Lug 13
13
Kpenn a sufu bee a kpo
1Iyaayoo nmɔn le bininfob biba nan be, le ki nan bei Yisa Galilii yaab ban wee Palati nan kun ki ta bi cham ki ŋmarin kumanug a cham. 2Le Yisa jiin ke, “Galilii yaab nmɔn kaah jin fala man nan, ni tiɛr ke bi toonbir jon bi tab yaar le? 3N bei ni le, aai! Amaa naa kpenn ni binbem ke, ni biɛn mu na yin kpo man le. 4Bee ligonl fufɔbil kaah nan lu ki ku bininfob piig nin biniin Siloom a tiŋin ni, ni tiɛr ke bi galin nan yab jon ban biɛn nan be Jerusalam nlee? 5N bei ni le, aai! Amaa naa kpenn ni binbem ke, ni biɛn mu nan yin kpo man le.”
Kiduusiig kan kaa lo iloon nan a bɔŋal
6Le Yisa gaa bi libɔŋal ke, “Uja uba le nan jɔɔ kiduusiig u kpaabin, weemba daal le u jon ke u tan laa tiduur, le kaa tan kan ni. 7Le ki bei u kpaguur win ke, ‘Ibin itaa sɔ le n gbaa chaan kiduusiig nan yaan ke n nan laa tiduur, le kaa ga niba. Ga ki gab ba! Ba ŋa wee ki si ki bii ntam yɔlii?’
8“Le u kpaguur win jiin ke, ‘Uyudaan, jiɛn na wee nin ŋa libinl liba ki kpiɛ, n li gbii ki tum ki piin nkpatam ŋam, 9Ni ye ki lon libinl daal ke, ni ŋan! Naa ye man ke, a gaa ki gaba.’ ”
Yisa kaah nan teb kipiiwɔbig likpakɔɔl daal man
10Juu yaab a kpakɔɔl daal le Yisa nan be wɔɔn Uwonbɔr a bɔr kuwonjiɛndiigin kiba yaan, 11le upii uba nan be kudiig nmɔn yaan, le kinaanbiig nan che u ŋa kiwɔbig ibin piig nin iniin. U nan bɔɔ le kaa li fir naar kolibi. 12Yisa kaah nan kan win, le u yin u nyann nintogil le ki bei u ke, “Upii, a wiɛn nmɔn jaa ŋa.” 13Le ki ta u nɔɔ ki paan upii nmɔn bu. Libol nmɔn yaan le u naar u tɔɔl le ki pag Uwonbɔr.
14Yisa kaah nan teb upii-n nmɔn likpakɔɔl daalin bu le kuwonjiɛndiig a ninkpelu a ŋuul nan fii le u bei bininfob ke, “Iweehn iloob li be ki ye itoon a ween. Mambu ni li chaan iweehn loobin a sisiigin ki nan gaa kutebug, amaa ki laa ji chaan likpakɔɔl daal li.”
15Le Uyudaan jiin u ke, “Nim bilinlarib nan! Ni ŋma kaa loor ni naau bee ni boŋ ki ta jo nkpen ki tan nyun ki likpakɔɔl daal laa? 16Le upii wan ma ye Abiraham a yaabil nan, le Sintani ŋa u tiyomir ibin piig nin iniin, le naa bi kpaa nin n nyan u tiyomir nmɔn yaan likpakɔɔl daal laa?”
17Waah nan pag man n-yonn man nin, le u dataam biɛn nan jin ifa, amaa le kuninfogbaluŋin biɛn nan jɔɔ npopeen nin waah nan tun ligaril a toonl yan biɛn nin bu.
Nnyiɛnbim a bɔŋal
(Matiu 13:31-32; Mag 4:30-32)
18Tɔ le Yisa nan baan ke, “Uwonbɔr a naangbɔŋ nann baa? N yin ta mi ki naŋ baa? 19Mi nann nnyiɛnbim man wee uninfo ta bun u kpaabin nin le. Le min yabig ki ŋa busub, wee nnɔɔm dan ki nan tiɛ bi tar ki bun le.”
