NAANAA 34
34
Sɛkɛmu kusina Dinaa
1Lea nɛ́nɔgbɛ̃ Dina kũ à ì kũ Yakubuo bò à wɛ́ kpátɛ bùsuu pì nɔgbɛ̃nɔi. 2Kũ bùsuu pì kína Amɔ nɛ́ Sɛkɛmu, Ivi buri a è, à a sɛ̀ kũ gbãnao, akũ à wùtɛ kãao. 3A pɔ dɔ nɔkpare pìia à yei, akũ à yã nnanna ònɛ. 4Akũ Sɛkɛmu pì a denɛ: Ǹ nɛ́nɔkpare bire wɛtɛmɛnɛ mà sɛ́. 5Kũ Yakubu mà ò a nɛ́nɔgbɛ̃ kpe bò, a nɛ́nɔn kú sɛ̃̀n kũ a pɔ́kãdenɔ, akũ à yĩ̀tɛ ari ò sù. 6Akũ Sɛkɛmu de Amɔ gɛ̀ɛ à Yakubu le à yã pì onɛ. 7Kũ Yakubu nɛ́nɔ bò sɛ̃̀n ò sù, akũ ò yã pìi mà gɔ̃̀nɔ. Ń nɛ̀sɛɛ yàka ò pɔ fɛ̃̀ manamana, kũ Sɛkɛmu wé'iyã kɛ̀ Isarailanɔnɛ yãi, à wùtɛ kũ Yakubu nɛ́nɔgbɛ̃o à yã kũ à de ò kɛro kɛ̀. 8Akũ Amɔ pìńnɛ: Ma nɛ́ Sɛkɛmu pɔ dɔ á nɛ́nɔgbɛ̃a. Á yã nna. À a kpáa nɔ ũ. 9Ò lɛ́dokɔ̃nɔ kɛ ògɔ̃ ó nɛ́nɔgbɛ̃nɔ kpãzãkɔ̃a. 10Àgɔ̃ kú kũoo, ó bùsu kun á pɔ́ ũmɛ. À vutɛn àgɔ̃ laga tán àgɔ̃ zĩtɛ vĩ. 11Akũ Sɛkɛmu ò Dina de kũ a dãgɔ̃nɔnɛ à pì: À tó mà á pɔnna le. Pɔ́ kũ a pi mà kpááwa mani kpá. 12À anzureblebɔ lɛ́ damɛnɛ zɔ̃kɔ̃ kũ gbanɔ dasidasi. Pɔ́ kũ a ò mani kpá. À nɛ́nɔkpare pì kpáma nɔ ũ.
13Akũ Yakubu nɛ́nɔ wè Sɛkɛmu kũ a de Amɔooa kũ manafikio kũ Sɛkɛmu ń dãre kpe bò yãi. 14Ò pìńnɛ: Óni fɔ̃ ò abire kɛro, óni fɔ̃ ò ó dãre kpá gyɔfɔrɔdearo, zaakũ wé'iyãmɛ ó kĩnaa. 15Óni we á yãiro, séto à gɔ̃ lán ó bà á gɔ̃gbɛ̃nɔ tɔ̃̀ zɔ̃ ń pínki. 16Tó a tɔ̃̀ɔ zɔ̃̀, óni ó nɛ́nɔ kpãzãáwa óni á nɛ́nɔ sɛ́ nɔ ũ. Ónigɔ̃ kú kãáo, óni gɔ̃ buri dokɔ̃nɔnɔ ũ. 17Ama tó ádi we ó yãiro, tó ádi tɔ̃̀ zɔ̃ro, óni ó dãre sɛ́ ò tá kãaomɛ. 18Yã pìi kɛ̀ Amɔ kũ a nɛ́ Sɛkɛmuoonɛ nna. 19Kɛfɛnna pì yã pìi gɔ̃̀gɔ̃ likalika, kũ Yakubu nɛ́nɔgbɛ̃ yã kànɛ yãi. À bɛ̀ɛrɛ vĩ deńla a de bedenɔ tɛ́.
20Amɔ kũ a nɛ́ Sɛkɛmuo gɛ̀ɛ ń wɛ̃tɛ bĩnilɛa, akũ ò yã ò kũ wɛ̃tɛdenɔ ò pì: 21Gbɛ̃ pìnɔ yãke vĩ kũooro. Ò tó ògɔ̃ kú ó bùsun ògɔ̃ laga tá, zaakũ bùsuu pìi yàasa ani mɔ́wá. Óni ń nɛ́nɔgbɛ̃nɔ sɛ́ óni ó nɛ́nɔ kpáḿma. 22Gbɛ̃ pìnɔ sɔ̃, oni we ògɔ̃ kú kũoo de ò gɔ̃ buri dokɔ̃nɔ ũro, séto adi kɛ ó gɔ̃gbɛ̃ sĩnda pínki tɔ̃̀ɔ zɔ̃̀ lán ń bà baasiro. 23Ń pɔ́kãdenɔ kũ ń aruzɛkɛnɔ kũ ń zùnɔ pínki ni gɔ̃ ó pɔ́ ũroo? Ò weńnɛ de ògɔ̃ kú kũoo. 24Wɛ̃tɛpidenɔ Amɔ kũ a nɛ́ Sɛkɛmuo yã mà, akũ ń gɔ̃gbɛ̃nɔ tɔ̃̀ɔ zɔ̃̀ ń pínki.
25A gɔrɔ aakɔ̃de zĩ, kũ ò kú kũ wãwão ò kú kũ yãke laasunnworo, Yakubu nɛ́ gbɛ̃nɔn planɔ Simɛɔ kũ Levio, Dina vĩ̀ninɔ, ń baadi a fɛ̃nɛda sɛ̀ ò sì wɛ̃tɛn ò gɔ̃gbɛ̃nɔ dɛ̀dɛ ń pínki. 26Ò Amɔ kũ a nɛ́ Sɛkɛmuoo dɛ̀dɛ, akũ ò Dina sɛ̀ ò bòo Sɛkɛmu kpɛ́n ò tà kãao. 27Wɛ̃tɛdenɔ dɛdɛnaa gbɛra Yakubu nɛ́nɔ sù ò wɛ̃tɛ pɔ́nɔ nàkɔ̃a kũ ò wé'i dà ń dãrea yãi. 28Ò ń sãnɔ kũ ń blènɔ sɛ̀tɛ kũ ń zùnɔ kũ ń zaakinɔ, pɔ́ kũ ò kú wɛ̃tɛ gũnnɔ kũ pɔ́ kũ ò kú ń buranɔ pínki. 29Ò ń aruzɛkɛnɔ sɛ̀tɛ pínki kũ ń nɛ́nɔ kũ ń nɔgbɛ̃nɔ kũ pɔ́ kũ ò kú ń bɛanɔ pínki.
30Akũ Yakubu pì Simɛɔnɛ kũ Levio: A sumɛnɛ kũ yã vãnio. Kanaanɔ kũ Pɛrizinɔ kũ bùsu díkĩna buri pãndenɔ nigɔ̃ ye ma kãiro. Lákũ ó dasiro nà, tó ò lìkawái, tó ò sìógu, oni ma dɛ kũ ma burinɔo pínki. 31Akũ ò wèa ò pì: Kũ à ó dãre dìtɛ karua ũ, abire manan gwe yá?
ที่ได้เลือกล่าสุด:
NAANAA 34: BB2005
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Bisã Bible © SIM International, 2005.
