Lug 14
14
Yisa kaah nan teb ubaar pɔɔg man
1Likpakɔɔl liba daal, le Yisa nan tan kɔɔ Farasii yaab a yudaau a niin ke un ji tijiir; le ban nan be niin nmɔn nan dibir u. 2Iyaayoo le ubaar uba be u nintogil, u taai nin u nɔɔi li nan pugin. 3Le Yisa baan ban nyi Uwonbɔr a siimin nin Farasii yaabin ke, “Nsiim chee ke ti li teb bininfob likpakɔɔl daal be ti la teb aa? 4Amaa le bi ŋmin. Le Yisa choo uja-n ki teb u ki jaa u le u jon.
5Le ki baan bi ke, “Ni ye ni ni uba jɔɔ kibig bee u naa wee u nyan lu libonl a poolin likpakɔɔl daal ke, waa li nyan u weem likpakɔɔl daal nmɔn naa? 6Le baa nan fir len niba.
Jiininba nin bicham a gaam a bɔr
7Yisa kaah nan kan bichamin kaah kal bi jilima a kikaabol bin ji tijiirin le u gaa bi libɔŋal ke: 8“Bi yiŋ lipiichanil a jiir a jim ke, laa kal jilimadam a kikaaboli. Nba ke bi yin wan joŋa ke u chaan. 9Ni ye man ke, udindaan wan yin ni bilee nmɔn li dan ki nan beiŋ ke, ‘Ta a kikaabol ki sei uja nan na.’ Le ifa nchooŋ le a kal nan yaan kaa ye jilima a kikaabol li. 10Amaa ni ye bi yiŋ ke, kalim nan yaan kaa jɔɔ jilima a bol, wee ni ye udindaan ni nan dan ke, u li beiŋ ke, ‘N jɔ, fii ki tan kal nan yaan jɔɔ jilima a bola.’ Man le a chantab a num li gbeeŋ. 11Uninfo wan biɛn don uba li jiir tum; wan mu jiin uba tum, li do paab.”
12Le Yisa nan bei wan yin u ke un nan ji-n ke, “A ŋaa tijiir ke, a laa yin a jɔtiib, bee a kpetiib, bee a maalim, bee a kunkɔɔn tab ban ye biwandamin ni, ni ye a ŋa man ke, bi mu li yiŋ ki yɔŋ. 13Amaa ni ye a yin yin bininfob tijiir a jim ke, a yim faladam, nin nwɔbim, nin ndiɛm, nin bijɔɔm, 14le Uwonbɔr a kaar li be a bu. Hali baah kaa li fir yɔŋ nan, Uwonbɔr li na yin yɔŋ, lidaal lan wee bibuchim na yin fii nkumin nin.”
Kuchiig takpeŋ a jim a bɔŋal
(Matiu 22:1-10)
15Ban nan lagin ki ka ji nin Yisa nan a ni uba kaah nan gbir man ni, le u bei Yisa ke, “Ban na yin ji tijiir nmɔn Uwonbɔr a niin nan, tikaar ye bi yaan le.”
16Le Yisa jiin ke, “Uja uba le nan be le ki nan ŋaan sili nin kuchiig takpeŋ a jim, le ki yin bicham takpem. 17Kuchiigin a yoo kaah nan nan foo-n, le u tun u toontunnu ke un tan bei bininfob ban wee u nan yin bi-n ke, ‘Ni dan ke tijiirin biɛn ŋa siliu.’
18“Amaa le bi biɛn nan piin ki ban isan yan wee bi li yii ki laa jo. Le chinchinn a ninfou win bei u toontunn nin ke, ‘N daa bikpapɔm le ki ban n jo ki tan lig baa be man, mambu n ŋa gafarau.’
19“Le uba mu bei u ke, ‘N daa inaaja kokaa piig le ki ban n tan bigin ki lig bukpaabin. N ŋa gafarau.’
20“Le uba mu bei u ke, ‘N le la kɔɔn upii le daandaan nan, maa li fir dan ni.’
21“Le u toontunn nmɔn jir kun u yudaau n ban, ki tan bei u bi biɛn kaah len man. Le liŋuul choo u. Le u bei u toontum n ke, ‘Ni li chaa kitiŋ poolin a sambu ki tan yin bilanjiim nin nwɔbim nin bijɔɔm nin ndiɛm ke bin dan.’
22“Le u toontunn nin bei u ke, ‘Uninkpel, n tan tun ŋa wɔɔnim man nin na, amaa npaan la be.’
23“Le u yudaau ni bei utoontunn ke, ‘Nyam ki li chaa kitintakpeŋin a san bu nin n sanbumin, ki che bin kɔɔn, wee n niin nan ngbee. 24N bei ni le, ban wee n nan yin ni a ni uba kaa li len n jiir nan ni.’ ”
Libɔɔnɔɔl kaah to man
(Matiu 10:37-38)
25Bininfob takpem le nan nɔɔ Yisa, le u nan gbiɛ lig bi ki ke: 26“Ni ye uninfo dan n ban, wee kaa nan u baa nin u na, nin u piib nin u buwaab, nin u kpetiib nin u watiib nin u ninsiɛb, hali nin u tɔɔl a miɛfol ke, waa li fir ŋa n bɔɔnɔɔru wi. 27Le uninfo wan mu kaa yuur u kum a dapunpunl ki nɔɔ min ke, waa li fir ŋa n bɔɔnɔɔru wi.
28“Ni che ti len ke ni ye ni ni uba ban un maa ligonl lan fɔg ke, waa li chinn kal ki bon kudaag ki jee u ligi li foo bee yaa li foo? 29Nan bu-n ni ye ke u fiɛ lifiɛl wee kaa fir maa diɛ wee wan biɛn nan kan ke u li laa u, 30Ki ke, ‘Uja nan nan piin ki ma le kaa nan fir diɛ.’
31“Bee ti len ke ubɔr uba li chaa un tan to u bɔr kpiɛg bitɔb. Waah li chinn ki kal ki bon jee u li fir ta bitɔtogib turpiig ki nyaŋ ubɔr wan jɔɔ bitɔtogib turpilee nan naa? 32Ni ye baa li fir to ke, see ke u tun ntoon le bin tan balin baah la be nan yaan fɔg nan. 33Man li ye ni, ni ye ni ni uba kaa jiɛn waah jɔɔ nan biɛn ke, waa li fir ŋa n bɔɔnɔɔru wi.
N-yaam man kaa jɔɔ tinyɔɔr a bɔr
(Matiu 18:12-14)
34“N-yaam ŋan; amaa ni ye mi mɔmin nan diɛ ke mi ji yin ŋa nii ki mɔɔ? 35Mi ŋa yɔli le nmɔn. Maa ji yin jɔɔ niba a ter li. Maa ji yin ŋan ki sei titann ni, le kaa ji yin ŋan ki sei lifatanpol mu. Bi yin tami gab le.
“Wan jɔɔ litul ke un gbirim.”
Kasalukuyang Napili:
Lug 14: KUGL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Komba New Testament © Bible Society of Ghana, 2014.
