Luka 11
11
“Mboya ya Mwĩaĩi”
(MATHAYO 6.9–13)
1 #
Lk 5.33. Na kweethĩwa, ailyĩ vandũ akĩvoya, na amina, ũmwe wa amanyĩw’a make amwĩa, Mwĩaĩi, tũmanyĩsye kũvoya, tondũ Yoana wamamanyĩisye amanyĩw’a make. 2Nake amea, Mũkĩvoya aasyai atũ, Asa, syĩtwa yaku yĩtaĩwe. Ũsumbĩ waku wũke. 3Tũnenge kĩla mũthenya lĩu witũ ũtwĩanĩe. 4Naku ũtũekee naĩ sitũ; nũndũ ithyĩ nĩtũũmũekea kĩla ũmwe ũla wĩ thiĩ naitũ. Na ndũkatũtwaae ũtatwanĩ.
Mboya ya kĩthing’ĩĩsyo, na ngelekan’yo ya mũnyanya ũtukũ katĩ
(MATHAYO 7.7–11)
5Nake amakũlya, Nĩ wĩva wenyu ũla wĩ na mũnyanyae, nake aithi kwake ũtukũ katĩ, aimwĩa, Mũnyanyawa, ngovethya imũtũ itatũ; 6nũndũ mũnyanyawa nĩwoka auma kyalo, na ndi na kĩndũ kya kũmũathĩsya? 7#Mt 26.10.Na ũla wĩ nthĩnĩ akamũsũngĩa, akyasya, Eka kũnyamasya: nũndũ nĩnĩvingie mũomo, na nĩngomete na syana syakwa; nditonya kũkĩla ngũnenge. 8#Lk 18.5.Nĩngũmwĩa, O na ethĩwa ndokĩla amũnenge nũndũ nĩ mũnyanyae, ĩndĩ ũndũ wa kĩthing’ĩĩsyo kyake akookĩla amũnenge o ila wĩ vata nasyo. 9Nakwa nĩngũmũtavya, Voyai, na mũkanengwa; manthai, na mũkoona vingũsyai, na mũkavingũĩwa. 10Nũndũ ũla ũnũkũvoya nũnũũnengwa; na ũla unũũmantha nũnũkwona; na ũla ũnũũvingũsya nũnũũvingũĩwa. 11Nĩ wĩva wenyu, ĩthe wa mwana, eetw’a kĩmũtũ nĩ mwana wake, nũmũnenga ĩvia? Kana eetw’a ĩkũyũ, vandũ va ĩkũyũ nũmũnenga nzoka? 12Kana eetw’a ĩtumbĩ, nũmũnenga kĩng’auũ? 13Ethĩwa inyw’ĩ ĩndĩ, ala mwĩ athũku, nĩmwĩsĩ kũnenga syana syenyu mĩthĩnzĩo mĩseo, ti mbee mũno Ĩthe wenyu ũla wa ĩtunĩ kũmanenga Veva Mũtheu ala mamwĩtasya?
Yesũ aisũngĩa ũvingan’yo wa eĩka maũndũ na ũtethyo wa Satani
(MATHAYO 12.22–30; MALIKO 3.22–27)
14Nake aumya ndaimoni ĩla ĩtaneenaa. Na kweethĩwa, yĩla ndaimoni yauma, ũla mũndũ ũtaneenaa, aneena; na andũ ma ĩkomano maseng’a. 15Ĩndĩ amwe masya, Nũnũkumya ndaimoni na vinya wa Veelisevuli, mũnene wa ndaimoni. 16#Mko 8.11.Na angĩ mamũtata, makyenda aumye kyama ĩtunĩ. 17Ĩndĩ nake, akĩmanya mosũanĩo moo, amea, Kĩla ũsumbĩ wĩvathanĩtye nũetae wanangĩkonĩ; na nyũmba yatilĩkangana na ĩngĩ nĩvalũkaa. 18Na ethĩwa Satani nĩwĩvathanĩtye ũu, ũsumbĩ wake ũkaũngama ata? Nũndũ nĩmũkwasya nĩngumya ndaimoni na vinya wa Veelisevuli. 19Nakwa ethĩwa numasya ndaimoni na vinya wa Veelisevuli, ana menyu masyumasya na vinya waũ? Kwondũ wa ũu makeethĩwa me asilĩli menyu. 20#Kuma 8.19.Ĩndĩ ethĩwa nyie numasya ndaimoni na kyaa kya Ngai, nĩ w’o ĩndĩ ũsumbĩ wa Ngai nũmũkĩe inyw’ĩ. 21Mũndũ wĩ vinya ũla ũkuĩte mĩio ya kaũ asũvĩaa nyũmba yake, syĩndũ syake syĩkalaa syĩ mboo: 22#Ako 2.15.ĩndĩ yĩla ũla wĩ vinya kwĩ we wĩũka, na kũmũkĩlya vinya, ũsu akamũvena mĩio yake yonthe ya kaũ ĩla wĩkwetye, akĩaan’ya mũtavo wake. 23#Lk 9.50.Ũla ũte ngalĩ yakwa ũsu e ũndũ nakwa; na ũla ũtombanasya nakwa nũnyaĩĩkasya.
