Lug 23
23
Baah ta Yisa dan Palati a nintogil man
(Matiu 27:1-2,11-14; Mag 15:1-5; Jɔnn 18:28-38)
1Le kulaguŋin biɛn nan fii ki ta Yisa jon Palati ban. 2Le bi nan piin ki galin u ke, “Ti kan uja nan le u be bei ti ninfob ke bi laa yɔ lampo ki tenn Siiza, ki ke u ma ye Masiya, ki ye ubɔr.”
3Le Palati baan Yisa ke, “Fin le ye Juu yaab a bɔru win naa?”
Le Yisa jiin ke, “Nn, ni ye ŋaah len man nan le.”
4Le Palati mɔɔn ki bei kumanug a yudamin nin kuninfogbaluŋin yaan ke, “Maa kan nan wee n li ta galin uja nan ni.”
5Amaa le bi le yii ke, “U wɔɔnim nmɔn che Judiya yaab a sufu fii le. U nan piin Galilii le ki nan kpa do.”
Baah ta Yisa jon Herɔd a nintogil man
6Palati kaah nan gbir man nin, le u baan ke u ye Galilii a ninfo lee? 7Waah nan nan biɛ ke Yisa nyan Herɔd a tinpaamin nin, le u nan che bi ta u jon Herɔd ban, wan mu nan be Jerusalam iyaayoo nmɔn ni.
8Herɔd kaah nan kan Yisa iyoo man, le u pool nan penn takpem, nan bu-n ni nan yuura le u ban un kan u. Waah nan gbir Yisa bu man nin, le u nan jɔɔ tama ke un kan waah yin tun ligaril a toon man. 9U nan baan Yisa ibinbaan pam; amaa le waa nan jiin u tiba. 10Kumanug a ninkpeeb nin ban wɔɔnn Uwonbɔr a siimin nan si niin, ki galin u nin inunman. 11Le Herɔd nin u tɔtogib nan daar u nyɔɔrug. Le ki nan ta daala ŋaŋ kan peen ki nyagin ki yeen u ki ta u jiin Palati ban. 12Lidaal nmɔn le Palati nin Herɔd choo tab kujɔtiig, amaa bi la nan ye ndataam le nin tab.
Baah sei npaan ke bin ku Yisa man
(Matiu 27:15-26; Mag 15:6-15; Jɔnn 18:39—19:16)
13Le Palati nan yin biminmanib a yudam nin Juu yaab a yudam nin bininfobin, 14le ki bei bi ke, “Ni ta uninfo nan dan ki ke u lar bininfob le bi kɔnn bininkpeeb a bɔr. N baan u tibɔr ni numin na le kaa kan igalin yan wee ni ke u tun nmɔn ni. 15Herɔd mu kaa kan u galin yi. Ni ma bu le u jiin u ki tenn ti; ni kan ke waa ŋa niba, wee ni foo nin un kpo. 16Mambu n li dar u tul wee ki jaau.”
17 # 23:17 Chinchinn a sɔbim nin nsɔbim man wee ti num gbee mu terim ki kpiɛ bitinkpegib a siɛra jib kaa jɔɔ Lug 23:17. Yuglagir a chiig libinl biɛn nin ke, Palati ti nyann baah loon ban nin a ni uba le ki jaa.
18Le kuninfogbaluŋin tiɛn nmɔpɔɔn ke “Kum uja nmɔn na! Wee ki nyan Barabasi ki sei ti!” 19(Bi nan ta Barabasi ki jaa kuloondiigin u mɔyiil nin u ninfo kul kitiŋ nmɔn yaan bu le.)
20Palati kaah nan ban un nyan Yisa jaa-n le u ji nan balin bininfobin. 21Amaa le bi le nan gbaa tann ke, “Kpaamu lidapunpunl bu! Kpaamu lidapunpunl bu.”
22Le u ji nan pag kpiɛ nfim mitaa ke: “Ba ŋaa? Uja nan le tun igalin ila baa? Maa kan nan wee u tun wee ni foo nkum a tudaril li. Mambu n li che bin dar u tul wee ki jaau.”
23Amaa le bi nan ta titintann ki yii ke bi le ban bin kpaa u lidapunpunl bu le, le bi tintann nmɔn nan nyaŋ Palati. 24Le u nan chee ki ŋa baah ban man nin. 25Le ki nan nyan uja wan bininfob nan ban nin, wan bi nan ta jaa kuloondiigin u limɔyiil nin uninfo kul nbu-n, ki sin nan jaa Yisa ki sei bi ke bin ŋa u baah ban man.
Baah kpa Yisa lidapunpunl bu man
(Matiu 27:32-44; Mag 15:21-32; Jɔnn 19:17-27)
26Baah nan jɔɔ u ki chaa-n, le bi nan choo Simɔnn wan nan nyan Sarene a tiŋin ki chaa Jerusalam nan, le ki ta Yisa a dapunpunl ki bugin u, le ki che u nɔɔ Yisa a bɔɔn. 27Kuninfogbaluŋ mu nan nɔɔ Yisa a bɔɔn le, bipiib nan nɔɔ u ki mɔr tikpemɔr ki fabin u bu. 28Le Yisa nan tan gbiɛ lig bi ki bei ke, “Jerusalam a bisiɛm, ni laa mɔr n bu, ni li mɔr ni tɔɔl nin ni buwaab buu. 29Nan bu-n iyoo chaan le ni na li ke, ‘tikaar be bipiib ŋɔɔb, nin lipool lan kaa nyi ma kibig, nin ibii yan kaa la mɔɔn kibig bu!’ 30Le
‘bi ni na li bei ijɔɔ ke, “Ber ki lu ti bu ni!”
ki bei igungon ke, “Piin ti bu ni!” ’#Hozaya 10:8
31Nan bu-n ni ye bininfob ŋaan nan busub nan kaah la sɔɔn nan ke, bi ni nan koor ke ba ni yin ŋaa?”
