Yohanes 1
1
Ebe Wene eti abat agike wene
1Ebenggeranem erlo paga nen, wene Ebe Wene etiat welagike. Ebe Wene eti Allah imbisagat dogolik, ebe Allah at werek. 2At eti ebenggeranem erlo paga nenat Allah imbisagat dogolik, 3yi mende ndi mende taʼbokogonat Allah nen walkasike eti at Ebe Wene nenat walkasike. At ebe dek dogolepma, omanggiat walkelep degat o. 4Ninilugut ninabigogo mende erlo arat werek eti paga, nit akoni liyat ninabi wagike. 5Nit o amummo werekma liyat ninabi wagike mende yibarlek werekma, o amum eti paga, o liya etnogo damut dusak erlok dek nen yibarlegat werek.
6-7O liyat ninabigogo mende eti ilu mende nen abok yoknisawagaluk, ap endaga Yohanes eti Allah nen ayonggo ʼbiluk laʼbi wagike. Laʼbi wagikemo wagike eti o liyat ninabigogo mende eti abok yogisasinem, akoni taʼbokogonat inendainggen at oba panggot duwagaluk wagike o. 8At ebe liyat ninabigogo mende eti ʼbuk. At liyat ninabigogo mende eti abok yoknisa wagike. 9At liya ebe mende eti agat oba yoma wago dogolik, nit akoni taʼbokogonat ninebe dombok liyat ninabi wagike.
10At nenat mbogot agat walkasike mende, at ebe agat oba yoma wagikesik werekma, it akoni agat oba mende yoma nen, at ebe didigidek welaguka. 11At enggaerek aguma wagike mende, at ewe agot nen ebe waganggidek togot disuka. 12Esigit diluk togot disuka mende, it akoni amberek nen, at ebe waganggukasik nen, inendainggen at oba panggot disukama, Allah aʼburi ebeat mende asuwagaluk inderinakike. 13Inderinakikemo, at aʼburi aguka eti akoni inaʼburi endaginabu warlok nen inamep mende dogum walogo endaginabigogi eti kak ʼbuk. At Allah nenat endaginakike.
14Ebe Wene etnogo abat agikesik ninomat welagagu. Ninomat dogolik, at ebe eti Allah aʼbut omanggiat endago etnogo, pogorarigogi mende ninilenggen kasugu o. At obabut pano nen, panorogo kagat ninakik, wene ebe wene yoknisigik, kagako mondok werekma ninilenggen kasugu.
15Wene at ebe pasik Yohanes nen men yogisasike,
“An nomborlik yabunggane ap omanggi wisigin, yiluk abok yokisasi lagi etnogo, ebe yiat o. At yi yabunggane an nomborlik waga mende, ebe an awan endak lagidek werek nggorlek, at alebat welagike eti paga, an nebe erlok dek o. Nggok, arat o,” yiluk, ane nggokogo yogisasike.
16Nen, at obabut pano mondok nen ninebe taʼbokogonat alep-yabungga panot ninako mondok werek o. 17Wene Allah nen ninasuk wakike wene etnogo yanggul nisawagaluk, alebat Musa laʼbi wagikemo, yanggul nisasike mende, Allah obabut pano nen panot ninakik, ebe wene yanggul nisigik, kagasuwagaluk, Yesus Kristus laʼbi wagikemo yanggulnisa wagike o. 18Akoni nen Allah ebe inilenggen mondok kigidek mende, at aʼbut omanggiat endago ombae eragalilu imbisak dogoligogo mende eti nenat Allah ebe dikogo yanggulnisa wagike o.
At Yohanes enggaerek pasik abok mbilelogo yogisasike wene
(Matius 3:1-12; Markus 1:1-8; Lukas 3:1-18)
19At Yohanes nen wene esigit diluk yogisasi werekma, it ap Allah indewerek mende inom, inunggulowak endaga Lewi mende inom, inom nen,
“Yohanes. Kat kebe ta kek nogo,” yiluk oba kinok waganuwagaluk, ap Yahudi mende o Yerusalem nen laʼbiya wagukama Yohanes oba waguka. 20Wagukasik, at oba kinok waganggukama, at Yohanes nen enggaerek abok laʼbelogo yogisigidek, ʼbukakogonat yogisasi dogolik, men yogisasike.
“An nebe, akoni ndil ninabuwagaluk Allah nen ayonggo ʼbiluk laʼbi wisigin yisike etnogo ʼbuk. Dek o,” yiluk yogisasike. 21Esigit diluk yogisasikemo it nen, men yogokuka,
“Kat kebe ta nogo? Kebe Elia a?” yiluk yogokukama, at nen,
“An nebe et eti ʼbuk, ninat o,” yiluk, yogisasikemo, it nen, men yogokuka,
“Kalok, ap omanggi Allah wene yoknisasi dogowagaluk ayonggo ʼbiluk laʼbi wisigin yisike etnogo a?” yiluk yogokukama, at nen,
“Eti an degat o,” yiluk yogisasike. 22Esigit diluk yogisasikemo it nen, men yogokuka,
“Kalok, kat kebe ta nogo. Nit wene dikogo yoknisamo, it ap nit laʼbinani wagaka mende, nit nen wene omanggi yogisa luwok nen, kat kenggaerek kabok ninggit diluk yiligogon. Ninilu asuwak nen, yoknisan o,” yiluk yogokuka. 23Esigit diluk yogokukama, at Yohanes nen, men yogisasike,
“Ap Yesaya Allah wene yogisasi lagike mende etnogo nen, men yisike.
