ኻወርየታኒዙ ሰቭ 25
25
ፈወነ 25
ባውሎስ ፊስጠውስት በዊል ኣልተጘ
1ፊስጠውስም ጝቅምቲል ጥው ሻቘ ግርቅ ሳብጠት ግረ፣ ቂሳርየስ ጕ እየሩሳልየም ፊሩ። 2ካኽነጣነ ኻልቅጢዝመ ኣይዅዳኒዝ ሽመቅልድም ፊስጠውስትል ኣልትጝ ባውሎስት ኪስ። 3ጛጭስም ኣድልው ባውሎስት እየሩሳልየም ነስጠ ማጥን ኪው ሽጝ ጨው፤ እንት ይጘውድም ጒደነይል ጭቭርጝ ባውሎስት ቁጥጘ በንጝ የጝ። 4ፊስጠውስ ግን፦ «ባውሎስ ቂሳርየ ወኽኒ ጝንል እፁሽ የጝ ፅበውድ፤ ያንም ነን ቃዝየዝ ዋጥር ፊጨ የጝ። 5እንዝ ማጥን ክታስልጣን ጕይጥድ ይጅቅ ቂሳርየ ተርጝ ባውሎስ ቢድለው በደል ፅብሽ ጝጊስ ኪስጝነ» የው ዊሱ።
6ፊስጠውስም ሰውጠ ዊንም ፅቃ ኣጥጘ ግርቅ ጛጅቅ ሳብጠት ግረ ቂሳርየ ጊሙ፤ ጛምርሲዝም ችለውትል ጐይ፦ «ባውሎስት ነስጥን» የው ኣዙ። 7ባውሎስም ኣልታንድ እየሩሳልየምስ ተረቍ ኣይዅዳንድ ጝት ኪብጝ ችብርጝ ማስረጀ ችጛይጘቍ ንቕፀቍ ኻይልቍ ክሳን ኣልስ። 8ባውሎስም፦ «ያን ኣይዅዳኒዝ ኽግድም ኣነ መቅደስ ጝንድ ዊንም ቂሳርት ቢድለው በደልም እጀር» የው ጝተከላክልሸነድ ኣልሱ። 9ፊስጠውስ ግን ኣይዅዳንድ ዲስ ሽጠ በን ባውሎስት፦ «እን ዊገድየንት እየሩሳልየም ፊትር ይበዊል ተፋርድሽተ በንረኵመ?» ዩ። 10ባውሎስ ግን፦ «ተፋርድጨ ጥውሸው ቂሳርት ፍርድ ወምበሪዝ በዊል ችብጥኩን፤ ክት ክቕምም ኣርቕራንትጘ ኣይዅዳንድዛት ውርም ቢድሊቀር። 11በደለኘ ኣቕሽ፣ ዊንም ክርጘል ችጝዘው ጭቓ ዊገ ሰራጭ ፅብሽ፣ ክጠቅምም የቅ፤ ጛይ ይት ኪስጘው ክስድ ጊነ ኣቐውዝየ ግን ኣውማውቅ ይት ጛጭስ ዲቍስ ይውጠ ቸላውም፤ ቂሳርትል ይግቫኝ የርኩን» ዩ። 12ኣይንድም ፊስጠውስ ጝማኽረቲጅቅ ማኽርሽ በር፦ «ፈር ቂሳርትል ይግቫኝ ይረውዝየ ፊርትር» ዩ።
ባውሎስ ኣግሪባት በዊል ኣልተጘ
13ዊትቍ ግርቅዝ ግረ ንጕስ ኣግሪባስመ በርነቂስስ ፊስጠውስት ወዝ ዳኽነ ተትረት ይጥጘ ቂሳርየ ተር። 14ጝግልም ንቕፀቍ ግርቅ ሳብጥ፤ ፊስጠውስም ባውሎስት ዊገድ ጒ ኣግሪባስ እንት የው ድቁ፦ «ፊልክስ እፁ በረው ላው እጅር እንል እኩ። 15ያን እየሩሳልየም ፊጥ ዊናንድ ካኽነጣነ ኻልቅጢዝመ ኣይዅዳነ ሽመቅሊዝ እን እጅርድየንት ኪስጘዊዝ ዊገድ ጕይ ጝት ፊርድጨ ማጥን ጭቕጘ ኪው ሽጝ ጨው። 