YOHANE 4
4
Yesu na mche Msamaria
1Heicho Mfumwa, ekinamanye iti Vafarisayo vesikie iti Yesu agharusha varateri vajinki kumkela Yohane, na kubatiza, 2(mira Yesu mwenye tebatize, esire varateri vakwe), 3akashigha Yudea akatonga wa Galilaya. 4Naye kikamtara kuvecha ghati ya Samaria. 5Niho akafika he muzi wa Samaria weitangwa Sikari, hafuhi na ula mghunda ewo Yakobo ekimunkie Yosefu mwanawe. 6Hala hekina kisima chakwe Yakobo. Kila Yesu ekifikiwe vuntu vwa ntambo yakwe, akakuikarira he kisima. Aho neki saa mtandatu. 7Hakaza mche wa Kisamaria kuzataha mpombe. Yesu akamti, “Ninka mpombe ninwe.” 8Ambu varateri vakwe vekitongie he muzi kuzora kijo. 9Niho ula mche wa Kisamaria akamti, “Kiveze we Myuda kuomba mpombe hemi, nami ne mche wa Kisamaria?” (Ambu Vayuda teveongerana na Vasamaria.) 10Yesu akagharusha, akamti, “Nanga wekimanyije vila vya mbonea ya Mrungu, kangi iti ni ani ekuti, ‘Ninka mpombe ninwe,’ wekimwomba engaye, naye ekikunka mpombe ya nkalamo.” 11Ula mche akamti, “Mfumwa, tuna kintu chatahia, na kisima cheseishe; ana wavonia hiyo iyo mpombe ya nkalamo? 12Ha! we u m’baha kumvecha vava wetu Yakobo, etuinkie iki kisima, naye mwenye akanwa mpombe yacho, hata na vanawe na mafio akwe?” 13Yesu akagharusha, akamti, “Ula enwa mpommbe ii enesikia wa nkiru; 14mira uo enenwa mpombe ila mi nenemunka tekazesikia nkiru na too; mira ila mpombe nenemunka ineoka ndeni heye kisima cha mpombe, yekiderereta mhaka nkalamo ya kae na kae.” 15Ula mche akamti, “Mfumwa, ninka iyo mpombe nisizesikia nkiru neri nisizeza aha kutaha wa.” 16Yesu akamti, “Tonga uremwitanga mme wako, uze naye aha.” 17Ula mche akagharusha, “Sina mme.” Yesu akamti, “Wetetie nezo wekiti, ‘Sina mme;’ 18ambu wekina vome vasano, na uo wena naye iki si mme wako; aho wetetie cha idi.” 19Ula mche akamti, “Mfumwa, nivona iti we u mroti! 20Vavava vetu vekitasa hena ntuvi ii, na unywi muti uko Yerusalemu niho hantu hetutara kutasia.” 21Yesu akamti, “Mcheku, niitikija, saa ineza eyo mwesikaretasia Vava hena ntuvi ii, neri kula Yerusalemu. 22Unywi mutasa kila mwesikimanyije; uswi tutasa cho twekimanyije, ambu lukio lufuma he Vayuda. 23Mira saa iza, nayo iho iki, eyo varetasa va idi venemtasa Vava he mpeho na idi. Ambu Vava evaenda vantu sa avo vemtasa. 24Mrungu ni Mpeho, na vala vemtasa Ye kivatara kumtasa kimpeho na idi.” 25Ula mche akamti, “Nemanyije iti Mesia eneza (eitangwa Kristo); naye ekiza, ye enetufunukurira mburi jose.” 26Yesu akamti, “Mi neteta nawe Niye.”
27Hala indi varateri vakwe vakaza, vakamaka kila eteta na ula mche; mira tehena etie, “Uendani?” kana, “Hanini weteta naye?” 28Niho ula mche akashigha sangu yakwe, akatonga he muzi, akavavwira vantu, 29“Nzoni muyoe mntu enivwirire mburi jose nejirongie. H’ii, tekive iti uu niye Kristo?” 30Niho vakafuma he muzi, vakamswia.
31Uko nyuma varateri vakwe vakamsingirija vekiti, “Rabi, la.” 32Akavati, “Mi nina kijo unywi mweksikimanyije.” 33Niho varateri vakwe vakatiana, “Ngea hetena mntu emwetie kijo?” 34Yesu akavati, “Kijo changu ni kuronga kikundire cha ula enitumie, nikenje ndima yakwe. 35Unywi temuti, ‘Heshele mieji mine, niho heneketa lufindiki?’ Rereha mi nimutio, Vushani meso enyu murerehe mighunda, iti yakenja kuela, yaringania he lufindiki. 36Na ula efindika eghuha mhako, na kuvunganya ntunda he nkalamo ya kae na kae; ula ehanda na ula efindika kive vaizihirwe hamwe. 37Ambu aho kiteto icho kioka idi: ‘Mmwe ehanda, ungi efindika.’ 38Mi nemutumie mufindike vila mwesivibinukie; vangi vebinuke, unywi mwaingia he kubinuka kwavo.”
39Na he ula muzi Vasamaria vajinki vakamwitikija he vuntu vwa kiteto cha ula mche, etetie vuonwa kuti, “Enivwirire mburi jose nejirongie.” 40Aho vala Vasamaria vekinamswie vakamsemba aikae havo; naye akaikaa uko misi miri. 41Vantu vajinkisha vakaitikija vuntu vwa kiteto chakwe. 42Vakamti ula mche, “Iki twaitikija, neri si vuntu vwa viteto vyako du; ambu uswi venye twasikia, kangi twamanya cha idi iti uu niye Mkija wa si ii.”
Yesu em’banja mwana wa mlao uko Galilaya
43Misi iyo miri yekivecha akavuka hala, akatonga Galilaya. 44Ambu Yesu mwenye etetie vuonwa iti mroti tevona shima he isanga lakwe mwenye. 45Aho ekinafike Galilaya, Vagalilaya vakamghuhia; kila vevonie mburi jose ejirongie kula Yerusalemu igheri la msi m’baha; ambu navo vekitongie he ula msi m’baha.
46Niho akafika wa Kana ya Galilaya, hantu ekigharushe mpombe ikaoka mvinyo. Aho hekina mlao mmwe ekina mwana wakwe ekiwajishwa uko Kapernaumu. 47Uo ekinasikie iti Yesu ezie kufuma Yudea mhaka Galilaya, akamswia, akamsemba asee am’banje mwanawe; ambu eki hafuhi na kufwa. 48Niho Yesu akamti, “Mwekisavona maluvengo na vimako temukaitikije neri.” 49Ula mlao akamti, “Mfumwa, sea mwanangu esinafwa.” 50Yesu akamti, “Kutongire, mwanao ereho.” Ula mntu akaitikija kila kiteto akivwirwa ni Yesu, niho akatonga. 51Aho eho esea vazoro vakwe vakamzana, vekiti mwanawe ereho. 52Niho akavavwija, ni saa ani evokie kuketa kachuu; navo vakamti, “Ighuo saa mfungate, isha likamshigha.” 53Niho vavee akamanya iti nire saa ila ila evwirirwe ni Yesu, “Mwanao ereho.” Akaitikija ye na vose va kaa hakwe. 54Ulwo ni luvengo lwa keri Yesu erongie aho ekinaze Galilaya kufuma Yudea.
ที่ได้เลือกล่าสุด:
YOHANE 4: CHSUNT67
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
Chasu New Testament © Bible Society of Tanzania, 1967.
