John 19
19
1Oˑnă̱h ne Piˑlate waˑoˑyeeˑno̱o̱ħ ne Jeˑsus, waˑòh'sòhˑgwaˑwesˑho̱o̱ħ.
2Oˑnă̱h noˑdis'gă̱ħˑă̱'gehˑdah wa'dihˑhiˑgwă̱ˑo̱ˑniħ oˑiħk'daħ naħˑot, neħ hoˑno̱ħˑă̱ă̱ħ'gĕh da'diˑă̱ħ, neħˑkuh ne wa'o̱ˑwa̱ˑwaas' gwă̱hˑdăă̱ħ'ă̱ă̱ħ niˑwa'dyaħˑda'wiħˑsyòħˑdă̱ă̱h,
3Neħ ne'oˑnă̱ă̱ aˑwĕn'detˑgăăˑdes'hăħ saˑyaħ'doˑwă̱ħt, Iis ne Go'wăhˑgoˑwaah hoˑno̱ˑwă̱h ne Jews! neħ kuh haˑdis'òhˑdaħ hoˑdiˑye'ăħˑdahˑgo̱h ho̱ˑwa̱ˑgo̱ˑeekˑho̱ħ.
4Oˑnaeħ ne Piˑlate asˑdeh' hesˑha'weˑno̱o̱h, neħ kuh naˑgo̱ˑyă̱'o̱hˑseeh, Swat'gaatˑhòh, Neħˑhuh daˑe'yaħˑdiitˑgă̱h asˑdeh heh swaˑyaħ'daˑdeħ, neħ naˑeˑswă̱ˑno̱h'do̱o̱k heh tă̱ħˑă̱h niiħ deħˑtaħˑgwĭsˑdă̱ħ deˑi'wa'gă̱ħˑseeħ.
5Oˑnă̱h ne Jeˑsus' neħˑhuh heˑa'weˑno̱o̱h haˑdi'yaħˑdaaˑdeħ hoˑdye'ăħˑdah'go̱ˑo̱ˑdyeħ gwaħˑhòh neh' oˑik'daħ gahˑhiˑgwăăħ, kuh neh' gwă̱hˑdăħˑă̱ă̱ħ aˑdyaħ'daˑwiħ'shăħ. Neħ naˑgo̱ˑyă̱'o̱hˑseeh ne Piˑlate, Sheˑswat'gatˑhòh, ne'o̱ˑgweh!
6Neħ dih naˑdi'yaħˑdo̱nˑtwʋs kuh noˑno̱n'diˑo̱nt, noˑnă̱h' waˑo̱'wa̱ntˑgaatˑhòħ, deˑo'no̱hˑsă̱nt'waħˑo̱h hoˑnă̱ă̱, Desˑheˑswaˑyah'so̱nˑdă̱h, desˑheˑswaˑyah'so̱nˑdăh? Piˑlate haˑgo̱ˑyă̱'o̱hˑseeh, Sheˑswaˑdyeˑno̱ˑwa̱t' iis' desˑheˑswaˑyah'so̱nˑdă̱h; tă̱ħˑă̱h să̱ħˑă̱h niiħ deħˑtaħ'gwĭsˑdă̱ħ deˑiˑwa'gă̱ħˑseeħ.
7Detˑho'disˑnyeħˑo̱h ne Jews ho̱ˑwă̱'o̱hˑseeh, Neħ no̱ˑgwaˑyaˑnes'hăˑyă̱ħ, neħ kuh heˑniˑyo̱ˑgwaˑya'nesˑyòħˑdă̱ă̱h gaˑi'waˑyă̱n'dahˑgo̱h neh a'ă̱ˑeeħ; neħ gaˑi'o̱ˑnih heh haˑo̱ˑhwa̱ħ' sho̱ No'aˑwak Na'wĕnˑniˑyòħ' ho'daˑdo̱ˑniih.
8Neħ'dih ne Piˑlate noˑnă̱h' wa'o̱o̱k he'noˑdiˑwă̱nˑno̱ˑwă̱h, neħ' nòħ'gaˑgă̱ă̱ˑis' sho̱ waˑòh'dyo̱ħk;
9Neħ'kuh ne' neħˑhuh ho̱'sa'yo̱ħ heˑdyoˑno̱k'daˑyă̱ħ ne deˑyo̱ˑdaˑdyaħ'doˑweh'dahˑgwaħ, neħ ne wa'wă̱ˑo̱s ne Jeˑsus, Ga'ă̱ˑo̱ˑweh' neˑgă̱ħ' diˑseehˑdo̱h'? Neħ dih ne tă̱ħˑă̱h daħˑdes'hoˑwă̱'no̱ħˑsăăˑgwă̱ă̱ħ.
