I YOHANE 4
4
Pepau-paua saru beine to Samaria
4:1-42
1Mansa-Do tumo'orio i Yesu, nine domerongeomo to Parisi, hadioopo Dopohawe ka Dopobaho ana guru sekono i Yohane 2– maupo komba Ondae-Do i Yesu mobaho, tendeano ana guru-Do, – 3Dobintaomo Yudea ka Dowali mekule i Galilea.
4Ondae asalakono telalo i wita Samaria. 5#Teg. 48:22; Yos. 24:32 Ka hawe Iramo a aasa kota i Samaria, anu meneeako Sikara umpeda a wita anu iweeakono i Yako i ndi'upua ndi anano i Yusupu. 6I tu'ai hinao sumuruno i Yako. Ondae i Yesu tedoa mokendo hangano pelempaa, onaemo ka Dopentoro a wiwi nsumuru atuu. Tempo atuu bara'ura langku hopulu ka orua. 7Ka haweomo aasa beine to Samaria ta montambu uwoi. Dopotaeakono i Yesu, ”Powee Aku ka Kupo'inu.” 8Hangano ana guru-Do melako iramo a ngkota mpo'oli kaanga. 9#Esr. 4:1-5; Neh. 4:1-2 Onaemo ka ipotae beine to Samaria atuu ndi Ondae, ”Kana'umpe Omiu, aasa to Yahudi, mo'ema mo'inu ndi ongkue, aasa to Samaria?” (Hangano to Yahudi nahi dompewali-wali saru to Samaria.) 10Sumangki Ira i Yesu, ”Tewala uto'orio mongkona pompowee-Do Ue Ala ka isemake Ondae anu mepauakomu: Powee Aku ka Kupo'inu! Asalakono mo'emakomo ndi Ondae ka Dopoweekomo uwoi tuwu.” 11Motae beine atuu ndi Ondae, ”Ue, nahina pontambu-Miu ka sumuru andio ondalo ntu'u; inso i suake Ipohawe uwoi tuwu atuu? 12Nde langkai Komiupoke sekono amamami i Yako, anu moweeakami sumuru andio ka ondaedo isa'a mo'inu anu inso i larono, ondae saru luwuno anado ka pinotuwudo?” 13Sumangki Ira i Yesu, ”Ba isema mo'inu uwoi andio, onae ta wali mokoranga, 14sine ba isema mo'inu uwoi anu Aku weeakono, onae nahi ta mokoranga ranta nahina tampulaano. Posuleno uwoi anu Aku weeakono, ta gagi mata uwoi a ngkoroino, anu waa mpiha hawe a ntuwu nahina tampulaano.” 15Motae beine atuu ndi Ondae, ”Ue, Ipowee akumo uwoi atuu, ka si kumokoranga ka siimo ku'aiwa mbo'u montambu uwoi i ndi'ai.” 16Dopotae i Yesu ndi onae, ”Lakomo, poboiomo tamamu ka i'aiwa i ndi'ai.” 17Motae beine atuu, ”Nahina tamaku.” Dopotae i Yesu ndi onae, ”Kona ntu'u pinaumu, nine nahina tamamu, 18hangano olima iramo tamamu ka anu kongko ndi omue kanandio-andio, lano komba tamamu. Mongkona andio mepauko mentee.” 19Motae beine atuu ndi Ondae, ”Ue, kanandio-andio mengkaa ndi ongkue, nine Omiu aasa nabi. 20Uempu'umami mpesomba ira a wawo ntorukuno andio, sine mpotae komiu, nine i Yerusalemo pesombaado mia.” 21Dopotaeakono i Yesu, ”Pompe'ala-alamo ndi Ongkue, hei beine, ta hawe tempono, nine komiu mpesomba ndi Ondae i Ama komba a ntorukuno andio ka komba mbo'u i Yerusale. 22Omiu mpesombaio hapa anu nahi imento'orio, omami mpesombaio hapa anu kimento'orio, hangano tekaduduia hawe inso a tongku Yahudi. 23Sine ta hawe tempono ka kanandio-andio haweomo, nine luwuno anu mpesomba mentee ira mpesomba ndi Ondae i Ama a laro Penaa ka menteea; hangano anu mpesomba kanatuu inehe-Do i Ama. 24Ondae Ue Ala atuu Penaa ka ba isema mesombai Ira, asalakono mesombai Ira a laro penaa ka menteea.” 25Sumangki beine atuu ndi Ondae, ”Kuto'orio, nine i Mesia Ira hawe, anu nineeako mbo'u i Kerisituu; ba Dohawe, Ira pauakami luwuakoano.” 26Motae Ira i Yesu ndi onae, ”Ongkuemo, anu kontongaano mepau saru omue.” 27I tempo atuu mehawe iramo ana guru-Do ka mengkohali-hali ira, nine kontongaa-Do mepau-pau saru aasa beine. Sine nahina maupo te'asa mia anu mepau, ”Hapa po'ehe-Miu? Ke: Hapa anu Ipepau-pauako saru onae?” 28Onaemo ka ibintao beine atuu kusino i tu'ai ka i'amba lumako a ngkota ka pauako ira mia anu i tu'ai, 29”Ime'aiwa, mengkitao! I ra'ai hinao asa mia anu pauakune luwuakoano anu kuweweuomo. Bara'ura Ondaemo i Kerisituu atuu?” 30Ka melako iramo mpeluarako inso a ngkota ka do'amba me'aiwa ndi Ondae i Yesu.
