मत्ती 13
13
1ओहाङःसैको एत दाय्ह्आक्तीको ओउः दीन्हाङः येसु कीम्सै ग्ल्युङ्ह्ती गालील त तोओ ताङ्ह्ओ दुम्हान्ताङ् आल्ती तीःकोः चीनःहाङः च्युङःती मुओ। 2ओहाङः च्युङःती मुतोक्हाङः आन नाःतो मान्ता हुम्लाङ् वाङ्आकाय् ओउःत झ्यान्ते येसुखे तीःहाङः मुओ दोङ्गाहाङःलेः लन्ह्ती ओहाङः च्युङःती मुओ खेःतो ओउः हुम्ती वाङ्ओलम्खे दुम्हान्कोः चीनःसै सायःती मुआकाय्। 3ओहाङःसैको ओउःमयः सायःती मुतोक्हाङः येसुइ वीनःराय् ल्हाक्ती नाःतो कुरा क्लोन्कोःदीङ् त नोःती स्यान्आथास “लौ सायःती मुन दा। यात्चाक् बीया चोया वार्साकायः चीङ्ती राङ्ताङ् आल्आ। 4राङ्ताङ् आल्ती ओहाङः वार्तोक्हाङः कोय् बीया राङ्हाङः मुओ ल्याम्हाङः दीह्आल्आ। ल्याम्हाङः दीह्आक्तीको वाःलम्इ दाह्ती वाङ्ती ओउः बीया चोयाकायः सेक्ती माक्जेःआथै। 5अरु बीया चोयाखे बाङ् ह्र्युङ्हाङः दीह्आल्आ। ओहाङःसैको साः ज्युम्ह्मालो त खेःया ओउः बीया चोया रेन्ह्तोलेः दुङ्तो ती 6ओउःकोः रुत् पेओ साःहाङः जोय्ती पोक्सा खाय्माःत न्याम् रावःतोक्हाङः मात् झ्योम्ह्ती सीजेःआ। 7फेरी अरु बीया चोयाखे चुःराङ् बन्राङ्हाङः दीह्आल्आ। ओउःखे बन्कुस् ब्रक्त लन्ह्ती यार्ती सीआ। 8अरुखे पेओ साःहाङः दीह्ती न्ह्योरःती न्ह्योरःती लन्ह्आक्तीको आन सायःनाः कोय् बोत्सै यात् घोगा वाङ्आ कोय्सै नीस् घोगा अरुसै तीन् घोगा वाङ्आ। 9लौ इ ङाइ तोओ कुरा पेतो चीःतीलेः सायःनु दा” त दाय्ह्ती येसुइ तोआथास। 10ओहाङःसैको एत तोआक्तीको येसुकुस् वाह्ओमयः ओउःकःताङ् वाङ्ती “लौ मेस् नाङ्इ स्यान्ओ कुरा दोह् हायःतीतेः हुम्ओलम्कायः वीनःराय्हाङः ताती तोतेःआकान्” त दाय्ह्ती येसुकायः व्हत्थातो 11“नीङ् परमेस्वर्कोः कुराकः ग्याओलम्खेकायः ओउःकोः राजीकोः चीःआक्मालो कुरा द्याह् पेतो चीःसा दोःतेःनै अरु मान्तालम्खेइ चीःसा दोःइली। 12सुसुखे नाःओ मुनै ओउःकायः अरुमा न्हाङ्तोलेः दोःनाः। सुसुखे नाःमालो मान्ता मुनै ओउःकोः दोह्मा मुचाः ओउः सबैलेः लाती वाय्ओ स्याव्नाः 13ओउःत झ्यान्ते ङाइ परमेस्वर्कोः राजीकोः कुरा वीनःराय्हाङः ल्हाक्ती छ्यानःओ ह। ओउःमयःइ परमेस्वर्कोः कुरा च्यवःसापाय् च्यवःनानी सायःसापाय् सायःनानी ल्हुङ्हाङः पेतो ग्याती च्यवःमामाःत सायःमामाःत झ्यान्ते पेतो चीःसा खाय्नीली। 