LOS HECHOS 9
9
Saulo apyakmagkaso apwáxok
(Hch 22.6-16; 26.12-18)
1Axta elwáteseykmok Saulo apmáheyo elnápok énxet apteme nak melya'áseyam Wese' egegkok Jesús. Ekeso eñamakxa apmahágko axta Saulo aphakxa m'a apkemha apmonye nak appasmo apkelmaxnéseso Dios énxet'ák apagkok, 2apkelmaxnakkek axta weykcha'áhak apxawayol'a énxet yakwayam emhagkok apchakneykekxexa énxet'ák judíos ma'a tegma apwányam Damasco, yakwayam enxoho elchetmok ma'a énxet'ák ektaha axta apkelyetlo ámay axnagkok, énxet'ák tén han kelán'ák, yakwayam enxoho nahan elmok enaklakxak ma'a Jerusalén. 3Xama axta apwokmo Saulo keto' tegma apwányam Damasco, pelakkasek axta ekweywento elseyexma eñama néten eyahapwa'a Saulo. 4Apteyekmek axta náxop Saulo, apleg'ak axta anhan ektaha amya'a apcháneyákpo s'e: “Saulo, Saulo, ¿Yaksak ektaha seyakmásencha'a nak xép?”
5Aptahak axta apkelmaxneyeyncha'a Saulo s'e: “¿Wese', yaksak exchep?” Entahak axta amya'a kélategmowágko s'e: “Ko'o Jesús, neykhe s'e apyakmáseyncha'a nak xép.” 6Etnamha, emhok ma'a nepyeseksa tegma apwányam nak; sat kóltennaksek eyéméxchexa nak etnehek xép ma'a.
7Apkelyegwakkek axta m'a ektaha axta apkelxegexma'a Saulo, hakte apkelleg'ak axta m'a ektahakxa axta kélpeywa, axta eyke ét'ak ma'a ektaha axta ekpakmeyesma. 8Keñe axta apkempákxo néten Saulo. Xama axta apmoko elyaheykha, axta ét'axma'. Keñe axta kélma apmék kélyentama m'a tegma apwányam Damasco. 9Antanxo ekhem axta aphakmok ma'a meyke apwetéxma, tén han meto apto, tén han meya yegmen xama enxoho.
10Apheyk axta Damasco xama énxet apwesey axta Ananías, apteme axta mey'áseyam Wese' egegkok, cham'a apxekmowáseykpoho axta Wese' egegkok tén han aptaha apcháneya s'e: “¡Ananías!” Aptahak axta apchátegmowágko Ananías se'e: “Wese', keso sekha s'e.”
11Aptahak axta apcháneya Wese' egegkok se'e: “Etnamha, emhok hana ámay eltamhomaxko nak ámay ekpéwomo. Apwokmek sat agkok Judas apxagkok, etegyaha sat apwesey xama énxet apkeñama nak Tarso, apwesey nak Saulo. Aptemék nempeywa nelmaxnagko m'a énxet nak. 12Máxa axta apwanmagko Saulo apwet'a apyepetchegwokmoho xama énxet apwesey Ananías, tén han apnegkena apmék apyetseksek yakwayam enxoho étekxaxma.”
13Xama axta apleg'a Ananías xa, aptahak axta s'e: “Wese', apxámok énxet'ák seltennaso ko'o aptémakxa m'a énxet nak, eltennáseykha nahan ekyókxoho aksok ekmaso apkelané Saulo m'a tegma apwányam Jerusalén apkenmexma m'a xép énxet'ák apagkok apkelpagkanamap nak. 14Apwa'ak eyke kaxwo' Saulo s'e yetlo apxawé yakwayam enaklakxak sẽlpextétamakxa apyókxoho énxet apwóneykha nak xép apwesey, eñama apkeltémo m'a apkelámha apmonye'e nak appasmo apkelmaxnéseso Dios énxet'ák apagkok.”
15Wánxa agkok, aptahak axta Wese' egegkok apcháneya Ananías se'e: “Etyánegwomho, ko'o axta selyéseykha m'a énxet nak yakwayam enxoho eltennasha sekwesey m'a énxet'ák apheykha nak mók nekha, tén han ma'a kelwese'e apkelwányam apagkok nak, tén han eltennasha m'a énxet'ák Israel. 16Axekmósek sat ko'o yakwánxa katnehek ekyawe aplegeykegkoho m'a énxet nak, ko'o eñamakxa.”