31Kontongaano atuu ana guru-Do umoluako Ira, dompotae, ”Guru, Ipongkaamo.” 32Sine Dopotaeako ira, ”Ndi Ongkue hinao kaanga anu nahi imento'orio.” 33Ka mpepau-pau iramo ana guru atuu pada ondaedo, ”Hinaoke mia anu mowawa hapa anu Ira Kumaano?” 34Motae Ira i Yesu ndi ondae, ”Kaanga-Ku onaemo weweuo po'ehe-Do anu tumena Aku ka moko'umario anggaa-Do. 35Komba omiuke mpotae: Opaa wulapo ka ihawe tempo sumowi? Sine Kupauakomiu: Impekitamo limbu-limbu ka imengkitaomo luwuno lere anu mongkuniomo ka motaha sowianomo. 36Kanandio-andio anu sumowi montarimaomo tambono ka ipumpuo wua tiano tuwua anu nahina tampulaano, ranta anu morawo ka anu sumowi pada ira mo'unde. 37Hangano mongkona anu kanandio menteeomo pompotundaa pau: Anu asa mia morawo ka anu susua sumowi. 38Kutena komiu ka imensowio hapa anu nahi mpe'iseiakono; mia susua mpe'iseiakono ka omiu hawe me'opuo hasilino pe'iseido.” 39Ka hadio to Samaria inso a ngkota atuu mpompe'ala-ala iramo ndi Ondae hangano pinauno beine atuu anu mesakosii, ”Dopauakune luwuakoano anu kuweweuomo.” 40Mansado mehawe to Samaria atuudo ndi Ondae i Yesu, dome'emao ndi Ondae ka Dopo'ia ndi ondae; ka mo'ia Iramo i tu'ai orua oleo tehineno. 41Ka lalu hadio mbo'u mia anu mpompe'ala-ala hangano pau-Do, 42ka dompotaeakono beine atuu, ”Mpompe'ala-ala kami, sine komba hangano mbo'u anu pinaumu, hangano omami isa'a rumonge Ira ka kimento'orio, nine mente ntu'u Ondaemo Puu Pongkaduduino wawontolino.”
Mekule i Galilea
4:43-45
43Ka umarino orua oleo atuu melungka Ira i Yesu inso i ra'ai lumako i Galilea, 44#Mat. 13:57; Mrk. 6:4; Luk. 4:24 hangano OndaeDo isa'a i Yesu mesakosii Iramo, nine aasa nabi nahi pinelangkai i witano onaeno. 45#Yoh. 2:23 Ka mansa-Do hawe i Galilea, domentotowo Iramo to Galilea, hangano domengkitaomo luwuakoano anu inangga-Do i Yerusale a gawe atuu, hangano melako ira koa mbo'u a gawe atuu.
Ondae i Yesu mokotompao anano pegawai langkanae
4:46-54
(Mat. 8:5-13; Luk. 7:1-10)
46 #
Yoh. 2:1-11
Umarino atuu mekule Ira mbo'u i Yesu i Kana i wita Galilea, i tu'ai Doweweuo uwoi gagi anggoro. Ka i Kapenau hinao asa mia pegawai langkanae, anano kontongaano mahaki. 47Tempono irongeo, nine Ondae i Yesu hawe Iramo i Galilea inso i Yudea, lumakoomo ndi Ondae ka i'amba umemao, ka Dolako mokotompao anano, hangano anano atuu ilawu mate. 48Onaemo ka Dopotaeakono i Yesu, ”Tewala nahi mpongkita petondoni ka anu kinohali-haliako, nahi komiu mpompe'ala-ala.” 49Motae pegawai langkanae atuu ndi Ondae, ”Ue, I'aiwamo se'eluno napi mate anaku.” 50Motae Ira i Yesu ndi onae, ”Lakomo, anamu tuwu!” Mia atuu me'ala-alao pau anu Dopauakono i Yesu, ka i'amba lumako. 51Tempono onae da a ntonga nsala me'aiwa iramo atano ndi onae mpowawa lele, nine anano tuwu. 52Isikeno ira langku opia ipompu'u tompa nana'ote atuu. Mesangki ira, ”Indiawi meene langku aasa tetadiomo mokulano.” 53Ka ipokompewowoloomo ama atuu, nine i tempomo atuu Dopepauakono i Yesu, ”Anamu tuwu.” Ka i'amba mompe'ala-alaomo, onae ka luwuno somborino.
54Ka onaemo petondoni ko'orua anu wineweu-Do i Yesu tempono Dopekule i Galilea inso i Yudea.
ที่ได้เลือกล่าสุด:
I YOHANE 4: XMZ
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
