Luka 21
21
Firiyamuso ye wari don kɛsu kɔnɔ
(Mar 12.41-44)
1Ka Yezu to Alabatosoba kɔnɔ, a ye nafolotigiw ye n'u be wari donna Alabatosoba kɛsu kɔnɔ. 2A ye firiyamuso dɛsɛbagatɔ dɔ fana ye n'a be tama fila donna yen. 3O tuma na, Yezu y'a fɔ ko: «Tiɲɛ na, ne b'a fɔ aw ye ko firiyamuso dɛsɛbagatɔ nin ye wari min don kɛsu kɔnɔ, o ka ca ni tɔw bɛɛ ta ye, 4bari olu mako te se u ka nafolo min ma, u ye dɔ bɔ o le la k'o don, nga ale kɔni n'a ka fantanya bɛɛ, min tun b'a kun ka kɛ dumunisɔngɔ ye, a y'o bɛɛ don.»
Yezu be Alabatosoba ciko fɔ
(Mat 24.1-2; Mar 13.1-2)
5O kɔ, mɔgɔ dɔw tun be kumana Alabatosoba koo la, ko a lɔra ni dakamana kabakuruw ye, ko a masirinin be ni fɛnɲumanw ye, mɔgɔw tun ye minw di ka Ala boɲa n'o ye. O la, Yezu ko: 6«Aw ɲaa be fɛɛn min na, loon dɔ bena se, o kabakuru si tena to a tɔɲɔgɔn kan, u bɛɛ bena walaka.»
Laban tuma taamasiɲɛw
(Mat 24.3-8; Mar 13.3-8)
7U ye Yezu ɲininga ko: «Karamɔgɔ, koo nunu bena kɛ tuma jumɛn? Taamasiɲɛ jumɛn ben'a yira k'o bena kɛ?»
8Yezu y'u jaabi ko: «Aw k'aw yɛrɛ kɔlɔsi janko mɔgɔ si kana aw fili. Bari caaman bena na ne tɔgɔ la k'a fɔ k'olu ye ne yɛrɛ ye, ko diɲɛ laban tuma surunyana. Aw kana tugu u kɔ. 9N'aw ye kɛlɛw ni jama murutiko mɛn tuma min na, aw kana siran. Wajibi lo o koow ka kɛ fɔlɔ, nga o tena kɛ diɲɛ laban ye o yɔrɔnin kelen.»
10O kɔ, a y'a fɔ u ye ko: «Siya dɔ bena wili siya dɔ wɛrɛ kama. Jamana dɔ bena wili jamana dɔ wɛrɛ kama. 11Dugukolo bena yɛrɛyɛrɛ kosɔbɛ yɔrɔ dɔw la. Fɔɲɔbanaw ni kɔngɔ bena don yɔrɔ dɔw la fana. Jatigɛkow ni taamasiɲɛbabaw bena ye sankolo la.
12«Nga sanni o koow bɛɛ ka kɛ, mɔgɔw bena aw minɛ k'aw tɔɔrɔ kosɔbɛ. U bena aw don kalanso kuntigiw bolo k'aw don kaso la. U bena taga n'aw ye masacɛw ni jamanatigiw fɛ ne kosɔn. 13O bena kɛ sababu ye, aw be ne koo fɔ u ye. 14#Luka 12.11-12 Aw k'aw hakili to a la ko aw man kan ka jɔɔrɔ aw ka fɔta la u ɲakɔrɔ, 15bari ne yɛrɛ bena hakilitigiya kuma don aw daa la fɔɔ aw jugu si tena se k'aw sɔsɔ, walima k'aw ka kuma kɔɔ kari. 16Hali aw wolobagaw, n'aw badenw, n'aw balimaw, an'aw teriw yɛrɛ, olu bena aw don aw juguw bolo k'aw dɔw faga. 17Mɔgɔ bɛɛ bena aw kɔniya ne tɔgɔ kosɔn. 18Nga hali aw kunsigiden kelen tena tunu. 19Aw ka muɲuli ben'a to aw bena hɛrɛ sɔrɔ Ala fɛ sini.
