Maatiyoos 11
11
Wosɛytaanak Sigɛkan Wosɛykɛɛ Sooy Lak Yowanis Sinɛ A'aadiik
(Luk. 7:18-35)
1Saaɓa Yeese ruumeeɗ sekiyɛ nomtaanaka gɛɛna sigɛɛga aarin a pɛɛyk. Nɛɓa ŋaar rɔɔriyɔɔna a laaganyɔɔna katamɛɛka Gɛlilaak.
2Saaɓa arkiɗ Yowanis godeey korkoɗɔɔnoŋkuk. Nɛɓa tiyɛ ijaag agut Kereseek, nɛɓa wosɛyɛ nomtaanak gɛɛŋk, 3nɛɓa kɔɔniyar Yeesee kɛ, "Iin sinɛɓa tonɛɛ kɛ mɛlkikoynɔŋɔŋk, maŋk in koorii iɗit om?"
4Nɛɓa Yeese jumur sɛɛga kɛ, "In kɛɛɗɛɛ tonɛɛ Yowanisa any sinɛkɔ tiyɛɛrik a sinɛkɔ dɛnɛɛrik. 5Dɛnɗi motak, ŋawiiter nyɔŋtaanak, bɔdɛr joop sigɔ gorur dɔɔɓɔyk, tiiɗi joop sigɔɓa kir tiiɗitik, ŋaararki joop sigɔɓa rɛrarŋɔŋk ret walasa, waasɛɛ Pɛɛni sinɔ Ɓɛlkɛɛstank sankaanaka. 6Iɗit sinɔ ki toŋoɗ ŋaadiyɛ eeteek geetitan."
7Saaɓa ŋaararɗi nomtaanak Yowanisik, nɛɓa Yeese tonu agut Yowanis joopa sigaaga ɓɔɔkaak kɛ, "Ŋaararkɔɔ paatoona kɛnɔ dɛnɛɛr jikon? Iɗit sinɔ weewer koɓi nɛɛk a ito sombal sinɔ yike yoŋgoyk?" 8Maŋk ŋaararkɔɔ kɛnɔ dɛnɛɛr jikon? Iɗit sinɔkan kadi abiyak sigɔ obi gati nɛɛkɛŋɔŋk? Joop sigɔkan kadir abiyak sigɔ obi gati nɛɛkɛŋɔŋk ɓɛɛlɛr godeey suumiyɛɛkoŋkuŋ. 9Ŋaararkɔɔkan kɛnɔ dɛnɛɛr jikon? Iɗit pɛrkaakoŋk? Eekeerɛ tona kɔnaaŋ, Ii, Sɛɛn sinɛ iɗit pɛrkaakoŋkuk. 10Taapɛɛɓa Wargatɛɛ Waakoyotoŋk agut sɛɛn kɛ,
'Wosɛyɛɛrakoy wosɛytan naak iine ɔɗɔɔkɛ,
sinɔkoy isiise gopan nook iine ɔɗɔɔkɛ.'
11Eekeer tona kɔnaaŋ, kɛɛ iɗit sinɔ kaalɛ Yowanis sinɛ A'aadiik, joope sigaagɛɓa ɓartɛɛk baŋɛk kɔɔr, mayakana burɛɛ dariyoŋk iɗit sinɛ tɛmk kaalɛ sɛɛniŋ. 12Ŋuujɛɛ burɛ dariyoŋk jɛt aɓa tukiɗi eme Yowanis sinɛ A'aadiik nɔ mɛlɛɛɗa sisɔwa. Paarir joop boŋiɗa ɓaŋkawukaat. 13Joop pɛrkaakoŋk baŋɛ a higi Muuseek nɔ mɛlɛɛɗa Yowanisa, tonurɓa pɛrkaaŋ. 14Ɔkɔn doomɛɛri a boŋiiriŋ, Eliyaas sinɛɓa tonɛɛ kɛ mɛlkikoyŋɔŋk Yowanis sini. 15Iɗit sinɔ lak weena sinɔ tiiɗiŋɔŋk, in tiyɛɗ.
16"Joop eme sinik rɔɔma sɛɛg a jikon? Gayi a tɔɔmɔk sigɔ beebeɗar nyon gabiyeyoŋk, nɛ riyar piraakak gɛŋk kɛ,
17'Gotii kɔna seetɛɛ
nɛ kiir duubiyeet.
Ariikɔna googiyoo,
nɛ kiir wuɗaat.'
