Lucas 23

I Jesús xk'am b'i chwach ma Pilato

1Konojel xewalijik, xaq xkik'am b'i i Jesús chwach i ma Pilato. 2Are o chik chila xkijeq ukojik umak; xkib'ij:

—Qariqom i achi ri, chi ktijin chkitunik i qach aj tinimit. Ub'im chi kqatoj ti alkawal che i ma César. Kub'ij chi are ire Cristo xaq kub'ij chi are ire Ajawinel —xecha.#23.2 Keje kitzij ile i je ajkojol umak i Jesús chwach i ma Pilato.

3Are uri i ma Pilato xutz'onoj che i Jesús:

—¿Yet, at Ajawinel ke i aj Judío?

I Jesús xub'ij:

—Yet xatb'inik.

4Are uri i ma Pilato xub'ij chke i kaj-atzil i rajpatan i Dios xaq chke i winaq, yin nti umak i achi ri kinriqo; xub'ij chke.

5Xwiri ike xa kkikowij ukojik umak. Xkib'ij:

—Ru' ronojel ni'pa i uk'utunik, lik usachom chik kinojb'al i winaq pa tinimit. Xujeq u'ankil ile chila pa Galilea, xaq wo'or k'unnaq ru' uk'utunik le chi pa Judea —xecha.

I Jesús xk'am b'i chwach ma Herodes

6I ma Pilato, are xuta ile, xutz'onoj chke we i Jesús aj Galilea. 7Are xkib'ij chi qatzij, ire aj Galilea, xutaq b'i ru' i ma Herodes, chi ajawinel puwi i ulew Galilea. Che taq i ij le i ma Herodes o pa Jerusalén. 8I ma Herodes are xril i Jesús lik xkikotik; ujer chik kraj rilik uwach, man utom utzijol wach ktijin chu'ankil, xaq kraj rilik jun nim laj il chi ire ku'an na. 9Lik k'i i tz'onb'enik xu'an che, xwiri i Jesús lik xula' ti uwach che. 10Chila xaq je o i kaj-atzil i rajpatan i Dios, xaq i tijonelab' re i ujer atb'al tzij chi lik kkimayij ti ukojik umak. 11I ma Herodes, junam ku' uwinaq chi je yij che i ch'oj, to' kketz'b'ej u'ij. Xaq xkikoj jun u'u' lik chom, pacha re jun ajawinel, yo'b'al re; te'uri i ma Herodes xutzalijsaj chub'i ru' i ma Pilato. 12Che taq i ij le i ma Pilato ru' i ma Herodes xeu'an amiy; xwiri chuxe'el ni'pa ile je ajch'oj te'eq chkiwach.

I winaq lik xesik'in chub'ixkil chi kkamsax i Jesús

13I ma Pilato xeumol kichi' i kaj-atzil i rajpatan i Dios, xaq i uwi kijolom i tinimit, xaq konojel i winaq. 14Xub'ij chke:

—Yix xik'am li achi ri chinwach, kib'ij chwe chi xa usachom chik kinojb'al i winaq. Xwiri yin lik chiwach yix xin-an wi k'iyal tz'onb'enik che, xwiri lik nti umak inriqom pacha umak chi ikojom yix. 15Xaq i ma Herodes, xuriq ti umak; rumali chi xutaq chal wu' yin. Ya xiwilo chi lik nti umak u'anom we kkamsaxik. 16Rumali, xwi kintaq uya'ik ulo'xik, te'uri kwo'taj b'ik —xub'ij i ma Pilato chke. 17#23.17 I versículo 17 ri xwi kriqtaj chupam jujun versículo re uwuj i Dios ujer chi masorético ub'i: Pa taq nima'ij Pascua, i ma Pilato o chuqul ro'taxik b'i jun ajprexil chke i winaq.

18Lik konojel i winaq kesik'in chub'ixkil:

—¡Kqaj ti achi le! ¡Chakamsaj! ¡Chawo'taj i ma Barrabás! Xecha.

