ኻወርየታኒዙ ሰቭ 11
11
ፈወነ 11
ቢጥሮስ ኣኽዛቫነ ጝንጢል ጥወው ዊገይዝቍዝ ኣስርድዘጘ
1ኻወርየታኒዝመ ይዅዳ ኻግሪል ፅበቍ ምመናኒዝም፣ ኣኽዛቫንድ ቈሽ እደረት ቃልድ ለምርጘጘ ወሽ። 2እንዝ ማጥን ቢጥሮስ እየሩሳልየም ትጐ ፋንድ ጝታማኽሊስ ጊርዝሽተነውዝ ኣምነቍ እቅ ቢጥሮስት ኒቕፍጛ፦ 3«ክት ጊርሽቲየቍ ኣኽዛቫኒዝ ጝኒል ጥውር ጛጅቅ ዅርኵሩ» ይጝ ዊቅስ።
4ቢጥሮስ ግን ኣቐው ዊገድቅ በውረይስ ኪርም ቲረ ቲረዝ እንት ያ ኣስርድዘነው ኪርሙ። 5«ያን እዮቢ ኻትመይል ዊናንድ፣ ፃልያ ሲጝቀ ሚስጥጭ እትለ ቓሉን፤ ኽየው ገርደነ ኣልቨ ተከው እረቈ ሲዘት ማዘንዝ ፃይሽ ሲመይስ ጊመኵ። 6ያንም ጝት ትክ የር ቓላንድ ሲዘ ልኵጣንዝ ፃጘቍ እንሰስዝመ ኣረዊታንዝ፣ ቈሽም ዝቨዝቨ ዊትርሸቍ ፍጥርትዝመ ኪፍዝ ቢረቍ ዚልቅዝቅ ቓሉን። 7ኣይንድም ሲመይስ፦ ‹ቢጥሮስወ! ጕ ዝውራ ዃይ› የው ዊግታንድ ወጩን። 8ያንም፦ ‹ኣደረወ! ፃቨቅም፤ በርክሺየው፣ ዊንም ርኵስ ስየ ይመቸይል ችጝዝም ኣርቐቅ› ዩን። 9እድየን ድመድም፦ ‹እደረ በርከውድየንት ክት እርኵስ ይተ ጥውሻውም› የው ሲመይስ ዊሱ። 10እን ዊገድም ሸውን ደግምግምሹ፤ ጝዝለም እድየን ገርደነው ኣልቨ ተከው እረቈድ ሲመይ ትጐ ጥቅልሽ ፊሩ።
11ኣይንድም ቂሳርየስ ይጐ እፃሸቍ ሻቘ እቅ ተርጝ ያን ዊነው ጝኒል ችጝ። 12መንፈስ ቅዱስም ውርቅ ኣወላውሊጝቀ ጛጅቅ ፊጨ ማጥን ይጭስ ድቁ፤ እንዛይ ዋልጠ ይፅንድም ይጅቅ ዊን፤ ላብጠም ፊርን እድ ቈርነሊወስ ይጘው እጅሪዝ ጝኒል ጥውኑን። 13ጘጝም መላክ ጝጝን ኣቒል ችብር እትለጘ፦ ‹እዮቢ ትጐ እቅ እፃቕር ቢጥሮስ ይሽተው ስሙንት ጭጝሽ። 14ጘጝ ክስመ ክበተሰቪዝ ቓድትርኑ ጒደነድ ክታጭስ ድቍጡ› የው ድቈጘም ይናጭስ ድቁ። 15ያንም ዊግተነው ኪርመጘ መንፈስ ቅዱስ በውገ ይናግል ጊመጘ ጛግልም ጊሙ። 16ኣይንድም፦ «ይዃንስ ኣቝዝ ጣምቁ፤ ክትን ግን ዊትቍ ግርቅዝ ግረ መንፈስ ቅዱስዝ ጣምቅሽትርንቅ» የው ኣደረ ዊግተው ቃልድ ትዝ ዩን።#ኻወ. 1፡5። 17ነስየ እደረ ይን ኣደረ እየሱስ ክርስቶስት ኣምንናንድ ይናጭስ ነየውድየንት ጛጭስም ይወውዝየ፣ እደረት ኪልክልጨ ያን ኣው የጝ?»
