Lug 20
20
Nbinbaan ki jiin Yisa a ninkper a pɔɔm paam
(Matiu 21:23-27; Mag 11:27-33)
1Weemba daal waah nan be iwonjiɛn niin a loob ki wɔɔn bininfob ki mɔɔn Uwonbɔr a bɔr ŋann ni, le kumanug a ninkpeeb nin ban wɔɔnn Uwonbɔr a siim nin kitiŋ nmɔn a ninkpeeb donn u ban. 2Ki nan bei u ke, “Bei ti nan a ninkper a pɔɔm wee a jɔɔ tun ŋaah tun man nan, Ŋma seiŋ man a ninkper a pɔɔm maa?”
3Le u jiin ke, “N mu jɔɔ nbinbaan le ki yin baan ni, ni beim ni, 4Jɔnn a nyunfulin, ni nan nyan paab le bee uninfosaal ban naa?”
5Le bi nan nyan ngbaan ki tan gbeer tab ke, “Ni ye ti ke, ‘Ni nyan paab’ ke, u li baan ti ke, ‘Ba ŋa wee naa ŋa u yadaa?’ 6Amaa ti ke, ‘Uninfosaal ban ke,’ bininfob ban biɛn be do nan li gabir ti itangbag, nan bu-n bi ŋa yada ke Jɔnn nan ye Uwonbɔr a linlenu le.”
7Mambu le bi nan jiin bei Yisa ke, “Taa nyi naa nan nyan nan yaan ni.”
8Le Yisa ke, “Tɔ, n mu kaa yin bei ni nan a ninkper a pɔɔm wee n tun maah tun man nan ni.”
Ukpaar uba a bɔŋal
(Matiu 21:33-46; Mag 12:1-12)
9Le Yisa nan gaa bininfob nmɔn libɔŋal nan, “Uja le nan kon bukpaab, le ki ta bi ŋa bikpaakob biba a nɔɔn, le ki yaar jon niba paam ni yuur waah foon weemi. 10Le lidichiɛl a yonn nan foo le u tun utoontunn uba ke un jo ki tan bei bikpaabin ke bin sei u bukpaabin a kpajiir ni. Amaa le bikpaabin tan choo u ki boo ki jaa u kun linɔɔpiɛŋmiɛl. 11Le u ji tun utoontunn uba, le bikpaabin ji tan boo u mu ki jin u ifa le u mu kun linɔɔpiɛŋmiɛl. 12Le ukpadaan nin ji tun uyom wan kpiɛ bita, le bi boo u ki nan sei u kidaŋ ki ta u gab.
13“Le ukpadaan nin ni bei ke, ‘N ni yin ŋa nii? N yin tun n bija le, wan wee n jiɛ; ni ba ke bi li sei u jilima.’
14“Amaa bikpaabin kaah nan nan kan win, le bi gbeer tab ke, ‘Ufaajirin nsɔ, ni che ti ku u, wee lifaalin ŋa ti yaal.’ 15Le bi nan choo u, ki ta u nyan nkpagbaan ki tan ku u.
“Tɔ, ukpadaan nan ni yin ŋa bikpaab nmɔn nii.? 16U le dan ki nan ku bikpaab nmɔn ki ta bukpaabin sei bikpaab biba.” Bininfobin kaah nan gbir man nin, le bi ke, “Uwonbɔr laa che man nŋa!”
17Le Yisa lig bi num paam chob le ki ke, “Tɔ ke nan sɔb Uwonbɔr a gbɔŋin ni a taai aa?
‘Kudaag#20:17Juu yaab nan jɔɔ litangbagtakpenl lan ŋmag kudiig a maam le, man le Bikɔɔm mu jɔɔ kijaantelig kan ŋmag kudiig a yɔgiri nin limɔɔpinl. kan wee bitanmaab yii ki n ni,
ki ma nan ye kijaantelig ŋaŋ’#Ilan 118:22?
18Uninfo wan biɛn lu litangbagil nan bu ke u li genn genn, amaa litangbagil nan mu lu wan bu ke, see li mar u.”
19Ban wɔɔn Uwonbɔr a siim, nin kumanug a yudam nan biɛ ke Yisa gaa libɔŋal nan ŋa bi ma le, mambu le bi nan ban bin choo u libol nmɔn yaan. Amaa le ki sin san kuninfogbaluŋin bijawaam.
Lampo a yɔm a binbaan
(Matiu 22:15-22; Mag 12:13-17)
20Baah ni nan guu win, le bi nan tun bininfob penkaab, ban nan ta biba ŋa ke bipopendamin. Bi nan jɔɔ tama ke bin choo Yisa u mɔboi bu, wee ki ta u ki sei tininkper a pɔɔm nin npɔɔn man biɛn be ban ŋma kitiŋin a nɔɔn. 21Le bininfob penkaab nmɔn baan u ke, “Wan wɔɔn, ti nyi ke a pag ki wɔɔn nan ye ibamɔn, le a mu kaa gann ni, amaa ki wɔɔn Uwonbɔr a bɔr tan ye ibamɔn. 22Ni ŋan nin ti li yɔ lampo ki tenn Siiza bee ti laa yɔɔ?”