14ओउःतलेः एसायाकोः उय्ह्ले तोओ कुरा ताप्ताक्नानी ‘ “लौ सायःसापाय् सायःतीलेः मुतेःइतो चीःसा खाय्तेःनीली योसापाय् योतीलेः मुतेःइतो च्यवःसा खाय्तेःनीली। 15लौ इ मान्तालम्कोः ल्हुङ् व्हाय्मालो स्याव्आकाय् ओउःमयःकोः नोःमा लोक्तोलेः मीक्मा मेल्तोलेः स्याव्आकाय् उया मीक्इ च्यवःचानी नोइ सायःचानी त खेःया ओउःमयः ल्हुङ् चीःती ङाकःताङ् द्यान्ह्ती ङाकायः ङ्हाम्चाःताङः खेःतो ओहाङःसै ङाइ रौ जीङः दोःताक्चाङःसु खेःतो” त दाय्ह्ती परमेस्वर् दाय्ह्ओ’ त एसायाइ लेखआकान्। 16नीङ्खेकायः परमेस्वर्इ आन पेतो हायःतेःआकाय् बा दोह् हायःती दाय्ह्सा नीङ्इ ओउःकोः कुरा च्यवःतीमा सायःतीमा चीःसा खाय्तेःनानी। 17दोङ्सी दाय्ह्भनाङ् नीङ्इ च्यवःओमा सायःओ कुरामा नाःतो उय्ह्लेहाङः मुओ परमेस्वर्कोः कुरा छ्यानःओ मान्तालम्मा ओउःकोः काम् पेओ जाङ्ह्ओलम्मा ओउः कुरालेः सायःसामा च्यवःसामा झाक्इतो ओउःमयःइ दोःइली।
18लौ नीङ्इपाय् ओउः बीया चोयाकोः वीनःराय्कोः माने सायःनु दा। 19कोय् बीया चोया ल्याम्हाङः दीह्आ दीह्आक्तीको वाः वाङ्ती ओउः बीयाकायः सेक्ती जेःनानी इलो लेखा कोय् मान्तालम्खेइ परमेस्वर्कोः राजीकोः कुरा सायःनीतो सायःआक्तीको ल्हुङ्हाङः पेतो चीःनीली ओहाङःसैको सैतान् त तोओ वाःलो लेखा वाङ्ती ओउः मान्ताकोः ल्हुङ्सै परमेस्वर्कोः पेओ कुरा सेक्ती आलःनौ। 20अरु मान्तालम्खेइ परमेस्वर्कोः कुरा म्रोती सायःती ल्हुङ्हाङः ग्याइतो 21लोने परमेस्वर्कोः काम् जाङ्ह्साकायः लीह्सीःओ बेला वाङ्नाः त खेःया ओउः कुरा फेनानी। इलो खेःओ मान्तालम् रुत् ज्युम्ह्ती आलःमालो बाङ् ह्र्युङ्हाङः दीह्ओ बीया चोयालो लेखा मुनै। 22ओहाङःसै अरु मान्तालम्खेइमा परमेस्वर्कोः कुरा सायःती ओउःकोः काम् जाङ्ह्आक्नीतो लोने लयः झाक्ओ काम्कायः रुःओ ल्हुङ् वाङ्नाः पैसा क्युसा बोङःओ ल्हुङ्मा लीङ्हायःओ ल्हुङ्मा वाङ्नाः त खेःयाकायः परमेस्वर्कोः काम् जाङ्ह्सा लोने ग्याइली। इलो खेःओ मान्तालम्खे चुःराङ्हाङः दीह्ओ यार्ती वाय्ओ सायःसा खाय्मालो बीयालो लेखा मुनै। 23फेरी अरु मान्तालम्खेइ परमेस्वर्कोः कुरा सायःती पेओ चीःती ङ्हाम्आक्तीको आन जाङ्ह्नानी। इलो खेःओ मान्तालम् पेओ साःहाङः दीह्ओ बीया चोयालो लेखा पेओ काम्लम् ब्याव्तीलेः जाङ्ह्नानी” त दाय्ह्ती येसुइ छ्यान्ह्ती तोआथास।
