ኻወርየታኒዙ ሰቭ 19
19
ፈወነ 19
ባውሎስ እፊሰውን ትጐ ፊረጘ
1ኣብሉስ ቈረንተውስ ዊነው ግርየይዝ ባውሎስ ንየቱ ኻግሪዝ ፃቭ እፊሰውን ተሩ፤ ጝጊስም ላው ላው ምመናን ችጝ፣ 2«ኣምንድርናንድ መንፈስ ቅዱስት ለምትርኑመ?» የው ዋቕሩ፤ ጛይም፦ «ለምሪነቅም፤ እንድያውም መንፈስ ቅዱስ ፅበጘ እኳ ወሺነቅም» ይ። 3ባውሎስም፦ «እደስለ ኣወየው ጥምቅትዝ ጣምቅሽርኑ?» ዩ፤ ጛይም፦ «ይዃንስት ጥምቅትዛ» ይ። 4ባውሎስም፦ «ይዃንስት ጥምቅትድሰ ንስኻ ጥወነውዙ ጥምቅት ኣቈ ዊነውድ፤ ጝቕም ይዃንስም እቅ ጝዝ ግረ ተረው እየሱስት ኣምንጥጘ ማጥን ዊግትኩ» ዩ።#ማቲ. 3፡11፤ ማር. 1፡4፤7-8፤ ሉቃ. 3፡4፤ 16፤ ይዃ. 1፡26-27። 5ጛይም እኒንት ወሽጛንድ ኣደረ እየሱስት ሽዝ ጣምቅሽ። 6ባውሎስም ጝናንጣንድ ጝታዲጊል እቝራንድ መንፈስ ቅዱስ ጛግል ጊሙ፤ ላጥ ቋቍጥዝም ዊግት፤ ትንቪትም ዊግት። 7እቅድም እጝቅቅ ፅጭ ሊጘ ኣጥጘ ዊን።
8ባውሎስም ምኵራቪል ጥዋ እደረት ምጝግስትዝ ማጥን ተከራክርሻ፣ ኣምንሳም ሻቘ ርፍ ምሉ ውርቅ ጐውቲጝቀ በውዝ በው ዊግታ ዊኑ። 9ላው ላውድ ግን ኽልክኝጥ ኣቕጝ ኣደረት ጒደነድ እቀ በዊል ሽክስጛ እምቢ ይጛንድ ጛጊስ እክልዱ፤ ምመናንድዛትም ጛጊስ ቲዝ ጢረውነ የነው ክንድጝ ጝኒዝ ኣደራሺል ፃቭ ግሪ ጨቨቅ ክንሳ ዊኑ። 10ባውሎስም ሊጘ ምት ኣጢስ እንት ሸው ክንሳ ዊኑ፤ ኣቓንስቅም እስየት ኣውራጀይዝቍ ኣይዅዳኒዝመ ግሪካን እቂዝቅ ኣደረት ቃልድየንት ወሽ።
11እደረም ባውሎስት ናኒዝ ጭቕጘ ዲንቅሰቍ ታምራን ፃቫ ዊኑ። 12እንዝ ማጥን ባውሎስት ሰውነትድ ዳቐው ፃርቀድ፣ ዊንም ምኻረምድ ፊስጝ ፅውዝ ጅንጥድዛት ዳቕስጛንድ ጝታፅውዘድ ሊቃ ዊኑ፤ ርኵሳን መንፈሳንድም ፍጛ ዊን። 13ጅልውጛ እቂስ ጋኒናን ፊስጛ ዊነቍ ላው ላው ኣይዅዳንም፦ «ባውሎስ ሲቭከው እየሱስት ሽዝ ፍርናንስ ኣዝነኵን» ይጛ ጋኒናኒዝ ፃይሸቍ እቂል ኣደረ እየሱስት ሽድ ጭጝጥጘ ሚኵር።
