मत्ती 12
12
1ओहाङःसैको ओउः बेलाहाङः यहुदीलम्कोः काम् न्यास्ती धोओ दीन्हाङः येसुमा ओउःकुस् वाह्ओमयःमा गहुङ्राङ् च्योल्ती वाह्ओ खेःइतो। 2ओहाङः वाह्तोक्हाङः येसुकुस् वाह्ओमयःइ योङ्क्राय्ती झ्यान्ते गहुङ्कोः चुय्लम् काव्ह्ती जेःआकानी। ओउःमयःइ चुय् काव्ह्ती जेःओपाय् फरीसीलम्इ च्यवःती ओउःमयः येसुकःताङ् वाङ्ती “लौ योउ दै। इ ङीइ जवओ धोओ दीन्हाङः नाङ्कुस् वाह्ओमयःइ इत चुय् काव्ह्ओ काम्मा अरु दोह् काम्मा जाङ्ह्सा स्याव्ल बा” त दाय्ह्ती तोनीतो 3“लौ दावुद् राजाइ दोह् दोह् जाङ्ह्ओ नीङ्इ पह्रती चीःतेःनीलीया। 4दावुद्मा ओउःकोः साथीलम्मा योङ्क्राय्ती सीती झ्यान्ते परमेस्वर्कोः मन्दीर्हाङः पोक्ती परमेस्वर्कायः ल्हाती गम्ओ लाङ् रोत्ती जेःसाकायः आलःआकानी। जेःसापाय् जेःनीतो ओउः लाङ्पाय् दावुद्इमा ओउःकोः साथीलम्इमा सुइमा जेःसा स्याव्ल मन्दीर्कोः पुरोहीत्लम्इ ह जेःसा स्याव्नाः त जवती गम्ओ खेःतो। इत नीङ् पह्रतेःआकानी माःर। 5फेरी धोओ दीन्लम्हाङः ओउः पुरोहीत्लम्इ मन्दीर्हाङः काम् जाङ्ह्लेःनानी। काम् जाङ्ह्सापाय् जाङ्ह्नानी ओउःत हायःसा स्याव्लेःनाः त परमेस्वर्कोः आखरःहाङः लेखती मुलेःनाः। इमा पह्रती चीःतेःनीलीया। 6ओउःमयःइपाय् धोओ दीन्हाङः इत काम् जाङ्ह्सा स्याव्लेःनाः। दोङ्सी दाय्ह्भनाङ् मन्दीर्हाङः काम् जाङ्ह्ओलम्सै ङालेः पुःनाङः। 7फेरी ओउः आखरःहाङः लेखओ कुरा ‘लौ सुखेइ ङाकायः ल्हाती बयःओ काम् ह जाङ्ह्नौ ओउःकः ङा झाक्ङल। सुसुखेइ अरुकायः योनःती योती पेतो हायःनानी ओउःखेकः ङा झाक्नाङः बा’ त परमेस्वर् दाय्ह्ती लेखओ नीङ्इ पेतो चीःतेःउलु। पेतो चीःयाकायः ङाकोः पेतो जाङ्ह्ओ वाह्ओमयःकायः जान्तो खेःतेःआक्इली। 8लौ ङा मान्ताकोः चोः त तोओपाय् धोओ दीन्हाङः दोह् काम्कायःमा ‘इखे जाङ्ह्सा स्याव्नाः ओउःखे स्याव्ल’ त दाय्ह्सा हुकुम् बयःसा प्रभु लेःआः ङ” त दाय्ह्ती येसु दाय्ह्आ।
