MATEO 11
11
Juan Bawtistapa willakoqninkuna
1Jesús chunka ishkey disípulukunata yachatsir usharirnam, ewkorqan tseypita yachatsikoq i predikaq peykunapa markankunachow.
2I karselchow Juan wiyarna, Kristupa rureyninkunata, kacharqan ishkey disípulunkunata, 3tapunanpaq: —¿Qamku kanki shamunan kaq, ó shuyayáshaq juktaku?
4Yaskirnin Jesús peykunata nerqan: —Eywayey, i musyatsiyey Juanta, wiyayanqeykita i rikáyanqeykita. 5Wiskukunam rikáyan, kojokunam puriyan, leprosukunam limpyashqa kayan, sordukunam wiyayan, wanushqakunam kawarishqa kayan, i waktsakunatam willakushqa ebangelyu; 6i kushikíyoqmi trompeseyta noqachow mana tareq.
Jesús willakun Juan Bawtistapaq
7Peykuna ewkiykáyaptinna, Jesús qalleykorqan nirnin Juanpaq nunakunata: “¿Ima rikaqtaq yarquyarqeyki chusyaqta? ¿Juk shoqush byentupa kuyutsishqataku? 8¿O ima rikaqtaq yarquyarqeyki? ¿Juk nunata fínu bestiduwan bistishqataku? Kaq key, fínu bestidu bestikoqkunaqa, reykunapa wayinkunachowmi keykáyan. 9Peru ¿ima rikaqtaq yarquyarqeyki? ¿Juk profetataku? ¡Awmi, niyaqmi, i profetapitapis masmi! 10Keymi key pipaq qellqareykanqan:
Kaq keymi, noqa kachamú
willakoqníta nowpeykita,
peymi alistanqa nánikita qampa
nowpeykichow.
11Tseqeypam niyaq: Warmipita yurikoqkunachow manam sharkushqatsu ni juk mas jatun Juan Bawtistapita, peru mas ichikllan syelukunapa reynunchow, mayormi peypita. 12Juan Bawtistapa junaqninkunapita kananyaq, syelupa reynun jipan wápukunapa, i qochiyan wápukunam. 13Llapan profetakuna i leywan profetisayashqa Juanyaqllam. 14I chaskita munayaptikeqa, peymi taqey shamunanpaq kaq Elias. 15Wiyananpaq rinriyoq kaqqa, wiyatsun.
16“Masqa ¿imawanraq tinkutsishaq key kastata? Plásachow tákureq jobinkunanowmi, i yanaqinkunaman qayakuyan, 17nirnin: ‘Plawtata tokayámorqó, i mana qatsuwayarqonkitsu; qotsuyámorqó llakikipaq i mana waqayarqonkitsu.’ 18Juan shamorqan, ni mikoqtsu ni upoqtsu, i niyan: ‘Demoniyuyoqmi.’ 19Nunapa Tsurin shamorqan, mikun i upun, i niyan: ‘Kaq key juk nuna allápa mikoq, i bínuta upoq, publikánukunapa i jutsasapakunapa amígun.’ Peru yacheyqa justifikashqam tsurinkunapa.”
Nanatsikiykuna markakunaman
20Tseynam qalleykorqan piñaparnin atska milagrukuna rurashqan markakunata, mana wanakushqa kayaptin, nirnin: 21“¡Allaw qampita, Korasin! ¡Allaw qampita Betsayda! Sitsun Tiruchow i Sidonchow milagrukuna rurakashqa kanman karqa qamkunachow rurakashqanpita, uneynam wanakuyashqa kayankiman karqa silisyuwan i uchpachow. 22Tseyreykurmi niyaq fisyu junaqchowqa, mas awanteypaqmi kanqa kastígu Tírupaq i Sidonpaq, qamkunapita.
23“I qam Kapernaum, syeluyaq sharkatsishqa kanki, Adesyaqmi undishqa kanki; si Sodomachow milagrukuna rurakashqa kanman karqan qamchow rurakashqanpita, kanan junaqyaqmi patsakashqa kanman karqa. 24Tseyreykurmi niyaq fisyu junaqchow, mas awanteypaqmi kanqa kastígu Sodoma markapaq, qampita.”
Jesús ánikun almapa jamakiyninpaq
25Tsey tyempuchow, yaskirnin Jesús, nerqan: “Alabaqmi, Teyta, syelupa i patsapa Señornin, pakarqonkim key kosaskunata yacheyoqkunapita i kayikiyoqkunapita, i rikátsirqonki wamrakunata. 26Awmi, Teyta, tseynowmi gustashorqonki.
27“Llapan kosaskunam qomashqa karqan Teytápa; i manam pipis reqintsu Tsurita, sinowqa Teytallam, ni meyqanpis reqintsu Teytata, sinowqa Tsurillam, i pitam Tsuri munan musyatsita.
28“Noqaman shayámi llapan uryashqa kaqkuna i juytushqakuna, i noqam jamatsiyashqeyki. 29Qamkuna yúgúta apayey, i yachakuyey noqapita, manshu keyníta i qollmi shonqu keyníta i jamakiytam tariyanki almeykikunapaq. 30Yúgúqa fasilllam, i juytíniypis ankashllam.”
Kasalukuyang Napili:
MATEO 11: QUEAN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Quechua Ancash New Testament © Peruvian Bible Society, 1992.
