ኻወርየታኒዙ ሰቭ 18
18
ፈወነ 18
ባውሎስ ቈረንተውስ ኻትመይዝጐ ፊረጘ
1እንዝ ግረ ባውሎስ ኣቲነስ ጕ ቈረንተውስ ትጐ ፊሩ። 2ጝጊስም ኣቂለ የነው ባንጡስቱ ኣይዅዳነው ጅር ችጙ፤ ጘጝም ኣይዅዳንድቅ ረውምየት ሊቅጥጘ ማጥን ቂሳር ቀላውዲወስ ኣዝ ዊናንስቅ ጝውነ ብርስቅለ ጅቅ ጣቅ ግርቅዝ ጣልየንስ ተረው እጅር ዊኑ፤ ባውሎስም ጝታጐ ፊር ዲምቅሹ። 3ጝሰቭድም ጝታጘ ድኳን ሳቐነው ዊናንስቅ ጛጅቅ ጐይ ላው ኣቕጝ ሰራሽጛ ዊን። 4ቅዳምሲንቭት ጨቨቅም ምኵራቪል ጥዋ ኣይዅዳኒዝመ ግሪካኒዝ ኣስርድዛ ዊግታ ዊኑ።
5ሲላስስመ ጢመቲወስስ መቀደውንየስ ተርጛንድም ባውሎስ እደረት ቃልድ ክንሰነውዝ ቲግያ፦ «እየሱስ ጘጝ ክርስቶስ የጝ» ያ ኣይዅዳኒዝ ሚዝርዳ ዊኑ። 6ዊገድ ግን ኣይዅዳንድ ተቃውምሽጝ ዛሽጛ እምቢ ይጛንድ ጝኣልቨይዙ ኣወረድየንት ኣርግፍ፦ «ነስየ እደረ ፊርዲሽ ክታቕምስ ወሱ! ያን ክታብሪስ ንፅዅ የጝ! ነስየ ኣኽዛቫኒዝጐ ፊጭር» ዩ። 7ጝጊስም ፍ ቲተውስ እየስጡስ ይሽተው እደረት ኣምልከው እጅርዝ ጝንል ፊሩ፤ ጘጝ እጅሪዝ ጝንድ ምኵራቭዝ ጋቢል ዊኑ። 8ቀርስበስ ይሽተው ምኵራቪዝ ኻልቀ እጅርድም ጝበተሰቪጅቅ ኣደረት ኣምኑ፤ ንቕፀቍ ቈረንተውስት እቅም ባውሎስ ዊግታንድ ወሽጝ ኣምንጝ ጣምቅሽ። 9ኣደረም ባውሎስት ኻር እትለዝ ጋልፅሽት እንት ዩ፦ «ኣይዝዀች ጐውተ! ዊግጭ ዝም ይተ። 10ያን ክጅቅ እኩን፤ ኣውማውም ክግል ጕ ቘጨ ችጝዝጠ ቸለው እጅር እጀውም፤ እኝቸን ኻትመየንትል ንቕፀቍ እቅ ፃቀር የጝ» ዩ። 11እንዝ ማጥን ባውሎስ እደረት ቃልድ ክንሳ ጛጅቅ ላው ኣምረዝመ ግቨርዝ ጝግል ጐዩ።
12ጋሊወስ ኣካይየስ ኻግር ቅመተ ኣቕ ይምሻንድ፣ ኣይዅዳንድ ላብጠ ተቫቭርሽጝ ባውሎስትል ጕ፤ ጝትም ፍርድ ሸጐዊል ፊስጝ ችብስጝ፦ 13«እን እጅርድ ኽግድ ፊቅዳው ጒደነዝ እቅ እደረት እምልክጥጘ ማጥን ቀሰኵ» ይ። 14ባውሎስም ዊግትጠ ኣስልሽ ፅባ ጋሊወስ ኣይዅዳኒዝ እንት ዩ፦ «እፈ ኣይዅዳን ክታትርነ! ኣልስርነው ክስድ ኣመፅ ዊንም ኽየው ወኝጀል ኣቓን ወጨ ዊኑን። 15ዊገድ ግን ክታክርክርድ ቃላንዝመ ሽንዝ ቈሽም ክታኽግዝ ማጥን ኣቐውዝየ ክታቕም ኣርቕጥን፤ ያን እነየው ዊገል ጥውን ፊርደነው በነቅም» ዩ። 16እንት የውም ጛት ፍርድ ሸጐዊስ ፊሱ። 17ኣይንድም እጝቅቅ ምኵራቪዝ ኻልቀ ሰስተንስት ፃይጝ ሸጐዊዝ በዊል ድድብ፤ እንቅ ኣቓንድ ጋሊወስ ግድም እጀው ዊኑ።