10Oˑnă̱h ne Piˑlate haˑwă̱'o̱hˑseeh, Tă̱ħˑă̱h gă̱h taħˑdo̱n'dasˑges'nyeħs? Tă̱ħ'ă̱h gă̱h deħˑsă̱'no̱hˑdo̱ħ heh' aˑgeħˑħasˑdes'hăˑyă̱ħ neh' daˑgo̱ˑyah'so̱nˑdă̱ħ, neħ'kuh naˑgeħˑhasˑdes'hăˑyă̱ħ neh o̱ˑsaˑgo̱'yatˑgaħ?
11Detˑhòs'nyeħˑo̱h ne Jeˑsus, haˑwă̱ă̱, Neħ neh deħˑòsˑto̱o̱h' deħˑo'gweˑnyo̱o̱h naah'seħˑhas'desˑhăăˑdaħk neh haħˑgwĭs'dă̱ħ no̱o̱sˑgyeeħ' neħ sho̱ neh heħˑtgă̱'gwaah ă̱ˑdya'wehˑdah'go̱ˑo̱k ă̱ˑyeˑsaˑwi'aak; neħ' dih gaˑi'o̱ˑnih neħ haˑyaħ'daˑdeħ ne'neħˑhuh haˑgyaħ'datˑgaħ'wă̱h heh' syaħˑdaaˑdeħ neħ kuh' naeh haˑaħ' ne gaˑi'waˑneħ'akˑsyòˑwaˑnă̱h.
12Neħ dyo'iˑwaħ nă̱ˑgă̱ă̱ waˑih'saak ne' Piˑlate heˑno̱'o̱ˑdaˑye'ăħ'dʋk o̱o̱'saˑòtˑgaħ; neħ gwaah ne Jews deˑò'no̱hˑsă̱nˑtwaħˑo̱h hoˑnă̱ă̱, Neħ giħˑshă̱h neh ă̱chˑheh'satˑgaħ nă̱ˑgă̱ă̱ ho̱ˑgweh, tă̱ħˑă̱h' waeh deħˑneeħ' deħ'jaˑdă̱ˑòħ' ne Ceˑsar; so̱'diħˑgwa'naħˑòt haˑo̱ˑhwa̱ħ sho̱o̱ go'wăhˑgoˑwaah' ă̱ˑo̱ˑdaˑdo̱ˑniħ, waˑoˑdwă̱ˑno̱ħ'dih waeh ne Ceˑsar.
13Neħ daˑyò'iˑwaħˑheħt dih ne Piˑlate, noˑnă̱h' wa'o̱o̱k he'noˑdiˑwă̱nˑno̱ˑwă̱h, oˑnă̱h' waˑo'yaħˑdo'dahˑsiħ ne Jeˑsus, neħˑhuh' naeh hwaˑaˑdyă̱ă̱ħ' haˑdyă̱n'dahˑgwaħ naˑi'waˑă̱ħˑhetˑhaħ, he'o̱ˑweh oˑno̱k'daˑyă̱ħ ne' Gaħˑsgwăˑdă̱h'daaħ gaˑyaˑso̱h, neħˑgwa' naeh neh Heˑbrew, Gabˑbaˑtha, gaˑyaˑso̱h.
14Neħ oˑnă̱h heˑyò'eeh nă̱'no̱nˑdes'yo̱ˑnyaa'no̱o̱ħ ne deˑwaˑdaˑwă̱'o̱h'gwaħ, neħ' kuh neh' oˑnă̱h' no̱o̱h yee'iħ niˑyo'isˑdaaħˑeeh; neħ neh oˑnă̱h' haˑgo̱ˑyă̱'o̱h'seeh ne Jews, Sheˑswat'gatˑhòh ne swaˑwă̱h ne Go'wăhˑgoˑwaa!
15Neħ gwaah' ne deˑo'no̱hˑsă̱n'twaħˑo̱h, Sheˑswa'yaħˑdo̱ħˑneek, sheˑswa'yaħˑdo̱ħˑneek; deˑsheˑswaˑyah'so̱nˑdă̱h! neħ ne' Piˑlate haˑgo̱ˑyă̱'o̱hˑseeh, Neħ' gă̱h neh iiħ' dă̱ˑe'yahˑso̱nˑdă̱ħ' ne swaˑwă̱h' ne Go'wăhˑgoˑwaah? Detˑho'disˑnyeħ'o̱h naˑdih'să̱ˑnoˑwaˑnă̱s haˑdi'yaħˑdo̱nˑtwas hoˑnă̱ă̱h, Tă̱ħ'ă̱h niiħ deħˑo̱ˑgwaˑyă̱ħ ne go'wăhˑgoˑwaah, neħ sho̱ ne Ceˑsar.