9ओहाङःसैको इत दाय्ह्आक्तीको येसु आल्आकाय्। 10आल्आक्तीको लोनेकोः धोओ दीन्हाङः येसु यहुदीकोः थनःओ कीम्हाङः पोक्ती वाङ्आ। कीम् पोक्ती वाङ्तोक्हाङः ओहाङः हुम्ती मुओलम्कुस् यात्चाक् क्रुत् स्रीत्ती जीक्ओ मान्ता मुओ खेःतो। ओहाङःसैको यात्नीस् फरीसीलम् मुती “लौ धोओ दीन्हाङः मान्ताकायः स्याक्ताक्सा काम् जाङ्ह्सा स्याव्नाःया स्याव्लया” त दाय्ह्ती येसुकायः व्हत्आथै। “येसु ‘माः स्याव्लेःनाः’ त त्याङ्नाः त खेःया ङीइ ओउःकायः गाल्तुम्ती तोसा खाय्नाङःसु” त दाय्ह्ती फरीसीलम् म्हर्आकाय्। 11एत म्हर्ती येसुकायः ओउःतलेः व्हत्आथै। व्हत्आक्तीको “लौ नीङ्कःगन यात्चाक्कोः मेत्छ्याःपाय् धोओ दीन्हाङः इनार् घाङ्हाङः ह्रप्चाः त खेःया ओउः मान्ताइ मेत्छ्याःकायः चुम्ती च्युन्नौ माःर। 12धोओ दीन्हाङः मेत्छ्याःपाय् स्याक्ताक्सालेः स्याव्नाः त खेःया मान्ताकायः स्याक्ताक्सा न्हाङ्तोलेः स्याव्आनाः बा। माः धोओ दीन्हाङः पेओ काम् जाङ्ह्सा गल खेःयामा स्याव्लेःनाः” त दाय्ह्ती येसु त्याङ्ती 13ओउः क्रुत् स्रीत्ती जीक्ओकायः “लौ क्रुत् प्योस दा” त दाय्ह्ती तोथातो ओउः जीक्ओ मान्ता क्रुत् प्योआक्तीको क्रुत्पाय् स्याक्तोलेः स्याव्आ ओउःकोः अरु क्रुत्लो लेखा जुगाङ् सेलः स्याव्आ। 14ओहाङःसैको ओउः फरीसीलम्पाय् थनःओ कीम्सै ग्ल्युङ्ह्ती “लौ इ येसुकायः गत हायःती सात्ती वाय्चाःतय्ह्नी” त दाय्ह्ती नोःकाय्आकाय्।
15“लौ ओउःकायः सात्नी” त दाय्ह्ओ येसुइ चीःती ओउः देस्सै ज्याल्आ ओउःकुस् नाःतो मान्तालम् वाङ्आकाय्। 16ओउःकः वाङ्ओ जीक्ओलम्कायः येसुइ सबै स्याक्ताक्आथास। स्याक्ताक्आक्तीको “लौ इ स्याक्ताक्ओ कुरामा ङा ‘सुलो’ त दाय्ह्ओ कुरामा अरुकायः दोह्मा दाय्ह्ती छ्यान्ह्तेःचानी” त दाय्ह्ती येसुइ तोआथास। 17एत हायःती ओउःइ उय्ह्लेकोः एसायाइ तोओ कुरा ताप्ताक्आकान्। 18“लौ ङाइ छ्युङ्ह्ओ आन राप्ओ नोकरी योनु दा। ओउःकः ङा आनलेः म्रोनाङः फेरी ओउःकायः ङाकोः ग्वालामःलेः बयःनाङः। ओउःइपाय् ङाकोः तय्छनःती योसा कुरालेः सबै जात्कोः मान्तालम्कायः छ्यानःती तोलेःनौ। 19ओउःपाय् क्योङ्ह्ती काय्काय्मामाःत गलकायःमा वाह्लेःनाः 20ओउःपाय् मीओलम्कः खह्र्तो खेःल ह्र्यात्लम्कायः ओउःइ योनःतीलेः योनौ। ओहाङःसैको दोङ् पेओ ऐन् स्याव्लेःनाः। 21ओउः वाङ्साकायः सबै जात्कोः मान्तालम् झाह्ती मुनै” त दाय्ह्ओ एसायाइ परमेस्वर्कोः कुरा लेखआकान् ओउः कुरापाय् ताप्तोलेः स्याव्आ।