Ap omanggi o limo akoni dekma etoma ane nggokogo yisi dogolik,
Ninewe Endaganggok wisiginmo kolak motogo yako dogoni o, yiluk yisi dogogin, (Yes. 40:3)
yiluk yisikemo kolal mbalek werek etnogo, nebe anat o,” yiluk yogisasike.
24It ap waguka eti it ap Farisi mende nenat laʼbiya wagukama wagukasik nen, omanggi men yogokuka,
25“Kat nen,
An nebe, Allah nen akoni ndil ninabuwagaluk ayonggo ʼbiluk laʼbi wisigin yisike etnogo dek o. Nen, Elia degat o. Nen, Allah wene yoknisasi dogowagaluk laʼbi wisigin yisike etnogo degat o, yegen mende, nenaluk akon ima wusa ʼbiyaligogon?” yiluk yogokukama, 26at Yohanes nen, men yogisasike,
“An nen akoni ima wusa ʼbiyaligogoat mende, ap omanggi kit nen ebe didigidek mende kinakla mendek werek o. 27Ap eti ebe an nomborlik yabunggane wisigin mende, at ebe mondok nggok. An nebe elege eti paga, at iyok agut kerle warek mende eti an nen piyalusak erlok dek o,” yiluk yogisasike. 28Wene esigit diluk yisuka eti i Yordan aik ilibagangge, Yohanes nen akoni ima wusa ʼbiyasi lagikemo o endaga Betania dogolik nen yisuka.
Yohanes nen Yesus ebe yanggul isasike wene
29Wene esigit diluk yisukasik nen, noge yiluk, kubulukngge, at Yesus Yohanes oba wagonem ilenggen lakalok nen, wene men yogisasike,
“Allah anggo andomba eyak mende nit akoni agat oba yoma weyak kagarigogi mende nggorogo togot diyagin mende etnogo waga eli kinilenggen lakani. (Yes. 53:7; 1Kor. 5:7; 1Ptr. 1:19; Why. 7:9) 30Alebat wene an nen yokisasi dogolik,
Ap omanggi nomborlik wisigin mende, an awan endak lagidek werek nggorlek, at welagike eti paga, an nebe elege mende, arat mondok nggogat o, yiluk, abok yokisasi lagi etnogo, ebe waga etiat o. 31Alebat, at ebe an nonggodekma, at ebe ta salek, didigidek welagi mende, akoni Israel mende at eti inilu asuwagaluk ima wusa ʼbiyasi dogigiluk wagigi o,” yiluk yogisasike.
32Esigit diluk yogisasikesik nen, yabunggane at ilenggen kasike mende ʼbukakogo men yogisasike,
“Allah Agurengge sewe merpati yogik negen mbogot oba nen wusa wagasik Yesus oba labek werekma an nilenggen kigi o. 33Etinem, at ebe ta salek an nonggodek welagi mende, Allah nen an akoni ima wusa ʼbiyasi dogowagaluk laʼbani wagike mende etnogo nen yoknoko dogolik, men yoknikike,
An Nagurengge ap omanggi oba labi wusalok werekma kilenggen kegen kalok, at eti nen akoni ima wusa ʼbiyau kak, Nagurengge inoba wusa ʼbi wago dogogin o, yiluk, yoknikikemo nogo nen, 34at ebe an nilenggen dikogo kigirik nen didigi o. Esigit diluk didigirik, at eti Allah aʼbut eberogonat o, yiluk, abok kit ʼbukakogo yokisiligogo yi,” yiluk yogisasike.
At Yesus agoromi ebenggeranem omborlik laguka wene
35Esigit diluk yogisasikesik noge yiluk kubulukngge, at Yohanes ebe inom, agoromi at ane waganggo laguka mende inebe mbere inom, inomat etoma mende welaguka. 36Esigit diluk mendek werekma, at Yesus kolak eti paga lagaluk wagonem Yohanes ilenggen lakalok nen, men yogisasike,
“Allah anggo andomba eyak mende etnogo waga eli kinilenggen lakani o,” yiluk yogisasikemo, 37at agoromi inebe mbere eranogo at wene yogisasike mende inasuk kolkukasik nen, Yesus omborlik laguka. 38Esigit diluk omborlik lagonem Yesus nen ilenggen dagakogo ʼbiriyasi dogolik, men yogisasike,
“Nagoromi. Kit nena mende kweyarik wagap,” yiluk yogisasikemo, it nen, nit ninane paga,
“Wene yanggul nisiligogo mende newe,” yiluk yu kak, it inane paga,
“Rabi newe. Kat kago o nggoma werek,” yiluk yogokukama, 39at nen,
“Kit nen kinilenggen dombok kobagik nen witni o,” yiluk yogisasike. Esigit diluk yogisasikemo, it imbisagat lagukasik, o keyamngge jam 4 negen at welagikemo inilenggen kasukasik, inom welaguka.