Boroboro a nyɔgim a bɔr
(Matiu 13:33)
20Le U ji nan baan ke, “N yin ta Uwonbɔr a naangbɔŋ nan ki bigin baa? 21Uwonbɔr a niin a naam nann boroboro a nyɔgim man wee upii ta ŋmarin boroboro a yom man yabin wee min fugir ki do-n le.”
Linaanganl lan kaa yalin nan a bɔr
(Matiu 23:37-39)
22Le Yisa kaah nan be nsan bu ki chaa Jerusalam nan, u nan nɔɔ ntintakpem nin ntinbumin, ki wɔɔn bininfob Uwonbɔr a bɔr; 23le uba nan baan u ke, “Uyudaan, bininfob wama le na yin kan feegabaa?”
Le U bei bi ke, 24“Ni pɔɔn ni ba wee ki nan kɔɔ linaanganl lan kaa yalin nan yaan. N bei ni le, bininfob takpem na li ban bin kɔɔ niin, le kaa yin fir kɔɔ. 25Ni ye uniindaan nan fii ki loon linaanganl wee ni paar ki si nkaafiin ki kpaar linaanganl ki ke, ‘Uninkpel, loora wee ti kɔɔ ke.’
“Amaa u li ke, ‘Maa nyi ni; kaa nyi naah nyan nan yaan ni.’
26“Le ni na li ke, ‘Tim nin fin nan lagin ki ji ki nyu na; ke a wɔɔn ti Uwonbɔr a bɔr ti timin na.’
27“Amaa le u ji li jiin ke, ‘Maa nyi ni, kaa nyi naah nyan nan yaan ni. Nim ti toonbir dam nan biɛn, ni fɔɔr n ban na!’
28“Ti mɔr na li be niin, nin inyin a ŋmam, n-yonn man wee ni na kan Abiraham, nin Azig nin Jekɔb nin bilinlemin biɛn kaah be Uwonbɔr a naam ni, amaa nim ma bi li ta ni ki gab nkaafiin. 29Bininfob na li nya liwonpɔɔnl, nin liwonlul, nnɔɔjiin nin nnɔɔgan paam ki nan kɔɔ Uwonbɔr a naamin ki kal bi kikaabol ki ji tijiir. 30Ibamɔn bibɔɔnpaab na li ŋa bisanliib, le bisanliib mu li ŋa bi bɔɔn paab.”
Yisa kaah jiɛ Jerusalam man
(Matiu 23:37-39)
31Iyaayoo nmɔn le Farasii yaab biba dan Yisa ban, ki nan bei u ke, “Nya do ki li chaa niba paam ma, Ubɔr Herɔd ban un kuŋ le.”
32Le U jiin ke, “Ni li chaa ki tan bei kuŋɔg nmɔn ke, ‘Dinan nin won le n yin nyan nnaanbiim bininfobin, ki che bibaarib n pɔɔg. Iweehn itaa daal le n toon yin diɛ.’ 33Ni le ye man ke, ni kpaa le nin n jo Jerusalam dinan, nin won, nin daalib. Nan bu-n ulinlenn kaa kpeg niba yaan ni see Jerusalam!
34“Jerusalam, Jerusalam, nim ban ku Uwonbɔr a linlem, ki yɔgir ban wee u tun ni ban ni itangbag ki ku bi. Iyoo biɛn le n gbaar le ke n lagin ni nba, ke ukool kaah lagin u koobum ki ŋa u jiɛgin man ni, le naa ban man ni. 35Ni lig man, Uwonbɔr jiɛn ni niin ki per na. N bei ni le, naa ji li kam mi nin naah na li ke, ‘Tikaar be uninfo wan choon Uwonbɔr a yinl bu-n.’#Ilan 118:26; Lug 19:38”
Kasalukuyang Napili:
Lug 13: KUGL
Haylayt
Ibahagi
Kopyahin
Gusto mo bang ma-save ang iyong mga hinaylayt sa lahat ng iyong device? Mag-sign up o mag-sign in
Komba New Testament © Bible Society of Ghana, 2014.