16Neħ neh oˑnă̱h' neħˑhuh' waˑooˑtgaħ haˑdi'yaħˑdaaˑdeħ neħ' ă̱ˑo̱ˑwa̱ˑyaħ'taˑă̱ħ. Neħ neh wa'o̱ˑwa̱ˑdyeˑno̱ˑwa̱t ne Jeˑsus, o'yaħˑjih' kuh hwaˑo̱'wa̱a̱ħ'.
17Neħ na'o̱ˑhwa̱ħ' kuh hoˑtăăˑdyeħ' ne deˑga'yahˑso̱nt, neħˑhuh' heˑaˑweeˑno̱o̱h he'o̱ˑweh ne gaˑyaˑso̱h' he'o̱ˑweh yo̱ˑă̱ˑjaˑdeh'go̱h noˑno̱ħ'ă̱ă̱ħ òkˑdaħ, neħ' naeh ne Heˑbrew Golˑgoˑtha, gaˑyaaˑso̱h.
18Neħ hò'o̱ˑweh do̱nˑda'o̱ˑwa̱'yahˑso̱nˑdă̱ħ, deˑi'yasˑheeh' kuh noˑyaħ' ne shaħˑgaat' waˑo̱ˑwa̱ˑdi'yaħˑtaaˑă̱ħ, deˑjaˑo̱h'gwaa no̱'yaħˑdaˑdih, neħ ne Jeˑsus haħˑde'wahˑsă̱ă̱ˑno̱h.
19Neħ ne waˑa'yaˑdo̱o̱ħ ne Piˑlate, neh ă̱ˑyòˑyă̱ˑdeh'dahˑgo̱'o̱k, neħˑhuh heˑdeˑga'yahˑso̱nt da'ă̱ħ. Neħ' heˑniˑgaˑyeˑă̱h' he'gaˑyaˑdo̱ħ, JEˑSUS NEH NAZˑAˑRETH toˑya'gă̱ħˑo̱h, NEĦ GO'WAHˑGOˑWAA HOˑNO̱ˑWĂ̱H NEH JEWS noˑno'ă̱ˑjoħˑdă̱ħ.
20Neħ' nă̱ˑgă̱ă̱ heˑniˑgaˑwă̱nˑnóħ'dă̱ă̱h oˑnă̱h' waaˑdiˑwă̱'no̱hˑsaaˑwă̱ħ' hoˑno̱nt'gaħˑdeħ ne Jews; neħˑsă̱ħ'ă̱h he'o̱ˑweh òħˑto̱ˑwa̱ˑyah'so̱nˑdă̱ħ neˑJeˑsus dòsˑgă̱'o̱h he'o̱ˑweh niˑgaˑno̱nˑdaˑyă̱ħ; neħ heˑniˑgaˑwă̱nˑnòħˑdă̱ă̱ he'gaˑyaaˑdo̱ħ neħ ne Heˑbrew, Greek, Laˑtin gwaħˑhuh.
21Oˑnă̱h' naˑdih'să̱ˑnòˑwaˑnă̱s' haˑdi'yaħˑdo̱nˑtwʋs ne Jews ho̱ˑwă̱'o̱hˑseeh ne Piˑlate, Să̱ˑno̱h ă̱sˑyaaˑdo̱o̱h, Neh Goˑwăh'goˑwaa ne Jews hoˑno̱o̱ˑwă̱h, neħ gwaa', he'niˑoˑyeˑă̱h hoˑsnyeħ'o̱h, Iiħ' neˑgă̱ħ ne Go'wahˑgoˑwaa ne Jews hoˑno̱ˑwă̱h.
22Desˑhaˑgo̱ˑwă̱'no̱ħˑsăăˑgwă̱h ne' Piˑlate, haˑwă̱ă̱', Neħ heˑniˑwaˑgyeeˑă̱h heh akˑhyaˑdo̱ħ', heˑgaˑgo̱ˑdah'go̱h heˑniˑwaˑgyeeˑă̱h heh' ak'hyaˑdo̱ħ.