14ኣይዅዳኒዝ ካኽነጣነ ኻልቀ ኣቐው ኣስቂወት ላጝጠ ግልቍ ዅልድም እንት ሽጛ ዊን። 15ርኵስ መንፈስድየን ግን፦ «እየሱስት ኣርቐኵን፤ ባውሎስትም ኣርቐኵን፤ እረ ክትን ኣውታይ ጛያ?» ዩ። 16ርኵስ መንፈሲዝ ፃይሸው እጅርድየንም ጛት በጕር ኻንቑ፤ ጭቕጘም በርታቑ፤ ጛይም ኻቐነ ብጛንስቅ፣ ልኻንዝ ልኻን ኣቕጝ ጘጝ ጝኒስ መጥማጥ ሰይጝ ፊር። 17እን ዊገድም እፊሰውን ፅበቍ ኣይዅዳኒዝመ ግሪካንዝቅ ወይሽታንስቅ እጝቅቅ ጐውት፤ ኣደረ እየሱስት ሽድም ጭቕጘ ኪብሩ። 18ኣምንጝ ዊነቊስም ንቕፀቍ እቅ ተርጛ ጝታጭቓ ሰቭድ ነዚትጛ ግልፅዝ ዊግት። 19ንቕፀቍ ኣስማትኝጥም ጝታኣስማታነ መፃፋንድዛት ኣኽቭጝ ኽዝቪዝቅ በዊል ልየዝ ቃጥል፤ እን ቃጥልሸቍ መፃፋኒዝ ወየድም ቲምንሻንድ ኣኵርጝን ሽኽ ቍርሻን ኣቑ። 20እነየውዝም ኣደረት ቃልድ ፈራቓ፣ ኻቓም ፊሩ።
እፊሰውንስ ኽምዘ ጒሸጘ
21እንቅ ኣቐት ግረ፣ ባውሎስ መቀደውንየስመ ኣካይየስ ፃቭ ዲቍ እየሩሳልየም ፊርጠ ጝመንፈሲዝ ኻስቭ፦ «ጝግል ችጝ በጥ ረውምየት ቈሽ ቓልጨ» ዩ። 22እንዝ ማጥን ጝት ኣግልግለቍ እቂስ ሊጘድ ጢመቲወስስመ እርስጠንስ መቀደውንየ እፃቕ ጘጝ ጝቕም እስየ ዊትቍ ግርቅ ሳብጡ።
23ኣይንድም ክርስትነ ኻይማነውትዝቍዝ ኽየው ኽምዘ ጉ። 24ላው ድሚጥረውስ ይሽተው ኣንጥርኘ እጅር ኣርጠምስቱ መቅደስ ጝኒዙ ምስልድየንት ብረትዝ ተሳ ኣንጥርኝጢዝ ንቕፀቍ ትርፍ ችጝሳ ዊኑ። 25እን እጅርድ እንዛይ ኣንጥርኝጢዝመ እን ሰቪዝ ውላቐቍ ላጥ እቅድዛትም ኣኽቭ እንት ዩ፦ «እፈ እቅ ክታትርነ! ይን ኻቭት ችጝነውድ እን ሰቪዝ ኣቐጘ ክታቕም ኣርቕርነኵ። 26እን ባውሎስድ ቈሽ፦ ‹እቀ ናንዝ ተሲተቍ ቅርፃንድ ኣምላካንም ኣየቍ› ያ እፊሰውንት ጭቝ ኣዪጝቀ ምሉ እስየት ኣውራጀይዙ ኽዝቪስ ኽይጠድቅ ኣምንሳ ቀሰጘ ይኸው ቓልድርነዊዝመ ወሽርነዊዝ የጝ። 27እንዝ ኣይንትዝ ይናሰቪዝ ነቅሸነውድ ጭቝ ኣዪጝቀ እስየስመ ኣልሚዝ ኽዝቭድቅ እጝቅ ኣምልክጘይ ኽይረይ ኣምላክ ኣርጠምስት መቅደስ ጝንድ ወየ እጀው እዳጠ የጝ፤ ቈሽም ጭቕጘ ጊነው ጝርክቭሪስም ተዋርድሽች የነት የጝ።»