18Agut sinɔ kusaakɛɓa Yowanis a ki ada ɗama ɛ ki tuu ogool wɛynik, nɛɓa joop tonur kɛ, 'Lak nɔ wɛɛŋa sigɔ somkaanakik.' 19Kusɓa Tɔn Etoŋk a ɗami ɛ utiɗi ogool wɛynik, nɛɓa joop baŋɛ tonur kɛ, 'Ɗami a obiiŋ ɛ utiɗi, poru joop sigɔ yayawar worik a tikitaanak.' Ɗegerɛɛ ɗegerɔn ɛɛkoŋk iɗit sinɔ mentan taamɛkɛ Waakoyotoŋk ant sinaanɛ laŋɛɛ ijaagik."
Gɔɔnyɛ Yeese Joop Katamɛɛkoŋk Agut Sinɔɓa Kirɗi Ŋaadiɗiitik
(Luk. 10:13-15)
20Gɔɔnyɛɓa Yeese joop katamɛɛ sigɛɓa ijaag sɛɛga sɔɔriyɛ sigɔ ɓɔɔkaaŋɔŋkuk, agut sinɔɓa kirkiɗ weeriit tikiyɛɛkɛ Waakoyotak aɓa tonu sɛɛga kɛ, 21"Durikoy kɔna, iinaka joop Korajiinik! Durikoy kɔna, iinaka joop Beetɛsaydaak! Sɔɔriyɛ sigɛɓa ijaagɛɛ sɛɛg iinakɛ kɔɔr, ɔkɔnɓa ijaagɛɛ sɛɛg joopa Tiiroosuk a Sidoonaak, gunɓa gaɓɛr ɛɛka abiyak wuɗakoŋk ɗeeŋk, nɛ bokuyer ɛɛk taɗaput nɛ weeriik tikiyɛɛkɛ Waakoyota. 22Eekeer tona kɔnaaŋ, ɓeny sinaanɛkoy pirdiyoŋk iinakɛ sɔgɔɔsɔyk, balaageeɗkoy pirdi nɛɛkɛ Tiiroos a Sidoonaa. 23Iin Kipirnahoom, ɗɛyin a ɓɔŋgɔɔrun ɛɛk dariya? Kina gayɛ, guugunyunkoy siioola. Sɔɔriyɛ sigɛɓa ijaagɛɛ sɛɛg iinek, ɔkɔnɓa sɛɛg ijaagɛɛ Sɛdoome gunɓa beeɗ mɛlɛɛɗa ɓɛɛnyɔwase. 24Eekeer tona kɔnaaŋ, ɓeny sinaanɛkoy pirdiyoŋk iinakɛ sɔgɔɔsɔyk balaageeɗkoy pirdi nɛɛkɛ ɗoo Sɛdoomuk."
Laŋɛɛ Imiiny Yeesee
(Luk. 10:21-22)
25Saaɓak tonuɓa Yeese kɛ "Iin Baabɛɛ sinɛ Suumi dariyoŋk a ɗookoŋkuk, pɔɔsaniŋ agut sinɔkɔ dugeeɗin any sini joope sigɔɔgɛ ɗegerar ɛɛkik, makɔ yaaŋin tɔɔmɔkaak. 26Ii, Baabɛ, egekɔ sini ɗɛyan nook.
27"Gaɓɛɓata Baabɛ any baŋɛ, kɛɛ iɗit sinɔ ɗeger Tɔɔn nɛɛkik ɗegeera Ɛpɛn dakɛɗa, kɛɛ iɗit sinɔ ɗeger Ɛpɛnik ɗegeera Tɔɔn nɛɛk dakɛɗa a iɗit sinɔ ɗɛyɛ Tɔn nɛɛkɛ a yaaŋgeeɗŋɔŋk.
28"Iinak joop sigɛ bɔɔlaak sigɛkɔna ɗili diilk baŋɛ, in kusɛɛ son lak eetik, gaɓaakoy kɔna imiinyiŋ. 29In ɓatakɛɛ toloy naak, in barɛɛ ɛɛk eete, eet iɗit sinɔ koɓi joopak ɛ iɗit sinɔ rikita ɛɛk naak ɗooka ɓayaay naakɛkik. Laŋiirkoy imiiny wɛɛŋaka goŋkuŋ. 30Nyolnyol toloy naakɛŋ, maɓɔrɛ pɔyɔɔ diil naakɛŋ."
ที่ได้เลือกล่าสุด:
Maatiyoos 11: KSTM
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
