ኻወርየታኒዙ ሰቭ 7
7
ፈወነ 7
እስጢፋነውስ ሸጐዊል ኣቕ ዊግተው ዊገድ
1ካኽነጣነ ኻልቀድም እስጢፋነውስት፦ «እን ኪስሽትረው ዊገድ እማንመ?» የው ዋቕሩ። 2እስጢፋነውስም እንት የው ዊሱ፦ «ይፅንዝመ ይኣቅልዝ ክታችወ! ይናኣይር ኣቭርኻም ካራን ትጐ ተረነዊስ በውገ ገነ መስበጠውምየ ፅባ ክቭርዙ ኣምላክ እደረ ጝጭስ እትል፦ 3‹ክኻግሪስ ፍር፣ ክዊግኒስም ቲትር፣ ያን ቓሊሰው ዝቨይዝጐ ፊጥ› ዩ።#ዘፍ. 12፡1። 4ጘጝም ከላውዲወንት ዝቨይስ ፍ ካራን ጐዩ፤ እግረም ጚር ክረት ግረ እደረ ቃው ነን ክትን ፅብርነው እን ኻግሪል ነሱ።#ዘፍ. 11፡31፤ 12፡4። 5ኣቕሽም ጝጊስ ላይ ፃብት ኵተ ዝቨትም ይዊየው፤ ዊገድ ግን ጘጝ ውርቅ ዅር እዅሪጝቀ ጝለ ፅባ፣ ጚ ዝቨየንት ጝጭስ፣ ጝዝግረም ጝዚረይዝ እርስት ፃቭ ይውጠ ቃል ጥዉ።#ዘፍ. 12፡7፤ 13፡15፤ 15፡18፤ 17፡8። 6እደረም እንደ ገነ እነይ ዊግቱ፦ ‹ክዚረድ ቀብራ ኻግርል ስድትኝጥ ኣቕጝ ፅብጥቍ፤ ሲዘ ላ ምትም ተሰቃይሽጛ በርነይዝ ቅምሽጥቍ።#ዘፍ. 15፡13-14። 7ኣነጚ እድየን በርነይዝ ቅመው ኽዝቭድየንት ቕፃርዝ ፊርድጭር፤ ጝዝግረ ጝጊስ ፍጝ እን ኻግሪል ኣቕጝ ይት ኣምልክጥቍ› ዩ።#ዘፀ. 3፡12። 8እንዝ ግረ ግዝርትዙ ኪዳን ይዉ፤ ኣቭርኻምም ይሳቅት እዅሩ፤ ሰውጠትረ ግርየይዝም ጊርዙ፤ እኒዝጘም ይሳቅ ያይቈቭት፣ ያይቈቭም ፅጭ ሊጘ ነገዲዝ ኣቅል ጝቝርድዛት ጊርዝ።#ዘፍ. 17፡10-14፤ 21፡2-4፤ 25፡26፤ 29፡31-35፤ 18።
9«ያይቈቭት ቝር ይናኣቅልድም ጝታዝን ዮሴፍትል ቀንይጝ ግቭፅ ኻግሪል በርነይዝ ቅይጝ በርስ፤ እደረ ግን ጝጅቅ ዊኑ።#ዘፍ. 37፡11፤28፤ 39፡2፤ 21። 10ጝሚከረይስቅም ፊሱ፣ ግቭፅት ንጕስ ፈርወንት በዊልም መጐስዝመ ጥቨቭዝ ይዉ፤ ፈርወንም ግቭፅ ኻግሪል ጝጝኒዝቅ ኻልቀ ፃቭ ይሙ።#ዘፍ. 41፡39-41። 11ኣይንት ኰሪዝም ግቭፅስመ ከናንት ኻግራኒልቅ ኽየው ኰር ግርየ ተሩ፤ ይናኣቅልድም ዀነው ብጝ ቺግርሽ።#ዘፍ. 42፡1-2። 12ያይቈቭም ግቭፅስ ኣር ችጝሽጘኵ የነው ጂጘ ወሻንድ ይናኣቅል ጝቝርት ሊን ግቭፅ ኻግሪል እፃቕ በርሱ። 13ሊጘት ፊርጛንድ ቈሽ ዮሴፍ ጝቕምት ጝፅንስ ኣርቕሱ፤ ፈርወንም ዮሴፍት ዊግንድዛት ኣርቑ።#ዘፍ. 45፡1፤16። 14እንዝ ግረ ዮሴፍ ጚር ያይቈቭስመ ላጝጥርጝን ኣኰ ኣቐቍ ጝበተሰቭድቅ ጭጝስ ግቭፅ ኻግሪል ነሱ።#ዘፍ. 45፡9-10፤17-18፤ 46፡27። 15ያይቈቭም ግቭፅ ትጐ ጊሙ፤ ጘጝም፣ ይናኣቅልድም ጝግል ክር።#ዘፍ. 46፡1-7፤ 49፡33። 16ጝታእርሸድም ሰክየም ፊስጝ ኣቭርኻም ኢሙርት ቝሪስ ጝቍርሻንዝ ጅቨው መቃቭሪል ዲቭ።#ዘፍ. 23፡3-16፤ 33፡19፤ 50፡7-13፤ እያ. 24፡32።
17«እደረ ኣቭርኻምስ ጥወው ቃል ኪዳንድ ፋፅምሸው ግርየድ ችጝጠ ጓንድ፣ ግቭፅ ዊነው ይናኽዝቭድ እቀጘ ንቕፃ ፊሩ። 18እንዝ ግረ ዮሴፍት ኣርቓው ላየ ንጕስ ግቭፅትል ኒግሱ።#ዘፀ. 1፡7-8። 19ጘጝም ይናዊግኒል ተኰልዝ ጕ እዅርሸቍ ኽፃናታድዛትቅ ክርጥጘ ማጥን ቢዘይል ፊስጛ ማልጥጘ ይናኣቅልድዛት ኣስገድድዙ።#ዘፀ. 1፡10-11፤22። 20ኣይንድም ሙሴ እዅርሹ፤ ጘጝም እደረት በዊል ዲስ ሸው ኽፃን ዊኑ፤ ጚርት ጝኒል ሻቘ ርፍ ሊግዙ።#ዘፀ. 2፡2። 21ቢዘ ማልሽታንድም ፈርወንት ቝረ ችጝር ጝርዅር ፃቭር ሊጊስች።#ዘፀ. 2፡3-10። 22ሙሴም ግቭፅት ጥቨቭድቅ ክንዱ፤ ጝዊገይዝም ጝሰቪዝም በርታቑ።
23«ጝእድሚድ ኣርቨ ምት ኣቓንድም ጝፅን እስራየላንድዛት ገቭስጠ በኑ።#ዘፀ. 2፡11-15። 24እንዝ ግረ ላው ግቭፅቱ እጅር ጝዊግኒስ ላውድ ጣዛንድ ቓል፣ ቢድልሸው ጝዝኒዝ ከቭ እድ ግቭፅቱ እጅርድየንት ቍዉ። 25ሙሴም፦ ‹እደረ ይግዝ ፃቭ ጛት ፊስጠጘድ ይፅን ልብትጥቍ› የው ኻስቫ ዊኑ፤ ጛይ ግን ልብቲየቍም። 26ጝኣምርሲዝ ቈሽ ሊጘ እስራየላን ጛስ ጛይ ጐርትጛንድ ችጙ፤ ጛትም ኣርቅስጠ በን፦ ‹እፈ እቅ ክታትርነ ውረ ክትንሰ ዚን ኣይርነቅቀ እደስለ ውረ ክታስ ክታይ ጐርትርና?› ዩ። 27ጛጊስም ጝዝንድየንትት ድድባ ዊነው ላውድ ሙሴት፦ ‹እግልፈ! ክት ውር ድውሱ? ክት ይናዲጊል ፊርደተ ደጘ ፃቭ ይመውድ ኣው የጝ? 28ዊንስ ታትነ ግቭፅቱ እጅርድየንት ቁረጘ ይትም ቁተ በንርመ?› የው ትክቩ። 29ሙሴም እኒን ዊገድ ወሸጘ ሰይ ምድያም ኻግሪል ስድትኘ ኣቕ ጐዩ፤ ጝጊስም ሊጘ ዅል እዅሩ።#ዘፀ. 18፡3-4።
30«ጝግል ኣርቨ ምት ፅበት ግረም ሲነት ኣበይዙ በራኸይስ እደረት መላክ ልየዝ ኻውየው ቍጥቋጠይል ኣቕ ሙሴስ እትሉ። 31ሙሴም እኒንት ቓላንድ ጊርምሽ እን እትለውድየንት ቐናዝ ሚርምርጠ ኣልት ያንድ እደረት ድመድየን፦ 32‹ያን ክኣቅልዝ ኣምላክ ኣቭርኻምት ኣምላክ፣ ይሳቅት ኣምላክ፣ ያይቈቭት ኣምላክ የጝ› ዩ። ሙሴም ጐውትዝ ቀጥቀጥ ዩ፤ ትክ ይን ቓለነው ድፍርትም ችጚየውም። 33እደረም፦ ‹ክፃብጣንድ ጭውዝ፤ ክት ችብትረይ ስፍረየን ቀድስሽትረይ ዝቨ ጚ። 34ግቭፅ ፅበው ይኽዝቪዙ ሚከረድ እርግጥዝ ቓልኩን፤ ጝታጭጝቅቲዙ ሊዝድም ወጭኩን፤ ኣቓንስቅም ጛት ቓዝጨ ጊምኩን፤ ነንም ለው! ያን ክት ግቭፅ እፃጨ የጝ› ዩ።#ዘፀ. 2፡14።
35«‹ይናዲጊል ፊርደተ ደጘ ፃቭ ክት ይመውድ ኣው የጝ?› ይጝ ኻዲጘው እኒን ሙሴት፣ እደረ ቍጥቋጠይል ኣቕ እስለው መላኪዝ ኣመካይነትዝ ታድገው ደጘ ፃቭ ጝታጐ እፃቑ። 36ጘጝም ጛት ግቭፅስ ፊሱ፣ ግቭፅስ፣ እርትራት ባኽሪስመ ኽልም የው በራኸይስቅ ጊርምሰቍ ዊቅዝመ ታምርዝቍ ምልክታንዝ ፃቫ ኣርቨ ምት ቃዉ።#ዘፀ. 7፡5፤ 14፡21፤ ዘዅ. 14፡33። 37እስራየልት ኽዝቪዝም፦ ‹እደረ ይት ተከው ነቭይ ክታማኽሊስ ጕይስጡ› የው ዊግተውድ እኒን ሙሴ የጝ።#ዘዳ. 8፡15፤18። 38እን እጅርድ ሲነት ኣበይስ ዊግተው መላኪጅቅ፣ ይናኣቅሊጅቅም ኣቕ ኽልም የው በራኸይል ኣኽቭሽ ዊነው ኽዝቪጅቅ ዊነውድ የጝ፤ ርዅየዝቍ ቃላንድዛት እደረቲስ ለምር ይናጭስ ነየውድም እኒን ጝቕም የጝ።#ዘፀ. 19፡1-20፤ 17፤ ዘዳ. 5፡1-33።
39«ይናኣቅልድ ግን ጝት ተቃውምሽጚ ጝጭስ ኣዚቲየቍም፤ ጝታእዘኒዝም ግቭፅ ትጐ ዋጥር። 40ኣረውንትልም ፊርጝ፦ ‹ይናበው በዊል ፃጘቍ ኣምላካን ተሽ፤ ግቭፅስ ቃው ፊሰው እድየን ሙሴድ ውር ኣቐጘ ኣርቓይነቅም› ይ።#ዘፀ. 32፡1። 41ኣይንድም ኒውዙ ምስል ጣወት ተስጝ ምስዋይት ኣልስ፤ ጝታናኒዙ ሰቪዝም ዲስ ይ።#ዘፀ. 32፡2-6። 42እደረ ግን ጛጊስ ቲቱ፤ ሲመይት ሰራዊተንድዛትም ኣምልክጥጘ ማጥን ዲቍስ ይዉ፤ እንም ነቭያታኒዙ መፃፊዝ፦
‹እፈ እስራየልት ኽዝቭ ክታትርነ!
ኣርቨ ምት ኽልም የው በራኸይል ዊንድርናንድ፣
ይጭስ ምስዋይትዝመ ሚቨዝ ኣልስርኑመ?
43ኽሽስ ኣምልክትርነ ሰራሽርነቍ መለኵት ድⶖኳንዝመ
«ረፈም» ይሽተው ክታጣወት ፅግለወይዝ ምስልድየንት ንየስ ንየስ ሽርኑ፤
ኣቓንስቅም ያን ቈሽ እለ ባቢሎንቲስ እድጐ መራሽርን ሲድሽትርነ ፃቭጭር›
ይሽት ፃፍሽ ዊነጘ የጝ።#ኣመፅ. 5፡25-27።
44«እደረ ሙሴስ ቓሊሰው ምስሊዝ ሚስርትዝ ተሲትረይ ሚዝርዝወ ድⶖኳን ይናኣቅሊጅቅ በራኸይል ዊንች።#ዘፀ. 25፡9፤ 40። 45ይናኣቅልድም እኝቸን ድⶖኳንሸንት ለምርጘት ግረ፣ እደረ እየሱት ቃወትነይዝ ኣኽዛቫኒዝ ኻግራንድዛት ጛጭስ ዊርሳንድ ፃይጝ ጥው፤ ዳዊትት ዚምኒል ኣሽም ጝግል ፅብች።#እያ. 3፡14-17። 46ዳዊትም እደረት በዊል መጐስ ችጛንስቅ ያይቈቭት ኣምላክት ጨነ ጝን ተስጠ በን እደረት ጨዉ።#2ሳሙ. 7፡1-16፤ 1ዚመ. 17፡1-14። 47ዊገድ ግን እደረት ጨነ ጝን ተሰውድ ሰለሙን የጝ።#1ነገ. 6፡1-38፤ 2ዚመ. 3፡1-17። 48ኣነጚ እጝቅት ንየቱ እደረ እቀ ናንዝ ተሲተው ጝንል ፅባውም። 49እንም ነቭይ፦
‹ሲመይ ይዙፋን የጝ፤
ዝቨም ይልኲዝ ደደነ ጚ፤
እደስለ ኣወየው ጝን የጝ ይጭስ ተስርነውድ?
ዊንስ ይጭስ ፈወነ ኣቐው ስፍረድ ኣውየን የጝ? የኵ ኣደረ። #እሳ. 66፡1-2።
50እኒንትቅ ተስረይሸን ይናንሸን ኣይረይቀ?›
የው ዊግተጘ የጝ።
51«እፈ ክታእዘንድ ዲፍንሸው፣ ክታቀርዝድም ወሻው ቕልመ ዲንድነቍ ክታትርነ! ክትንም ክታኣቅልታጘ መንፈስ ቅዱስት ዊትርቅ ተቃውምሽርነኵ።#እሳ. 63፡10። 52ነቭያታኒስ ክታኣቅልድ ጅግዚጘውድ ኣው የጝ? ፃድቂዙ ተረነድየንት በውግስጝ ዊግተቍድዛት ቍዉ፤ ነን ቈሽ ክትን ጝት ዲቍስርን ይውርን ቍውርኑ። 53መላካኒዝ ኣመካይነትዝ ወሪትት ኽግ ክታጭስ ነይሽታንም፣ ለምትርኑጚ ፋፅሚርነቅም።»
እስጢፋነውስት ቕርጘዝ ድድብጝ ቁጘጘ
54ሸጐዊዙ ኣኸቨይል ዊነቍድም እኒንት ወሽጛንድ ጭቕጘ ኻልክሽ፤ ጝታእርቍጣንድዛትም ገጫዝ። 55እስጢፋነውስ ግን መንፈስ ቅዱስዝ እቻቕ ሲመይ ትጐ ትክ የው ቓላንድ እደረት ክቭርድየንት ቓሉ፤ እየሱስትም እደረት ለዊል ችብር ቓሉ። 56እንዝ ማጥን፦ «እንወ ሲመይ ቢት እጅር ዅርም እደረት ለዊል ችብር ቓለኵን!» ዩ። 57ኣይንድም ጝታድመድ ኣጕስ ሽጝ ቓፅጛ ጝታቀርዝጣንድ ዲቭጝ ላው ኣቕጝ ጘጝ ፅበዊዝጐ ውጢጛ ፊር። 58ኻትመይስ ቢዘ ፊስጝም ዲጕጥዝ ድድብጥጘ ኪርም፤ ጝግል ዊነቍ ሚዝረጫንም ጝታኣልብድዛት ሊሚድጠ ማጥን ሳውል የነው ውርጋጠዝ ልኲል እቝር። 59እስጢፋነውስም ዲጕጢዝ ድድብሻ ሲጝቀ፦ «ኣደረ እየሱስወ! ይኒፍስሸንት ለምጫ!» ያ ፃልዩ። 60ኣይንድም ግርቨቭሽ ጝድመድ ኣጕስ ሸው ኣደረወ! እኒን ጝታኽጥያትድየንት እግዝተ! የው ዊግቱ፤ እኒንት የው ዊግተጘም በውዝ ክሩ፤ ሳውልም እስጢፋነውስት ክርጘይዝ ቲስመም ዊኑ።
Kasalukuyang Napili:
ኻወርየታኒዙ ሰቭ 7: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in