Luka 22

U b'a fɛ ka Yezu faga

(Mat 26.1-5,14-16; Mar 14.1-2,10-11)

1 *Buru funubali ɲanagwɛ, min tɔgɔ ko *Hɔrɔnya ɲanagwɛ fana, o tun surunyana. 2Sarakalasebagaw kuntigiw ni sariya karamɔgɔw bena se ka Yezu faga cogo min na ni jama ma bɔ a kala ma, u tun b'o cogo ɲinina bari u tun be siran ko jama bena muruti.

Zuda ka kɛta

3O tuma na, Zuda min be wele Isikariyɔti n'o ye kalanden tan ni fila nunu dɔ ye, Sutana y'a daminɛ k'o hakili yɛlɛma. 4A tagar'a fɔ sarakalasebagaw kuntigi ni Alabatosoba kɔlɔsibagaw kuntigiw ye ko cogo b'ale fɛ ka Yezu don u bolo. 5O diyara u ye kosɔbɛ. U bɛnn'a la k'u bena wari hakɛ dɔ d'a ma. 6Zuda sɔnna. A y'a daminɛ ka cogoɲuman ɲini waasa k'a don u bolo ni jama ma bɔ a kala ma.

Yezu b'a ka kalandenw fila ci

(Mat 26.17-19; Mar 14.12-16)

7 *Buru funubali ɲanagwɛ loon nana se. Sagaden tun ka kan ka faga o loon ka kɛ *Hɔrɔnya ɲanagwɛ saraka ye. 8Yezu y'a fɔ Piyɛri ni Zan ye k'u ka taga Hɔrɔnya ɲanagwɛ dumuni labɛn u ye.

9U y'a ɲininga ko: «I b'a fɛ an k'o labɛn yɔrɔ jumɛn?»

10A y'u jaabi ko: «Aw dontɔ dugu kɔnɔ, aw ni cɛɛ dɔ bena ɲɔgɔn kunbɛn, duun fanin be jii la a kunna. Aw ka tugu o cɛɛ nin kɔ. N'a donna luu min kɔnɔ, aw ye don yen, 11k'a fɔ o lutigi ye ko karamɔgɔ ko a n'a ka kalandenw bena Hɔrɔnya ɲanagwɛ dumuni kɛ boon min kɔnɔ, k'o be min. 12A bena bonba dɔ yira aw la sangaso la. An mako bena se fɛɛn minw ma, o bɛɛ b'a kɔnɔ. Aw ka ɲanagwɛ dumuni nin labɛn o yɔrɔ la.»

13Piyɛri ni Zan tagara. Yezu tun y'a fɔ u ye cogo min na, a kɛra ten fana. U ye Hɔrɔnya ɲanagwɛ dumuni labɛn yen.

Jɛnɲɔgɔnyakura layidu

(Mat 26.26-29; Mar 14.22-25; Kor fɔlɔ 11.23-26)

14Dumuni kɛtuma sera minkɛ, Yezu n'a ka ciden tan ni fila sigira dumuni na. 15A y'a fɔ u ye ko: «Ne tun b'a fɛ kosɔbɛ ka *Hɔrɔnya ɲanagwɛ nin dumuni kɛ n'aw ye sanni ne be tɔɔrɔ, 16bari ne b'a fɔ aw ye ko ne tena Hɔrɔnya ɲanagwɛ wɛrɛ dumuni kɛ tugu fɔɔ a dumukun ka dafa Ala ka masaya kɔnɔ.» 17O tuma na, a ye duvɛn ta ka barika la Ala ye k'a fɔ ko: «Aw k'a minɛ k'a min, 18bari ne b'a fɔ aw ye ko ne tena duvɛn min tugu ni Ala ka masaya ma se.»

