Luka 12
12
Yesũ aimea amanyĩw’a Make mesũvĩe na wangangan’yo
(MATHAYO 10.26–27)
1 #
Mt 16.6; Mko 8.15. Na ĩndĩ ĩvinda yĩu, andũ ngili nyingĩ moombana, mũvaka makinyangana, nĩvo ĩndĩ wambĩlĩlye kũmea amanyĩw’a make, Ĩsũvĩei ĩlawa ya Avalisi, nayo nĩ wangangan’yo. 2#Lk 8.17.Ĩndĩ vai ũndũ ũvw’ĩke, ũtakavuũwa; kana ũndũ ũvithe, ũtakamanyĩka. 3Kwondũ wa ũu o ũla mwaneenee kĩvindunĩ ũkeew’ĩka kyeninĩ; na ũla mwaneenee na kĩwe tũsũmbanĩ twa nthĩnĩ ũkatavanĩw’a nyũmbanĩ ĩũlũ.
Ũla waĩle ũkĩwa
(MATHAYO 10.28–33; 12.32; 10.19–20)
4Nakwa nĩngũmũtavya anyanyawa makwa, Manyai ũmakĩa ala moaa mwĩĩ, na ĩtina maitonya ũndũ ũngĩ. 5Ĩndĩ nĩngũmũtavya ũla mwaĩle kũmũkĩa: Mũkĩei ũla ĩtina wa kũaa wĩ na vinya wa kwĩkĩa Ngienanĩ; ĩĩ, nĩngũmũtavya, Mũkĩei ũsu. 6Tũsũni tũtano tũithoow’a masendi elĩ? Na Ngai ndolwa nĩ kamwe katw’o. 7#Lk 21.18.O na nzw’ĩĩ syonthe sya mĩtwe yenyu nĩ ndale. Manyai ũkĩa ĩndĩ: inyw’ĩ mwĩ vata kwĩ tũsũni twingĩ. 8Nakwa nĩngũmwĩa, Kĩla mũndũ ũla wĩmbumbũlaa mbee wa andũ, Mwana wa mũndũ akamumbũlaa mbee wa alaĩka ma Ngai: 9#Lk 9.26.ĩndĩ ũla wĩngaĩaa mbee wa andũ akakaĩawa mbee wa alaĩka ma Ngai. 10#Mt 12.32; Mko 3.28,29.Na ũla wĩmũneenea Mwana wa mũndũ ndeto, akaekewa: ĩndĩ ũla wĩmũuma Veva Mũtheu ndakaekewa. 11#Lk 21.14,15; Mt 10.19,20.Na yĩla makamũtwaa mbee wa ala ma masinakoke, na asumbĩki, na ala me na ũkũmũ wa kũsilĩla, mũikavũavũane ũndũ mwĩmasũngĩa kana ũndũ mwĩneena: 12nũndũ Veva Mũtheu akamũmanyĩsya saa o ũsu ũndũ ũla mwaĩlwe nĩ kũneena.
Wendi w’onthe, na ngelekan’yo ya mũthwii mũtumanu
13Na ũmwe wa ĩkomano amwĩa, Mũmanyĩsya, mũtavye mwana‐a‐ia andaĩe ũtiĩwa. 14#Meko 7.27. Ĩndĩ amwĩa, Mũndũ we, nũũ ũla ũndw’ĩte mũsili kana mũaan’ya ĩũlũ wenyu? 15#1 Tim 6.9,10.Nake amea, Ĩmanyĩlĩlei na ĩsũvĩei wendi w’onthe: nũndũ thayũ wa mũndũ ndumaa syĩndũnĩ syake, o na syĩ nyingĩ ata. 16Na amatavya ngelekan’yo, akyasya, Mũũnda wa mũndũ mũthwii ũmwe wasyaĩte mũno: 17na avindya ngoonĩ yake, akyasya, Nĩĩka ata, nũndũ ndi na vandũ va kũtuĩsya isyo syakwa? 18Na asya, Ngeeka ũũ: ngathasya makũmbĩ makwa, nake angĩ manene; na vau ngatuĩsya isyo syakwa na isamũ syakwa syonthe. 19Na ĩndĩ ngatavya ngoo yakwa, Ngoo, isamũ wĩ nasyo sya myaka mingĩ; thũmũa, ũkĩĩsaa na ũkĩnyusaa, wĩw’e mũyo. 20#Aevl 9.27.Ĩndĩ Ngai amwĩa, Wĩ ndia we, ũtukũ ũũ thayũ waku nũkwoswa; isamũ isu wĩyũmbanĩsye, ikatw’ĩka syaũ? 21#Mt 6.20.Nĩw’o ũilyĩ mũndũ ũla wĩyũmbanĩasya isamũ, na ti mũthwii kwa Ngai.