19I ma Barrabás le, o prexil man xujeq jun ch'oj chrij i atb'al tzij pa tinimit xaq ukamsam jun winaq. 20I ma Pilato, kraj ire kro'taj i Jesús, rumali xeu'ijla chik i winaq. 21Xwiri ike xa mas ko xesik'in chub'ixkil:

—¡Chakamsaj chwach i krus! ¡Chakamsaj chwach i krus! —Xecha.

22I ma Pilato xutz'onoj chik uroxmul chke:

—¿Wach i utz taj u'anom? Yin nti jun umak xinriqo we lik kmajawik chi kkamsax na. Kintaq uya'ik ulo'xik, te'uri kwo'taj b'ik —xub'ij i ma Pilato chke.

23Xwiri ike lik ke'uxlan ti che i sik'inik chutz'onoxik chi o uchak kkamsax chwach i krus. Rumal i kisik'inik le lik xya' urayijb'al kik'ux pacha i kkitz'onoj. 24Rumali, i ma Pilato lik keje xu'ano pacha i xkitz'onoj i winaq. 25Xro'taj i ma Barrabás pacha xkitz'onoj ike, i achi le tz'apil te rumal i ch'oj chi uyakom, xaq rumal i kamik u'anom. Te'uri xujach i Jesús pki'ab' kki'anb'ej che pacha kkaj ike.

Uripik xaq utz'awik i Jesús chwach i krus

26Xkik'am b'i i Jesús ipa kkikamsaj wi. Are ketijin che i b'e, xkik'ulaj jun achi aj pa tinimit Cirene, ma Simón ub'i; ire k'a te xk'un pa taq jyub'. Xkitak'b'a xki'an pen che chi kuk'am b'i krus rij uqul; xaq xterej b'i chrij i Jesús.

27Je k'i i winaq xaq je k'i ixoqib' ke'o' che i Jesús, kesik'in rumal i kib'is, je teren b'i chrij. 28Xwiri i Jesús xupiskilij rib' xaq xub'ij chke:

—Ixoqib' aj Jerusalén, mix-o' chwe yin. Are chixo' chiwe yix xaq chixo' chke iwak'al. 29Man kuriqa ni jun ij chi kb'ix na: “Utz ke ike chi xk'iji ti kak'al; utz ke ike chi xealan taj; utz ke ike chi kitz'umansam ti kak'al” 30Are uri i winaq kkib'ij ni chke i nimaq taq jyub', “¡Chixtzaq li chqij!” Xaq kkib'ij ni chke i tzam taq jyub', “¡Chojich'uqu!”#23.30 Man lik kkixij kib' chwach i k'ax kpetik. 31Lik k'ax ketijin chu'anik chwe yin wo'or chi nti jun utz taj in-anom; etelechiki chke i jub'an chik chi kki'an i utz taj —xub'ij i Jesús chke i ixoqib'.

32Xaq je o chik keb' achiyab' xekik'am b'ik re kekikamsaj junam ru' i Jesús; ike, chekeb', o kimak chwach i atb'al tzij. 33Are xeupon che jun ral jyub' chi “K'ijib'al re ub'aqil ujolom kamnaq” ub'i, i achiyab' chi je yij che i ch'oj xkirip i Jesús xaq xkitz'aw chwach i krus. Xekiripo xaq xekitz'aw i keb' chi o kimak, jun puwiqab'im i Jesús, i jun chik pumoxim. 34Are uri i Jesús xub'ij: “¡Ta, chakuyu kimak; man keta'am taj wach ketijin chu'ankil!”#23.34 I jub'i' che i versículo ri kriqtaj ti chupam ujer taq uwuj i Dios.

I achiyab' chi je yij che i ch'oj xki'an sakinik chrij u'u' i Jesús ilb'al re pachin kch'akaw b'i chke. 35I winaq chi je o chila to' ketaqenik; xaq i kiwi kijolom i tinimit lik xkiyo'ya. Xkib'ij:

—Ire o winaq xeuto, wo'or chuto rib' ire, we qatzij are i Cristo, chi chatal rumal i Dios —xecha.