23Oˑnă̱h' neh hoˑdis'gă̱ħˑă̱'gehˑdah, noˑnă̱h òħˑto̱ˑwa̱ˑyah'so̱nˑdă̱ħ ne Jeˑsus, deˑo'dihˑgwă̱h noˑsyo̱'nyasˑhăħ, geˑih' niˑga'yaħkˑho̱s'hăˑgee hoˑno̱ˑnii, sgasˑho̱ħ' waˑdiˑyeˑno̱o̱ħ' haħˑdeˑyo̱ˑgweħ'daˑgee noˑdis'gă̱ħˑă̱'gehˑdah; neħ' kuh noˑdyaħ'daˑwiħ'shăħ; da neħ' naˑdyaħ'daˑwiħˑshăħ tă̱ħˑă̱h daħˑde'gaħˑnyă̱'òt, sgat gwa' sho̱ heˑyò'do̱ħˑo̱h he'gasˑyo̱ˑniih, heħˑtgă̱h' dyòhˑsa'wahˑgo̱h, tiˑgaˑgweeˑgo̱h' neħˑhuh' heˑyòħ'dă̱ă̱h;
24Neħ' dih neh oħˑtă̱ˑna̱ˑda'dă̱'o̱s, Să̱ˑno̱h' dă̱ˑdwăăħ'neˑgaah, neħ' gwaa' neh deˑdwaħ'wasˑdyaħk neħ' ă̱ˑgaˑdoˑgă̱s so̱'diħˑgwa'naħ'òt ă̱ˑyaˑgoˑwă̱s'theħt; neħ naˑga'iˑwaˑyeeˑih' heˑniˑgaˑyeeˑă̱h gaˑyaaˑdo̱ħ noˑya'do̱sˑhăˑdoˑgă̱h'diħ, neħ' ne waˑdo̱h, Neħ neh waˑă̱ˑno̱ˑda'dekˑhah'so̱ˑgwʋs naˑgas'yo̱ˑnyas'hăħ, da' oˑnă̱h neh aˑga'dyaħˑda'wiħˑshăħ, neħ' naeh neh waa'diħˑwas'dyaħk. Neħ' nă̱ˑgă̱ă̱ no̱ħˑò'iˑòħˑdă̱ħ'sho̱ħ' neħ noˑdis'gă̱ħˑă̱'gehˑdah neħˑhuh' no̱nˑdiˑyeeħ.
25Da neħ' ne' wakˑah' he'o̱ˑweh deˑa'yahˑso̱nt ne Jeˑsus neħˑhuh' iˑyeet noˑnòħ'ă̱h, kuh neħ' hoˑnòħ'ă̱h deˑgya'dă̱ă̱ˑno̱nˑdeeħ, Mary gwaħˑhuh, yòòħ neh Cleˑoˑpas, neħ' kuh ne Mary Magˑdaˑlene.
26Neħ' dih noˑnă̱h ne Jeˑsus' oħˑshaˑgoˑgă̱ħ noˑnoħ'ă̱h, kuh neh' hoˑi'o̱ˑnyaˑnih neh hoˑno'o̱hˑgwaħ dòsˑgă̱'o̱h niˑa'dihˑsiˑaaħ, neħ ne shaˑgaˑwă̱'o̱hˑseeh noˑnòħ'ă̱h, Si'o̱h, heˑsat'gatˑhòh nee'shaˑwak;
27Oˑnă̱h' haˑwă̱'o̱h'seeh no'iˑo̱ˑnyaˑnih, sheˑyatˑgatˑhòh neh' sa'nòħˑă̱h! Neħ sho̱ kuh naeh heˑniˑdyò'isˑdaħ'eˑno̱ħ nă̱ˑgă̱ă̱ neh' hoˑi'o̱ˑnyaˑnih neħˑhuh' ho̱ˑsas'haˑgòˑaaħ heh toˑno̱h'sòòt.
28Neħ noˑnă̱h' shaħˑga'at nă̱ˑgă̱ă̱h', neħ' noˑno̱h'do̱ħ ne Jeˑsus neħ naaħˑdeˑyòˑi'waˑgeeh oˑnă̱h' oħˑga'iˑwaˑyeeˑih, neħ kuh naˑga'iˑwaˑyeeˑih heˑniˑgaˑyeeˑă̱h' he'gaˑyaˑdo̱ħ, noˑya'do̱sˑhăˑdoˑgă̱h'diħ', haˑwă̱ă̱', oħkˑhaħˑdatˑhă̱h.
