मर्कूस 16
16
येशू सीच लकीङ जीवाम सोच
(मत्ती २८:१-८; लुका २४:१-१२; युहन्ना २०:१-१०)
1जब म्हुङ बाट्च डीन केल्र्हखीङ मरीयम मग्डलीनी र याकुबौ मोइ मरीयम र सलोमीये बासना राछ डर्ब्यको येशूओ लासाङ मोल्खी डेम लोवा। 2पीउर्हाक लेखो हप्टौ पहीलो डीन गोराक न नाखान फेर्च बेलाङ होखुरीक येशूओ चीहानाङ नुङा। 3अनी होखुरीक नुङ्चै जाट्नाङ मेखुरीक-मेखुरीक डेया, “कानुङ लागी चीहानौ मेङेराङ डाच ल्हुङ चहीँ सुये हटडीम याल्हे औँला?” 4टर ढेम्लाक ङोस्नाङ होखुरीकै चीहानुङ होसे बाड्को ल्हुङ हटडीम डाच डाङा। 5अनी होखुरीकै चीहान भीत्री पर्यार ङोस्नाङ होला काट जना बोच बढीन बील्छ रेन्जा भर्मी चीहानौ डोर पट्टी ङुच डाङा। अनी होखुरीक बीर्हीया। 6टर होसे भर्मीये होखुरीककी डेया, “माबीर्हीनी, नाखुरीकै नासरतुङ येशूकी पामन ले, सुकी क्रूसाङ टङ्गडीमन्या। होसको जीवाम सोम भ्यामने। होसको इला माले। ङोस्नी ट डाच ठाउँ। 7नुङ्नी, होसकुङ चेलाको र पत्रुसकी डेम यान्ही, होसको नाखुरीकुङ अगाडी-अगाडी गालीलाङ नुङ्ङन ले। होसकै नाखुरीककी डेच अनुसार नाखुरीकै होसकोकी होला डाङ्ले।” 8टब होखुरीक चीहानीङ ख्योव्हार भोक्डीसा, हीजैडेनाङ होखुरीक साप्फी बुरुक्चै बीर्हीम आटडीस्नन्या। होटै होखुरीकै सुकीर हीर माडेया, हीजैडेनाङ होखुरीक बीर्हीमन्या।
येशू चेलाको लेठाङ डाङ्च
(मत्ती २८:९-२०; लुका २४:१३-५३; युहन्ना २०:११-२३; प्रेरित १:४-११)
9[होटै हप्टौ पहीलो डीनौ गोराक न येशू सीच लकीङ जीवाम सोरखीङ होसको पहीला मरीयम मग्डलीनी लेठाङ डाङा। होसे लकीङ येशूये साट वटा भूत्को छ्युक्ङन्या। 10अनी मरीयमै नुङार होसकुङ चेलाकोलाक इसे कुरा सेटाका। होखुरीक बीलाप जाट्चै राप्म ङुमन्या। 11अनी येशू जीवाच र मरीयमै डाङा डेच कुरा होखुरीकै सेया, टर होखुरीकै मापट्डीया।
12होटै नीस जना चेलाको लाङ्घा पट्टी नुङ्चै जाट्च बेलाङ होखुरीक लेठाङ अर्को न रुपाङ डाङा। 13अनी होखुरीक ल्हेस्न नुङार अरुकोलाक सेटाका। टर होखुरीकै होसे नीस जनौ कुराकी र विश्वास माजाटा।
14होटै चेक न्हुइङ एघार जना चेलाको ज्याकी ङुच बेलाङ, येशू होखुरीकुङ मीघ्याङ डाङा। अनी होखुरीकुङ अविश्वास र मीमनौ कठोरटौ लागी होसकै होखुरीककी हक्कारीया। हीजैडेनाङ होसको सीच लकीङ जीवाम सोच न्हुङइ होसकोकी डाङ्च कुरा होखुरीकै विश्वास माजाट्नन्या।
15होटै येशूये होखुरीककी डेया, “पट्ट संसाराङ नुङार पट्ट भर्मीयो जाट-जाटीकोलाक सेछ समाचार सेटाक्नी। 16विश्वास जाटार बप्तिस्मा लाचये उडार डुप्ले, टर विश्वास माजाट्च चहीँ दोषी ठहरीस्ले। 17अनी विश्वास जाट्चको खाटा इसे चीन्हको छान्ले: ङौ म्यार्मीनाङ होखुरीकै भूत्को खेट्डीले र नयाँ भासाको ङाक्ले। 18होखुरीकै बुलको घोले र कुसे कीसीमुङ बीसालु ठोक गानाङ र होखुरीककी होचे हीर हानी माजाट्ले। होखुरीकै छाचको मीटाक लहो मीहुट डाले र होखुरीक गेप्ले।”
19टब प्रभु येशू चेलाकोखाटा ङाक्ङ भ्यारखीङ होसको स्वर्गाङ गाराङ्ङ आल्हा, अनी परमेश्वरौ डोर मीहुट पट्टी ङुवा। 20होटै होसे चेलाकै नुङार पट्ट ठावाङ प्रचार जाटा। प्रभुये होखुरीकुङ साठाङ काम जाट्न न ङुवा र अचम्मौ चीन्हको लकीङ होखुरीकै ही प्रचार जाट्नन्या होसकै होसे सत्य ठहरीयाका।]#१६:२० ९-२० पड अरु सोरोट बाइबलाङ माले
ที่ได้เลือกล่าสุด:
मर्कूस 16: EMGP
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© 2024 (Active), Wycliffe Bible Translators, Inc. All rights reserved.
