Lug 21
21
Lipukɔɔl a piin
(Matiu 12:41-44)
1Yisa kaah nan yaar ligin, le u kan bijɔɔndam kaah jɔɔ bi piin ki ŋaan kuwonjiɛndiig a piini a yiigin. 2Ki ji kan lipukɔɔl lanjiin uba mu ta koobu ilee ki ŋa ipiin a yiigin. 3Le u ke, “N bei ni ibamɔn le, lipukɔɔl lanjiin nan ŋa ipiin ki jon ni biɛn nan kaah ŋa man na. 4Bi biɛn nan sei ipiin bi jɔɔm bu le; amaa uma nin u fala nan biɛn ni, u ŋa waah jɔɔ nan biɛn le.”
Yisa nan pag iwonjiɛn niin kaah nan li ber man
(Matiu 24:1-2; Mag 13:1-2)
5U bɔɔnɔɔb biba nan be len iwonjiɛn niin a ŋam nin kaah jɔɔ itangbag ŋan, nin ipiin yan wee bininfob ta ŋa Uwonbɔr a yinl bu-n. Amaa le Yisa ke, 6“Naah kan tiwann tan biɛn do-n ma bu ke, n-yonn chaan le bi na li tir ni biɛn ki jaa tum, ke tangbagil liba kaa yin gur paa li tɔ bu.”
Tibɔr mugkaar nin limugil
(Matiu 24:3-14; Mag 13:3-13)
7Le u bɔɔnɔɔb baan u ke, “Wan wɔɔn, iba yoo wee ni biɛn nan li ŋaa? Ba li ŋa limagil ki wɔɔn ke ni biɛn nan mala nin nin ŋaa?”
8Le u jiin ke, “Ni li nyi man, wee uba laa lar ni. Nan bu-n bininfob takpem na li dan n yinl bu, ki len ke, ‘Min sɔ,’ bee ‘Iyonn nmɔn mala.’ Ni laa nɔɔ bi. 9Ni nan gbir itɔŋ nin ikɔn bu ke, ni laa che nin choo ni bijawaami. Ni nan biɛn na li chinn tun, amaa njoorim nmɔn kaa pa li dan nba bu man ni.”
10Tɔ le u bei bi ke: “Ibol na li kɔn nin ibol, le nnaam mu li kɔn nin nnaam.” 11Le kutingbɔŋ na li dam takpem, le nkom nin iwiɛn na li be ntim ntim a poolin. Le niba li ŋa ki choo bininfob bijawaam le limagil takpenl na li nya papaab ki lunn.
12“Amaa ni nan biɛn nan yin ŋa ke, bi li choo ni ki mugir ni. Bi na li ta ni ki jo tiwonjiɛndirin nin tiloondirin, le ki ji li ta ni jo bibɔryudam nin kitiŋ a yudam ban, ki ji ni tibɔr n yinl bu. 13Ni ma na yin sei ni npɔɔn man wee ni li fir taa pag n bɔr ki sei bi. 14Amaa naah kaa la foo nan, ni bon ni sufu ni na wee ki laa che ni mugir ni naah na li pag nyan niba man ni. 15Nan bu-n n na li sei ni imɔbon nin nlam man wee ni dataam kaa na li fir yii bee ki niɛ. 16Hali ni baam nin ni nam, nin ni kpetiib, nin ni watiib, nin ni maali, nin ni jɔtiib na li kɔɔr ni ki ku ni biba. 17Bininfob biɛn na li nan ni min bu. 18Amaa hali ni yul a yukpobig kuba kaa li guri. 19Ni si kenken ke ni li kan limiɛfol.
Yisa kaah pag Jerusalam kaah li bii man
(Matiu 2:15-21; Mag 13:14-19)
20Ni nan kan ndataam kaah jin Jerusalam ki tan to ke, ni biɛm ke ki biim mal le nmɔn. 21Iyaayoo ke, ni che ban be Judiya a tingbɔŋin li gu do ijɔɔ bu, wee ban mu be kitiŋ poolin mu li nya ki yaan na, ban mu be itingbaa nan mu laa ji kɔɔ kitiŋ poolin ni. 22Nan bu-n n-yonn nan li ye litudaril ke nin ngbeen nan biɛn nan sɔb Uwonbɔr a gbɔŋin nin. 23Ni na li bir idaa nmɔn ki sei bipiipoodam nin bipiib ban ŋmag nbiliɛm! Fala a jim na li be kitiŋ nmɔn ni, le Uwonbɔr a ŋuufiiŋ na li be bininfob nmɔn bu. 24Bi na li ta takoobi ki ku biba, ki li choo bibam mu ki ŋa tiloondirin ntim biɛn ni. Le bininfob ban kaa ye Juu yaab nan li do taa Jerusalam bu hali nin ban kaa ye Juu yaab a yonn kaah na li ŋa ibamɔn.
Uninfosaal a big a jirim a bɔr
(Matiu 24:32-35; Mag 13:24-27)
25“Imag a siɛra na li be nween, nin uŋmal nin iŋmabil ni. Le kutingbɔŋ nan yaan, imɔg a nyum na li ŋa tinyungbann takpen, ki jɔɔ kufuug takpoŋ, ki sei ibol ipotiɛ. 26Tininfobir a potiɛl a jawaam nan li dan dulinya nan yaan ki li che bininfob nfig, nan bu-n paab a wan naan wann na li dam dam le iŋmabil li lur. 27Iyaayoo nmɔn le bi li kan Uninfosaal a Big kaah nyan kitilangbɔŋin ki chaan ni npɔɔn nin kupag takpeŋ. 28Ni nan biɛn nan piin ki ŋaan ke, ni fii sir ki yaar ni yuli paaba, nan bu-n ni kpenim a manug a yoo mala.”
Bikinkam a bɔŋal
(Matiu 24:32-35; Mag 13:28-31)
29Le u nan gaa bi libɔŋal nan: “Lig bikinkam nin isiig biɛn. 30Ni nan kan isiig nmɔn a far bun ke, ni tɔɔl li biɛ ke likpanyigil mal le nmɔn. 31Ni ye man mu le, ni ye ni nan kan ni nan biɛn ŋaan ke, ni biɛ ke Uwonbɔr a niin a naamin mala.
32Ibamɔn le n bei ni nan, daandaan nan a ninfob kaa li kpo biɛn ni le ni nan biɛn nŋa. 33Paab nin tum na li jo amaa n mɔboi nan kaa li nyi ki jo.
34Ni choom ni bau, naa ye man ke lidanyugbeel ni ipotiɛ bir li piin ni sufu bu, le ni nan ka kaa nyi le lidaal nmɔn nan piin ni bu ke kukurug pen kaagin. 35Nan bu-n lidaal nmɔn li dan ban biɛn be kutingbɔŋ nan biɛn bu. 36Ni li guu nbamɔma, ki sin li miɛ Uwonbɔr wee ni fir guun ŋmar nan biɛn yin ŋa nan, wee ni nan fir ki sir uninfosaal a bija-n a nintogil.”
37Idaa biɛn Yisa nan ti wɔɔn iwonjiɛn niin le, le kujɔɔg biɛn ke u ti nya ki tan dɔ lijɔɔl lan bi yi ki Olif a jɔɔlin kunyiɛg biɛn, 38le njakpiin ke bininfob nan lagin u ban iwonjiɛn niin ki nan pelig u bɔr.
Kasalukuyang Napili:
Lug 21: KUGL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Komba New Testament © Bible Society of Ghana, 2014.
