Maatiyoos 10
10
Nomtaanak Sigɛ Aarin A Pɛɛyk
(Mar. 3:13-19; Luk. 6:12-16)
1Riykɓa Yeese nomtaanak sigɛ aarin a pɛɛyk son lak sɛɛnik, nɛɓa gaɓɛ sɛɛga ɓaŋkawuka kɛnɔ ɔɔyɛr wɛɛŋa sigɔ somkaanakik, ɛ ebɔdiɗi goriɗakɛ a meetanakɛ baŋɛ. 2Tiriya wosɛytaanak sigɛ aarin a pɛɛyk sɛɛg sigi, tuki nɛɛkɛ Simion sinɛ riyɛ kɛ Petrosuk a manya Indiriyaas, tɔɔmɔk Jɛbdiyoosuk Yaykoob a Yowanis, 3Pilipoos, Bɛrtɛloomiyos, Toomaas, Maatiyoos sinɛ yayawu worik, tɔɔn Ilpiyoosuk Yaykoob, Taadiyoos, 4Simion sinɛɓa palamɗi agut ɗoo nɛɛkik, Askorotu Yuudaa sinɛɓa gaɓɛ Yeesee gumakeera gɛɛnaakik.
5Wosɛyɛɓa Yeese joop sigi aarin a pɛɛyk a tonu sɛɛga kɛ, "Kat kɛɛɗɛɛ son lak joop sigɛ moko Ayuuduk, kat guugunyɛɛ katamɛya joop Sɛmaariyaak. 6Mayakana in kɛɛɗɛɛ son lak joop Israeelik sigɛ badɛr a ito jiŋkuyɛk. 7Nɛ saa kaarɗɔk in rɔɔriyaakɛɛ a toniir kɛ, 'Wɔɔŋku burɛ dariyoŋkuŋ.' 8In ebɔdɛɛ gortaanak, in ɓɔŋgɔrkɛɛ reteer, in ebɔdɛɛ joop sigɛ gorur dɔɔɓɔyk, in ɔɔykɛɛ wɛɛŋa sigɔ somkaanakik, in gaɓɛɛ any sinɔkɔ boŋiir sɔkɔnk, oko sinɛkɔ boŋurɗɔɔk. 9Kat diilɛɛ worke, maŋk attari, maŋk biri kisikɛ goŋk. 10Kat diilɛɛ gopɛ noŋk kosɛ, maŋk abii wonoyɛtoŋk, maŋk saamɛyɛ, maŋk gumboy, agut sinɔ ijaagen ɗɛygeeɗ ɗamaŋ.
11"Saakɔɔ guugunyarɗɔ katamɛya maŋk mɛndɛra omaltaak, in warɛɛ iɗit sinɔ kɔnu boŋu yaakatik, nɛ in beeɗɛɛ saadi nɔkɔɔ ŋaararɗɔɔk. 12Saakɔɔ guugunyarɗɔ godeya nɛɛkaakik, in digoyɗiirɛɛ. 13Ɔkɔn sɛɛk ɗɛyɛr digoy noŋkuŋ, nɛ in mɛlɛ sɛɛga. Ma ɔkɔn sɛɛk kir ɗɛyɛŋ, nɛ in murku iinaka. 14Ɔkɔn lakɛ iɗit sinɔ kɔnu ki boŋiiɗkiŋ maŋk ki geleewɛɛt rɔɔriyɔɔna noŋkuŋ, nɛ in tɛntɛŋɛɛrɛ duudur sinɛ latukari derakɛk saa ŋaararkiɗɔ godeey maŋk katamɛɛ sinaanɛk. 15Eekeer tona kɔnaaŋ, ɓeny sinaanɛkoy pirdiyoŋk katamɛ sinɛ balaakoy pirdi nɛɛkɛ sinɛɓa ɗoo Sɛdoom a Gɛmooraak.
Rakatɛ Sinɔ Obiiŋɔŋk Sinɛkoy Mɛlkik
(Mar. 13:9-13; Luk. 21:12-17)
16"In tiyɛɛko, wosɛya kɔnu okokɔ jiŋkuyɛkoŋk tuwookaka kɔɔra. Agut sini in ɗegerɛɛ ɛɛk oko kooko ɛ in rikitɛɛ ɛɛk oko kulɓeer. 17In koorɛɛ ɛɛk, agut sinɔ gaɓɛrkoy kɔnu joop pirdiya godeya pirdiyoŋk ɛkoy kɔnu ɗiŋer sinɔɔnɛ godeyi gɛŋk tolɛɛɗoŋk Ayuuduk. 18Diilerkoy kɔnu joop agut eet son lak joop sigɛ lowur ɗook a son lak tapaak. Waasɛɛrkoy ɔɔtɛ naak sɛɛge a joope sigaagɛ moko Ayuuduk taamɛkɛ. 19Saakoy kɔnu gaɓɛrɗik, kat ɓakɛyɗiikɛɛ kɛ 'Toniikɔɔ ɛk? Jumuriikɔɔ ɛk?' Gaɓɛɛkoy kɔna saakoyk sisa any sinɛ toniirkiŋ. 20Tonɗiikoy kɔne Wɛɛŋa Baaɓa noŋkuk, ma moko iinak.