36Xaq i achiyab' chi je yij che i ch'oj xkiyo'ya i Jesús. Xetejeb' pan ru' xaq xkisujuj uwa'al uva muqb'am ch'am che. 37Xkib'ij che:

—¡We yet at Ajawinel ke aj Judío, lik chato awib' yet uri! —Xecha.

38O jub'an tzij tz'ib'tal puwi i krus chi keje iri kub'ij: “Iri, are i Ajawinel ke i aj Judío”.

39Te'uri, o jun chke i keb' chi je riptal ru', xuyo'ya pan i Jesús:

—Yet, we qatzij at Cristo, chato uri awib' xaq chojato yoj —xub'ij che.

40Are uri, i rachi'il xuyajo; xub'ij che:

—¿Yet, kaxij ti awib' che i Dios? Xaqjunam tab'a ri i kamik kqa'an yoj ru' i jun le. 41Xwiri, yoj, lik kmajaw chqe kqatij i k'axi, man kojtijin chutojik i qamak pacha usuk', xwiri i achi le nti umak u'anom —xub'ij che i rachi'il.

42Te'uri xub'ij che i Jesús:

—Jesús, minsach chak'ux are kajeq i awajawinik —xub'ij.

43I Jesús xula' uwach che:

—Saq laj tzij kinb'ij chawe: Lik su' wo'or katok ni wu' pa chom laj k'ijib'al —xub'ij che.

Ukamik i Jesús

44Are tik'il ij xpe jun nim laj equm chwach ronojel uwach i jyub' ta'aj, i equm le xk'is k'a che oxib' or re uqajb'al ij. 45Lik xtz'aptaj uwach i ij. Xaq i kortin chi o prachoch i Dios xraqch'ij pa nik'aj. 46Te'uri, i Jesús ko xch'awik:

—Ta, ¡Pa'ab' yet, kinjach wi i wanima!

Are xub'ij ile, xel uk'ux.

47I kaj-atzil i achiyab' chi je yij che i ch'oj aj Roma, are xrilo wach i x-anik, lik xukoj u'ij i Dios. Xaq xub'ij:

—Lik qatzij i achi le nti umak u'anom —xub'ij.

48Ni'pa i winaq chi je o chila, are xkilo wach i x-anik, xe'ok chuch'ayik uwach kik'ux, xe'e chi kachoch. 49Konojel i keta'am uwach i Jesús xa xetak'i k'a naj. Xaq keje xki'an i ixoqib' chi je teren li chrij k'a pa Galilea; k'a naj xetak'i wi chutaqexik.

Umuqik i Jesús

50O jun achi, ma José ub'i, lik utz laj achi, suk'ul uk'ux chwach i Dios. Ire aj Arimatea, jun tinimit ukwenta i ulew Judea. Ire are jun chke i jutz'ob'aj unimaqil chi kki'at tzij pkitinimit aj Judío, xwiri 51ire uya'om ti uwach ku' i je rachi'il; xraj taj wach xki'an che i Jesús. Ire xurayij chi kjeqan i ajawinik re i Dios. 52Ire le x-e ru' i ma Pilato xutz'onoj uch'akul i Jesús. 53Chrijil chik uqajsaxik loq chwach i krus xupasij chupam jun sawan chi lik paqalik. Te'uri xuya chupam jun muqb'al kamnaq k'ak' worom pa nim laj ab'aj chi nti winaq muqtal chupam. 54I ij le are i ij re uyijb'axik i ij sábado, man ya kjeqan i ij sábado.

55I ixoqib' chi je petnaq ru' i Jesús k'a Galilea, xeterej b'i chrilik ipa kmuqi wi, xaq wach ukotz'b'axik uch'akul x-anik. 56Te'uri xetzalij b'i chi kachoch xaq xkiyijb'a i kunb'al muy, xaq i aceite ke i kamnaq. Are xjeqan i ij sábado, xe'uxlanik pacha kub'ij i ujer tzij pixab'.

ที่ได้เลือกล่าสุด:

Lucas 23: ACHICUB

เน้นข้อความ

แบ่งปัน

คัดลอก