17Apmahágkek axta Ananías ma'a tegma aphakxa axta Saulo. Xama axta aptaxnegwokmo m'a, apnegkenchek axta apmék apyetseksek Saulo. Aptahak axta apcháneya s'e:
—Eyáxeg Saulo, Wese' egegkok Jesús eyáphásak ko'o yakwayam enxoho éteyekxaxma exchep, tén han elánhok apwáxok Espíritu Santo, cham'a Jesús apxekmowáseykpoho axta náxet ámay neyseksa apxegayam.
18Yetlókók axta ekleyamaxche aksok elapma apakta'ák Saulo, máxa axta m'a kelasma empe'ékla'a. Apwetakxeyk axtaxma Saulo. Keñe axta apkempákxo néten, kélyakpásesek axta yegmen. 19Aptaweykxeyk axta apto, apmákxeyk axta nahan ekyenneykha apyempehek. Yakwatakxoho axta nahan aphákxak xamo' énxet'ák melya'áseyam Jesús apheykha m'a Damasco.
Saulo apkeltenneykha tegma apwányam Damasco
20Apchénawók axta apkeltenneykha Saulo apchakneykekxexa judíos apxéna Jesús aptaha Dios Apketche. 21Pelakkasek axta apkelwet'a m'a énxet'ák ektaha axta apháxenmo apkeltenneykha. Aptahak axta anhan apkelpakmeta s'e:
—¿Háweya apmenxeneykencha'a axta énxet tegma apwányam Jerusalén xa, cham'a énxet ektaha nak apkelwóneykha apwesey Jesús? ¿Háweya apwa'a axta apmoko elmok énxet ektaha nak melya'áseyam Jesús apwesey xa, apmoko axta elmések ma'a apkelámha apmonye'e nak appasmo apkelmaxnéseso Dios énxet'ák apagkok?
22Apkeltennáha axta Saulo yetlo megyeye, apxénchek axta Jesús aptaha nakso' Mesías. Apkenatchesek axta apwet'a énxet'ák judíos.
Saulo apxegányam nepyeseksa énxet'ák judíos
23Nano' axta entemék ekhémo mók apkelpakmeyesma énxet'ák judíos yakwayam yakhek Saulo. 24Apleg'ak axta eyke amya'a Saulo. Yókxoho ekhem, yókxoho axta'a axta apchakneykha énxet'ák átog nenteyapmakxa tegma apwányam yakwayam yakhek Saulo, 25wánxa agkok, hówenak apxagkok ekyawe axta eyke kélakxegkásak Saulo, kélweykesanteyk axta náxop kélyeykhasa m'a tegma apwányam kélhaxtegkeso nak nepyáwa. Enxet'ák melya'áseyam Jesús axta apchakxegkeso. Cháxa ektahakxa axta apxeganakmo Saulo xa.#2 Co 11.32-33.
Saulo apweykekxa tegma apwányam Jerusalén
26Xama axta apwákxo Saulo tegma apwányam Jerusalén, apmokók axta eykhe epáxakwók neyseksa apchakneykekxa énxet'ák apteme nak melya'áseyam Jesús; wánxa agkok, apyókxoho axta eyke apkelakak, hakte apkelya'ásekmek axta énxet'ák aptaha nahan mey'áseyam Saulo m'a Jesús. 27Bernabé axta eyke apyentamak Saulo apxekmósakmo m'a énxet'ák seykha amya'a. Apkeltennáseyha axta Bernabé énxet'ák seykha amya'a apwetaya Saulo Wese' egegkok Jesús náxet ámay, tén han appakhetchesama, apkeltennáseyha axta anhan apkeltenneykencha'a Saulo apxeyenma Jesús ma'a tegma apwányam Damasco yetlo megyeye. 28Aphákxeyk axta Saulo tegma apwányam Jerusalén, apkelxegexma'a axta aptahak xa énxet'ák apteme axta melya'áseyam Jesús. Apkeltennáha axta nahan cha'a Wese' egegkok apwesey yetlo megyeye. 29Axta eyenseykmok apkeltenneykha Saulo tén han apkelátegmomakpo cha'a m'a énxet'ák judíos apkelpakmeyesma nak griego appeywa; wánxa agkok, apkelenxanakmek axta eyke yakhek xa énxet'ák nak. 30Xama axta apkelya'ásegwokmo énxet'ák aptémo xamo' melya'áseyam Jesús Saulo xa, kélyentamákxeyk axta tegma apwányam Cesarea Saulo, axta kéláphásamhok kéltamho emhagkok Tarso m'a.
