YOHANE 5
5
Muwaji wa he ndiva ya Betsada
1Nyuma ya ivyo hekina msi m’baha wa Vayuda; Yesu naye kakwea noko Yerusalemu. 2Na uko Yerusalemu he mvera wa magonnji hena ndiva yekiitangwa he Kiebrania Betsada, nayo ina majumba masano. 3Ndeni heo hekishinjia irivati ibaha la vawaji, matuntu, vesiveiwatonga, na veholoje, [ vekiinda mpombe idifuke, 4ambu hekina igheri elo malaika esea, akaingia he ila ndiva, akadifua mpombe. Heicho ula enerongaingia mpombe ikinadifuwa ebanjwa vuwaji vwose ena navwo.] 5Aho hekina mntu ewaie hantu ha miaka makumi matatu na mnane. 6Yesu ekinamvone uu eshinjie, naye ekimanya iti eikae huvo misi mingi, akamti, “Uenda kubanda?” 7Ula muwaji akagharusha, “Mfumwa, mi sina mntu enigera he ndiva mpombe yekidifuwa; aho nekitonga mntu ungi enirongorira kusea.” 8Yesu akamti, “Imuka, tika igodoro lako utonge.” 9Hala indi ula mntu akabanda, akatika igodoro lakwe, akatonga. Ula msi neki sabato.
10Heicho Vayuda vakamti ula ebandijwe, “Yoo ni sabato, neri tekikundijwa we kutika igodoro.” 11Akavagharusha, “Ula enibandije niye enivwirire, ‘Tika igodoro lako utonge.’” 12Niho vakamvwija, “Ula ekuvwirire, ‘Tika igodoro utonge ni ani?’” 13Mira ula mntu ebandijwe temmanyije iti ni ani; ambu Yesu ekikkunyembelushe, kila hala hantu hekina vantu vajinki. 14Nyuma ya ivyo Yesu akamkicha he nyumba ya mtaso, akamti, “Rereha, wabanda; usironge mabanu kangi, usirevonekiwa ni kivivi kukela. 15Ula mntu akatonga, akavakulila Vayuda mburi kuti Yesu niye em’bandije. 16He iyo mburi Vayuda vakamrisha Yesu vwasi, kila erongie ivyo he msi wa sabato. 17Akavagharusha, “Vava wangu eronga ndima mhaka iki, nami nironga ndima.” 18He vuntu vwa icho Vayuda vakazika enda kumkoma, ambu si sabato du ekondie, mira hamwe na icho emwitanga Mrungu Vavee, ekikuringanya na Mrungu.
Yesu evonyesha sa vuntu emvikiie Vavee ikuji
19Niho Yesu akagharusha, akavati, “Kididi, kididi, nimutio; Mwana teidima kuronga kintu mwenye esire kila evonie Vavee ekikironga; ambu vyose ye eronga, nirevyo na Mwana eronga. 20Kila Vava emkindie Mwana, naye emvonyesha vyose eronga ya mwenye; na ere ndima mbaha kukela ijo enemvonyesha, nesa unywi muidime kumaka. 21Ambu sa vuntu Vava evusha vefwie, na kuvakalamija, nirehuvo Mwana evakalamija vala evakunda. 22Kangi Vava telaha mntu neri mmwe, mira emunkie Mwana mlaho wose; 23nesa vantu vose vamshimie Mwana sa vuntu vemshimia Vava. Esimshimia Mwana temshimia Vava emtumie. 24Kididi, kididi, nimutio, Ye esikia kiteto changu na kumwitikija ula enitumie ena nkalamo ya kae na kae; neri tekaingie he milaho, mira evecha kufuma he kifwa na kuingia he nkalamo. 25Kididi, kididi, nimutio, Saa yezie na iki iwaha, vefwie venesikia izii la Mwana wa Mrungu, na vala velisikia venekalama. 26Ambu sa vuntu Vava ena nkalamo heye mwenye, nirehuvo emunkie na Mwana kuketa nkalamo heye mwenye. 27Kangi emunkie nzinya kuchwa masa, kila e Mwana wa Mntu. 28Musimake he ivyo viteto, ambu saa iza eyo vantu vose veho he mbira venesikia izii lakwe. 29Navo venefuma; vala verongie vyedi he kuvuka kwa nkalamo, na vala vehirire vivivi, he kuvuka kwa mlaho.
Vuonwa vwakwe Yesu
30“Mi mwenye siidima kuronga kintu; sa vuntu nesikia nivwo vuntu nelaha; na mlaho wangu ni wa kitea, ambu sienda mikundire yangu mi mwenye, esire mikundire ya ula enitumie. 31Mi nekikutetia vuonwa mwenye vuonwa vwangu si vwa idi. 32Hena ungi enitetia vuonwa; nami nemanyije iti vuonwa vwakwe enitetia ni vwa idi. 33Unywi mwekitumie vantu hakwe Yohane, naye akatetia idi vuonwa. 34Mira mi sighuhia vuonwa he vantu, mira niteta ivi nesa muidime kukia. 35Ye neki taa yeaka na kuangaja, na unywi mukakunda kung’arira kianga chakwe kakenda. 36Mira vuonwa nena navwo ni vubaha kuvecha vula vwakwe Yohane; ambu jila ndima Vava eninkie iti nijikenje, ijo ndima njenye nejironga, jinitetia vuonwa iti Vava enitumie. 37Na uo Vava enitumie enitetia vuonwa. Izii lakwe temunalisikia narini, neri fwani yakwe temunaivona. 38Neri kiteto chakwe temukina cheikaa he unywi, kila unywi mwesimwitikija ula etumiwe niye. 39Musaka he maandiko ambu mudunganya iti heo muna nkalamo ya kae na kae; nao nio enitetia vuonwa. 40Neri temukunda kuza hangu iti muinkwe nkalamo. 41Mi sighuhia ngazo he vantu. 42Mira nemumanyije unywi iti temuna lukundo lwa Mrungu lweho he unywi. 43Mi nezie he izina la Vava wangu, neri unywi temunighuhia; ungi ekiza he izina lakwe mwenye, uo munemghuhia. 44Muidima ze kuitikija unywi mweinkana ngazo venye na venye, na ila ngazo yefuma he Mrungu ere mmwe temuienda? 45Musidunganye iti ninemurengeha he Vava; hena ye emurengeha, niye Mose, eye unywi mwemwarira. 46Ambu nanga mwemwitikije Mose, mwekiraniitikija nami; ambu ye eandike mburi jangu. 47Mira mwekisaitikija maandiko akwe, muneitikijaze viteto vyangu?”
ที่ได้เลือกล่าสุด:
YOHANE 5: CHSUNT67
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chasu New Testament © Bible Society of Tanzania, 1967.