32Bi nan ta bininfob bilee, ban nan ye bi naayigib, mu kpiɛ u bu ke bin tan ku bi. 33Baah nan tan foo nan yaan wee bi yi ke, kuyukpabug nan, nin yaan le bi nan kpaa u ma nin binaayigibin lidapunpunl bu, uba be u nɔɔjiim paam le uba mu be u nɔɔgam paam. 34Le Yisa ke, “N Baa, jiɛn bi bir ki per ba, nan bu-n baa nyi baah tun nan ni.” Le bi nan tɔn inaa ki por u wan yɔɔr.
35Le bininfob nan si ki lig, hali ke biyudam daar u nyɔɔrug. Bi nan ke, “U nan fee biba jaau; ni sin ye ke u ye Uwonbɔr a Masiya, Uninfo gannkaa-n, ke un fee u bau.”
36Le bitɔtogib mu nan donn ki nan daar u nyɔɔrug. Le ki sei u lidamunmɔŋil, 37le ki ke, “Ni ye a ye Juu yaab a bɔru ke, a fee a ba ki jaau.”
38Bi nan sɔb nsɔbim ki paan u yul bu, le ni karim ye: JUU YAAB A BƆR WIN SƆ.
39Le binaayigib ban nan jɔn niin nin a ni uba sugir Yisa ki ke, “Ŋaa ye Masiya lee? Fee a baa jaau ki fee ti mu.”
40Amaa le u kpiɛgin tiɛn ubu ki ke, “Ŋaa san Uwonbɔr aa? Nin taah be litudaril liba ni nan naa? 41Tim kan litudaril nin ibamɔn le, nan bu-n bi jiin ti toon kaah kpaan ti gaa man le. Amaa uja nan ma kaa tun tibir ti ba.”
42Le ki ke, “Yisa, “Iyoo man a nan kɔɔ a naam ni ke a tiɛr n bu.”
43Le Yisa jiin u ke, “N beiŋ ibamɔn le, dinan a li be n ban Uwonbɔr a niin.”
Yisa a kum a bɔr
(Matiu 27:45-56; Mag 15:33-41; Jɔnn 19:28-30)
44Ni nan ye nween a kurug piig nin tilee le, le libunbɔnl nan lu kitiŋ nmɔn biɛn bu ki tan kpaa kujɔɔg a kur titaa, 45nan bu-n nween kaa ji nan jɔɔ nwonween ni. Le likinkenl lan nan jɔn iwonjiɛn niin nin, nan choo bɔgir nfim milee. 46Le Yisa nan tiɛn nmɔpɔɔn ki ke, “N Baa, n ta n naaŋ ki ŋubin a nɔɔn na.” Waah nan len man ki diɛ-n le u foor u diɛm a foorug.
47Bitɔb a sanliiru kaah nan kan ni wan nan tun nin, le u nan don Uwonbɔr a yinl ki ke, “Ibamɔn uja nan ye ubuchin le.” 48Bininfob ban nan lagin bi nan ji siɛra-n biɛn kaah nan kan niwann nan sin tun nin, le bi jir chonn sulim sulim ki kun. 49Amaa ban nan nyi win, nin bipiib ban nan nɔɔ u ki nyan Galilii, nan si nan fɔg le, ki lig ni niɛ nan biɛn.
Baah pii Yisa man
(Matiu 27:57-61; Mag 15:42-47; Jɔnn 19:38-42)
50Uja uba nan be le u yinl ye Josef, u nan ye Juu yaab a laguŋ a ninfo wan ye ubamɔndaan le, 51waa nan chee bi lol nin bi ŋaari. U nan nyan Juu yaab a tiŋ kan bi nan yi ki ke Arimatiya le, ki nan guu Uwonbɔr a naamin a foom le. 52U nan jon Palati ban le ki tan gaa Yisa a gbanann. 53Le ki ta ti jiirin ki pɔbin ti kikinkenpeŋin, ki ta piin kikaapɔŋ kan wee bi nan chib ki kutangbapiigin wee baa la nyi ta uba pii niin nin. 54Ni nan ye sili daal le, le likpakɔɔl nan be piin.
55Bipiib ban nan nyan Galilii ki nɔɔ Yisa dan nin nan nɔɔ Josef ki tan kan kukaagin nin baah pii u man. 56Le bi nan jir kun ki tan ŋa sili ki ban tifar tan jɔɔ nbaam nin tulaali. Amaa le ki nan foor likpakɔɔl daal nmɔn, ke Uwonbɔr a siim kaah wɔɔn man nin.
Kasalukuyang Napili:
Lug 23: KUGL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Komba New Testament © Bible Society of Ghana, 2014.