31Méko axta eyke ektahakxa apwáxók apchakneykekxexa énxet ekyókxoho yókxexma Judea, tén han ma'a Galilea, tén han ma'a Samaria. Yáwegkek axta apkelya'ásegwayam eñama nak Dios. Apcháyo axta anhan aptamheykegkok Wese' egegkok Jesús. Espíritu appasmo axta keñamak apxámagko énxet apteme melya'áseyam Jesús.
Eneas kéltakmelcheseyam
32Apwenchámeykha axta cha'a Pedro aptéma meyk'a aptémo xamo' nak melya'áseyam Jesús, apkelteyánegwokmók axta anhan énxet'ák apteme axta melya'áseyam Jesús apheykha m'a tegma apwányam Lida. 33Axta apwetágwomhok xama énxet apwesey axta Eneas ma'a ekweykmo axta ocho apyeyam apyetno néten aptaháno. Megkamopwána eltakheykha axta m'a. 34Aptahak axta apcháneya Pedro s'e:
—Eneas, Jesucristo aptakmelchesekmok xép. Etnamha, elánekxa aptaháno.
Yetlókók axta apkempeykekxa néten Eneas. 35Apyókxoho énxet axta apwet'ak apkempákxo néten, cham'a apheykha nak tegma apwányam Lida, tén han ma'a Sarón. Aptemék axta anhan melya'áseyam Wese' egegkok Jesús.
Dorcas ekxátekhágwayam
36Heyk axta nahan xama kelán'a ekteme axta megkay'áseyam Wese' egegkok ma'a tegma apwányam Jope ekwesey axta Tabitá apkeltéma axta griego appeywa Dorcas. Tásek axta ektémakxa xa kelán'a nak, pasmomchek axta cha'a énxet ekha nak eyéméxchexa aksok. 37Chakhémok axta nahan ekháxamáxko Dorcas ma'a, ketsekkek axta anhan. Kélpekkenwokmek axta kañe' tegma netno' natámen kélyenyéseso ekyókxoho empehek. 38Keto' axta Jope m'a tegma apwányam Lida, cham'a apwánxa axta Pedro m'a; Xama axta apkelya'ásegwokmo énxet'ák melya'áseyam Jesús apha Pedro m'a, kéláphásek axta apkánet énxet yakwayam enxoho etnehek yának Pedro s'e: “Epekhaksoho sat emyekxak xép ma'a tegma apwányam Jope.”
39Apkelyetlákxeyk axta Pedro xa énxet'ák nak. Xama axta apkelwákxo m'a, kélyentamákxeyk axta Pedro kañe' tegma netno' ekyetnakxa axta ápak xa kelán'a nak; wakha'ak axta kelán'ák tampe' apkenmágkaxa Pedro. Kellekxagweyha axta ekxekmósa Pedro m'a apáwa tén han ma'a apáwa kéltaxno elané axta Dorcas ekyennaktamakxa. 40Apkelántekkesek axta Pedro yókxexma apyókxoho énxet apchaknákxo axta m'a, apkeltekxekkek axta aptapnák xóp aptaha nempeywa nelmaxnagko; keñe axta apkelano m'a kelán'a ápak, aptahak axta s'e:
—¡Tabitá, kampekxa néten!
Kelyaháha axta xa kelán'a nak. Xama axta ekwet'a Pedro, hákxeyk axta néten. 41Apmeyk axta ámek Pedro xa kelán'a nak, apkempáseykxeyk axta néten; keñe axta apkeláneyeyncha'a m'a énxet'ák apteme axta melya'áseyam Jesús, tén han ma'a kelán'ák tampe', yennakxók agko' axta apxekmowasékxo Pedro énxet'ák xa kelán'a nak. 42Legáxchek axta amya'a ekyókxoho tegma apwányam Jope, apxámok axta anhan énxet apteme melya'áseyam Wese' egegkok. 43Néwomók axta apha Pedro nepyeseksa tegma apwányam, xama énxet apkelané aksok empehek apxagkok axta aphak, apwesey axta Simón.
Kasalukuyang Napili:
LOS HECHOS 9: LEGN
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Lengua Sur (Enxet) New Testament © United Bible Societies, 1992.