19O kɔ, Yezu ye buru ta ka barika la Ala ye. A y'a tilantilan k'a d'u ma k'a fɔ ko: «Nin ye ne fari ye [min bena kɛ saraka ye aw ka nafa kosɔn. Aw ye to ka nin kɛ k'aw hakili to ne la.» 20Dumuni kɛnin kɔ, a ye duvɛn fana ta ka barika la Ala ye. A y'a di u ma k'a fɔ ko: «Nin ye ne joli ye, Ala be jɛnɲɔgɔnyakura sigi ni min ye. O joli nin bena bɔn aw ka nafa kosɔn.]

Yezu b'a janfabaga koo fɔ

(Mat 26.20-25; Mar 14.17-21)

21«Mɔgɔ min bena ne don mɔgɔjuguw bolo, o tigi be dumuni kɛra ni ne ye. 22Tiɲɛ lo, Mɔgɔ Dencɛ bena sa i n'a fɔ a latigɛra cogo min na, nga min ben'a don u bolo, bɔnɛ bena o tigi sɔrɔ.»

23Kalandenw y'a daminɛ ka ɲɔgɔn ɲininga k'o bena kɛ jɔn ye u cɛma.

Ɲamɔgɔ ka kɛ i n'a fɔ jɔɔn ye

(Mat 18.1; 20.25-28; Mar 9.34; 10.42-45)

24 # Luka 9.46 Kalandenw y'a daminɛ ka ɲɔgɔn sɔsɔ kosɔbɛ, bari u tun b'a fɛ k'a lɔn ni mɔgɔ min ye ɲamɔgɔ ye u cɛma. 25Yezu y'a fɔ u ye ko: «Siyaw ka masacɛw be kuntigiyakow kɛ tɔw la, ani fanga be minw bolo, olu b'a fɛ u k'u tɔgɔɲuman fɔ. 26#Mat 23.11; Mar 9.35 Nga aw ta man kan ka kɛ ten. Mɔgɔ min ye mɔgɔbaba ye aw cɛma, o tigi k'a yɛrɛ kɛ i n'a fɔ aw bɛɛ la dɔgɔ. Fanga be min bolo, o tigi k'a yɛrɛ kɛ aw ka baaraden ye. 27#Zan 13.12-15 Mɔgɔ min be dumuni labɛnna an'a be di min ma wo, jɔn le ye mɔgɔbaba ye u fila cɛma? Dumuni be di min ma, o tɛ wa? Ayiwa, ne be aw cɛma i n'a fɔ jɔɔn.

28«Aw kɔni muɲuna ka to ne fɛ n ka sigɛnw waati la. 29O le y'a to, ne Faa ye masaya di ne ma cogo min na, ne fana b'a di aw ma ten, 30#Mat 19.28 janko aw ka dumuni kɛ ka minni kɛ ne ka masaya la, ani ka sigi masasigilanw kan ka Isirayɛli ka deen tan ni fila kɔmɔgɔw kiti.»

Yezu ko Piyɛri ben'a fɔ ko a t'ale lɔn

31Yezu y'a fɔ ko: «Simɔn, Simɔn, Sutana ye sira ɲini waasa k'i yuguyugu i n'a fɔ mɔgɔ be mugu tɛntɛn cogo min na, 32nga, ne ye Ala daali i ye waasa i ka lanaya kana cɛn. N'i segira ne ma tuma min na, e k'i tɔɲɔgɔnw dɛmɛ.»

33Piyɛri y'a fɔ a ye ko: «Matigi, hali ni ne ka kan ka fara i kan u k'an don kaso la, walima u k'an faga, ne be sɔn.»

34Nga Yezu y'a fɔ a ye ko: «Piyɛri, ne b'a fɔ i ye ko dondo tena kasi bii n'i m'a fɔ ko i te ne lɔn fɔɔ siɲɛ saba.»