Mĩisyo ya kũlea kũalyũla ngoo vyũ
(MATHAYO 12.43–45)
24Veva mũvuku wauma mũndũnĩ, ũvĩtĩlaa kũndũ kũte manzĩ, ũkĩmantha ũthũmũo, na walea kwona, ũkyasya, Nĩngũsyoka nyũmbanĩ yakwa ĩla naumie. 25Naw’o wooka, weethĩa yĩ ndute, na yĩ mbanakavye. 26#Yoa 5.14.Nĩvo ĩndĩ ũithi, ũkyosa maveva angĩ mũonza mathũku kũte w’o; na mailika na kwĩkala vo: na mwĩkalĩle wa ĩtina wa mũndũ ũsu wĩtw’ĩka mũthũku kũte ũla wa mbee.
27 #
Lk 1.28,42,48. Na kweethĩwa, akĩneena maũndũ asu, mũndũ mũka ũmwe wa ĩkomano ookĩlya wasya, na amwĩa, Nĩ ĩathime ĩvu yĩla yaũkuie, na nondo ila woongie. 28#Lk 8.15,21.Nake asya, Ĩĩ, ĩndĩ, nĩ aathime mbee, ala mew’aa ndeto ya Ngai, makĩmĩkwata.
Kwĩsũvĩa kũmantha syama
(MATHAYO 12.38–42; MALIKO 8.12)
29 #
1 Ako 1.22. Na yila andũ aingĩ mambĩlĩlye kũmũmbanĩa, ambĩlĩlya ũneena, Ũsyao ũũ nĩ ũsyao mũthũku: nũũmantha kyama; na ndwĩnengwa kyama ate o kyama kya Yona. 30Nũndũ o tondũ Yona watw’ĩkie wonan’yo kwa Anineva, no ta ũu Mwana wa mũndũ akeethĩwa kwa ũsyao ũũ. 31#1 Asu 10.1.Na ũla mũsumbĩ mũndũ mũka wa ngalĩ ya ĩtheo, nũkokĩla ũsilĩlonĩ vamwe na andũ ma ũsyao ũũ, na akamasilĩla: nũndũ we nĩwokie kuma itulunĩ sya nthĩ nĩ kana ew’e ũĩ wa Solomoni; na sisyai, vaa ve ũla mũnene kwĩ Solomoni. 32#Yona 3.5.Andũ ma Nineva makaũngama ũsilĩlonĩ vamwe na ũsyao ũũ, na makoosilĩla: nũndũ nĩmaalyũlile ngoo ũtavan’yonĩ wa Yona; na sisyai, vaa ve ũla mũnene kwĩ Yona.
Ũmanyĩsyo kuma taanĩ
(MATHAYO 5.15; 6.22–23)
33 #
Mt 5.15; Lk 8.16. Vai mũndũ ũnũũkwatya taa na kũvitha ĩimanĩ, kana ungu wa ĩmisi, ĩndĩ nũnũũwia vala vatũlu, nĩ kana ala meũvota mone kyeni. 34Taa wa mwĩĩ waku nĩ itho yaku: yĩla itho yaku yĩ ĩseo, mwĩĩ waku w’onthe nĩwusũĩtwe nĩ kyeni; ĩndĩ yĩla yĩ ĩthũku, mwĩĩ waku naw’o nũtulĩtye kĩvindu. 35Ĩsũvĩe ĩndĩ, kana kyeni kĩla kĩ nthĩnĩ waku kĩtikethĩwe kĩvindu. 36Kwondũ wa ũu ethĩwa mwĩĩ waku w’onthe nĩwusũĩtwe nĩ kyeni, ũte vandũ ve kĩvindu, ũkeethĩwa usũĩtwe nĩ kyeni ki, o tondũ taa ũkũmulĩka na kyeni kyaw’o yĩla wakanĩte nesa.
