MATEO 10
10
Jesús kachan chunka ishkeykunata
1Tseynam chunka ishkey disípulunkunata qayarir, peykunata pwedeq keyninkuna qorqan, jaqman qarquyánanpaq rakcha espiritukunata i llapan qeshyakunata i nanatsikiykunata kachakátsiyananpaq. 2Chunka ishkey apostulkunapa jutinkuna keymi kayan: puntata Simon, Pedru jutiyoq, i wawqin Andres; Sebedeopa tsurin Jakobo, i wawqin Juan; 3Felipe, Bartolomé, Tomás, publikánu kaq Mateu, Alfewpa tsurin Jakobo, Lebeo, shuney jutin Tadeo, 4Simon kananista, i Judas Iskaryoti, peymi entregarqanpis.
Chunka ishkeykunapa misyonnin
5Key chunka ishkeykunatam Jesús kacharqan i yachatserqan, nirnin: “Gentilkunapa náninkunapaqa ama eywayeytsu, i samaritanukunapa markanman ama yeykuyeytsu, 6sinowqa puntata eywayey Israyelpa wayinpita oqrakashqa úshakunaman. 7I eywarnin, predikayey, nirnin: ‘Syelukunapa reynun chámushqanam.’ 8Kachakátsiyey qeshyakoqkunata, limpyayey leprosukunata, kawaritsiyey wanushqakunata, qarquyey demoniyukunata; grasyapitam chaskiyarqonki, grasyapita qoyey.
9“Ama apayeytsu óruta, ni qelleyta, ni kobrita tseqlleykikunachow; 10ni alporjata nánipaq, ni ishkey túnikakunata, ni llanqita, ni garrutita, uryaqqa merisinmi mikíta. 11Meyqan markaman ó tunanman yeykuyanqeykiman, tapukuyey pim tseychow meriseq, i tseychow posadakuyey yarquyashqeykiyaq. 12I wayiman yeykur, saludayey. 13I si meriseq wayi kaptenqa, qamkunapa yamey keynikikunam shamonqa peyman; peru mana merisiptenqa, yamey keynikikuna kutimonqa qamkunaman. 14I si pipis mana chaskiyashuptikeqa, ni wiyayanqatsu palabreykikunata, yarquyey tsey wayipita o markapita, i tapsikuyey chakikikunapita polbuta. 15Tseqeypam niyaq fisyu junaqchow, Sodoma i Gomorra markapaq mas awanteypaqmi kanqa kastigu, taqey markapeq.
Shamoq jipakiykuna
16“Keymi key, noqa kachayaq úshakunatanow; lóbukunapa chowpinman; kayey kulebrakunanow mákoq, i manshu palumakunanow. 17I kuydakuyey nunakunapita, konsilyukunamanmi entregayashunki, i eyllukayanan wayinkunachowmi astayáshunki; 18i gobernadorkunaman i reykunamanran apashqa kayanki noqapaqreykur, willakushqa kananpaq peykunaman i gentilkunaman. 19Mas entregariyáshuptiki, ama yarpakachayeytsu imanow ó imata parlayaneykita; sinowqa tsey órachowmi qoshqa kayanki parlayaneykipaq kaqta. 20Manam qamkunatsu kayanki parlakoq, sinowqa Teyteykikunapa Espiritunmi parlan qamkunachow.
21“Wawqinmi entreganqa waniyman wawqinta, i teytan tsurinta; i tsurinkunana teytankunapa kontran sharkuyanqa, i wanutsiyanqa. 22I kayanki llapankunapa chikishqam jutiyreykur; pim tsarakonqa usheyaq, keymi salbashqa kanqa. 23Key markachow qatikacháyáshuptikeqa, safakuyey juk kaqman; tseqeypam niyaq, manam ushayankitsu purir llapan Israyel markakunapa, manaraq Nunapa Tsurin shamuptin.
24“Disípuloqa manam mayestrunpita mastsu, ni sirwipakoq señorninpita. 25Kontentakutsun disípulu mayestrunnow kar, i sirwipakoq señorninnow key. Si kastapa teytanta jutitsayarqan Belsebú, ¿manatsuraq wayinchow kaqkunata masraq?
Jesús kallpakatsin peypa kaqkunata
26“Tseymi, ama mantsayeytsu; manam ima kantsu pakaraq, mana rikakushqa kaq; ni pakashqa, mana musyakánan. 27Ampikunachow niyanqaqta, niyey aktsichow; i rinrillachow wiyanqeykita, qaparipa niyey altuskunapita. 28Ama mantsayeytsu kwerpu wanutseqta, almataqa manam wanutsita pwediyantsu; mas alleqa mantsayey alma i kwerpu infyernuchow ushakátseqta. 29¿Manaku rantikuyan ishkey pishqukunata juk qelleypa? Tseynow karpis, manam ni juklleyllapis ishkintsu patsaman Teyta mana munaptenqa. 30Aqtseykikunapis yupashqam keykan. 31Tseyreykur ama mantsayeytsu; qamkunaqa báliyanki pishqukunapita masran.
32“Meyqanpis, tseynow nunakunapa nowpanchow konfesamaqníta, noqapis konfesashaqmi syeluchow keykaq Teytápa nowpanchow. 33I meyqanpis nunakunapa nowpanchow negamaqnítaqa, noqapis negashaqmi syeluchow keykaq Teytápa nowpanchow.
Disípulu keypa premyun
34“Ama pensayeytsu patsaman yamey key apamoq shamonqáta; manam shamorqó yamey keyta apamunápaqtsu, sinowqa espádatam. 35Shamorqó chikinakiyman churanápaqmi nunata teytanpa kontran, wawata mamanpa kontran, i llumtsíta swegranpa kontran; 36i nunapa chikeqninkunam kayanqa kikinpa wayinchow kaqkuna.
37“Pim kuyanqa teytanta ó mamanta noqapita mas, manam noqapita merisintsu, pim kuyanqa tsurinta ó wawanta noqapita mas, manam meresintsu noqapita; 38i pim krusninta tsarirkur i qepáta shamuntsu, manam merisintsu noqapita. 39Kaweyninta tareqqa, oqrarenqam; i pim oqranqa kaweyninta noqapa kawsareykur, tarirenqam.
40“Pim qamkunata chaskiyáshunki, noqatam chaskiman; i noqata chaskimaqqa kachamaqnítam chaskin. 41Pim chaskenqa juk profetata profeta kanqanreykur, profetapitam rantinninta chaskenqa; i pim chaskenqa juk justuta justu kaptin, justupitam rantinninta chaskenqa. 42I meyqanpis key ichikllankunata juk básu alalaq yakuta qoykonqa disípulu kanqanreykur, tseqeypam niyaq manam oqranqatsu premyunta.”
Kasalukuyang Napili:
MATEO 10: QUEAN
Haylayt
Ibahagi
Kopyahin
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Ftl.png&w=128&q=75)
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Quechua Ancash New Testament © Peruvian Bible Society, 1992.