23Le Yisa mu nan biɛ ke bi pen u lam le, le ki bei bi ke, 24“Ni wɔɔm nligibim nmɔn ni. Ŋma a nunaŋ nin u yinl be nligibim nmɔn buu?”
25Le bi jiin ke, “Siiza.”
Le u bei bi ke “Man ke, ni li tenn Siiza nan ye Siiza yaan na wee ki mu li tenn Uwonbɔr nan ye Uwonbɔr yaan na.
26Baa nan fir choo u waah nan len man kuninfogbaluŋin yaan ni, le u jiinim nan gar bi, le bi jir ŋmin.
Nkum a fiim a binbaam
(Matiu 22:23-33; Mag 12:18-27)
27Le Sadusi yaab, ban len ke uninfo kaa li fir fii nkumin nin, nan ta nbinbaan ki dan Yisa ban. 28Bi nan baan ke, “Wan wɔɔn, Moziz nan sɔb nsiim sei ti ke, ni ye uja a kpel kpo ki jiɛn u poo wan kaa la jɔɔ kibig ke, ni kpa le nin uja nmɔn taa lipukɔɔlin ki maa nbum ki sei u kpel nmɔn. 29Tɔ, bijab bilile le nan be, ki ye tinabir, le uninkpelin nan kɔɔn upii ki kpo kaa ma bigi. 30Le wan paa nan taa upii-n, ki mu kaa ma le ki kpo 31le wan kpiɛ bita-n nan taah u, man le wan nan nan kpiɛ bilile-n nan kpo kaa ma kibigi. 32Ni bɔɔn bu le upii nmɔn mu nan kpo. 33Ke nkum a fii daal ke, ŋma nin na yin ye upii nmɔn naa, bilile nan biɛn kaah nan kɔɔn u nan?”
34Le Yisa jiin ke, “Dulinya nan yaan bijab kɔɔn bipiib le bipiib mu kun bijab. 35Amaa ban kpaan nin dulinya pɔŋin nin nkum a fiimin, bijab kaa na li kɔɔn bipiib le bipiib mu kaa li kun bijabi, 36le baa ji na li kpo; nan bu-n bi na yin nann malakam le. Bi ye Uwonbɔr a buwaab le, baah ye nkum a fiim a buwaabin bu. 37Amaa kimɔchiɛgin bu ke, hali Moziz nan wɔɔn ke bitakpiib li fii nkumin, nan bu-n u nan yin Uyudaan ke ‘Abiraham a Weem, nin Azig a Weem, nin Jekɔb a Weem.’ 38Waa ye ban kpo a Weemi, amaa ban fo a Weem, nan bu-n uma bu le bininfob biɛn be nin limiɛfol.”
39Le ban wɔɔnn Uwonbɔr a siimin a ni biba jiin ke, “Wan wɔɔn, a len nan ŋan na!” 40Le uba kaa ji fir baan ibinbaan ni.
Nbinbaan ki taa jiin Masiya paam
(Matiu 22:14-46; Mag 12:35-37)
41Le Yisa baan bi ke, “Nii wee bi len ke Masiya ye Defid a yaabil aa? 42Defid baan tɔɔl nyan pag Ilan a gbɔŋin ke,
‘Uyudaan nan bei n yudaau ke:
“Kalim n nɔɔjiim paam
43hali nin maah na li che a dataam nkpann
a taai a tɔɔnbol.” ’#Ilan 110:1
44Defid yin u ke ‘Uyudaan.’ Ke niin wee u ji ye u yaabil aa?”
Yisa kaah kpaan ki jiin ban wɔɔnn siimin paam man
(Matiu 23:1-36; Mag 12:38-40)
45Bininfobin biɛn kaah nan peligin, le Yisa nan bei u bɔɔnɔɔb ke, 46“Ni li nyi ban wɔɔnn nsiimin bu. Bi ban bi li chonn yee daala fufɔgir le, ki jiɛ bi li poor bi nnyam ni, ki jiɛ bininkpeeb a kikaabol tiwonjiɛndirin nin jilima kuchiigin. 47Bi feen ipukɔɔ a niin le paab, ki sin ji miɛ Uwonbɔr ki yuur ki wɔɔn biba. Man a ninfobol li kan litudaril lan yab.”
Kasalukuyang Napili:
Lug 20: KUGL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Komba New Testament © Bible Society of Ghana, 2014.