Yesũ aileana na Avalisi na asili
(MATHAYO 23.1–36; MALIKO 12.38–40; Luka 20.45–47)
37 #
Lk 7.36; 14.1. Akĩneena ũu, Mũvalisi ũmwe amwĩta oke aye lĩu kwake: na avota, ekala nthĩ aye. 38#Mt 15.2.Na Mũvalisi oona ũu, aseng’a nũndũ ndaathamba atanamba kũya. 39Na Mwĩaĩi amwĩa, Inyw’ĩ Avalisi nĩmũtheasya kĩkombe na ĩsaani ĩũlũ; ĩndĩ nthĩnĩ nĩmusũĩtwe nĩ ũvutani na ũthũku. 40Inyw’ĩ atumanu, ũla wombie ĩũlũ tiwe wombie nthĩnĩ? 41Ĩndĩ nenganei motethyo ma syĩndũ ila mwĩ nasyo, na sisyai, syĩndũ syonthe ikeethĩwa syĩ ntheu kwenyu.
42Woo nĩ wenyu Avalisi! Nũndũ nĩmumasya kĩlungu kya ĩkũmi kya mindi na laũ na syĩndĩ ingĩ sya ũvanda, mũkĩtia ũsili wa katĩ na wendo wa Ngai: ĩndĩ asu nĩmwaĩlwe nĩ kũmeka, na ti kũtia asu angĩ mũtamekĩte. 43#Lk 20.46.Woo nĩ wenyu Avalisi! Nũndũ nĩmwendaa ivĩla sya mbee masinakokenĩ, na ngethi sya andũ ing’ang’anĩ. 44Woo nĩ wenyu! Nũndũ mũtilyĩ ta mbũa itonekaa, na ala makũnĩlaa ĩũlũ wasyo matyĩsĩ kana syĩ kw’o.
45Na ũmwe wa amanyĩsya ma mĩao amwĩa, Mũmanyĩsya, ũkyasya ũu nũũtũneenea o naitũ naĩ. 46Nake asya, O nenyu amanyĩsya ma mĩao, woo nĩ wenyu! Nũndũ nĩmũmaĩkasya andũ mĩio mĩito ĩtakuĩka, nenyu mũtiĩtĩkĩla kũmĩkiita mĩio ĩsu, o na kyaa kĩmwe. 47Woo nĩ wenyu! Nũndũ inyw’ĩ nĩmwakaa mbũa sya athani, na aaĩthe menyu nĩmo mamoaie. 48Ũu nĩw’o mũkũsĩĩa meko ma aaĩthe menyu na kũmetĩkĩla: nũndũ nĩmo mamoaie, nenyu nĩmũkwaka mbũa syoo. 49Kwondũ wa ũũ ũĩ wa Ngai nĩwaneenie, Ngamatũmĩa athani na atũmwa; na amwe moo makamoaa na kũmathĩn’ya; 50nĩ kana nthakame ya athani onthe, ĩla yetĩkiw’e nthĩ kuma mwambĩlĩlyonĩ wa nthĩ, ĩandũwe kwa ũsyao ũũ; 51#Mwa 4.8; 2 Mav 24.20.kuma nthakame ya Aveli kũvika nthakame ya Nzakalia, ũla woaĩwe katĩ wa kĩthembeo na vala vatheu: ĩĩ, nĩngũmwĩa, ĩkaandũwa kwa ũsyao ũũ. 52Woo nĩ wenyu, inyw’ĩ amanyĩsya ma mĩao! Nũndũ nĩmwoosie ũvungũo wa ũmanyi: inyw’ĩ ene mũiaavota, na ala mavotaa asu nĩmwamasiĩĩaa.
53 #
Lk 20.20. Na auma kw’o, aandĩki na Avalisi mathing’ĩĩsya mũno kũmũkũlya, maitata kũtuma aneena maũndũ maingĩ; 54makĩmantha ũndũ wumĩte kanyw’anĩ wake mamũvinganĩsye naw’o.
Kasalukuyang Napili:
Luka 11: Mbivlia
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
