Lug 24
24
Nkum a fiim
(Matiu 28:1-10; Mag 16:1-8; Jɔnn 20:1-10)
1Nnyantoon a chinchinn a weem daal, kitaayɔg, le bipiibin nan taa tifar tan jɔɔ nbaam wee bi nan ban nin ki jon kukaagin yaan. 2Bi nan tan kan ki miin likaloolin choo loora, 3amaa baah nan tan kɔɔ-n, baa nan kan Uyudaan Yisa a gbanann ni. 4Baah nan si kaa ji nyi baah tiɛr man nin, le libol nmɔn yaan bijab bilee ban nan yee tiwanpenn tan nyagin nan sir bi ban. 5Le bijawaam nan choo bipiibin le bi gbaan tum ki tibin bi yuli, amaa le bijab bilee nmɔn baan bi ke, “Ba ŋa wee ni be ban wan fo bitakpiib a bol aa? 6Waa be do; u fiiu! Ni li tiɛr waah nan bei ni man, n-yonn man wee u la nan be Galilii ni ban ni: 7‘Ni kpaa le ke bin ta Uninfosaal a Big ki ŋa tibirdam a nɔɔn, le bi li kpaa u lidapunpunl bu, wee iween itaa daal ke un ji fii nkumin.’ ” 8Le bi nan tiɛr u mɔboi nmɔn.
9Baah nan nyan kukaag nmɔn yaan ki jir kun ni, le bi nan ta ni niɛ biɛn ki bei Itoon piig nin uba-n nin ban biɛn nan be niin ni. 10Meri wan nyan Magidalin, nin Joana, nin Meri wan nan ye Jemisi a na nan, nin ban nan be niin kpiɛ-n li nan tan bei Yisa a tooi nmɔn ni niɛ biɛn. 11Amaa baa nan ŋa bipiibin yada, nan bu-n bi mɔboi nan nann tibɔyɔɔr le bi ban. 12Amaa le Piita ma nan fii, ki guun ki jon kukaag nmɔn yaan. Waah nan tan bɔɔn ki ligin, le u kan ki miin kikinkenpeŋ nmɔn a binba li dɔ, le nan nan ŋa-n choo u ligaril, le u labir fɔr niin.
Emausi a sam bu a bɔr
(Mag 16:12-13)
13Lidaal nmɔn le bi bilee nan chaa kitiŋ kiba bi yi ki ke Emausi, ki ma nin Jerusalam nan ye maal ilile le. 14Bi nan choon ki pag nin tab niwann nan biɛn tun nin bu le. 15Baah nan chaa ki pag ni niɛ nan ni, le Yisa tɔɔl nan nan kpiir bi bu ki nan nɔɔ bi chaa; 16amaa Uwonbɔr kaa nan wonn bi num wee bi biɛ wi.
17Le u baan bi ke, “Ni choon ki pag baa a bɔr aa?”
Le bi baan sir, le bi num paam bii. 18Le bi ni uba, u yinl ye Kileopa, baan u ke, “A ye uchaan le ki be Jerusalam nan ki ma kaa gbir niwann nan tun niin iweehn ilelee nan naa?”
19Le u baan ke, “Wan ba ŋaa?”
Le bi jiin ke, “Yisa wan nyan Nazarif nan a bɔr, U nan ye ulinlenn le, ke u mɔboi nin u toon jɔɔ npɔɔn Uwonbɔr a nintogil nin bininfob biɛn ban. 20Le kumanug a yudam nin ti yudam nan ta u ki ŋa bibɔjib a nɔɔn ke bin ji u tibɔr ki ku u, le bi nan kpaa u lidapunpunl bu; 21amaa ti nan jɔɔ tama ke uma yin ŋa nkpenim a manug ki sei Iziral yaab. Amaa baah ŋa u man nmɔn a ween itaa sɔ dinan. 22Nan ji kpiɛ ye, ti piib biba mu bei ti tibɔr tiba le ti ŋa ti ligaril. Bi jon kukaag nmɔn yaan le kutaayɔg nan, 23amaa le baa tan kan u gbanann ni. Bi jirin ki nan bei ti ke, bi tan kan zii le ni ye malakam, le malakam nmɔn ke u be nin u miɛfol. 24Le ti ni biba jon kukaag nmɔn yaan, ki sin tan kan bipiibin kaah chinn ki bei ti man nin, amaa baa tan kan wi.”