24ओहाङःसैको अरु वीनःराय् ताती येसुइ परमेस्वर्कोः राजीकोः कुरा स्यान्आथास 25“यात्चाक्इ राङ्ताङ् आल्ती ओहाङः पेओ गहुङ्कोः बीया चोयालेः वार्उतो लोने याह्दीङ्पाय् मान्ता एनःतोक्हाङः अरु ओउःकः झाक्मालो मान्ता वाङ्ती राङ्हाङः बन्कोः बीयामा चानःती वार्आकान्। ओउः बन्कोः मात्पाय् गहुङ्कोः मात्लो लेखालेः च्यवःनाः। वार्आक्तीको ओउः मान्तापाय् ज्याल्आ। 26ओहाङःसैको ओउः गहुङ् दुङ्ती सायःती मुतोक्हाङः बन्कुस् ल्याव्ह्आनाः च्यवःआकानी। 27च्यवःआक्तीको ओउः मान्ताकोः खेत्ल्यालम् ओउःकःताङ् वाङ्ती ‘हजुर् नाङ्कोः राङ्हाङः पेओ बीया चोया वार्ओ खेःतोआः र। गत हायःती द्याह् बन्कुस् ल्याव्ह्ओलेः मुनाः’ त दाय्ह्ती व्हत्थातो 28‘लौ ङाकः झाक्मालो मान्ताइ एत हायःओआः बा’ त दाय्ह्ती ओउः मान्ता त्याङ्आ। 29‘लौ द्याह् ओउः बन् फुक्ती वाय्लाङ् आल्इया’ त दाय्ह्ती खेत्ल्यालम् दाय्ह्इतो ‘खेःल द्याह्पाय् स्याव्धाङ्ल ओउः बन्कुस् नीङ्इ गहुङ्मा रक्ती वाय्तेःनानी यादो। 30तेन्छ्याङ् ल्याव्ह्ती मुपाः ओहाङःसै गहुङ्कोः सायः राःती त्युम्ह्सा बेलाहाङः चल्पाः। ओउः त्युम्ह्लाङ् वाङ्ओ मान्तालम्कायः “लौ ओउः बन्खे ङ्हा त्युम्ह्ती देङ्ती म्हेःहाङः तय्क्ती वाय्आक्तीको ओहाङःसैको गहुङ्खे त्युम्ह्ती ङाकोः कीम्हाङः गम्नु दा” त दाय्ह्ती तोनाङःसु’ त दाय्ह्ती ओउः मान्ताइ खेत्ल्याकायः तानौ। परमेस्वर्कोः राजी ओउःलो लेखा मुनाः” त दाय्ह्ती येसुइ स्यान्ती तोआथास।
31“फेरी परमेस्वर्कोः राजी दोह्लो खेःओ मुनाः दाय्ह्सा। ओउःपाय् अरुसै मीस्ओ सायःलो लेखा मुलेःनाः बा। ओउः सायःपाय् मान्ताइ लात्ती आलःती राङ्हाङः सुक्नाः। 32सुक्आक्तीको ओउः सायः दुङ्ती लन्ह्दा लन्ह्दा जुगाङ् ब्राव्ओ सीङः स्याव्नाः। ब्राव्आक्तीको अरु अरु सीङःसै छोङ्ह्ती ओउःकोः केङ्काहाङः वाःलम् न्यास्सा खाय्नानी” त दाय्ह्ती येसु दाय्ह्ओ। 33“फेरी परमेस्वर्कोः राजी लाङ् फताक्सा ओखोत्लो लेखा मुनाः। ओउः ओखोत्पाय् मोमःचोःइ रोत्ती तीन् पाथीकोः ओय्क्कुस् ल्याव्ह्ती क्राक्ती ओहाङःसैको लाङ् सबै फनाः” त दाय्ह्ती येसुइ तोआथास। 