21"Gaɓɛkoy iɗit manya reta, gaɓɛkoy iɗit tɔɔn nɛɛk reta. Kirkoy tiiɗit tɔɔmɔ ɛpɛnaakaka a ɛmɛsakaka arirkoy a ɓokootɛɛ sɛɛgiŋ. 22Ɓooyurkoy kɔnu joop baŋɛ agut sinɔ nomɛrɗɔ eetik. Mayakana iɗit sinɛkoy nomɛ eete pediyaak bɔdɛkoyŋ. 23Saakoy kɔnu epayɗɛ katamɛɛ omalteek, in gonɛɛ katamɛya omalta. Eekeer tona kɔnaaŋ. Kiir koy rɔmɛɛɗ katamɛɛ Israeelik baŋɛ mɛlɛɛɗa nɔkoy mɛlkiɗ Tɔn Etoŋkuk.
24"Ki kaalɛɛt bartaan rɔɔriytan nɛɛk, ki kaalɛɛt ijaagent suumi nɛɛk. 25Ɔkɔn gayi bartaan a rɔɔriytan nɛɛkiŋ ma ijaagen a suumi nɛɛkiŋ gaygeeɗiŋ. Ɔkɔn riyar ɗumaat kɛ ɔɗɔwen wɛɛŋa sigɔ somkaanakik sinɔ riyɛ kɛ Biel jebuulkiŋ, nɛ joop wɛy nɛɛkik kir tirii oko sinik a kaalɛŋ ɛk?
In Ɓurɛɛ Waakoyo
(Luk. 12:2-7)
26"Kat ɓurɛɛ joop. Any sinɔɓa miinyɛɛŋɔŋk ki dakɛ a koy kɛɛ yaaŋɛɛt. Any sinɔɓa dugɛɛŋɔŋk ki dakɛ a koy kɛɛ ɗegerɔɔn. 27Any sinɛ kɔna tona nyuugurk, in waasɛɛ pɛɗɛrkaat. Any sinɛ tiyɛɛr yɛɛyɛgɛɛtik, in laaganyɛɛ soodi pɛɗɛɛɗŋɔŋk. 28Kat ɓurɛɛ joop sigɛ ɓokotur buusɛ ma kir oolɛ a ɓokotur wɛɛŋaŋɔŋk. Ma in ɓurɛɛ Waakoyo sinɛ oolɛ a sɔɔkɛ wɛɛŋa a buusɛ siioolek. 29Wesiyak a pɛɛy mokoto ɓalɗiiɗɛɛ a tɛm gati nɛɛkɛŋ? kiiki sɛɛge ɗiirin ɗooka sinɔ omoŋɔŋk a kiiɗɛ ɗɛyan Ɓaaɓa noŋkuk. 30Ikomtaanak aasi ami goŋk ɔɗɔwoŋk baŋɛ a kɛɛ sinɔ dakɛ omoŋɔŋk. 31Kat ɓuriikɛɛ. Kaalɛɛr wesiyak sigɔ ɓɔɔkaaŋɔŋkuŋ.
32"Iɗit sinɔ waasɛ eet joope taamɛkɛk, waasaakoy ɓɔra sɛɛn taamɛkɛ Baabɛɛ sinɛ ar darikiŋ. 33Ma iɗit sinɔ kaaɗɛ eet taamɛkɛ joopoŋkuk, kaaɗakoy ɓɔra sɛɛn taamɛkɛ Baabɛɛ sinɛ ar darikiŋ.
34"Kat koɓiir kɛ kusaakan a yaaka ɗooka raŋana. Kusaakan saak a kaarn, ma moko yaaka. 35Kusaakan kɛnɔ pakata iɗit a ɛpɛn, ma ɓɔrɛ tɔɔn sinɔ peetik a ɛmɛs, ma ɓɔrɛ jarti a keerɛɛk nɛɛk. 36Dakɛrkoy eta joop wɛy nɛɛkik a gumaakeer.
37"Ki gayɛ eeta, iɗit sinɔ poru ɛpɛn maŋk ɛmɛs a kaalɛ eetik. Ki gayɛ a nomtan naak, iɗit sinɔ poru tɔɔn nɛɛk sinɔ mooyk, maŋk sinɔ peetik a kaalɛ eetik. 38Ki gayɛ eeta iɗit sinɔ ki ragadɛ ɛɛk rakatɛya a reta, nɔ nomɛ eeteekiŋ. 39Iɗit sinɔ kol wɛɛŋa gɛɛŋkik sɔɔkɛ sɛɛgiŋ. Mayakana iɗit sinɔ sɔɔkɛ wɛɛŋa gɛɛŋk agut eetik laŋkoy sɛɛgiŋ.
40"Iɗit sinɔ boŋu kɔnu yaakatik boŋu eet. Iɗit sinɔ boŋu eet yaakatik boŋu Baabɛɛ sinɛkanti wosɛykik. 41Iɗit sinɔ boŋu iɗit pɛrkaakoŋk tiriyaakɛ iɗit pɛrkaakoŋkuk, laŋkoy gati iɗit pɛrkaakoŋkuk. Iɗit sinɔ boŋu iɗit sinɔ mentanŋɔŋk tiriyaakɛ iɗit sinɔ mentanŋɔŋkuk, laŋkoy gati iɗit sinɔ mentanŋɔŋkuk. 42Eekeer tona kɔnaaŋ. Iɗit sinɔ gaɓɛ maawu sigɔ salowɛrŋɔŋk a gɔtɛ omoŋɔŋk joope sigeege temetuŋɔŋk omaltaak agut sinɔ sɛɛn nomtan naakik, kikoy sanɛɛɗ gati nɛɛk."
ที่ได้เลือกล่าสุด:
Maatiyoos 10: KSTM
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