Kwĩmakĩa, na kũĩkĩĩa Ngai
(MATHAYO 6.25–34)
22Amea amanyĩw’a make, Kwondũ wa ũu nĩmwĩa, Mũikemakĩe ũndũ wa mathayũ menyu, kĩla mwĩya, kana ũndũ wa mĩĩ yenyu, kĩla mwĩĩvw’ĩka. 23Nũndũ thayũ ũvĩtũkĩte lĩu, na mwĩĩ ũvĩtũkĩte ngũa. 24#Sav 147.9.Sũanĩai ũvoo wa ngũngũũ, nĩkwĩthĩwa itivandaa, na itikethaa; na iti na vandũ va kũmbanĩsya kana ĩkũmbĩ; na Ngai nĩwiĩthasya: inyw’ĩ mũi vata mũno kwĩ nyũnyi? 25Na kwenyu aĩva ũla ũtonya kwĩyongeleela ũasa wake mũkono ũmwe kwondũ wa kwĩmakĩa? 26Ĩndĩ ethĩwa mũtitonya kwĩka ũndũ ũla ũnini, mwĩĩmakĩa nĩkĩ ũndũ wa maũndũ ala angĩ? 27Sũanĩai ũvoo wa malaa ma lili, ũndũ mameaa: maitethasya wĩa, na maiokothaa; ĩndĩ nĩngũmũtavya, O na Solomoni ndaĩanĩ yake yonthe ndaaĩvw’ĩka ta yĩmwe yamo. 28Ĩndĩ ethĩwa Ngai nũvw’ĩkaa nyeki ya kĩthekanĩ ta ũu, ĩla ĩnĩkwĩkala ũmũnthĩ, na ũnĩ ĩkekw’a ikonĩ; ndakamũvw’ĩka inyw’ĩ mbee mũno, inyw’ĩ ma mũĩkĩĩo mũnini? 29Nenyu manyai ũmantha kĩla mwĩya, na kĩla mwĩnyw’a, o na mũikethĩwe na nzika. 30Nũndũ syĩndũ isu syonthe nimanthawa nĩ mbaĩ sya nthĩ: ĩndĩ Ĩthe wenyu nĩwĩsĩ mwĩ na vata wa syĩndũ isu. 31Ĩndĩ inyw’ĩ manthai ũsumbĩ wa Ngai, na syĩndũ isu nĩmũkongeleelwa. 32#Lk 22.29; Isa 41.14.Manyai ũkĩa, inyw’ĩ ĩĩthya ĩnini; nũndũ Ĩthe wenyu nĩwendeew’e nĩ kũmũnenga ũsumbĩ. 33#Lk 18.22.Tai ila mwĩ nasyo mũnengane motethyo; tumai ngusu itakũaa, ũthwii wĩ ĩtunĩ ũtanyivaa, vala kĩng’ei kĩtathengeaa, o na lungulu ũtananga. 34Nũndũ vala ve ũthwii wenyu, nĩvo vethĩawa ngoo syenyu nasyo.
Vata wa kũsyaĩĩsya, na ngelekan’yo ya ngombo yĩ kĩthito na ĩte kĩthito
(MATHAYO 24.45–51)
35 #
Kuma 12.11; 1 Vet 1.13. Mwĩthĩwe mwĩvotoete inyunyunĩ, na mataa menyu makanĩte; 36#Mt 25.1–13.nenyu mwĩthĩwe ta andũ ala meteele vwana woo, yĩla wĩsyoka kuma mũtwaanonĩ; nĩ kana akyũka na kũvingũsya, mamũvingũĩe mĩtũkĩ. 37#Yoa 13.4.Nĩ ngathime ngombo ila ikethĩwa isyaĩĩsye vwana wasyo akyũka: nĩ w’o nĩngũmũtavya, akeevotoa na kũsyĩkalya nthĩ iye, na akooka kwithũkũma. 38Na ethĩwa akooka ũsyaĩĩsyonĩ wa kelĩ, kana wa katatũ, na asyĩthĩa ta ũu, nĩ ngathime ngombo isu. 39#1 Ath 5.2.Ĩndĩ manyai ũũ, kethĩwa mwene wa nyũmba nĩwesĩ saa ũla kĩng’ei kĩkoka, ethĩwa asyaĩĩsye, o na ndaĩ aeka nyũmba yake ĩtũlwe. 40Nenyu ĩkalai mwĩyũmbanĩtye: nĩkwĩthĩwa Mwana wa mũndũ akooka saa ũla mũtataĩĩe.