34इ परमेस्वर्कोः राजीकोः कुरा स्यान्साकायः येसुइ वीनःराय् ताती हुम्ओ मान्तालम्कायः कोदीङःती तोआथास वीनःराय् आःताः तामाःत ओउःइ दोह्मा स्यान्थासल। 35ओउःत हायःती उय्ह्लेकोः परमेस्वर्कोः कुरा छ्यानःओ मान्ताइ ङ्हा तोओ कुरा ताप्ताक्आकान् “लौ ङाइपाय् कोदीङःती स्यान्ती तोनाङःसु। ल्हाव्ह्दैबाङ्कोः जाङ्ह्ओ दीन्सै चीःसा खाय्मालो कुरा ङाइ देङे छ्यान्ह्नाङःसु” त दाय्ह्ती ओउः मान्ता दाय्ह्ओ कुरा येसुइ ताप्ताक्आकान्।
36ओहाङःसैको येसुइ हुम्ओलम्कायः फेती कीम्ताङ् पोक्आकाय्। ओहाङः पोक्ती मुतोक्हाङः ओउःकुस् वाह्ओमयः वाङ्ती “लौ ओउः मेस् तोओ गहुङ्कुस् बन् ल्याव्ह्ओ राङ्कोः वीनःराय् चीःताक्ताङी दा” त दाय्ह्ती तोआथै। 37“लौ ओउः पेओ बीया चोया वार्ओचाक्पाय् ओउः मान्ताकोः चोःत तोओलो लेखा लेःआः। ओउःकोः राङ्पाय् ल्हाव्ह्दैबाङ् लेःआः। 38ओहाङःसैको ओउः पेओ बीया चोयाखे परमेस्वर्कोः राजीहाङः मुओ मान्तालम् लेःआः ओउः पेमालो बीयाखे रेव्ओ मान्तालम् लेःआः। 39ओउःमयःकायः सैतान्इ ल्हाव्ह्दैबाङ्हाङः गम्आकान् 40-41ओहाङःसैको ओउः लोने वाङ्सा ल्हाव्ह्दैबाङ्कोः द्युम्ओ दीन्हाङः ओउः मान्ताकोः चोः त तोओइ परमेस्वर्कोः ल्होक्ओमयः ल्हाव्ह्दैबाङ्ताङ् ल्होक्नौ। ओउः ल्होक्ओमयःइ वाङ्ती रेव्ओलम्कायः पेमालो बन्लो लेखा त्युम्ह्ती म्हेःहाङः काती वाय्नाःथास 42ओउःत झ्यान्ते ओउः रेव्ओलम्खे आन लीह्ती र्याःती मुनै 43ओउः पेओ मान्तालम्खे ओउःमयःकोः परमेस्वर् आपाकोः राजीहाङः न्याम्लो लेखा अङ्ग थङ्गत थोङ्ती सबैइ च्यवःसा खाय्नानी। लौ इ पेतो सायःनु दा।
44फेरी परमेस्वर्कोः राजी पाम्ह्ती गम्ओ चान्दी पैसालो लेखा लेःआः। यात्चाक्इ ओउः पैसापाय् राङ्हाङः च्यवःआकान्। च्यवःती फेरी नुस्ती गम्आक्तीको ओउःइ चोङाय्तोलेः पाय्ह्ती ओउःकोः माल्ताल् सबै वीनःती ओउः पैसा मुओ राङ् लेःनौ। 45फेरी परमेस्वर्कोः राजी साहुलो लेखा लेःआः ओउः साहुइपाय् गाःहाङः गाःहाङःमा पेओ मोती मनी बोङःती ब्याह्ती वाह्नाः। 46ओहाङःसैको बोङःदा बोङःदा यात्ज्योः सबैसै पेओ मोती च्यवःआक्तीको ओउः साहु पाय्ह्ती लयःकोः माल्ताल् सबै वीनःती ओउः पेओ मोती लेःआकान्।
