MATEO 8
8
Jesús kachakátsin juk leprósuta
1Jirkapita Jesús urámuptin atskaq nunakuna qatiyaq. 2Kaq key shamorqan juk leprósu i qonqurikurqan nowpanman, nirnin: —Señor, munarnenqa, pwedinkim limpyameyta.
3Jesús makinta makyar yateykorqan, nirnin: —Munámi; limpyu key.
I tseyllana lepran ushakárerqan. 4Tseynam Jesús nerqan: —Rikey, ama pitapis nitsu; sinowqa eywey saserdotiman rikátsikiy, i Moyses mandanqan qareyta qoy, peykuna musyayananpaq.
Jesús kachakátsin senturyonpa sirweqninta
5Kapernaunman Jesús yeykureykaptin, peyman shamorqan juk senturyon, rowarnin, 6i nirnin: Señor, sirweqními jitareykan wayichow, paralitiku, antsa tormentashqa.
7I Jesusnam nerqan: Noqam eywashaq i kachakátsishaq.
8Senturyon yaskerqan i nerqan: Señor, manam meresitsu wayí rurinman yeykuneykipaq; palabrallata níkiy, i sirwimaqní kachakárenqam. 9Noqapis mandakoq nunam ká, i soldadúkuna kapamanmi mandakiyníchow; keyta ní: “Eywey”, i eywan; i juknintana: “Shamiy”, i shamun; i sirwimaqníta: “Keyta rurey”, i ruran.
10Jesús keyta wiyarirnam, almirakurqan, i qateqninkunata nerqan: Tseqeypam niyaq, ni Israyelchowpis tarerqótsu keyláya kreyikiytaqa. 11I niyaqmi atskaqkunam shayámonqa inti ullumunanpita i jeqananpita, i tákuriyanqa Abrahamwan Isakwan i Jakobwan syelukunapa reynunchow; 12peru reynupa tsurinkunaqa jaq ampeqkunamanmi jitashqa kayanqa; tseychowmi kanqa waqakiy i kirukuna ruchuchútsi.
13Tseynam Jesús nerqan senturyonta: Eywey, kreyenqeykinow, rurakápushiy. I sirweqnin tsey órallana kachakárerqan.
Jesús kachakátsin Pedrupa swegranta
14Jesús shamorqan Pedrupa wayinman, i rikarqan swegranta kámachow jitareykaqta, fiebriwan. 15I makinta yateykurqan, i fiebri jaqirerqan; i peyna sharkur, peykunata sirwerqan.
16I ampirkuptinna, peyman apayámorqan atskaq demoniyuyoqkunata; i palabranwan qarqorqan demoniyukunata jaqman i llapan qeshyayoqkunata kachakátserqan; 17Profeta Isaias nenqan kumplikánanpaq, nenqannow: Kikinmi qeshyantsikkunata tsarerqan, i nanatsikiynintsikkunata aparqan.
Jesusta qatinapaq chanin
18Jesús atska nunakunapa jirurushqa rikakurnin, mandarqan wak tsimpata pasayananpaq. 19I judyukunapa leynin yachatseq shamur peyta nerqan: —Maestru, qatishqeykim meyta eywaptikipis.
20Jesusnam nerqan: —Atoqkunapa kayápunmi macheyninkuna, syelu pishqukunapapis qeshunkuna; Nunapa Tsurinpaqa manam kapuntsu meychow peqanta tunaqáratsinanpaq.
21Disípulunkunapita juknin kaqnam nerqan: —Señor, permisuramey, eywá puntata pamparamushaq teytáta,
22Jesusnam nerqan: —Qatimey; jaqiriykiy wanushqakuna pampayatsun wanushqankunata.
Jesús páratsin shukukiyta
23I pey barkaman yeykuriptin, disípulunkuna qatiyarqan. 24Kaq key lamarchow shárikurkurqan allápa jatun shukukiy barkata shukurraq; peru peynam puniykarqan. 25Disípulunkuna shayámur riyatsiyarqan, nirnin: —¡Señor, salbeykallayamey, ushakáriyánam!
26Peynam nerqan: —¿Imanirtaq mantsakáyanki, ichiklla kreyikiyoq nunakuna?
Tseynam, sharkurnin, piñapeykorqan byentukunata i lamarta; i párakárerqan. 27I nunakuna almirakuyarqan, nirnin: —¿Ima nunataq key, byentukunapis i lamarpis kasuyan?
Jesús kachakátsin ishkey endemoniyadukunata
28Juknin kuchunman cháriptinna, gadareynukunapa markanman, yarqayámorqan tarinakoq sepultúrakunapita ishkaq endemoniyadukuna, allápa kallpayoq, tseyreykur ni pí paseyta pwederqantsu tsey nánipa. 29I qayakuyarqan nishpa: —¿Imanankitaq noqakunawan, Jesús, Dyospa Tsurin? ¿Keyman shamorqonki tormentayámaqníku manaraq tyempuchow?
30Peykunapa karunkunachow juk purwa kuchikuna mikiykáyarqan. 31I demoniyukuna rowayarqan nishpa: Sitsun jaqman qarquyámanki, permitiykayamey tsey purwa kuchikunaman eywayanápaq.
32Peynam nerqan: —¡Eywayey!
I peykuna yarquyarqan, i eywakuyarqan tsey purwa kuchikunaman; i kaq keymi, llapan purwa kuchikuna jeqakurkuyarqan juk jirkapa lamarman, yakukunachow wanuriyarqan.
33I mitseqkuna eyqikuyarqan, i markaman shamur, willakuyarqan llapan kosaskunata, i endemoniyadukunawan pasashqanta. 34I llapan marka yarqurqan Jesuswan tinkoq; i rikeykuyarnam, rowayarqan peykunapa jiruroqninkunapita ewkunanpaq.
Kasalukuyang Napili:
MATEO 8: QUEAN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Quechua Ancash New Testament © Peruvian Bible Society, 1992.