18ጛይም እኒንት ወሽጛንድ ዊግተነው ዊገ ብጝ ዝም ይ፤ «እደስለሰ እደረ ኣኽዛቫኒዝ ርዅየል ኣቭቃዘው ንስኻ ይዉ የነት ቃየው!» ይጛ እደረት ሚዝየንዝ።
ምመናንድ ኣንፀውክየስ ክርስቲያን ይሽትጘጘ
19እስጢፋነውስትል ተረው ሚከረይዝቍዝ ቢትንሸቍ ምመናንድም ፊንቅየስ፣ ቈብረውስስመ ኣንፀውክየስታል ኣሽ ጅሉጛ ኣደረት ቃልድ ክንስ፤ ኣነጚ ኣይዅዳኒዝ ጭቝጚ ላጥ እቅዝ ድቊየቍም።#ኻወ. 8፡1-4። 20ጝታማኽሊስ ግን ቈብረውስስመ ቀርየነስ ተረቍ ላው ላው እቅ ኣንፀውክየ ትጐ ፊርጝ ኣደረ እየሱስት ወንጌልድየንት ግሪካኒዝ ሲቭክ። 21ኣደረት ናንሸንም ጛጅቅ ዊንች፤ ጭቕጘ ንቕፀቍ እቅም ኣምንጝ ኣደረ ትጐ ዋጥር።
22እን ጂጘድም እየሩሳልየም ፅበቍ ምመናኒል ችጙ፤ ጛይም በርናቫስት ኣንፀውክየ ትጐ እፃቕ። 23ጘጝም ጝግል ችጛንድ እደረ ጝፃገድ ኽዝቪዝ ይወጘ ቓል ዲስ ዩ፤ ቈሽም ጝታእዘኒዙ ፍቃድዝ ኣደረት ኣምነነውዝ ፀናጥጘ ማጥን እጝቅትቅ ማኽሩ። 24ጘጝም መንፈስ ቅዱስዝመ እምንትዝ እቻቐው ቀሰው እጅር ዊኑ፤ ጭቕጘ ንቕፀቍ እቅም ኣደረ ትጐ ዋጥርጝ ጝታጅቅ ቈሺት። 25እንዝ ግረ በርናቫስ ሳውልት ደምዝጠ ጠርሲስ ትጐ ፊሩ። 26ጝት ችጛንድም ኣንፀውክየ ትጐ ፃይ ተሩ።
27ጝታቪልም ጝግል ፅበቍ ምመናኒጅቅ ኣቕጝ ላብጠ ኣምረ ምሉ ንቕፀው ኽዝቭ ክንስ፤ ምመናንም ኣፍለ ኣንፀውክየስ፦ ‹ክርስቲያን› ይሽት። 28ኣይንት ወራቲዝ ላው ላው ነቭያታን እየሩሳልየምስ ጕጝ ኣንፀውክየ ትጐ ጊም፤ ጛጊስም ኣጋቨውስ ይሽተው ላውድ ጕ፦ «ኣልሚልቅ ኽየው ኰር ተርጡ» የው መንፈስ ቅዱስዝ ቃውሽ ዊግቱ፤ እን ትንቪትድም ቂሳር#11፡28 ቂሳር፦ ረውማነ ንጕሳኒዝ መርግዙ ሽ ኣቓንድ ጝትርጕምድ፦ «ንጕሳነ ንጕስ» የነት የጝ። ቀላውዲወስት ዚምኒዝ ፋፅምሹ።#ኻወ. 21፡10። 29ምመናንም ኣይንድ ይዅዳ ፅበቍ ምመናኒዝ ጝታይተኣቅሚዝጘ ፊሰ ፊስጝ እርዳተ ይውጥጘ ዊስን። 30እንዝ ማጥን እን ፊስጘው እርዳተድየንት በርናቫስመ ሳውልስታናኒል በርስጝ ይዅዳት ምክን ቃወጢዝ#11፡30 ምከን ቃወጥ፦ ግሪኪዝ ሽመቅል የኵ። ይው።
Kasalukuyang Napili:
ኻወርየታኒዙ ሰቭ 11: ኽምጣኣኪ
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in