40Nen, it ap inebe mbere Yohanes ane yisinem inasuk kolkukasik, Yesus omborlik laguka mende eta ap omanggi endaga Andreas, Simon Petrus etnogo agot. 41Yesus omborlik lagukasik inom welagukasik nen, at Andreas eti ndak ewe Simon etnogo kweyarik lagikesik, imbisak abuk agukasik nen, men yogokike,
“Mesias etnogo nit arat ninom abuk ago,” yiluk yogokike. (Mesias yisuka eti nit ninane paga Kristus Allah nen akoni ndil ninabuwagaluk laʼbi wisigin yisike etnogo yu kak, it inane paga Mesias yiligogi o.) 42Esigit diluk yogoko lagikesik, Yesus oba wolok wagikemo, at Yesus ilenggen at oba lakasikesik nen, men yogokike,
“Simon Yohanes aʼbut yi, nagot. Kat kendaga Kepas yisi dogowagaluk salkaki o,” yiluk yogokike. Esigit diluk yogokike eti nit yoma ninane paga endaga nggit yu kak, it Yunani inane paga Petrus yiligogi kak, Ibrani inane paga endaga Kepas yiluk salkike.
At Yesus nen Filipus Natanael imbisak inayonggo ʼbiyasike wene
43Esigit diluk yisikesik noge yiluk kubulukngge, at Yesus o Galilea dagi wisigiluk akla ambasikesik nen dagi wagonem, ap endaga Filipus imbisak abuk agukasik nen, men yogokike,
“Nagot. An nomborlik eme o,” yiluk ayonggo ʼbisikemo omborlik lagike. 44At Filipus eti Andreas, Petrus imbisak inago unggul o Betsaida omanggimo mende. 45Omborlik lago dogolik, at Filipus etnogo nen yabunggane Natanael kweyakikesik men yogokike,
“Natanael. At Musa nen wene Allah nen ninasuk wakike wene etnogo paga, ap omanggi abok yisi dogolik, kolal mbalkik, nen, it ap Allah wene yogisasi laguka mende yomenogo nen abok yisi dogolik, kolal mbalkik, kagakuka mende etnogo, nit arat kweyako. At ebe, Yusuf aʼbut o Nazaret mende Yesus at o,” yiluk yogokike mende, 46at Natanael nen, men yogokike,
“A. O Nazaret etoma nen pano mende omanggi erlok wisusak a? Erlok dek o,” yiluk yogokikemo, at Filipus nen,
“Kat kilenggen dombokogo ʼbikanok nen eme o,” yiluk yogokike. 47Esigit diluk yogokikemo, at Natanael Yesus oba wisigiluk wagonem, at Yesus ilenggen lakalok nen, at abok men yogisasike,
“Ap eti ebe Israel mende eberogonat mende. Ane mbere mondok yiligogo dek mende eti lakani o!” yiluk yogisasikemo, 48at Natanael nen,
“Iya! Newe. An kagarigogo mende nobabut ninggit diluk nen kilu agan o?” yiluk oba kinok waganggikemo, at Yesus nen, men yogokike,
“Nagot. Filipus nen kat awan waikigidek werek nggorlek, kat kebe o ara erloma korek welagan etnaga, an ndak nilenggen kiyigi o,” yiluk yogokikemo, 49at Natanael nen, men yogokike,
“Newe. Allah aʼbut nit Israel mende ninewe nggok Kendaga Nggok karat kiyigi o,” yiluk yogokike. 50Esigit diluk yogokikemo, at Yesus nen, men yogokike,
“An nen,
Kat o ara erloma korek welagan etnaga an ndak nilenggen kiyigi o, yiluk, yokigi eti paga kendainggen an noba ebeken a? Eti we ʼbugurlagat negen kagakonem niyegen mende, yabunggane nggokogo kagakonem kilenggen niyagin o,” yiluk yisikesik, 51yabunggane wene omanggi men yogisasike,
“Yabunggane mbogot nggagukogo it malaikat Allah nen yonggo laʼbiya wirigogo mende yomenogo an abat endak lasi wagagi etnogo noba wusa wagik dagagik kagakonem kinilenggen niyasi dogogun o, yiluk nane eberogonat yokisigi,” yiluk yogisasike.
ที่ได้เลือกล่าสุด:
Yohanes 1: DNA
เน้นข้อความ
แบ่งปัน
คัดลอก
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
