Luk 6
6
Zezu ni Kuŋwu we vʉsa ve idzʉndu
1Vʉsa ve idzʉndu votu, Zezu alinanga mekʉba me mesangwe bane bebingi bedzi. Bebingi bedzi bavuneka mesangwe, banyukʉle mesangwe ne mekaka badza. 2Batu be Falizi ne bangu ati: «Ye beyi bipika tuu vʉsa ve idzundu ni yi? Beyi nde yiba ati, yedzi ne tsɨla.» 3Ye Zezu ekalule ne bangu ati: «Beyi beke tangala, me Davidi epika, vʉsa votu ye nzala ye kwata wangu bane booko nedzi 4Davidi anyinzile se ndaku ye Nzambi, aboko pembe ye bekaba Nzambi, adza bane batu bedze ne usukʉdze wangu. Ni bituka dza pembe yayu, si bekabi be bisemi bye Nzambi.» 5Zezu avele tanda ne bangu ati: «Me we yikwene Muutu, meni Kuŋwu we vʉsa ve idzʉndu.»
Zezu asaka muutu wedzi ne leme se boko
6Vʉsa voko ve idzʉndu, Zezu anyinzile se ndaku ye umbondu ne ulakise. Yedze ne muutu wedze ne leme se boko ye sangwe. 7Belakisi be bitsila ne batu be Falizi bedze ne uwaya, ne uyene ati, Zezu atse saka muutu vʉsa ve idzʉndu, ne bangu bifumba bomo mbingu ye upita Zezu. 8Ni Zezu eyiba metsimini me bangu. Zezu ne muutu widzi ne leme se boko ye sangwe ati: «Telime, dze wa busu ve batu besi.» Ye muutu etelime busu ve batu besi. 9Zezu ne bangu ati: «Me suŋwule beyi dzamvu dzotu, ye bituka pika vʉsa ve idzʉndu ni yi? Mamvu meve na mamvu mebi? Usaka muutu na ubuuma wangu.» 10Zezu awaya bangu besi, yedzi etanda ne muutu mene ati: «Simvɨle boko.» Muutu asimvɨle boko, ne boko ya lunga. 11Bekuŋwu be bitsɨla ne batu be Falizi bakamve kate kamve amene. Ye bangu bewowe tima ye bangu ati: «Ni bebe baki pika ne Zezu yu ni vi!»
Zezu atobo betuma bedzi iku ne bole
12Ndili mene yayu Zezu abita kule kudzi ne ubondo, yedzi ebondo Nzambi pinzi yesi. 13Vʉsa ve seŋwen Zezu abanga bebingi bedzi, atobo tima ye bangu batu iku ne bole, bedzi eluka kumvu ye betuma bedzi. 14Yenayi me kumvu me betuma be Zezu. Simon wedzi eluka kumvu ye Pyeli, ŋwanzi wedzi Andeli, Zaaki, Zan, Filipi, Batelemi. 15Matye, Toma, Zaaki ŋwana we Alife ne Simon witondo dzanza. 16Zudi ŋwana we Zaaki ne Zuda Isikalyoti witse sumbise Zezu.
Zezu alakise batu, asaka ne mibedzu
17Zezu asundaka kudzi bane betuma bedzi, basita se lindebe, buma yedze ne bebingi bedzi beyitsi. Yedze ne batu beyitsi be Zude, se ngundu ye Zeluzalemi ne be bingundu bye Tili ne Sidoni. Ngundu ye Tili ne ye Sidoni, bye dze ni unkolo ŋwen nzali ye metsimba. 18Batu baya yuka Zezu, baya saka ne me nyulu me bangu. Zezu asaka ne bedze ne mimbiti. 19Batu besi bafumba betime nedzi, ne singa yedze ne upula se nyulu yedzi, ne usaka mibedzu myesi.
Itsisa ne ndoko
20Zezu awaya bebingi bedzi, ne bangu ati:
«Itsisa ne beyi bidzi ne unkuuna,
ne Ukani ve Nzambi ni ve beyi!
21Itsisa ne beyi bidzi nzala lolo,
ne beyi betse yʉla,
itsisa ne beyi bilila lolo,
ne beyi betse sewe!»
22Itsisa ne beyi, ndili ye batu biwunda beyi, ye batu bilewe beyi, ye batu bitukene beyi, ye bitanda beyi mamvu mebi, itsina nami we yikwene Muutu. 23Tsisayi, tambayi ndili ye mamvu mamu mitse ya, ni Nzambi atse kaba beyi mewʉta meneni ikulu, ne bekoko be bangu bedze ne unyokɨle Batu be Nzambi si vavu.
24«Ni ndoko ne beyi bidzi ne untamvu,
ne beyi bamana bomo untamvu! 25Ndoko ne beyi bidzi ne byesi lolo, ni nzala yetse kwata beyi! Ndoko ne beyi bisewe lolo, beyi betse dze se ubi, ne beyi betse lila!»