22ओहाङःसैको यात्चाक् लान्इ ङायःओ च्यवःसामा नोःसामा खाय्मालो मान्ता येसुकःताङ् वानःआकानी। वानःआक्तीको येसुइ ओउःकायः स्याक्ताक्आथै ओहाङःसै स्याक्ताक्आक्तीको ओउः मान्ता नोःसामा च्यवःसामा खाय्ओ खेःतो। 23ओउः मान्ता जुगाङ् सेलः स्याव्ओ च्यवःती सबै ओहाङः हुम्ओ मान्तालम् आन ग्याङ्ह्आकाय् “लौ इपाय् ओउः वाङ्सा खेःओ दावुद् राजाकोः प्लोमःदाने लेःआः बा” त दाय्ह्तो नोःकाय्इतो 24ओउःमयः नोःकाय्ओ फरीसीलम्इ सायःती “लौ इपाय् बाल्जीबुल् त तोओ लान्कोः राजाइ बास्आथै ओउःत झ्यान्ते ओउः लान्कोः ग्वम्इ अरु लान्कायः ल्हेस्ती वाय्नौ बा” त दाय्ह्ती तोआकानी। 25ओहाङःसैको ओउः फरीसीकोः ल्हुङ्तुक्कोः कुरा येसुइ चीःती “लौ यात्ज्योः राजाकोः मान्तालम् लयःमयःकुस् काय्काय्ती मीन्ह्काय्ती मुचै त खेःया ओउः राजाखेकायः अरु राजाखेइ वाङ्आक्तोकोः रेन्ह्तोलेः क्लीमःसा खाय्नाःथै। फेरी गाव्कोः मान्तालम् कीम्कोः मान्तालम् लयःमयःकुस् मीन्ह्काय्ती मुचै त खेःया ओउः गाव्कोः मान्तालम् कीम्कोः मान्तालम् वाय्तो स्याव्नै माःर। 26इःलो लेखालेः ओउः लान्कोः राजा लयःमयःकुस् काय्काय्ती ल्हेस्ताक्चौ त खेःया ओउःकोः राजीपाय् वाय्तो स्याव्नाः। 27ङाकायःपाय् ‘लौ बाल्जीबुल् लान्कोः ग्वम् दोःती ओउःइ लान् ल्हेस्ताक्नौ’ त दाय्ह्ती तोतेःनाङ्सतो नीङ्कुस् वाह्ओलम्इमा लान्कायः ल्हेस्ताक्ओ जाङ्ह्नानी ओउःमयःइ सुकोः ग्वम् दोःती एत हायःसा खाय्नानी र। ओउःमयःइ बाल्जीबुल्खेकोः ग्वम् दोःती एत हायःनानी त खेःया ओउःमयःकायःमा जान्ती तोसा खेःतो। खेःल ओउःमयःमा परमेस्वर्खेकोः ग्वम् दोःती लान् ल्हेस्ताक्सा खाय्नानी त खेःया ङाकायःमा जान्सा स्याव्आक्ल। 28ओहाङःसै ङाइपाय् परमेस्वर्कोः ग्वालामःलेः दोःती लान् ल्हेस्ताक्नाङः त खेःया लौ परमेस्वर्कोः राजीपाय् ‘ङीकःहाङः दाह्ओ लेःआः’ त चीःसा खाय्तेःनानी। 29छुर्ओ मान्ताकायः आःताः क्लीमःती पानःमाःत सुइमा ओउः मान्ताकोः माल्ताल्लम् लाती आलःसा खाय्नीली। ओउःतलेः सैतान्कोः लान्लम् ल्हेस्ताक्साकायः ङाइ ङ्हासै सैतान्कायः क्लीमःसा खाय्ओ खेःङोतो। 30सुखेलो ङाकुस् वाह्इली ओउःलेः ङाकोः काम्पाय् त्याःसालेः बोङःनौ। सुसुइलो ङाकायः लव्ह्ओ काम् जाङ्ह्नीली ओउःइ जाङ्ह्ओ काम्पाय् लोल आह्रे लेःआः बा। 