Zeruzalɛmu halakiko
(Mat 24.15-21; Mar 13.14-19)
20«N'aw y'a ye ko Zeruzalɛmukaw juguw ka kɛlɛbolo ye dugu lamini tuma min na, aw k'a lɔn ko a halakituma sera. 21O tuma na, mɔgɔ minw be Zude mara la, olu ka boli ka taga kuluyɔrɔw la. N'o ye minw sɔrɔ Zeruzalɛmu kɔnɔ, olu ka boli ka bɔ. Minw be kongo kɔnɔ, u kan'a fɔ k'u bena u yɛrɛ sutara Zeruzalɛmu kɔnɔ, 22#Oze 9.7 bari a waati bena kɛ kojuguw juru sarawaati ye. Kiraw tun ye min fɔ, o bɛɛ bena kɛ, hali foyi ten'o jɛn. 23O waati la, musokɔnɔmanw ani minw deen be siin min, olu bena tɔɔrɔ kosɔbɛ, o tɔɔrɔ nin bena se Isirayɛli jamana mɔgɔw ma, bari Ala ben'a yira u la ko a dimina u kɔrɔ. 24U bena dɔw faga ni murujanjan ye, ka dɔw minɛ ka taga u kɛ jɔɔnw ye siya wɛrɛw cɛma. Siya minw te siran Ala ɲa, olu bena Zeruzalɛmu halaki pewu fɔɔ sarati min tun dira u ma, o ka dafa.
Mɔgɔ Dencɛ ka segiko
(Mat 24.29-31; Mar 13.24-27)
25 #
Eza 13.10; Eze 32.7; Zow 3.4; Yir 6.12-13 «Tile, ni kalo, ani lolow bena kɛ cogo dɔ la. Kɔgɔji bena mankanba kɛ, siyaw kɔnɔ bena gwan, u dabari bena ban. 26Mɔgɔ caaman bena sa jatigɛkojugu bolo, kabako miiri kosɔn minw be nana kɛ dugukolo kan. Sankolofɛnw bena ɲagami ɲɔgɔn na. 27#Dan 7.13; Yir 1.7 O tuma na, mɔgɔw bena Mɔgɔ Dencɛ natɔ ye sankabaw cɛma ni sebagaya ni nɔɔrɔ ye. 28N'o koow daminɛna ka kɛ tuma min na, aw ka dɔ fara aw jigi n'aw ka jagwɛlɛya kan, bari aw hɔrɔnyali waati sera.»
Yezu ka kuma tena cɛn abada
(Mat 24.32-35; Mar 13.28-31)
29O kɔ, Yezu ye talen dɔ la u ye ko: «Aw ka torosun ni yiri tɔw bɛɛ filɛ. 30N'aw y'a ye u bolow daminɛna ka nugu tuma min na, aw b'a lɔn ko samiɲa surunyana. 31O cogo kelen la, aw mana o koow kɛtɔ ye tuma min na, aw k'a lɔn ko Ala ka masaya waati surunyana.
32«Tiɲɛ na, ne b'a fɔ aw ye ko bii mɔgɔw bɛɛ tena sa ni o koow bɛɛ ma kɛ. 33Sankolo ni dugukolo bena tɛmɛ, nga ne ka kuma tena tɛmɛ.
Yezu kɔsegiko
34«Aw k'aw yɛrɛw kɔlɔsi, aw kan'a to nugubagatɔya, ni dɔrɔtɔya, ani diɲɛ hamikow k'aw hakili ɲagami, n'o tɛ, laban loon bena bari aw la, 35bari o loon bena cun diɲɛ mɔgɔw bɛɛ kan i n'a fɔ jɔɔ be fɛɛn minɛ cogo min na. 36Aw ye jija ka Ala daali tuma bɛɛ, ka kɛ mɔgɔ timinadiyaninw ye, waasa aw ka se ka kisi o koo nataw bɛɛ ma, ani aw ka se ka lɔ Mɔgɔ Dencɛ ɲakɔrɔ.»
37Loon o loon tile kɔnɔ, Yezu tun be mɔgɔw kalan Alabatosoba kɔnɔ. Ni suu kora, a tun be bɔ ka taga si Olivuyirikulu yɔrɔ la. 38Sɔgɔmada joona, mɔgɔ bɛɛ tun be taga sɛgɛrɛ Alabatosoba kɔnɔ k'a lamɛn.
Kasalukuyang Napili:
Luka 21: AKKDC08
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
La Bible en Jula © Alliance Biblique du Burkina Faso, 2007.