16ያን ግን፦ ‹ኪስሽተው እጅር ጝት ኪሰቊዝ በዊል ጅቭር ጝኪስሽተው ዊገይዝ ተከላክልሸነ ይዊጝቀ ዲቍስን ይወነው ረውማነ ስረትም ኣየው› የር ዊሱን። 17እንዝ ማጥን ኪሰጥድ እንል ተርጛንድ ያንም ደዪጝቀ ጛምርሲዝ ችለውትል ጐይ፦ ‹እድ እጅርድየንት ነስጥን› የር ኣዙን። 18ኪሰጥድ ግን ጝጋቢል ችብርጝ ዊግትጛንድ ያን ኣጡ የር ጊምት ዊነዊዝ ቝጠ ክስል ችጝዘው ዊገም ነሲየቍ። 19ዊገድ ግን በገዘ ጝታኻይማነውትዝመ ባውሎስ ጕኩ የው እየሱስ ይሽተው ክረው እጅሪዝቍዝ የጝ ተከራክርሽጛ ዊንጘውድ። 20ያንም እን ዊገድየንት ኣወሽ ሚርምርጨጘድ ቺግርጫንስቅ ባውሎስት፦ ‹እየሩሳልየም ፊትር እን ዊገድ ጝግል ኣቕር ተከራክርሽተ በንረኵመ?› የር ዋቕሩን። 21ጘጝ ግን ጝዊገድ ቂሳርስ ቓሊስጠ በን ይግቫኝ ያንስቅ ቂሳር ትጐ በርስጪስቅ ወኽኒ ጝኒል ዊንጠ ማጥን ኣዙን።» 22ኣግሪባም ፊስጠውስት፦ «ያንምቃል እድ እጅርድ ዊግታንድ ወጨ በና ዊኑን» ዩ፤ ፊስጠውስም፦ «ኣምር ወሽትር» ዩ።
23ጛምርሲዝም ኣግሪባስመ በርኒቅየስ ጝታምጝግስታነው ኣልቨድ ሲርጝ ዊተድር ኣዘቲዝመ ኻትመይዝቍ መኳንንታኒዝ ኣጅቭሽጝ ኽየው ግርማ መጐስዝ ፍርድ ጝኒል ጥው፤ ፊስጠውስም ባውሎስት ጭጝስ ነስሱ። 24እንት የውም ዊግቱ፦ «ንጕስ ኣግሪባወ! እንል ይናጅቅ ፅብርነቅ እቅድም እጝቅቅ! ነስየ ኣይዅዳንድ፦ ‹እን እጅርድ ርዅየዝ ፅብጠ ጥውሻውም› ይጛ ቓፅጛ እየሩሳልየምስም እኒስም ፊርድጨ ማጥን ዋቕርጘው እጅርድ እኒን ቓልድርነውድ የጝ። 25ያን ግን ክርጘዝ ቐፃሰው ውርም በደል ችጚቀር፤ ጘጝ ቂሳር ትጐ ይግቫኝ ያንስቅ ረውምየ ትጐ በርስጨ ዊስንኩን። 26ኣነጚ ጝማጥን ይኣደረ ቂሳርትል ፃፈነው ትክክልኘ ዊገ ችጚቀርም፤ ኣቓንስቅም ሚርምርሸት ግረ ፃፈነው ዊገ ችጝጨ በን ክታበዊል፣ እኒስ ዲቈም ንጕስ ኣግሪባወ! ክበዊል ኣልስኩን። 27ምላሰንድም እፁሸው እጅር ንየቱ ኣካልል በርሰናንድ ጘጝ ኪስሽተዊዙ ምላሰንድ ጋልፂነውዝየ ኻጝልት የጝ።»
Kasalukuyang Napili:
ኻወርየታኒዙ ሰቭ 25: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in