26«Ndoko ne beyi ti batu besi bakakise beyi, ne bekoko be bangu bedze ne upika si vavu ne Batu be Nzambi be undzuma.»
Tondo biwʉnda we
27«Ni me tanda ne beyi, biyuka me, tondayi biwʉnda beyi, pikayi mamvu meve ne batu be nde tondo beyi. 28Kabayi batu biwunda beyi meve, bondayi Nzambi ne batu bipanda beyi. 29Muutu ti adama we se ibuka dzotu, wa laka wangu ne dzoko. Muutu ti apinule we ingoyi dzineni, wa kaba wangu ne dzite. 30Kaba paka si muutu widzʉka we yila, ni muutu ti aboko we yila we nde suŋwule. 31Pikayi boko me beyi bitondo ati, bepika ne beyi. 32Beyi ti batondo si bitondo beyi, beyi nde buka ati betse vutise beyi live, ni ne batu bidzi ne mesumu betondo si bitondo bangu. 33Ni beyi ti bapika mamvu meve ne batu bipika beyi meve, nde wi vʉtise beyi live, ne batu bidzi ne mesumu bepika si vavu. 34Ni beyi ti babikise bedolo ne batu bitse vʉtise beyi, nde witse vʉtise beyi live. Ne batu bidzi ne mesumu bebikise si bidzi ne mesumu nda bangu, ne bangu bivutise bangu si mvunu mene mbotu. 35Ni tondayi biwunda beyi, pikayi bangu mamvu meve, bikisayi bangu bedolo, beyi nde somo ivukidze ati, bangu betuka vutise beyi bedolo babu. Yayu beyi betse bomo mewuta meneni, beyi betse yikwe baana be Nzambi we ikulu amene. Wangu adzi uve ne batu be nde vutise wangu live, ne, ne batu benzulu. 36Dzayi ne tsesi ye batu nda ye Tata we beyi.»
Dzikayi pama boko
37«Beyi nde pama boko, yayu ne Nzambi nde tse pama beyi. Beyi nde kwise boko mikwaka, ne Nzambi nde tse kwise beyi mikwaka. Bolokayi boko, ne Nzambi aboloko beyi. 38Kabayi boko, ne Nzambi atse kaba beyi, betse lundise membele me beyi bata ma takʉse. Ne Nzambi atse kaba beyi nda beyi bikaba boko.» 39Zezu avele te bangu ngana mboko ati: «Muutu we mɨsa pii, nde tuka bapa moko we mɨsa pii nda wangu. Toko bangu besi bole banaŋwen se ibila. 40umbingi nde tuka takwe Kuŋwu, ni umbingi we belakise uve uve, atse dze nda Kuŋwu. 41Yowe iwaya lisawʉle lidzi se dzɨsa dze moko, ni we nde yene liyi ye lipayi lidzi se dzɨsa dzowe. 42Yowe itanda ne ŋwana mama witi: “Yaka me nanguse we lisawʉle lidzi se dzɨsa dzowe”. Ni we nde yene liyi ye lipayi lidzi se dzɨsa dzowe? Umpyeli ŋwowe ŋwaŋwu, banda nanguse liyi ye lipayi lidzi se dzɨsa dzowe, yayu we yene tselele, ne unanguse lisawʉle lidzi se dzɨsa dze ŋwana mama.»
Ŋwili ne mbulu yedzi
43«Ŋwili umve nde buta mbulu yimbi, ne ŋwili umbi nde buta mbulu yimve. 44Beyiba ŋwili umve ni ne mbulu yedzi. Nde tolo sawu kule bikaka bye me sendule, nde tolongo mboloko sɨna mɨsambi. 45Muutu widzi ne mamvu meve, awowe ni mamvu meve, nedzi idzi ne unlima umve. Muutu widzi ne mamvu mebi, awowe ni mamvu mebi, nedzi idzi ne unlima umbi. Mamvu me muutu iwowe, me laka midzi se unlima ŋwedzi.»
Mendaku mole
46Zezu avele tanda ati: «Beyi bebanga me, Kuŋwu, Kuŋwu, ni beyi nde pika mami itanda ni yi? 47Muutu wibinga me, wiyuka mami itanda, ne ukuuna me, yenayi wedzi itala. 48Wangu atala ni muutu witunga ndaku, wangu aluma senze duu, asomo memanyan atunga ndaku kule memanyan. Mvʉla we uneni ti anon, tunda ya ya, mangu me unsulu makʉvele ndaku, ni ndaku yayu nde tuka anyingene ne betunga yangu uve. 49Ni wiyuka mami itanda, ti nde pika mangu, yenayi wedzi itala. Wangu atala ni muutu witunga ndaku nde luma ibila. Ye mangu me unsulu miya ye mangu mibula ndaku, ye ndaku yi naŋwen, ye yangu yi tsalive yesi.»
ที่ได้เลือกล่าสุด:
Luk 6: WUM
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