41Na Vetelo akũlya, Mwĩaĩi, ngelekan’yo ĩno watũtavya ithyĩ, kana nĩ ya andũ onthe? 42#2 Tim 2.15.Mwĩaĩi asya, Mũsyaĩĩsya wa syĩndũ wĩ kĩthito na mũĩ nũũ, ũla ũkaiwa nĩ vwana wake ĩũlũ wa andũ make onthe, amanenge lĩu woo ĩvinda yaw’o? 43Nĩ ngathime ngombo ĩla ĩkethĩwa ĩkĩka ta ũu, yĩla vwana wayo wĩũka. 44#Mt 25.21.Nĩ w’o nĩngũmwĩa, akamĩtw’a mũnene ĩũlũ wa isamũ syake syonthe. 45Ĩndĩ ethĩwa ngombo ĩsu ĩkasya ngoonĩ yayo, Vwana wakwa nĩwĩkalĩte atekũka; na ĩkyambĩlĩlya kwakũnanga athũkũmi, aũme na aka, ĩkĩya, ĩkĩnyw’a, na ĩkĩtoona; 46vwana wa ngombo ĩsu akooka mũthenya ũla ĩtataĩĩe, na saa ũla ĩtesĩ, nake akamĩkũna mũno, na akamĩnenga kĩanda kyayo vamwe na ala mate kĩthito. 47#Yak 4.17.Na ngombo ĩla yesĩ ũndũ vwana wayo ũnũkwenda, ĩndĩ ndĩaaĩyũmban’ya na ndĩaĩĩka kwenda kwake, ĩsu ĩkakũnwa makũna maingĩ; 48ĩndĩ ĩla ĩtesĩ, na yekie maũndũ ala meanĩwe nĩ ũkũnwa, ĩsu ĩkakũnwa makũna manini. Na ũla ũnũũnengwa nyingĩ, nũketw’a nyingĩ: na ũla makamũnenga syĩndũ nyingĩ, ũsu makamwĩtya nyingĩ mbee.
Movano ma mavinda
(MATHAYO 10.34–36; 16.1–4; MALIKO 8.11–13; MATHAYO 5.25–26)
49Nĩnookie kwĩkya mwaki nthĩ; na ethĩwa nĩwakaniw’e nĩenda ata mbee? 50#Mt 20.22; 26.38; Yoa 12.27.Nĩ na ũvatiso wa kũvatiswa naw’o; na nĩngũthingaatwa mũno kũvikĩa ũndũ ũsu wĩanĩw’e! 51Inywĩ’ mwĩasya nĩnookie kũete mũuo nthĩ? Nĩngũmũtavya, Ti w’o; ĩndĩ nĩ ũtilĩkangano: 52nũndũ kuma yu vakeethĩwa andũ atano nyũmba ĩmwe makatanĩsya, andũ atatũ na elĩ, na elĩ na atatũ. 53#Mika 7.6.Makeethĩwa makĩtaanganĩsya, ĩthe na mwana, na mwana na ĩthe; inyia na mwĩĩtu wake, na mwĩĩtu na inyia wake; inyia wa mũũme na mũka wa mwana, na mũka wa mwana na inyia wa mũũme.
54 #
Mt 16.2,3. Nake amea andũ ma ĩkomano, Yĩla mũkwona ĩthweo yĩkyũkĩla ũthũĩlonĩ wa syũa, mĩtũkĩ nĩmũkwasya, Mĩono ya mbua nĩyũkĩte; na kũkĩkĩka ũu. 55Na yĩla mũkwona kĩseve kĩkyuma ngalĩ ya ĩtheo nĩmũkwasya, Kũkavyũva mũno; na kũkĩkĩka ũu. 56Inyw’ĩ angangan’ya, nĩmwĩsĩ kũvathũkan’ya maũndũ ma nthĩ na ma ĩtu; kũilyĩ ata ĩndĩ mũtesĩ kũvathũkan’ya ĩvinda yĩĩ? 57Na nĩkĩ inyw’ĩ ene mũtisilaa katĩ? 58#Mt 5.25,26.Na yĩla ũendete na mũvinganĩsya waku kwa mũsili, mwĩ nzĩanĩ tata mũno wĩw’ane nake; nĩ kana ndakese ũkũtwaa kwa mũsili, na mũsili ũsu aikũnengane kwa ĩkanga, na ĩkanga yĩikwĩkĩa kolokolonĩ. 59Nĩngũkwĩa, Ndũkauma vo nongi mũvaka waĩva kũvika kawela ka mũminũkĩlyo.
Kasalukuyang Napili:
Luka 12: Mbivlia
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