ባውሎስ ኣንፀውክየ ትጐ ዋጥረጘ
18ባውሎስም ጝፅኒጅቅ ኣቕ ንቕፀቍ ግርቅ ቈረንተውስ ሳብጠት ግረ ጛት ሲነቭሽ ሚርክቭዝ ተሳፍርሽ ሰውርየ ትጐ ፊሩ፤ ኣቂለስመ ብርስቅለስም ጝጅቅ ፊር፤ ቈሽም ስለት ሲልሽ ዊናንስቅ ፊረነዊስ በውገ ክንክራወስ የነው ስፍረል ኣቕ ጝኣውርድ ላይቱ።#ዘዅ. 6፡18። 19እፊሰውን ችጛንድም ኣቂለስመ ብርስቅለስ ጝግል በሩ፤ ጘጝ ግን ምኵራቪል ጥው ኣኹደኒዝ ዊግታ ዊኑ። 20ጛይም እክሰው ግርየ ጛጅቅ ሳብጠ ማጥን ጨውጝ ዊን፤ ጘጝ ግን ኣነም ዪየው። 21ዊገድ ግን ጛት ሲነብሻንድ፦ «እደረት ፍቃድ ኣቕሽ ክታጐ ዋጥር ተጭር» ዩ፤ ጝዝለም ሚርክቭዝ ተሳፍርሽ እፊሰውንስ ፊሩ። 22ቂሳርየ ችጛንድም እየሩሳልየም ትጐ ክብዩ፤ ጝጊዝቍ ምመናንድዛትም ዲምቅሽ በር ኣንፀውክየ ጊሙ። 23ኣንፀውክየም ዊትቍ ግርቅ ሳብጥ በር ጝጊስ ጕ ገላትየታዝ፣ ፍርግየታዝ፣ ፃቭ ኻግርዝ ኻግር ጅሉልዋ ምመናንድዛት በርታዙ።
ኣብሉስ እፊሰውንስመ ቈረንተውስስ ክንስጠ ኪርመጘ
24ኣይንድ እስክንድርየስ እዅርሸው ኣብሉስ የነው ላው ኣይዅዳነው እጅር እፊሰውን ተሩ፤ ጘጝም ቅዱሳን መፃፋንድ ጣጝቅቅ ክንደው፣ ቈሽም ዊገ ኣርቐው እጅር ዊኑ። 25እን እጅርድ ኣደረት ጒደነድ ክንደው ዊኑ፤ መንፈስዝ ቃጥልሻ ኣደረ እየሱስት ማጥን ትክክልዝ ክንሳ ዊኑ፤ ኣነጚ ጘጝ ኣርቐውድ ይዃንስት ጥምቅትድየንት ጭቝ ዊኑ። 26ምኵራቪስም ዲፍር ዊግጥጠ ኪርሙ፤ ብርስቅለስመ ኣቂለስም ጝት ወሽጛንድ ጝታጝን ፊስጝ እደረት ጒደነድ በውገይስ ሽ ግልፅዝ ድቍ። 27ኣብሉስም ኣካይየ ፊርጠ በናንድ ምመናንድዛይ ጝኻሰቭድ ዲግፍ፤ ኣካይየት ምመናንድም ጝት ለምርጥጘ ማጥን ደብዳቢ ፃፍጝ ጝጭስ ይው፤ ኣካይየ ችጛንድም ኣደረት ፃገዝቍዝ ኣምንጝ ዊነቍድዛት ቐናዝ ከቭሱ። 28እየሱስ ጘጝ ክርስቶስ ኣቐጘ ቅዱሳን መፃፋንድዛት ጋልፃ ኣይዅዳንድዛት እቀ በዊል ፃቭ ተከራክርሻ ለጣቓ ዊኑ።
Kasalukuyang Napili:
ኻወርየታኒዙ ሰቭ 18: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in