LUKA 23
23
Yesu mozya hakwe Pilato mlao wa Kiroma
(Mat. 27:1-2, 11-14; Mrk. 15:1-5; Yoh. 18:28-38)
1Luvungano lwose vakavuka, vakamtonja kwa Pilato. 2Vakavoka kumsitaki vekiti, “Twemvonie uu ekikombosha mbari yetu, na kuvasuja vantu vasimunke Kaisari kodi, ekiti iti ye mwenye niye Kristo Mfumwa.” 3Pilato akamvwija ekiti, “We niwe mfumwa wa Vayuda?” Akagharusha akamti, “Sa vuntu wati.” 4Pilato akavati vabaha va vatasi na luvungano, “Mi sivona kintu kivivi he uu mntu.” 5Navo vakazikatetisha, vekiti, “Esembeka vantu, ekicheja Yudea hose, kuvokia Galilaya mhaka aha.”
Yesu mozya hakwe Herode
6Pilato ekinasikie ivyo, akavwija iti uu ni mntu wa Galilaya. 7Ekinamanye iti eho he kifumwa chakwe Herode, akamwinkija hakwe Herode, kila naye ekireho kula Yerusalemu misi ila.
8Niho Herode ekinamvone Yesu akaizihirwa mno, ambu ekiendisha too misi mingi kumvona, ambu esikie mburi jamwe, akaarira kuvona luvengo lwerongwa niye. 9Akamvwija viteto vijinki, mira ye asimgharushe neri. 10Vabaha va vatasi na vaandiki vakavuka, vakamsitaka haiwa. 11Herode hamwe na vasikari vakwe vakamfalaja, vakamsola na kumjika suke jedi; vekikenja vakamhundua hakwe Pilato. 12Niho msi ula ula Herode ne Pilato vakasikijanya na kuoka vambwie, ambu aho kuvoka vekina nzo venye kwa venye.
Pilato, Baraba ne Yesu
(Mat. 27:15-26; Mrk. 15:6-15; Yoh. 18:39—19:16)
13Pilato naye akazomanya vabaha va vatasi, na vabaha na vantu, 14akavati, “Uu mntu mwemwetie hangu iti ekombosha vantu, rereha, nami namlaha mozya he unywi, mira sivonie kivivi heye neri, he ivyo mwemsitake. 15Neri Herode, ambu amhundua hetu, heicho, rereha, tehena neri kivivi chochose eketie chemtara kufwa. 16Heicho ninem’bigha, nimchungue.” [ 17Kila chemtara kuvachunguia mnkore mmwe he igheri la msi m’baha.] 18Vakalonza vose hamwe, vekiti, “Mvushe uu, utuchunguie Baraba.” 19Naye neki mntu ekichungiwe vuntu vwa ivoo levoneke he muzi, na kwa kukoma. 20Pilato akateta navo ka keri, kila ekienda kumchungua Yesu. 21Mira vakalonza, vekiti, “Mvambe he msalaba, mvambe he msalaba!” 22Akavavwira ka katatu, “Hanini? Ni kivivi ani uu eketie? Sivonie heye kintu chemtara kufwa; mira nekikenja kum’bigha, ninemchungua.” 23Mira vakazikateta na izii ibaha, vekienda avambwe he msalaba; kilonzo chavo kikavota. 24Pilato akachwa iti mikundire yavo ikoloke. 25Akamchungua ula ekichungiwe vuntu vwa mavoo na kukoma, eye vemwendie; akamwinkija Yesu vamketie sa vuntu vekunda.
26Aho vekimvusha hala, vakamgura mntu mmwe, Simioni Mkirene. Naye ekifumie he mighunda, vakamtwisha msalaba, autike aze nyuma he Yesu.
Yesu evambwa he msalaba
(Mat. 27:32-44; Mrk. 15:21-32; Yoh. 19:17-27)
27Luvungano lubaha lwa vantu vakamratera, na vantu va kiche vekimwelila na kukubigha mpafu. 28Yesu akavagharukia, akati, “Unywi vana va kiche va Yerusalemu, musiniie mi, mira kuiieni unywi venye na vana venyu. 29Ambu rereha, heneza misi, eyo veneti, ‘Varela vwedi ni vala e migumba, na ndeni jesijitoha, na mavee esiamwisha.’ 30Niho venevoka kuvwira kuvwira ntuvi, ‘Tugwieni,’ na vidunda, ‘Tushiieni.’ 31Ambu kakicha veketa huvo he mti mvisi, kineoka ze he ula weomie?”