28እቅድም እኒንት ወሽጛንድ ጭቕጘ ቈጣሽጝ፦ «እፊሰውንትወ ኣርጠሚስ ኽይረይ ጚ» ይጛ ቓፀነው ኪርም። 29ኻትመድም ኽምዘዝ ዲቭልቅልቅሹ፤ ኽዝቭድም ኣቨረዝ ላው ኣቕ ጝእዅርሽንድ መቀደውንየቱ ኣቐው ጋይወስስመ ኣርስጥረኰስ ይሽተቍ ሊጘ ባውሎስት ፃምጥድዛት ጒዝጛ ኽዝቭ ኣኽቭሽ ዋርደ ቓለነ ስፍረይል ፊስ። 30ባውሎስም ኽዝቪዝጐ ፊር ጥውጠ በኑ፤ ምመናንድ ግን ፊራየጘ ኪልክል። 31እስየት ደጝጢስም ጝት ቀነቍ ላው ላውድዛይ፦ «ኣለቀይ ዋርደ ቓሊሰነ ስፍረይል ጥውር እትልደር!» ይጝ ባውሎስ ትጐ እፃ በርስ። 32ኣኸቨድም ጭቕጘ ኻሚታንስቅ እክሰው ኽዝቭድ ውር ማጥን ኣኽቭሸጘ እኳን ኣርቒየውም ዊኑ፤ ኣቓንስቅም ላውድ ላው ዊግታንድ እድየን ቈሽ ላየ ዊግታ ጝስመ ጝስ ኣልቅሻ ቓፃ ዊኑ። 33ኣይዅዳንድም እስክንድረውስት ኽዝቪዝ ማኽሊስ ትክቭጝ በዊዝጐ ፊስ፤ ኽዝቪዝ ማኽሊስም ላው ላውድ ቐናዝ ተከራክርሽጠ ማጥን ማኽር፤ ጘጝም ተከራክርሽጠ በን ኽዝቭድ ዝም ይጠ ማጥን ጝናኒዝ ሚርዩ። 34ዊገድ ግን እስክንድረውስ ኣይዅዳነው ኣቐጘ ኽዝቭድቅ ኣርቓንድ፦ «እፊሰውንትወ ኣርጠሚስ ኽይረይ ጚ» ያ እጝቅቅ ላው ኣቕ ሊጘ ሰት ኣጠ ቓፁ።
35ኻትሸነይዝም ኻትመይዙ ዋነ ፃፈተድ ኽዝቭድ ዝም ሸው እንት ዩ፦ «እፊሰውንት እቅ ክታችወ! ኽይረይ ኣርጠሚስት መቅደስ ጝኒዝመ ሲመይስ ጊመው ጝርምስሊዝ ልሚደተድ እፊሰውንት ኽዝቭድ ኣቐጘ ኣርቓው እጅርድ ኣው የጝ? 36እንዝ ማጥን እኒን ኻቅድ ኻድየው እጅር እጀው ኣቓንስቅ ዝም ይጥን፤ ደርተነውዝ ሚንትርነ ዊገ ፃቫይርነጘም ጣጝቅቅጭጥን። 37መቅደስ ጝኒዝ ንቭርት ዚርፊየቍ፣ ይናኣምላክትም ዛሺየቍ እንዛይ እቅድዛት ጊነዝ እንል ኣሽ ነስርንኵርኑ። 38ድሚጥረውስስመ ጝጅቅ ፅበቍ ኣንጥርኝጥድ ግን ፃይጘው ኣቪቱተ ፅብሽ ፍርድ ይወነቍ ግርቅ እኵ፤ ጛግዝ ኣልትጝ ኪሰነው ቸልጥቍ። 39እኒን ኣዪጝቀ ላየ ኣልስትርነ በንርነው ዊገ ፅብሽ ኽጋዊ ጒደነዝ ቓሊሽትጡ። 40ኣለዝየ ንጭ ኣቐው ዊገይዝ፦ ‹ኽምዘ ጕይስርንኵርኑ› ይሽትን ኪስሽታይነጘ ጐውሰኵ፦ ‹እኒን ኽምዘድ ውር ምላሰንዝ የጝ ጐውድ› ይሽትን ዋቕርሽናን ይውነው ትክክልኘ ዊሰ እጅነቅም» ዩ። 41እኒንትም ዊግት ኣኸቨድየንት ቢትኑ።
Kasalukuyang Napili:
ኻወርየታኒዙ ሰቭ 19: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in