29Neħ' neh wa'dikˑsaˑyă̱ă̱ħ gaˑno̱o̱ˑho̱h' neh' deˑyò'neˑga'yòħˑjis; neħ' ne waˑdiˑno̱ˑhet ne deˑgaˑne'gah'gwaħ ne deˑyòˑneˑgaa'yòħˑjis, oˑyo̱ˑwa̱ˑgă̱'yaat daˑă̱'no̱ˑă̱ħ neħˑhuh' heˑtahˑsa'gaˑă̱nt hwaˑdiˑdaat.
30Neħˑdih ne Jeˑsus noˑnă̱h' hwa'a'neˑgo̱ˑnă̱nt' ne deˑyo'neˑga'yòħˑjis, neħ neh haˑwă̱ă̱h, Oˑnă̱h' òħˑwa'dahˑgwiħ; neħ' neh do̱nˑda'ă̱ˑno̱'nyaħk, oˑnă̱h' waˑatˑgaħ noˑtwa'isˑhăħ.
31Neħ dih ne Jews neħ gaˑi'o̱ˑnih heh oˑnă̱h' heˑyo'eeh hòħˑwă̱ˑnĭsˑhăˑeeħ ă̱ˑno̱nˑdes'yo̱ˑnya'no̱o̱ħ, neħ na'gă̱ˑo̱o̱k, neħˑhuh' sho̱ a'gaˑniˑyo̱ˑdo̱o̱k naˑdiˑyaħˑdaħ' heˑdeˑga'yahˑso̱nt neh' aˑwă̱ˑdaˑdo'gă̱hˑdo̱ħˑgĕh, (neħ să̱ħ'ă̱h neh wă̱ˑnĭs'yoˑwa'nă̱ˑno̱ħ ne'neħ dya'wă̱ˑdaˑdo'gă̱hˑdo̱'no̱ħ,) ho̱ˑwa̱ˑdo̱'eˑsyo̱hˑgwaˑniih' ne' Piˑlate neh' da'o̱ˑwa̱'dihˑsiˑnyaħˑko̱o̱ħ, neħ gwaħˑhuh no'yaħˑjih ha'o̱ˑwa̱'diˑaaħ.
32Oˑnă̱h' hoˑdi'yo̱sˑo̱h noˑdis'gă̱ħˑă̱'gehˑdah, oħˑto̱'wa̱hˑsi'nyaħˑko̱o̱ħ ne dyoˑdye'ă̱hˑdo̱h, neħ' kuh ne shaˑyaħ'daat ne doˑgă̱ă̱h ho̱ˑwa̱ˑdiˑyaħ'taaħ [ne Jeˑsus.]
33Neħˑdih noˑnă̱h' neħˑhuh waˑdiiˑyo̱ħ haaˑyaħ'taaħ ne Jeˑsus, waˑă̱'no̱ntˑgaatˑhòħ oˑnă̱h gwah' naeh haˑwe'eˑyo̱o̱h, tă̱ħˑă̱h' daħˑde'o̱ˑwa̱hˑsiˑnyaħˑko̱ħ;
34Neħ' dih ne shaˑyaħ'daat noˑdis'gă̱ħˑă̱'gehˑdah hah'siˑgwa'ă̱ˑo̱o̱ħ neħ' waˑo'swaħˑgat, neħ ne' waħˑo'go̱nˑdaaˑdyeħ daˑga'yaˑgă̱ħt' neh' otˑgwă̱h'saħ, oˑneˑgaˑnòs' gwaħˑhuh.
35Neħ' kuh haaˑyaħ'daˑdeħ ne waat'gatˑhòħ haˑi'waˑgwa'ihˑso̱s, neħ' kuh heh ho'iˑwaˑgwa'ihˑso̱o̱h doˑgă̱s' ga'iˑwaˑgwĕnˑniˑyòħ; neħ kuh na'yă̱nˑdeeˑih ne ga'iˑwaˑgwĕnˑniˑyòħ' ho'tyoˑwiih, neħ nă̱ă̱ħ' iis naˑeˑswa'iˑwaˑgwĕnˑniˑyòs.
36Neħ să̱ħ'ă̱h nă̱ˑgă̱ă̱h' nòħˑo'iˑòħ'dă̱ħˑsho̱ħ neħˑhuh no̱ħˑo̱'wă̱hˑsyo̱ˑnyo̱o̱ħ, neħ naˑga'iˑwaˑyeeˑih iˑgă̱ă̱h' heˑniˑgaˑyeeˑă̱h' he'gaˑyaˑdo̱ħ, Neħ' neh' deħˑjòħˑnă̱ˑyaatˑah haˑyaħ'daˑdeħ taħ'daˑgaˑyaħ'go̱ˑo̱k.