32Hakatikwa na vangi veri vabanu, varekomwa hamwe naye.
33Vekinafike hala hantu heitangwa he mtwi, vakamvamba he msalaba aho, hamwe na vala vabanu, mmwe mondo wa kume na mmwe mondo wa kumoso. 34Yesu akati, “Vava, uvashighie, ambu tevemanyije icho veketa.” Vakaghava suke jakwe kwa kushotana manga. 35Vantu vakaimuka vekirerehia. Vala vabaha navo vakamsola, vekiti, “Ekijije vangi, nakukije se ye mwenye, kakicha niye Kristo wa Mrungu esaghurwe niye.” 36Vala vasikari navo vakaremsola, vekimswia na kumunka siki, 37kangi vekiti, “Kari we niwe mfumwa wa Vayuda, ukukije we mwenye.” 38Na wanga heye hekina kivonyesho, “UU NIYE MFUMWA WA VAYUDA.”
39Na mmwe wa vala varekonda vevambiwe he msalaba akamrara, ekiti, “H’ii, siwe Kristo? Kukije se we mwenye hamwe na uswi.” 40Mira ula wa keri akamgharusha, akam’bohija, ekiti, “Nawe wa tumfoleka neri Mrungu, uko nawe ureho he mlaho uo uo? 41Nawo, he uswi ni wa singisirya, ambu tuinkwa mhako wa kiringanyo cha mihiro yetu; mira uu tehena cho kivivi eketie.” 42Ekikenja, akati, “E, Yesu, unanikumbuke wekiingia he vufumwa vwako.” 43Yesu akamti, Kididi nikutio, “Yoo ili uneikaa hamwe nami he Paradiso.”
Kifwa chakwe Yesu
(Mat. 27:45-56; Mrk. 15:33-41; Yoh. 19:28-30)
44Aho neki sa igheri la saa mtandatu, hakagwa kija he isanga lose mhaka saa kenda, 45kianga cha izuva kikafwirira; na ila pazia yeghavie nyumba ya mtaso ikabajika ghati. 46Yesu akaiagha na izii ibaha, ekiti, “E, Vava, nivika ngoro yangu he mikono yako.” 47Ekikenja kuteta huvo, akachika moo. Ula akida ekivona vila vyeketike, akamkaza Mrungu, ekiti, “Kididi uu mntu neki mkitea.” 48Mavungano ose a vantu evo vekizomane kurereha ivyo vyeketike, vekinavone vila vyeketike, vakaghotoka na kaa havo vekikubigha-bigha mpafu. 49Na vose vala vemanyane naye, na vache vala vekitonjanya naye kufuma Galilaya, vakaimuka hae vekirereha ivyo.
Kujikwa kwakwe Yesu
(Mat. 27:57-61; Mrk. 15:42-47; Yoh. 19:38-42)
50Niho hakavoneka mntu mmwe, eitangwa Yosefu, e mntu wa chila, mntu wedi, mkitea; 51(esekundie mburi javo na icho veketie,) naye neki mntu wa Arimatia, muzi mmwe wa Vayuda, naye ekiinda vufumwa vwa Mrungu; 52uo mntu akatonga hakwe Pilato, akaenda kuinkwa mwiri wakwe Yesu. 53Akauseja, akauvunga na shanda ya suke nyewa, akauvika he mbira yetungiwe he mrarabwe, hesinayajwa mntu heyo neri. 54Na uo msi neki wa kuringanyija sabato, nayo ikavoka. 55Na vala vache vezie naye kufuma Galilaya vakaratera, vakavona mbira, na sa vuntu mwiri wakwe wevikiwe. 56Vakahunduka, vakaringanya vintu vyepupuntika, na mafuta. Vakahema msi wa sabato sa vuntu cheamorwe.
ที่ได้เลือกล่าสุด:
LUKA 23: CHSUNT67
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chasu New Testament © Bible Society of Tanzania, 1967.
