MATEO 6
6
Ankupákiy rureykunapaq
1“Kuydakuyey nunakunapa nowpanchow justisyeykikuna rureyta, peykunapa rikashqa kayáneykipaq; juklayapaqa manam kayápushunkitsu premyiykikuna syelukunachow keykaq Teyteykikunapita. 2Imeymi, llimushnata qonki, ama tokatsitsu tronpétata nowpeykichow, motolítukuna eyllukayanan wayikunachow i kállikunachow rurayanqannow, nunakunapa alabashqa kayánanpaq; tseqeypam niyaq kayápunnam premyunkuna. 3Qam llimushnata qoptiki, ama itsoqniki musyatsuntsu derécheyki ruranqanta; 4llimushneyki pakeyllapa kananpaq; i pakeyllachow rikaq Teyteykim premyashunki nunakunapa nowpanchow.
Mañakiypaq: Padre nuestro
5“I Dyosta mañakur, ama motolítukunanowqa keytsu, peykunaqa kuyayan eyllukayanan wayikunachow i kállipa eskinankunachow sheykar mañakiyta, nunakunapa rikashqa kayánanpaq; tseqeypam niyaq premyunkuna kayápunnam. 6Qamqa, Dyosta mañakurnin, yeykiy kwartikiman, punkuta wichqarqur, mañakiy pakeyllachow keykaq Teyteykiman, i pakeyllachow rikaq Teyteykim premyashunki nunakunapa nowpanchow. 7I Dyosta mañakur, ama inshitsu mana báleq kutipeykunata, gentilkunanow, pensayan allápa parleyninkunapa wiyashqa kayánantam. 8Ama rurakáyeytsu, peykuna niraqqa; Teyteykikunaqa musyanmi ima kosaskunapita waneyniykikuna kanqanta, manaraq qamkuna peyta mañayaptiki. 9Qamkunaqa, Dyosta mañakuyanki keynow: Syelukunachow keykaq Teytallákuna, jutiki santifikashqa katsun. 10Reyníki shamutsun. Muneyniki rurakátsun syeluchownow, tseynowlla patsachowpis. 11Kada junaq tantallákunata, kanan qoykayámey. 12I perdoneykallayamey jaqallákunata, imanowmi noqakunapis perdonayá jaqayámaqniykunata. 13I ama churayámeytsu tentasyonman, masqa libreykayamey mana allipita; qampam reyniki i pwedeq key, i glorya, wiñeypa wiñeynin. Amen. 14Perdonayankitsun nunakunapa ofensankunata, qamkunatapis perdonayáshunkim selestyal Teyteykikuna; 15manatsun perdonayanki nunakunapa ofensankunata, qamkunapa ofensekikunatapis Teyteykikuna manam perdonayashunkitsu.
Ayúnupaq
16“Ayunayarnenqa, ama ullpanashqa kayeytsu, motolítukunanow; peykunam jukláyátsiyan qaqllankunata ayunayanqanta nunakunata rikátsiyananpaq; tseqeypam niyaq premyunkuna kayápunnam. 17Peru qam ayunarnin, peqeykita llushi i qaqlleykita paqakiy, 18nunakunata ayunanqeykita mana rikátsineykipaq, sinowqa pakeyllachow keykaq Teyteykita; i pakeyllachow rikaq Teyteykim premyashunki atskaqkunapa nowpanchow.
Rikeysakunapaq
19“Ama rurayeytsu rikeysakunata patsachow, tseychowmi puyu i ismutseq ushakátsiyan, i suwakuna yeykuyan i suwayan; 20sinowqa rurayey tesorukunata syeluchow, tseychow manam puyu i ismutseq ushakátsiyantsu, ni suwakuna yeykuyantsu ni suwayantsu. 21Meychowmi keykan tesoríkikuna, tseychowmi keykanqa shonqiykikunapis.
Nawi: Kwerpupa lamparinnin
22“Kwerpupa lamparinninqa nawim; tseynowqa, sitsun nawiki alli kanqa, llapan kwerpiykim aktsipa juntashqa kanqa; 23peru nawikitsun mana alli kanqa, llapan kwerpiykim ampikunachow keykanqa. Tseynowqa, qamchow aktsi kaq ampeq keykan, ¿imanowraq kayanqa kikin ampeqkuna?
Kaweychow presisaqkuna
24“Manam pipis pwedintsu sirwita ishkaq señorkunata; chikenqa juk kaqta i jukninta kuyanqa, o estimanqa juknin kaqta i mana báleqpaq churanqa jukninta. Manam sirwita pwediyankitsu Dyosta i rikeysakunata.
25“Tseyreykurmi niyaq: Ama afanakuyeytsu kaweynikikunapaq, ima mikuyaneykita o ima upuyaneykita; ni kwerpikikunapaq, imawan bistikuyáneykipaq. ¿Manaku kawey mikiykunapita mas, i kwerpu bistídupita mas? 26Rikáyey syelu pishqukunata, muruyantsu, ni segayantsu, ni eylluyantsu trójakunaman; i selestyal Teyteykikuna mikutsin. ¿Manaku qamkuna peykunapita mas báleq kayanki? 27¿I pitaq qamkunapita pwedinman, allápa afanakurpis, tamañunman yapeyta juk metrupa pullanninllatapis? 28I bestidupaq, ¿imanirtaq afanakuyanki? Rikáyey kampuchow liryukunata, imanowmi winayan: manam uryayantsu ni putskayantsu; 29peru niyaqmi, ni Salomonpis manam bistikorqantsu llapan sumeyninwan keykunapita jukninnow. 30Kampuchow kanan kaq qora tseynow, i wareyqa jornuman jitashqa, Dyos bistitsin tseynow, ¿manatsuraq mas ruranqa qamkunawan, ichiklla kreyikíyoq nunakuna?
31“Ama afanakuyeytsu, nishpa: ¿Imataraq mikushun, o imataraq upushun, o imataraq bistikushun? 32Gentilkunam ashiyan key llapan kosaskunata; peru selestyal Teyteykikuna musyanmi key llapan kosaskuna wanayanqeykita. 33Masqa puntata ashiyey Dyospa reynunta i justisyanta, i llapan keykunam yapashqa kayápushunki. 34Tseymi, ama afanakuyeytsu warey junaqpaq, warey junaqqa apamonqa kikinpa afanakiynintam. Kada junaqpa afannin allin katsun.
Kasalukuyang Napili:
MATEO 6: QUEAN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Quechua Ancash New Testament © Peruvian Bible Society, 1992.