LUKA 24
24
Mbira yesina kintu
(Mat. 28:1-10; Mrk. 16:1-8; Yoh. 20:1-10)
1Msi wa kuvoka juma, chaheyavo kere, vakatonga he mbira, vetikie vintu vyepupuntika, vila veviringanye. 2Vakakicha lila ibwe labingilishwa hae na mbira. 3Vakaingia, vasivone mwiri wa Mfumwa Yesu. 4Navo aho vekimagarara vuntu vwa icho kintu, vantu veri vakaimuka hafuhi navo, vedokie suke jemekenisa; 5navo aho vekiingiwa ni fole na kusoma vusho si, avo vakavati, “Hanini mwemwemnda ula eho moo he vefwie? 6Tewaha ye, avuka he vefwie. Kumbukani sa vuntu etetie na unywi kila ereho uko Galilaya, 7ekiti, ‘Chemvaie Mwana wa Mntu kuinkijwa he mikono ya vabanu, kuvambwa he msalaba, na msi wa katatu kuvuka he vefwie.’” 8Vakakumbuka viteto vyakwe. 9Vakavuka he mbira, vakahunduka; vakavakulila vala ikumi na mmwe na vangi vose ijo mburi jose. 10Navo neki Maria Magdalena ne Yoana, ne Maria mlala wavo Yakobo, na vala vache vangi vekiho hamwe navo; nivo veukulile ntume ijo mburi. 11Viteto vyavo vikavoneka iti ni vurundu hevo, neri teveviitikije. 12Mira Petro akavuka, akadindika mhaka he mbira, akakodeka, akasungia noko ndeni, akavona du ila mihaluma ya shanda; akatonga ekimaka he vila vyeketike.
Yesu evoneka he nzia ya Emau
(Mrk. 16:12-13)
13Na msi ula ula hekina vantu veri hevo, vekitonga he kamuzi kamwe keitangwa Emau, kekiho hae na Yerusalemu sa hantu ha kutonga saa mbiri. 14Navo vekigaya venye kwa venye, mburi ja ivyo vyose vyeketike. 15Aho vekigaya na kuvwijana, Yesu mwenye akavafikia, akatonjanya navo. 16Meso avo akajivwa, vasimmanye. 17Akavati, “Ni mburi ani ii mweteta mwekitonga?” Vakaimuka mavusho avo ejingije. 18Mmwe wavo eitangwa Kiliopa, akagharusha, akamti, “Nirewe ra du we mgheni aha Yerusalemu, neri wesimanya ivyo vyeketike aha misi ii?” 19Akavavwija, “Ni mburi ani?” Vakamti, “Ni mburi yakwe Yesu wa Nazareti, eki mntu mroti, ena nzinya he kuketa na kuteta mozya he Mrungu na he vantu vose. 20Kangi sa vuntu vabaha va vatasi na vabaha vetu vemgerire he mlaho wa kifwa, vakamvamba he msalaba. 21Na uswi niye twekimvikiie ikuji iti niye enekombola Israeli. Na kushigha ivyo vyose, yoo ni msi wa katatu, too ula msi ivyo vyeketike. 22Kangi vache vasiku va hetu vetuchwie mwompi, kila vetongie he mbira chaheyavo kere, 23vasivone mwiri wakwe; vakaza, vakati, vefumiiwe ni vamalaika, vekiti iti eho moo. 24Va kumwe vala vekiho hamwe na uswi vetongie he mbira, vakavona huvo huvo sa vuntu avo vache vetetie, mira ye tevemvonie.” 25Akavati, “Unywi mu vesitwarija, na venye ngoro nkuji he kuitikija vyose vyetetiwe ni varoti! 26Hamao, techemvaie Kristo kuvona mavwasi aa, na kuingia he vwedi vwakwe?” 27Akavokia he Mose na varoti vose, akavahererejija he maandiko na mburi jose jemtara ye mwenye.
28Vakafika hafuhi na kala kamuzi eho hantu vekitonga, naye akakughosha sa eenda kuvecha noko mozya. 29Vakamsingirija, vekiti, “Ikaa hamwe na uswi ambu haswa, na msi usia.” Akaingia kuikaa hamwe navo. 30Igheri aho eikae si hamwe navo he kijo, akaghuha mkate, kauinka lutelwedi, akaubendua, akavainka. 31Meso avo akatambarujwa, vakammanya; akateka he meso avo. 32Vakvwirana, “Tetwekiramwamwana he ngoro jetu uko ndeni, aho ekiteta na uswi kula nzieni, va kutufunukurira maandiko?” 33Vakavuka saa ila ila, vakahunduka Yerusalemu, vakavakicha vala ikumi vevungane, vo hamwe na vala vekina navo, 34vekiti, “Kididi Mfumwa avuka he vefwie, naye amfumia Simioni.” 35Navo vakavagaia jila mburi vevonie uko nzieni, na sa vuntu emanyike hevo hala ekibendua mkate.
Yesu evafumia ntume jakwe
(Mat. 28:16-20; Mrk. 16:14-18; Yoh. 20:19-23)
36Aho vekiteta iyo mburi, ye mwenye akaimuka ghati hevo, akavati, “Mporere naiikae henyu!” 37Vakaituka na kufoleka mno, vekiti vavona mpepo. 38Akavati, “Hanini mwemagarara? kangi hanini mwekimwamwana he ngoro jenyu? 39Rerehani mikono yangu na maghu angu, iti nimi; nibabatani mikono yangu na maghu angu, iti nimi; nibabatani muvone, ambu mpepo teina mwiri neri mavindi sa vuntu mwenivona mi nena nao.” 40Ekikenja kuteta huvo akavavonyesha mikono yakwe na maghu akwe. 41Igheri aho verecheri vesinaitikija, he vuntu vwa kuizihirwa na kumaka, akavati, “Muna kintu chala aha?” 42Vakamunka kibendo cha samaki ya kukangaja. 43Akakighuha akala mozya hevo.
44Kangi akavati, “Ivyo nivyo viteto vyangu nekimuvwirire hala nena na unywi, iti niresari vikoloshwe vyose neandikiwe he myomongwa yakwe Mose na he varoti na mazumo.” 45Niho akavafunukurira kucha kwavo, nesa vatwarije maandiko. 46Akavati, “Nivwo vuntu cheandikwe, iti Kristo enerishwa vwasi, na msi wa katatu kuvuka he vefwie; 47na iti vaisanga vose venebirikirwa mburi ya kuchwa mti na kushighiwa mabanu he izina lakwe, kuvokia Yerusalemu. 48Na unywi ni unywi vaonwa va mburi ijo. 49Rereha, nimuetie kiravo cha Vava wangu; mira ikaani aha he muzi, mhaka mwenedokwa nzinya yefuma uko wanga.”
Kukwea wanga
(Mrk. 16:19-20)
50Akavatonja mhaka Betania, akavusha mikono yakwe, akavainka lutelwedi. 51Aho ekivainka lutelwedi, akakutanya navo, akatikwa noko wanga. 52Vakamdunkutia, vekikenja vakahunduka Yerusalemu vena kuizihirwa kubaha. 53Navo magheri ose vekiikaa he nyumba ya mtaso vekim’bumija Mrungu.
ที่ได้เลือกล่าสุด:
LUKA 24: CHSUNT67
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chasu New Testament © Bible Society of Tanzania, 1967.