25Le u bei bi ke, “Ba ŋa ni jɔr man naa, wee kaa ŋa Uwonbɔr a linlem kaah nan pag tibɔr tan nin biɛn yadaa? 26Naa ye ni kpaa le ke Masiya n ji fala nmɔn, wee ki nan kɔɔ u pagin naa?” 27Le waah nan piin Moziz a yonn ki tan kpaa Uwonbɔr a Linlemin, le u pag wɔɔn bi nan biɛn nan len nsɔbimin biɛn a poolin ki ta jiin u paam.
28Tɔ, baah nan tan mal kitinbig kan wee bi chaa-n, le Yisa ŋa ke u yin jo jo le-n. 29Amaa le bi nan bei u nin inunman ke, “Paar ti ban na, nan bu-n nween lu; le ni nin be nin bɔŋ le.” Le u nan nɔɔ bi ki kɔɔ ki tan be bi ban.
30Waah nan kal un ji bi ban nin, le u yuur boroboro ki sei Uwonbɔr kunɔɔpoog, le ki nan piin ki war tenn bi. 31Le bi num nin nan wonn le bi biɛ u. Le u bor bi ban, 32le bi nin bei tab ke, “Waah bi pag nsann ki wɔɔn ti tibɔr tan sɔb Uwonbɔr a gbɔŋin a taai yin, naa bi nann ke nŋmi le be ti sufu ni naa?”
33Le bi nan fii weem ki jir Jerusalam. Ki tan kan u tooi piig nin uba-n nin bibam kaah lagin ka, 34le ki len ke, “Ni ye ibamɔn le! Uyudaau sin fii nkumin na ki ta uba ki wɔɔn Simɔnn na.” 35Le bininfob bilee-n mu bei bi nan tun nsann, nin baah nan biɛ u, waah nan war boroboro n yonn man ni.
Yisa kaah degir u bɔɔnɔɔb bu man
(Matiu 28:16-20; Mag 16:14-18; Jɔnn 20:19-23; Litoonl 1:6-8)
36Baah la nan be pag ki jiin man paamin, le Yisa baantɔɔl nan nan sir bi sisiigin ki bei bi ke, “Nposɔɔn li be ni bu.”
37Le tiwar nin bijawaam choo bi, bi nan tiɛr ke bi kan utakpiir le. 38Le u baan bi ke, “Ba ŋa wee ni che ni mug naa, ba ŋa wee ni che nbiɛnim be ni ban naa?” 39Ni lig n nɔɔi nin n taai man. Ni ye nbaantɔɔl le! Ni maam wee ki lig; U takpiir kaa jɔɔ tigbanann nin ikpab ke naah kam wee n jɔɔ man nan ni.”
40Waah nan pag man ki diɛ le u wɔɔn bi u nɔɔi nin u taai. 41Baah kaa la nan ŋa yada npopeen nin ligaril bu-n, le u nan baan bi ke, “Ni jɔɔ tijiir doo ni ji?” 42Le bi yuur ujan ŋaakaa a wangenl ki ta sei u, 43le u gaa ki ŋman bi num min. 44Le ki bei bi ke, “Ni niɛ nan le n nan bei ni maah la nan be ni ban nin: Ni kpa le ke nan biɛn nan sɔb Moziz a siimin nin Bilinlem nin Ilan a gbɔŋin ni, ye nin gbeen le.”
45Le u nan loor bi potiɛl ke bin biɛ nan sɔb Uwonbɔr a mɔleen yin a taai. 46Le u bei ke: “Nan wee bi nan sɔb sɔ: Masiya-n li ji fala ki fii nkumin iween itaa daal, 47le nbinben a kpenim nin tibir a jiɛn per li mɔɔn u yinl bu ki piin Jerusalam ki sei ibol biɛn. 48Nim li ye ni niɛ nan a siɛradam. 49N yin sei ni nan wee n Baa nan siin limɔsiinl ke u li sei ni-n le; amaa ni laa nya kitiŋin yaan ni, ki li guu n-yonn man wee npɔɔn na li nya paab ki jiirin ki nan piin ni bu.
Uwonbɔr kaah ta Yisa don paab man
(Mag 16:19-20)
50Waah nan ta bi ki nyan kitiŋ nmɔn yaan ki tan mal Betani, le u nan don u nɔɔi paab ki kaab jaa bi bu. 51Waah nan be kaab ki jaar bi bu-n, le u nan fɔr ki jiɛn bi le Uwonbɔr nan yuur u ki don paab. 52Le bi nan jiɛ u ki jir Jerusalam ni npopeen takpem 53le bi nan be iwonjiɛn niin iyoo biɛn, ki donn Uwonbɔr a yinl.
Kasalukuyang Napili:
Lug 24: KUGL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Komba New Testament © Bible Society of Ghana, 2014.
