Ifyakutaŋga 9
9
1Popele ŵaLesa ŵalimusyucisye Noa neŵana ŵakwe, nekulaŵila kuli ŵo ati: Mufyaluluke, mufunuke, mufule pacalo. 2Popele ukumutineni nekumutondeni kukalukuli panama syonse isyapacalo, napafyuni fyonse ifyamwiulu; pamo nafyo fyonse ifilukukumana mumusili, nesaŵi lyonse ilyamucisiŵa, muminwe yenu filipelwe. 3Ifintu fyonse ifyenda ifyamweo fikalukuli fyakulya fyenu; koti nimbeu isilukumena namupeleni fyonse. 4Sombi iminefu ili nemweo waiyo, emilopa yaiyo, tesi mukailye-po. 5Kaŵili icine imilopa yenu, kumyeo yenu ŋkaifwatia; kuminwe yanama syonse ŋkaifwaila: nakaŵili nakuminwe yaŵantu, ekuminwe yaŵakwaŵo aŵantu ŵonse, eko ŋkaifwaile'myeo yaŵantu. 6Aŵantu ŵonse uwakupokomosye'milopa yamuntu, uyo imilopa yakwe eikapokomosiwa kuŵantu: pakuti ŵaLesa walileŋgele aŵantu necipasyo caŵo aŵene. 7Sombi mweŵo, ŋgamufunuke, mufule, mufyaluluke ukwakuti pacalo, mulukufulila-mo.
8Popele apo ŵaLesa ŵalilaŵile kuli Noa nakuŵana ŵakwe pamo nakwe, ati: 9Lomba neŵo, ŵoneni, ndukwikaliko'kulayana namweŵo neŵana ŵenu aŵapanuma penu; 10nefileŋgelwe fyonse ifyamweo ifili namweŵo, neŋombe, nenama isyapacalo syonse isili namweŵo; syonse isyakufuma mubwato, enama syonse isyapacalo. 11Popele ŋkekaliko'kulayana kwanji namweŵo; kaŵili ifyaminefu fyonse tesi fikonalwe liŵili kumenda aŵuloŵe; nakaŵili taŵukesa-po liŵili uŵuloŵe ubwakonale' calo capansi. 12Kaŵili ŵaLesa ati: Akesiŵilo akakulayana uko uku ndukulayana namweŵo nefileŋgelwe fyonse ifyamweo ifili nenu, ukulukwikele pafitentekwa ifyamuyayaya, nikaka: 13ndukuŵike' ŋkoŋgole yanji mwikumbi, popele ikalukuli kesiