ኻወርየታኒዙ ሰቭ 24
24
ፈወነ 24
ኣይዅዳንድ ባውሎስት ኪስጘጘ
1ኣኰ ግርቅ ኣቐት ግረ ካኽነጣነ ኻልቀ ኻናንየ ላው ላው ሽመቅልዝመ ጠርጠሉስ የነው ጠቨቀዝ ጅቅ ኣቕ ባውሎስት ኪስጠ ቂሳርየ ጊሙ፤ ባውሎስት ኪስጘው ዊገድየንትም ኻግር ቅመተ ፊልክስስ ኣልስ። 2ባውሎስም ጭጝሽ ኣልታንድ ጠርጠሉስ እንት ያ ኪስጠ ኪርሙ፦ «ኪብርደር ፊልክስወ! ክዚምኒዝ ኽየው ዲግተ ችጝንኵኑን፤ ከቀሰው ጭሰጭሰነይዝም ይናኽዝቭድ ተሻሽልሽኩ። 3ግሪ ጭቨቅ እን ቀሰው ክውልየተድየንት ችጝነው ስፍረይዝቅ ኽየው ሚዝየነዝ ለምርነኵን። 4ዊገድ ግን ጭቕጘ ሲለሲጝቀ እጅጝዝ ዊግጠው ዊገድየንት ክቀስነይዝ ወሽተ ማጥን ጨወኵን።
5«እን እጅርድ ኣልሚል ፅበቍ ኣይዅዳኒዝቅ ፅውዘ ኣቕ ኽምዘ ጕይሳ፣ ቈሽም ናዝራን የነቍ መናፍቃኒዝ ኻልቀ ኣቕ ችጝሽኩ። 6መቅደስ ጝንድየንትም ኣርክስጠ ሚኵራንድ ችጝን ፃይኑን፤ ይናኽጊዝጘም ፊርድነ በንን ዊኑን። 7ዊተድሪዝ ኣዘተ ሉሲወስ ተር ኽየው ኻይልዝ ይናናኒስ ቀም ፊሱ፤ ጝት ኪሰቍድዛትም ክጐ ተርጥጘ ማጥን ኣዙ። 8ነስየ ክት ክቕም ሚርምርድር ጝት ኪስነው ዊገድቅ እማን ኣቐጘ ኣርቕትር» ዩ። 9ኣይዅዳንድም፦ «እን ዊገድየን እማን የጝ» ይጛ ክሲዝ ቲስመም።
10ኻግር ቅመተ ፊልክስም ባውሎስት ዊግትጠ ማጥን ጝናኒዝ ጣቅሳንድ ባውሎስ እንት የው ዊሱ፦ «እክሰው ኽየው ዝምኒስ ኪርምር እን ኻግሪዝ ቅመተ ኣረጘ ኣርቐኵን፤ ኣቓንስቅም ዲስተዝ የጝ ይተከላክልሸነድ ክበዊል ኣልሰውድ። 11ሲግጨ እየሩሳልየም ፈት ፅጭ ሊጘ ግርቂስ ዲቋውም፤ እኒንትም ክቕም ደደደድስተ ቸልትር። 12ይት ኪሰቍድዛይ መቅደስ ጝኒስ ኣውጅቅቅ ተከራክርጫንድ፣ ምኵራቪስም ኣነ ኻትመይስ ኣውማው ስፍረይስቅ ኽዝቭ ጒሰጒሳንድ ችጚየቍም። 13ነን ይት ኪስጘዊዝቅ ክጭስ ማስረጀ ኣልሰነው ቸላቍም። 14ዊገድ ግን ጛይ መናፍቅነይ ይጘው ኣደረት ጒደነይዝ ይኣቅልዝ ኣምላክ እደረት ኣምልከኵን፤ ወሪትት ኽግዝመ ነቭያታነ መፃፋኒዝ ፃፍሸውድም እጝቅትቅ ኣምነኵን። 15ጛይ ቲስፈ ፃቭጛንትጘ ያንም ፃድቃኒዝመ ኽጥያትኝጢዝ ክርጘይስ ጕጥጘጘ እደረቲስ ቲስፈ ፃቀር የጝ። 16እንዝ ማጥን እደረስመ እጅርዝ በዊልቅ ንፅዅ ኽሊነ ፃቀር ኣጨ ልቕርጠኵን።
17«እየሩሳልየምስ ፊጠት እክሰው ዚምን ዲቈት ግረ ይዊግን ድኺዝ ይወነው እርዳተዝመ ሚቨዝ ፃቅ እየሩሳልየም ተጡን። 18መቅደስ ጝኒስም ዊር የነዊዝ ስረትድ ፋፅም እኒንት ፃቫ የጝ ጛይ ይት ችጘውድ፤ ኣይንድ ኽዝቭ ይጅቅ ኣኽቭሺየውም፤ ኽምዘም ጕይሺየውም።#ኻወ. 21፡17-28። 19ዊገድ ግን እስየስ ተረቍ ላው ላው ኣይዅዳን እኵ፤ ጛይ ይት ኪሰነው ዊገ ፃይጝ ፅብጝሽ ጝታዊገድ ክበዊል ኣልሰነው ቸልጘኵ። 20ዊንም እንል ፅበቍድ ሸጐዊል ኣልጣንድ ይጊስ ችጘው በደል ፅብሽ ነን ዊግትጝነ። 21እርግጥ ኣይንድ ይቃልድ ኣጕስ ሸር፦ ‹ክርጘይስ ጐነ የር ዊግጡዝ ንጭ ፊርድጥጘ ክታበዊል ችብጥኩን› የር ቓፅ ዊግጥኩን፤ እንዝለ ግን ላየ ፃቨው ዊገ እጀውም።»#ኻወ. 23፡6።
22ፊልክስ ግን ኣደረት ጒደነድ ዳኽነ ፃቭ ኣርቕ ዊናንስቅ፦ «ዊተድሪዝ ኣዘተ ሉሲወስ ተራንድ ክታዊገይዝ ውሳኒ ይውጭር» የው መለዝ ሲነቭሱ። 23ጝት ሊሚደው ላዝ ኻልቀድየንትም፦ «ባውሎስት እቀጘ ኻርነይ ኪልክሊጝቀ ሊምጭ፤ ጝወደጃንድም ጥውጛ ዋቕርጛንድ ኪልክልተ» ዩ።
24ዊትቍ ግርቅ ዲቍጘት ግረ ፊልክስ ድሩሲለ የነይ ኣይዅዳንወ ጝውነየንጅቅ ኣቕ ተሩ፤ ባውሎስትም ወኽኒ ጝኒስ ጭጝስ እየሱስ ክርስቶስት ኣምነነዊዝቍዝ ዊግታንድ ወሹ። 25ፊልክስም ባውሎስ ፅድቅዝቍዝመ ጛቕምት ቅመነውዝቍዝ፣ ተረው ፍርዲዝቍዝም ዊግታንድ ጐውት፦ «ነንትውድ ኣጥጘች፤ ሚቻንድ ላየ ግርየዝ ጭጝስጭር» የው ዊስ በርሱ። 26ፊልክስም ባውሎስ ጕበው ነይጡ የው ቲስፈ ፃቫንስቅ ንቕፀቍ ግርቅ ጭጝሳ ዊግሳ ዊኑ።
27ሊጘ ምት ኣቐት ግረ በርቅዮስ ፊስጠውስ ፊልክስት ልኲል ቲኪሹ፤ ፊልክስም ኣይዅዳንድ ዲስ ሽጠ በን ባውሎስት እፁሸጘ በሩ።
Kasalukuyang Napili:
ኻወርየታኒዙ ሰቭ 24: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in