Yezu ko ni kɛlɛkɛminan te min fɛ, o ka dɔ san

35 # Mat 10.9-10; Mar 6.8-9; Luka 9.3; 10.4 O kɔ, Yezu y'a fɔ a ka kalandenw ye ko: «Ne y'aw ci tuma min na k'a fɔ aw ye ko aw kana taga ni wari ni dugutagaminan ani sanbara ye, fɛɛn dɔ ye aw dɛsɛ wa?»

U y'a jaabi ko foyi m'u dɛsɛ. 36A y'a fɔ u ye tugu ko: «Nga sisan, ni wari be min fɛ, a k'a ta. O cogo kelen la fana, ni dugutagaminan be min fɛ, a k'a ta. Ni murujan te min fɛ, a k'a ka nɛnɛdeleke feere ka dɔ san. 37#Eza 53.12 Ne b'a fɔ aw ye, Ala ka kuma ye min fɔ ne ka koo la ko: ‹U y'a jati kojugukɛlaw dɔ ye,› wajibi lo o ka kɛ. Ayiwa, o tuma surunyana.»

38Kalandenw y'a fɔ a ye ko: «Matigi, murujan fila filɛ.»

A y'u jaabi k'o ka ɲi ten.

Yezu be taga Ala daali kulu dɔ kan

(Mat 26.36-41; Mar 14.32-38)

39Yezu bɔra ka taga Olivuyirikulu kan i n'a fɔ a tun be deli ka taga cogo min na. A ka kalandenw tugura a kɔ. 40A sera o yɔrɔ la tuma min na, a y'a fɔ u ye ko: «Aw ka Ala daali waasa aw kana don kɔrɔbɔli la.»

41O kɔ, a bɔra u kɔrɔ dɔɔni ka se bɛrɛ filiko kelen jaɲa ma. A y'a kunbiri gwan k'a daminɛ ka Ala daali ko: 42«Ne Faa, n'i b'a fɛ, i ka ne kisi tɔɔrɔ nin ma, nga ne sago kana kɛ fɔɔ e sago.» [ 43O tuma na, mɛlɛkɛ dɔ bɔra sankolo la k'a yɛrɛ yira a la, ka barika don a la. 44Yezu nii tɔɔrɔnin tun bɛ. A ye dɔ fara Ala daali kan. A wasiji ɲaa kɛra i n'a fɔ joli n'o be tɔnitɔni duguma.]

45A ye Ala daali ka ban tuma min na, a wilila ka segi ka na kalanden nunu fɛ ka u sɔrɔ sinɔgɔ la ɲanafinkojugu bolo. 46A y'a fɔ u ye ko: «Mun na aw be sinɔgɔ? Aw ye wili ka Ala daali waasa aw kana don kɔrɔbɔli la.»

Yezu minɛko

(Mat 26.47-55; Mar 14.43-49; Zan 18.2-11)

47Ka Yezu to kuma na, Zuda min tun ye kalanden tan ni fila nunu dɔ ye, ale bilara jama ɲa ka na. A gwɛrɛla Yezu la ko a b'a fo. 48Nga Yezu y'a fɔ a ye ko: «Zuda, i be Mɔgɔ Dencɛ don mɔgɔjuguw bolo ni foli le ye wa?»

49Mɔgɔ minw tun be ni Yezu ye, koo min bena kɛ, olu y'o faamu minkɛ, u ye Yezu ɲininga ko: «Matigi, an ka murujanjanw ta u kama wa?» 50U dɔ ye sarakalasebagaw kuntigiba ka baaraden kinibolo tulo caron.

51Nga Yezu y'u jaabi ko: «Aw k'a dan nin ma.» A magara o jɔncɛ tulo la k'a kɛnɛya.

52O kɔ, sarakalasebagaw kuntigiw ni Alabatosoba kɔlɔsibagaw kuntigiw ani cɛkɔrɔba minw tun tagara k'u b'a minɛ, a y'a fɔ olu ye ko: «Aw nana ne kama ni murujanjan ni berew ye i n'a fɔ ne ye benkannikɛla ye. 53#Luka 19.47; 21.37 Ne tun be n'aw ye loon o loon Alabatosoba kɔnɔ waati min na, aw ma ne minɛ, nga sisan ye aw ka waati ni dibi ka setigiya tuma ye.»

