I YOHANE 3
3
Pepau-paua saru i Nikodemu
3:1-21
1Hinao aasa to Parisi anu meneeako i Nikodemu, aasa petewawa agama Yahudi. 2Onae aiwa ndi Ondae i Yesu tempono wongi ka ipotae, ”Guru, kimento'orio, nine Omiu hawe gagi guru anu tinena-Do Ue Ala; hangano nahina maupo te'asa mia anu polio weweu ira petondoni anu wineweu-Miu atuu, ba nahi Dokongkomio Ue Ala.” 3Sumangki Ira i Yesu, Dopotae, ”Kupauakomu, menteeano tewala asa mia nahi wali pine'anaako, nahi ta mokokitao Poparentaa-Do Ue Ala.” 4Motae i Nikodemu ndi Ondae, ”Kana'umpeke asa mia ta pine'anaako, ba mota'uomo? Wali mokompewinsoke a laro mpe'anakaano ineno ka ipine'anaako mbo'u?” 5Sumangki Ira i Yesu, ”Kupauakomu, menteeano tewala asa mia nahi pine'anaako inso a uwoi ka Penaa, nahi ta mokompewinso a laro Poparentaa-Do Ue Ala. 6Hapa anu pine'anaako inso a koroi onaemo koroi, ka hapa anu pine'anaako inso a Mpenaa, onaemo Penaa. 7Si kohali-hali, hangano Kupotaeakomu: Asalakono komiu wali mempine'anaako. 8Angi mepuuri ba isua po'eheno, ka urongeo unino, sine nahi uto'orio ba isua insoano ke ba isua te'aroano. Kanandiomo teweweuno sompo mia anu hina inso a Mpenaa.” 9Sumangki i Nikodemu, ipotae, ”Kana'umpeke ta gagi anu kanatuu?” 10Sumangki Ira i Yesu, ”Omue anu paguru ira to Isaraeli, ka nahi upokonto'ori ira anu kanatuu? 11Kupauakomu, menteeano omami mpepau mongkona hapa anu tino'orimami ka mpesakosii mongkona hapa anu kinitamami, sine nahi imentarimao ponsakosiimami. 12Nahi impe'ala-alao, tempono Kupompauakomiu mongkona anu i wawontolino, kana'umpe komiu mpe'ala-alao, ba Kupompauakomiu mongkona anu i suruga? 13Nahina maupo te'asa mia anu mewuatakoomo i suruga, sangkadio Ondae anu metii Iramo inso i suruga, onaemo i Ana Manusia.
14 #
Pod. 21:9
Ka mengkena kana i Musa mompokomantande ule i pada one, kanatuu koa mbo'u i Ana Manusia asalakono Ira pinokomantande, 15ka dompohawe tuwua anu nahina tampulaano sompo mia anu me'ala-ala Ira. 16Hangano kanatuumo langkaino pompehohawa-Do Ue Ala i wawontolino andio, onaemo ka Dopeweengakono Ana-Do anu asa-asa, ka si domemate mia anu mpe'ala-ala Ira, tendeano mpohawe tuwua anu nahina tampulaano. 17Hangano Ondae Ue Ala tumenao Ana-Do hawe i wawontolino komba ka Dobitarao wawontolino tendeano ka Dokaduduio. 18Ba isema me'ala-ala Ira, nahi ta hinuku; ba isema nahi pompe'ala-ala, lano hinikuomo, hangano nahi pompe'ala-ala a nee-Do Ana-Do Ue Ala Anu Asa-asa. 19Ka ndiomo pohuku atuu: Mewine haweomo i wawontolino, sine mia inehedopo wongi-wongia sekono mewine, hangano luwuno wineweudo mosa'o. 20Hangano ba isema moweweu mosa'o, i'o'aliaakono mewine ka nahi aiwa a mewine atuu, ka si tengkita luwuno wineweuno anu mosa'o atuu; 21Sine ba isema moweweu anu mentee, onae aiwa a mewine, ka imengkaa, nine luwuno wineweuno iweweuo ndi Ondae Ue Ala.”
Ponsakosiino i Yohane mongkona Ondae i Yesu
3:22-36
22Umarino atuu Ondae i Yesu lumako saru ana guru-Do i wita Yudea ka mo'ia Ira i ra'ai saru ondae ka Dopobaho. 23Sine maupo i Yohane mobaho koa mbo'u i Aino, umpeda i Salimi, hangano i tu'ai hadio uwoi, ka mehawe ira mia i tu'ai ka domebinaho, 24#Mat. 14:3; Mrk. 6:17; Luk. 3:19-20 hangano i tempo atuu i Yohane napi wininso a laro torungku.
25Ka nteposisala iramo ana guruno i Yohane saru aasa to Yahudi mongkona pepokomemporia. 26Ka do'amba me'aiwa ndi Yohane ka dompotaeakono, ”Guru, mia anu perongamiu i asatowano koro Yarade ka anu mongkona Ondae mesakosii komiumo, mobaho Ira mbo'u ka luwuno mia melako ndi Ondae.” 27Sumangki i Yohane, ”Nahina maupo te'asa mia anu mokompo'ala hapa-hapa tiano koroino, tewala nahi pinoweeako inso i suruga. 28#Yoh. 1:20 Omiumo isa'a mpokompesakosii, nine mepau akumo: Ongkue komba i Mesia, sine ongkue tinena mese'elungi Ira. 29Anu me'umbuo umbu ngkoroi beine, onaemo umbu ngkoroi tama; sine sambe'eno umbu ngkoroi tama, anu mentade i horino ka anu merorongeakono, tedoa mawongko aroano rumongeo suarano umbu ngkoroi tama atuu. Onaemo mokomawongkoo aroaku, ka kanandio-andio mawongkoomo ntu'u aroaku. 30Ondae asalakono kolangka-langkai-Do, sine ongkue asalakono kokode-kodeiku.
31Isema anu hawe inso i wawono onaemo i wawono luwuno; isema anu inso i tolino, tewinso mia i tolino ka mepauako pau ntolino. Isema anu hawe inso i suruga onaemo i wawono luwuno. 32Ondae mesakosii mongkona hapa anu kinita-Do ka anu rinonge-Do, sine nahina maupo te'asa mia tumarimao ponsakosii-Do atuu. 33Isema tumarimao ponsakosii-Do atuu, imangakuakono, nine Ondae Ue Ala anu mentee. 34Hangano isema tinena-Do Ue Ala, Ondaemo mohaweo pau-Do Ue Ala, hangano Ondae Ue Ala moweeako Ira Penaa-Do nahi tetidahi. 35#Mat. 11:27; Luk. 10:22 Ondae i Ama mehohawao Ana-Do ka Dopeweengakonomo luwuakoano ndi Ondae. 36Ba isema me'ala-ala Ira Ana, onae mohawe tuwua anu nahina tampulaano, sine ba isema nahi petenunui Ira Ana, onae nahi ta kumitao tuwua, tendeano pontekudaako-Do Ue Ala kongko mpiha ndi onae.”
ที่ได้เลือกล่าสุด:
I YOHANE 3: XMZ
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