37Neħ' gwaħˑhuh aˑeħ' noˑyaħ heˑniˑgaˑyeeˑă̱h' he'gaˑyaaˑdo̱ħ, ne waaˑdo̱h', Neħ' nă̱'o̱ˑwa̱ntˑgaatˑhòħ neˑgă̱ħ' ne waˑo̱ˑwa̱ħˑgat.
38Neħ noˑnă̱h' shaħˑga'at nă̱ˑgă̱ă̱ [no̱ħˑo'iˑoħ'dă̱ħˑsho̱ħ,] Joˑseph, neh Ariˑmaˑthea tohˑdă̱nˑdyo̱o̱h, (neħ' gyeeh haˑyaħ'daaħ he'niˑă̱ˑno̱nˑdiih haˑgo̱'iˑo̱ˑnyaˑnih ne Jeˑsus, neħ' naeh hoˑi'wahˑseh'do̱h, neħ gaˑi'o̱ˑnih haaˑgo̱s'haˑnis neˑJews,) waˑoˑdo̱ˑeˑsyo̱hˑgwă̱ħ ne Piˑlate neh a'oˑyaħ'do̱ħˑneek ne Jeˑsus; neħ' neh waˑo'no̱kˑdootˑhʋs' ne Piˑlate. Oˑnă̱h' neħˑhuh' hoˑyo̱s'o̱h hoˑyaħ'do̱ħˑno̱o̱h' [ne Jeˑsus.]
39Neħˑhuh ha'eħˑgwah hoˑyo̱s'o̱h neh' Nicˑoˑdeˑmus, (neħ' aˑgwas' dyoˑdye'ă̱hˑdo̱h hoˑyaħ'doˑwă̱ħ'o̱h ne Jeˑsus so̱'eh,) neħ' ha'aˑwiħ ne deˑga'yesˑdo̱h ne myrrh kuh ne aˑloes, sgat no̱o̱h deħˑwă̱ħ'nyaħˑeeh niˑga'go̱ħˑshăˑgeeh niˑyòsˑdeħ.
40Oˑnă̱h' deˑo'dihˑgwă̱h naaˑyaħ'daħ ne Jeˑsus, neħ noˑniˑgăˑo̱sˑhă'niˑyo̱h naħˑot hoˑdii'waˑdaaˑseeh, neħ kuh deˑoˑdiˑyes'do̱h ne gaˑsă̱ˑno̱ˑgaħ'o̱sˑho̱ħˑo̱h [spices,] neħˑhuh gwaah' kuh' naeh no̱nˑdiˑyeeħ heˑniˑaˑdiˑyă̱'nòħˑdă̱ă̱h ne Jews nòħ'shaˑgoˑdih'saˑdo̱o̱ħ.
41Daˑneħ ne'neħˑho'o̱ˑweh he''o̱o̱ˑweh deˑo̱ˑwa̱ˑyah'so̱nˑdas'o̱h neħ ne'gaħˑă̱ă̱ˑyă̱ħ niˑgaħˑă̱ă̱ħ'a̱'a̱h; neħ ne'gaħˑă̱ă̱ˑgo̱o̱h ne niˑgaħˑă̱ă̱ħ'a̱'a̱h gasˑsyo̱ˑniih ne waaˑseeħ no̱nˑda'dehˑsa'do̱hˑgwaħ, deˑwă̱nˑdo̱h' kuh ahˑso̱h no̱ˑgweh neħˑhuh ha'o̱ˑwa̱h'saˑdo̱o̱k.
42Neħ ne'neħˑhuh sho̱ hwaˑo̱ˑwa̱ˑyas'hă̱ă̱ħ ne Jeˑsus, neħ gaˑi'o̱ˑnih heh oˑnă̱h' ne Jews heˑoˑnă̱ˑnĭs'hăˑeˑwiih nă̱'no̱nˑdesˑyo̱ˑnya'no̱o̱ħ; neħˑsă̱ħ'ă̱h neˑgă̱ħ no̱nˑda'dehˑsa'do̱hˑgwaħ dòsˑgă̱'o̱h sho̱ he'o̱ˑweh.
ที่ได้เลือกล่าสุด:
John 19: SEE
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Gospels published by the American Bible Society in 1872, Psalms in 1892.
