Luk 5
5
Zezu atobo bebingi bedzi be wika
1Vusa votu Zezu adzi unkolo nwen dzanga dze Zenezaleti. Batu beyitsi bedze konedzi ne uyuka iwowe dze Nzambi. 2Zezu ayene membungu mole unkolo nwen dzanga. Belobi be beswi basunda ne uswaka bikonwon bye bangu. 3Se membungu ma mole Zezu abita se mbungu ye Simon, Zezu nedzi ati: «Lawe ne mbungu va ite ne unkolo.» Zezu asunda untsitsi se mbungu, ne ulakise batu. 4Zezu amana wowe, wangu ne Simon ati: «Tseke tima ye nzali, beyi besomo bikonwon, bekwata beswi.» 5Simon akalule nedzi ati: «Kunwu besu balamba bikonwon pindzi yesi nde kwata yila. Ni nda we me tanda vavu, me somo bikonwon se mangu.» 6Bangu basomo bikonwon se mangu, bikonwon bya lunda ne beswi, bya fumba nyasive. 7Ye bangu bebanga boko bedze se mbungu mboko ne uya yamene bangu, bangu balundise membungu mesi mole ne beswi. 8Simon Pyeli ayene vavu yedzi evuna membongo busu ve Zezu ati: «Kunwu lawe nami, me ni mutu widzi ne mesumu.» 9Ni Simon etanda vavu ni ne bane boko beyene bongo ne bangu bekwata beswi beyitsi. 10Zaaki ne Zan bana be Zebedi, bedze ne dzandza ne Simon, ne bangu bayene bongo. Zezu ne Simon ati: «We nde yene bongo, ne ubanda vusa velolo we nde tse vele lobo beswi, dzandza dzowe dzakitse dze ni ne uya ne batu bitse binga me.» 11Bangu baye vutse ne mbungu ngulu, ye bangu bedzika byesi ne ubinga Zezu.
Zezu asaka mutu widzi ne fima
12Vusa votu Zezu edze se ngundu yotu, awayu yedze ne mutu wedze ne fima, yedzi eyene Zezu, wangu ananwen busu vedzi panza se sendze. Wangu abondo Zezu ati: «Kunwu, wetuka saka me ti wa tondo.» 13Zezu asi mvile boko, abetime ne mutu widzi ne fima nedzi ati: «Me tondo, lunga.» Zezu amana wowe vavu, mutu mene alunga. 14Zezu atanda ne mutu wedzi mesaka ne fima ati: «Wende tanda ne batu. Tseke laka nyulu ne bekani be ndaku ye Nzambi, yayu bangu beyiba ati, walunga.» 15Batu bedze ne uwowe uyitsi ne me Zezu edze ne pika, batu beyitsi bedze ne ukukene ne uyuka mamvu me Zezu edze ne utanda, wangu asaka ne mibedzu. 16Zezu atse se buma ye ikanye ne umbondo.
Zezu asaka buka
17Vusa votu, Zezu edze ne lakise iwowe dze Nzambi, batu be Falizi ne belakisi be bitsila bye Moyizi, bedze mitsitsi kone dzi. Bangu beyinga ni se membuka mesi me Galile, me Zudee ne ngundu ye Zeluzalemi. Singa ye Kunwu Nzambi yedze nedzi ne usaka mibedzu. 18Batu babapa buka se lipoyi, bangu bafumba somo buka se ndaku ne utedze yangu busu ve Zezu. 19Ni bangu beke tuka nyindzile utsina ne batu beyitsi. Bangu babita kule nwanza, batsuba ibunga, basundise buka ne lipoyi lesi tima ye batu busu ve Zezu. 20Ye Zezu eyene ivukidze dze bangu, atanda ne buka ati: «Akama, ma boloko mesumu mowe.» 21Belakisi be bitsila bye Moyizi, babanda ne utsimene ati: «Ayu mutu niza wiwowe nda Nzambi, wituka boloko mesumu si Nzambi.» 22Zezu ayiba metsimini me bangu, Zezu atanda ne bangu ati: «Ye beyi bidzi ne metsimini me tu niyi?» 23Ye nde udilu niyi, ne utanda ati: «Baboloko mesumu mowe.» Na ne utanda ati: «Telime we landa.» 24Yayu, beyi beyiba ati: «we yikwene Mutu adzi ne singa, ye uboloko mesumu se sendze.» Zezu ne buka ati: «Telime, boko lipoyi tseke ndaku yowe.» 25Ye buka ye telime busu ve batu besi, aboko lipoyi ledzi edze kule langu, yedzi etse ne ukumise Nzambi. 26Batu besi bakima, bayene bongo, bakumise Nzambi, ye bangu betanda ati: «Vusa velolo, besu bayene ma nvu meve me likimiyinda.»
Zezu abanga levi ne ubinga wangu
27Yumana Zezu apula, ayene untolingi we bedolo, we kumvu Levi untsitsi se buma yedzi ye dzandza. Zezu nedzi ati: «Binga me.» 28Levi atelime, adzika byesi ne ubinga Zezu. 29Ye Levi elamba bila biyitsi se ndaku yedzi ne uyamba Zezu. Yedze ne betolingi be bedolo beyitsi, ne batu boko bedze ne dza bila kone bangu. 30Batu be Falizi ne bembatsi be bangu, ne belakisi be bitsila bedze ne upanda unsunvu nwanwu, bangu ne bebingi be Zezu ati: «Ye beyi bidza ne noto kone betolingi be bedolo, ne batu bidzi ne mesumu ni yi?» 31Zezu ayuka vavu, wangu ne bangu ati: «Mibedzu ni mifumba unsaki, ni mingananga nde fumba unsaki. 32Mekeya banga batu bidzi telee, ni me meya ni ye banga batu bidzi ne mesumu, yayu bangu bedzika biku bibi.»
Zezu awowe dze utsili ve nzala
33Batu be Falizi ne Zezu ati: «Bebingi be Zanbatise ne batu be Falizi bekuta utsili ve nzala ne ubondo, ni bebingi bowe, bedza, benoto.» 34Zezu akalule ne bangu ati: «Nde tuka tanda batu ne ukuta utsili ve nzala vusa ve ibala, ndili ye unlumi idzi kone bangu. 35Ni ndili ye bitse nanguse unlumi, bangu betse kuta utsili ve nzala.»
36Zezu ati: «Nde mutu wituka lata liyi ye unkanda nwen tsawen kule nwen kala. Ni ti bapika vavu unkanda nwen tsawen nwetse biwe, ne liyi ye unkanda nwen tsawen nde vukise ne nwen kala. 37Nde mutu wisomo melaku me tsawen, se membinda me kala, toko melaku me tsawen mabula membinda, melaku masumve, ne membinda ma biwe. 38Ni besomo melaku me tsawen, ni se membinda me tsawen. 39Nde mutu witondo noto melaku me tsawen, ti amana noto melaku mekala, ni betanda ati melaku mekala ni meve.»
ที่ได้เลือกล่าสุด:
Luk 5: WUM
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
©Seed Company in partnership with COORDINATION INTER EGLISES POUR L’ALPHABETISATION ET LA TRADUCTION EN LANGUES GABONAISES