31ओउःत झ्यान्ते ङाइ इत तोनेःनाङ्स दा। सुसुखेइ रेव्तो जाङ्ह्मानौ रेव्तोमा नोःलेःनौ ओउःकोः रेव्तो हायःओलेः परमेस्वर् क्युम्ह्ताक्सापाय् ग्यालेःनाः सुसुखेइ परमेस्वर्कोः ग्वालामःकायः रेव्तो नोःचै ओउःकोः रेव्ओपाय् गलकायःमा क्युम्ह्सा दोःल बा। 32सुसुखेइ ओउः मान्ताकोः चोः त तोओकायः रेव्तो नोःचै ओउःकोः रेव्ओमा क्युम्ह्सा दोःलेःनाः सुसुखेइ परमेस्वर्कोः ग्वालामःकायः रेव्तो नोःचै ओउःकोः रेव्ओ तेन्छ्याङ्मा लोनेमा गलमा क्युम्ह्सा दोःल बा।
33लौ पेओ सीङःसै पेओ सायःलेः दोःनाः ओउःलो लेखा पेओ मान्ताइपाय् पेओ काम्मा जाङ्ह्नौ पेओ कुरामा नोःनौ। पेमालो सीङःसै पेओ सायः दोःल फेरी पेमालो मान्ताइ पेओ काम् जाङ्ह्नीली। 34अ नीङ् कुयः युक्कोः चोःलम् एत रेव्ओ ल्हुङ् खेःओलम् पेओ नोःसा जुगाङ् खाय्तेःनीली। 35पेओ मान्ताखे पेओ ल्हुङ्तुक्सै पेओ कुरा नोःनाः रेव्ओ मान्ताखे ओउःकोः पेमालो ल्हुङ्तुक्सै रेव्तो नोःनाः। 36दोङ्सी दाय्ह्भनाङ् दोह् दोह्तेः आह्रे दाय्ह्तेःनै ओउः तय्छनःती योसा दीन्हाङः नीङ् ल्हाक्ती छ्यानःसा खेःतेःइतो 37ओउः कुरा पेतोलेः त खेःयाकायः नीङ्मा पेलेःतेःनै। खेःल ओउः कुरा रेव्तोलेः त खेःया नीङ्मा रेव्लेःतेःनै त अरुइ चीःसा खाय्नानी” त दाय्ह्ती येसुइ तोआकान्।
38ओहाङःसैको यात्नीस्चाक् धर्मा स्यान्ओमयःमा फरीसीलम्मा वाङ्ती “लौ गुरुय ङीकायः ग्याङ्ह्राय् जाङ्ह्ताङी दै ओहाङःसै नाङ्कायः ताङ्ह्ओ मान्ता लेःआः त चीःसा खाय्नाङःसु” त दाय्ह्ती तोथातो 39“खेःल तेन्छ्याङ्कोः आन पेमालो ङ्हाम्सा ग्यामालो मान्तालम्पाय् ग्याङ्ह्राय् च्यवःआक्तीको ह ङाकायः ङ्हाम्सा ग्यानै। लौ ङा परमेस्वर्कःसै वाङ्ओ लेःआः त छ्यानःसाकायः ओउःमयःइ ग्याङ्ह्राय् बोङःनीतो इत छ्यानःसा ग्याङ्ह्राय्लेः ओउःमयः दोह्मा दोःइली इ याज्याङ् ग्याङ्ह्राय् ह च्यवःसालेः दोःनै। 40उय्ह्लेकोः योनाह् त तोओ सुम् याह्दीङ् न्हीदीङ्कायः ताङ्ह्ओ ङाःकोः तुक्हाङःलेः मुआक्तीको सेलः मुओ खेःतो। ओउःलो लेखा ओउः मान्ताकोः चोः त तोओपाय् सुम् याह्दीङ् सुम् न्हीदीङ्कायः ह साःहाङः पाम्ह्आक्तीको उह्ती च्योक्लेःनाः। इ ग्याङ्ह्राय् ह ङ्हाम्ताक्साकायः बयःलेःनाः। 