47फेरी परमेस्वर्कोः राजीपाय् ताङ्ह्ओ ङाः सात्साः लाङःलो लेखा लेःआः। ओउः लाङःपाय् तीःहाङः वार्आक्तीको सबै खाल्कोः ङाः ङायःनौ। 48ओहाङःसैको लाङः ब्लीङ्आक्तीको साःताङ् वानःती पेपेओ ङाःलम्खे देकालाक्हाङः कानीतो पेमालोलम्खे ताती वाय्नानी। 49इतलेः ओउः ल्हाव्ह्दैबाङ्कोः द्युम्ओ दीन्हाङः स्याव्नाः। परमेस्वर्कोः ल्होक्ओमयः वाङ्ती रेव्ओ मान्तालम्खेकायः पेओकःसै चल्ती म्हेःहाङः ताती वाय्नानी। 50ओउः ताती वाय्ओलम् आन लीह्तो स्याव्नै। 51लौ इ कुरा चीःतेःआकानीया चीःतेःधाङ्तेःइलीया” त दाय्ह्ती येसुइ लयःकुस् वाह्ओमयःकायः व्हत्आकान् “माः चीःआलाङःसु” त दाय्ह्ती त्याङ्आकाय्। 52“लौ परमेस्वर्कोः राजीकोः कुरा चीःओ धर्मा स्यान्ओमयः साहुलो लेखा मुलेःनाः। ओउः साहुइपाय् लयःकोः त्युम्ह्ती गम्सा थाव्सै नयामा पुरानो थोक्लम्मा त्युत्नौ। ओउःलो लेखालेः परमेस्वर्कोः राजीकोः कुरा चीःओ धर्मा स्यान्ओमयःइमा नया कुरामा पुरानो कुरामा छ्यान्ह्सा खाय्लेःनौ” त दाय्ह्ती येसुइ सबै कोदीङःती तोती स्यान्आकान्।
53-54ओहाङःसैको एत स्यान्ती खाय्आक्तीको येसु आल्ती लयःकोः देस्ताङ् पाय्ह्ती वाङ्आकाय्। लयःकोः देस्ताङ् दाह्ती वाङ्आक्तीको यहुदीलम्कोः थनःओ कीम्हाङः पोक्ती ओहाङःकोः हुम्ती मुओलम्कायः स्यान्आथास। स्यान्ती मुतोक्हाङः ओउः हुम्ती सायःओलम् आन ग्याङ्ह्आकाय् “लौ इजा इलो व्हाय्ती नोःसा चीःओ गाःसै दोःआ ती। आन ताङ्ह्ओ काम्लम् इइ गत हायःती जाङ्ह्सा खाय्नौ र। 55इपाय् ओउः सीकर्मीकोः गोय्चोःचोः लेःआः बा। इकोः आमा मरीयम् लेःआः हौचोङ्पाय् याकुब् युसेफ् सीमोन् यहुदात तोओ लेःइ। 56इकोः हौद्याङ्लम् सबै ङीकुस् मुनै। ङीकःगनसै वाङ्ओ मान्ताजा इत हायःसा ग्वम् गाःसै दोःओआः रैस” त दाय्ह्ती ओउः मान्तालम् लयःकुस् नोःकाय्ती येसुकः ब्लाय्क्तो स्याव्आकाय्। 57“लौ परमेस्वर्कोः कुरा छ्यानःओ मान्ताकायःपाय् गाःहाङःमा मान्तालम्इ ताङ्ह्ताक्थातो लयःकोः देस्कोः मान्तालम् कीम्कोः मान्तालम् ह ओउःकः झाक्इली” त दाय्ह्ती येसुइ तोआथास। 58ओहाङःसैको येसुकोः लयःकोः मान्तालम्इ ओउःकायः ङ्हाम्नीली त झ्यान्ते ओहाङःपाय् ओउःइ ताङ्ह्ओ काम् नाःतो जाङ्ह्उलु।
ที่ได้เลือกล่าสุด:
मत्ती 13: CDM93
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 1993 Wycliffe Bible Translators Inc., All Rights Reserved.
