MATEO 7
7
Wakinkunata jusgey
1“Ama jusgayeytsu, mana jusgashqa kayaneykipaq. 2Jusgayanqeyki fisyuwanmi, jusgashqa kayanki, i tupu tupuyanqeykiwan tupushqa kayanki.
3“¿I imanirtaq wawqikipa nawinchow achuta rikanki, i mana rikankitsu kikikipa nawikichow qeru keykaqta? 4¿O imanowraq ninki wawqikita: Nawikipita achuta jorquramushaq, i kaq key qeru kikikipa nawikichow? 5¡Motolítu! Puntata jorqiy qeruta kikikipa nawikipita, tseynam alleq rikanki wawqikipa nawinpita achuta jorquneykipaq.
6“Ama qoyeytsu allqukunata santu kaqta, ni jitayeytsu perlasnikikunata kuchikunapa nowpanman, paqtataq jalukacharkuyanman, i kutiykayámur rachikacharkuyáshunkiman.
Dyos mañakiypa alli keynin
7“Mañakuyey, i qoyáshunkim; ashiyey i tariyankim; qayakuyey i kichapuyashunkim. 8Meyqanpis mañakoqqa, chaskinmi; i asheqqa, tarinmi; qayakoqtaqa, kichapuyanqam. 9¿Pí nunaraq qamkunapita kan, tsurin tantata mañaptin, juk rumita qoykunqa? 10¿O juk peskaduta mañaptin, kulebrata qoykunqa? 11Si qamkuna, mana alli keykashpa, yachayanki alli qareykuna qoyta tsurikikunata, ¿manaku masraq syelukunachow keykaq Teyteykikuna qonqa alli kosaskuna mañaqninkunata?
Orupita regla
12“Tseymi, llapan kosaskuna qamkunawan nunakuna rurayananta munarqa, tseynowlla qamkunapis rurayey peykunawan; keymi leyqa i profetakuna.
Punku i kaweypa nánin
13“Kichki punkupa yeykuyey; anchum punku, i jayaqmi náni oqrakeyman apaq, i atskaqmi kayan tseypa yeykoqkuna; 14kichkim punku, i llanum náni kaweyman apaq, i wallkallam kayan tareqkuna.
Imanowpa uli profetakunata reqi
15“Uli profetakunapita kuydakuyey, qamkunaman shayámun úshakunapa bestidunwan, rurinpaqa kayan suwa lóbukuna. 16Wayíninkunapam reqiyanki. ¿Akasu eylluntsik ubasta kashakunapita, ó ígusta kardonkunapitaku? 17Tseynowmi llapan alli monti qon alli wayíkunata, i mana alli montiqa qon mana alli wayíkunatam. 18Manam alli montiqa mana alli wayíta qonmantsu, ni mana alli monti alli wayíta qonmantsu. 19Llapan monti mana alli wayí qoqqa, muchushqam i ninaman jitashqa. 20Tseymi, wayíninkunapa reqiyanki.
Ishkey simyentukunawan tinkutsikiy
21Manam llapan: Señor, Señor, nimaqtsu, yeykonqa syelukunapa reynunman, sinowqa syelukunachow Teytápa muneynin ruraqmi. 22Atskaqmi niyámanqa taqey junaqchow: ‘Señor, Señor, ¿manaku profetisayarqá jutikichow, i jutikichow demoniyukunata qarquyarqá, i jutikichow rurayarqá atska milagrukunata?’ 23I Tseynam niyashqeyki: ‘Manam imeypis reqiyarqoqtsu. ¡Noqapita witikuyey, mana alli ruraqkuna!’
24“Meyqanpis, key palabrakuna wiyamaqníqa, i ruraqta, tinkutsishaq juk alli yarpeyoq nunatawanmi, qaqa jananchow wayin ruraqwan. 25Tamyamorqan, i shayámorqan mayukuna, i púkayarqan byentukuna, i tsaktayarqan taqey wayipa kontran; i manam ishkirqantsu, qaqa jananchow patsátsishqa kaptin.
26“Peru meyqanpis key palabrakuna wiyamaqníqa i mana ruraqqa, tinkutsishaq juk upa nunatawanmi, wayinta rurarqan aqusha jananchow; 27i tamyamorqan, i shayámorqan mayukuna, i púkayarqan byentukuna, i tsaktayarqan feyupa taqey wayipa kontran; i ishkirerqan, i jatunmi karqan ushakeynin.”
28Jesús key palabrakunata ushariptin, nunakuna almirakuyaq yachatsikiyninpita; 29awtoridáwan yachatsikuptin, i manam judyukunapa leynin yachatsikoqkunanowtsu.
Kasalukuyang Napili:
MATEO 7: QUEAN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Quechua Ancash New Testament © Peruvian Bible Society, 1992.