NAANAA 35
35
Luda arubarikadana Yakubugu Bɛtɛli
1Luda pì Yakubunɛ: Ǹ futɛ ǹ tá Bɛtɛli ǹ vutɛ gwe. Ǹ ma gbagbaki bo gwe, zaakũ ma bo ma summa gwe gɔrɔ kũ ntɛn bàa lɛ́ n vĩ̀ninɛ. 2Akũ Yakubu pì a ɔndenɔnɛ kũ gbɛ̃ kũ ò kú kãaonɔ ń pínki: À buri zĩ̀tɔnɔ tãna kũ á vĩnɔ kɔ́tɛ à zú o à á pɔ́kasanɔ lilin kɛ. 3Óni futɛ ò tá Bɛtɛli. Mani Luda gbagbaki bo gwe, zaakũ à kpàmai ma warikɛgɔrɔ zĩ, àdigɔ̃ kú kũmao gu kũ ma gɛn pínki. 4Akũ ò buri zĩ̀tɔnɔ tãna kũ ò vĩnɔ kpàa kũ pɔ́sã kũ ò dananɔ, akũ à pɔ́ pìnɔ vĩ̀ gbiri lí gbáru Sɛkɛmu sarɛ. 5Kũ Yakubu kũ a nɛ́nɔ dà zɛ́n, Luda tò vĩna wɛ̃tɛ kũ ò kú ń sarɛnɔ denɔ kũ̀ manamana, akũ ń gbɛ̃ke dí pɛ́tɛńyĩro. 6Akũ Yakubu kũ gbɛ̃ kũ ò kú kãaonɔ ń pínki kà Luzu kũ òdi pi tera Bɛtɛli, Kanaanɔ bùsun. 7À sa'oki bò gwe, akũ à tɔ́ kpà gu pìinɛ Bɛtɛli Luda, zaakũ gwen Luda bò à sùan gɔrɔ kũ àtɛn bàa sí a vĩ̀ninɛ. 8Debora kũ à de Rɛbɛka gwàri ũ yã gà gwe, akũ ò a vĩ̀ gbiri lí gbáru Bɛtɛli sarɛ. Akũ ò tɔ́ kpà lí pìinɛ Ɔ́ɔdɔlii.
9Luda bò à sù Yakubua dɔ a suna kũ Mɛsɔpɔtamiao gbɛra, à arubarikaa dàagu 10à pì: N tɔ́n Yakubu, ama oni pinnɛ Yakubu doro, sé Isaraila. Lɛmɛ à tɔ́ kpànɛ Isaraila lɛ. 11Luda pìnɛ dɔ: Luda Gbãnasĩndapinkidemɛ ma ũ. Àgɔ̃ nɛ́ i àgɔ̃ kara. Buri ni bo n kĩnaa kũ buri dasinɔ dɔ, n buri kenɔ nigɔ̃ de kínanɔ ũ. 12Mani bùsu kũ ma kpà Ibrahĩ kũ Isaakuooa kpámma kũ n burinɔ n ga gbɛra. 13Akũ Luda fùtɛ à bò gu kũ à yã ò kãaon. 14Yakubu gbɛ̀ɛ pɛ̀tɛ gu kũ Luda yã ònɛn dɔngupɔ ũ. À í tɔ̀a à nísi kùa. 15Akũ Yakubu tɔ́ kpà gu kũ Luda yã ònɛn pìinɛ Bɛtɛli.
Rahila kũ Isaakuo ganaa
16Akũ ò fùtɛ Bɛtɛli ò dà zɛ́n. Kũ ò kà kãni kũ Ɛflatao, Rahila nɛ́'igɔrɔ kà, akũ nɛ́'i kɛ̀a zĩ'ũ. 17Nɛ́'iwãwã a kũ̀ gbãna, akũ nɔgbɛ̃ nɛ́sɛtɛrii pìnɛ: Ǹsun vĩna kɛro, n nɛ́gɔ̃gbɛ̃ ì dɔ. 18Rahila gbãna vĩ doro àtɛn ga, akũ à tɔ́ kpà a nɛ́ pìinɛ Bɛnɔni, akũ a de tɔ́ kpànɛ Biliaminu. 19Kũ Rahila gà, ò a vĩ̀ Ɛflata kũ òdi pi tera Bɛtilihamu zɛ́n. 20Yakubu gbɛ̀ dɔngupɔ pɛ̀tɛ a miraa. Rahila mira gbɛ̀ɛ pì kú gwe ari kũ a gbãrao.
21Isaraila ɛ̀ra à dà zɛ́n, akũ à bùraa kàtɛ Migidalɛda arɛ kpa. 22Gɔrɔ kũ à kú bùsuu pìn Rubɛni gɛ̀ɛ à wùtɛ kũ Bilao, Yakubu nɔ yìgisaride, akũ Yakubu yã pìi mà.
Yakubu nɛ́gɔ̃gbɛ̃nɔ ì mɛ̀n kuri awɛɛpla. 23Lea nɛ́gɔ̃gbɛ̃nɔn dí: Yakubu daudu Rubɛni, Simɛɔ, Levi, Yuda, Isaka kũ Zɛbulunio. 24Rahila nɛ́nɔn Yusufu kũ Biliaminuo ũ. 25Rahila zĩkɛri Bila nɛ́nɔn Dã kũ Nafatalio ũ. 26Lea zĩkɛri Zilipa nɛ́nɔn Gada kũ Asao ũ. Nɛ́gɔ̃gbɛ̃ kũ ò ń í kũ Yakubuo Mɛsɔpɔtamianɔn gwe.
27Akũ Yakubu kà a de Isaaku kĩnaa Mamare. À kú Kiriataba kũ òdi pi tera Ɛblɔnu sarɛ, gu kũ Ibrahĩ kũ Isaakuo vùtɛn. 28Isaaku kà wɛ̃̀ bakɛ̃ndo 29à zĩ kũ̀ yúkuyuku, akũ à gà à kàkara kũ a gbɛ̃nɔo, akũ a nɛ́nɔ Isau kũ Yakubuo a vĩ̀.
ที่ได้เลือกล่าสุด:
NAANAA 35: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