Piyɛri ko a te Yezu lɔn

(Mat 26.57-58; Mar 14.53-54; Zan 18.12-18)

54U ye Yezu minɛ ka taga n'a ye sarakalasebagaw kuntigiba ka luu kɔnɔ. Piyɛri tugura u kɔɔ ka furancɛba to u ni ɲɔgɔn cɛ. 55Mɔgɔw tun ye tasuma mana luu cɛmancɛ la ka sigi a daa la. Piyɛri tagara sigi olu cɛma.

56Ka Piyɛri siginin to tasuma daa la, jɔnmuso dɔ y'a ye, a y'a ɲaa basa a la k'a fɔ ko: «Cɛɛ nin fana tun be ni Yezu ye.» 57Piyɛri ye muso sɔsɔ k'a fɔ ko: «Ne t'a lɔn.» 58Waati dɔɔni o kɔ, cɛɛ dɔ fana y'a ye k'a fɔ a ye ko: «Ele fana ye u dɔ ye.» Nga Piyɛri ye cɛɛ jaabi ko: «Ne te u dɔ ye.» 59Lɛrɛ kelen ɲɔgɔn tɛmɛnin kɔ, cɛɛ dɔ wɛrɛ segira k'a fɔ ko: «Siga t'a la, cɛɛ nin tun be ni Yezu ye bari Galileka lo.» 60Nga Piyɛri y'a jaabi ko: «E be min fɔra, ne t'o faamu.» K'a to o kuma na, o yɔrɔnin bɛɛ dondo kasira. 61Matigi y'a ɲaa yɛlɛma ka Piyɛri filɛ. Piyɛri hakili jigira a ka kuma na, a tun ye min fɔ a ye ko: «Sanni dondo bɛ kasi bii, i ben'a fɔ fɔɔ siɲɛ saba ko i te ne lɔn.» 62Piyɛri bɔra kɛnɛma ka kasi kosɔbɛ.

63Yezu kɔlɔsibagaw tun be yɛlɛ a ma n'u b'a bugɔ. 64U tun y'a ɲaa siri ka sɔrɔ ka to k'a bugɔ, ani k'a ɲininga ko: «Jɔn y'i bugɔ?» 65U ye kumajugujugu wɛrɛw fɔ a ma.

Yezu be zuwifuw ka kiti tigɛyɔrɔ la

(Mat 26.59,63-65; Mar 14.55,61-64)

66Dugu gwɛra tuma min na, dugu cɛkɔrɔbaw, ni sariya karamɔgɔw ani sarakalasebagaw kuntigiw ye ɲɔgɔn lajɛn. U tagara ni Yezu ye u ka kititigɛlaw fɛ waasa k'a kiti. 67U y'a fɔ a ye ko: «N'i ye Ala ka Mɔgɔ wolomanin nin ye, a fɔ an ye.» Yezu y'u jaabi ko: «Ni ne y'a fɔ aw ye, aw tena la a la. 68Ni ne y'aw ɲininga fana, aw tena ne jaabi. 69Nga, kabini sisan, Mɔgɔ Dencɛ bena sigi Setigi Ala kinibolo fɛ.» 70U bɛɛ y'a fɔ ko: «O tuma na, e ye Ala Dencɛ ye wa?» A y'a fɔ u ye ko: «Aw yɛrɛ y'a fɔ ko ne lo.» 71U y'a fɔ ɲɔgɔn ye ko: «An mako te mɔgɔ ka seereya la tugu ka sɔrɔ k'a jalaki, bari an yɛrɛw y'a dalakuma mɛn.»

Kasalukuyang Napili:

Luka 22: AKKDC08

Haylayt

Ibahagi

Kopyahin