41योनाह्खेइ जान्ती तोओ कुरा सायःआक्तीको ओउः नीनेवे त तोओ सहर्कोः मान्तालम्इ ल्हुङ् द्यान्ह्ती रेव्ओ काम् जाङ्ह्ओ फेआकानी। ओउः मान्ताकोः चोःखेपाय् योनाह्सै ताङ्ह्तो लेःआः ओउःइ तोओ कुरा नीङ्इ सायःतेःनीली ओउःत झ्यान्ते परमेस्वर्इ तय्छनःती योसा दीन्हाङः ओउः नीनेवेकोः मान्तालम् नीङ्कायः गाल्तुम्तीलेः तोतेःनै। 42फेरी दक्सीन्हाङः मुओ सेबा देस्कोः रानी आन लोक्तोसै सुलेमान् राजाकोः व्हाय्ती तोओ कुरा सायःसाकायः वाङ्लेःआ ओउः मान्ताकोः चोःपाय् सुलेमान्सै व्हाय्तोलेः नोःनौ ओउःइ तोओ कुरापाय् नीङ्इ सायःसा ग्यातेःइली ओउःत झ्यान्ते ओउः सेबाकोः रानीसै नीङ्पाय् न्हाङ्तोलेः न्युम्ह्तोतेः स्याव्तेःनै बा।
43लौ यात्ज्योः लान्पाय् मान्ताकायः फेनौ त खेःया फेआक्तीको यात्ज्योः याक्गार्सीःमालो थाव्हाङः ब्याह्ती न्यास्सा थाव्कायः बोङःलाङ् वाह्नाः। 44ओउःइ थाव्कायः बोङःसापाय् बोङःउतो दोह्मा च्यवःल ओउःत खेःओ ओउः लान्पाय् ‘लौ ङा ङ्हा मुओहाङः पाय्ह्लेःनाङः’ त दाय्ह्ती ओउः ङ्हा ङायःओ मान्ताकः पाय्ह्नाः। 45पाय्ह्आक्तीको ओउः लान्कोः ङ्हा मुओहाङः पेतोलेः हाःतो मुबाय्ओ त च्यवःती ओउः लान्इ अरु सात्गोता न्हाङ्तोलेः रेव्ओ लान्लम् वानःती ओउःमयः सबै ओउः मान्ताहाङः याक्नै। ओहाङःसैको ओउः मान्तापाय् ङ्हासै न्हाङ्तोलेः पेमालो स्याव्नाः। इतलेः ओउः मान्तालो लेखा तेन्छ्याङ्कोः रेव्ओ मान्तालम् न्हाङ्तोलेः पेमालो स्याव्नै” त दाय्ह्ती येसुइ तोआथास।
46ओहाङःसैको हुम्ओलम्कायः एत तोतोक्हाङः येसुकोः आमामा हौचोङ्लम्मा ओउःकुस् नोःलाङ् कीम् बाहीरहाङः दाह्ती वाङ्आकाय्। 47ओउःमयः येसु द्याङ्तो वाङ्सा खाय्माःत झ्यान्ते “लौ नाङ्कोः आमाचोङ् नाङ्कुस् नोःसाकायः बाहीरहाङः दाह्ती मुनै” त दाय्ह्ती यात्चाक्इ तोथातो 48“ङाकोः आमाचोङ्मा हौचोङ्मा सुसुलो त तोची दा” त दाय्ह्ती येसुइ ओउः वाङ्ओ मान्ताकायः व्हत्आकान् 49व्हत्आक्तीको ओउःकोः लयःकुस् वाह्ओमयःकायः दोती छ्यानःती “लौ इमयःपाय् ङाकोः आमाचोङ्मा हौचोङ्मा लेःआः इ बा। 50सुसुइ ङाकोः लाङ्काहाङः मुओ आपाकायः म्रोताक्सा कुरा जाङ्ह्नानी ओउःलेः ङाकोः आमाचोङ् हौचोङ्लो लेखा स्याव्आनै” त दाय्ह्ती येसु दाय्ह्आ।
ที่ได้เลือกล่าสุด:
मत्ती 12: CDM93
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 1993 Wycliffe Bible Translators Inc., All Rights Reserved.
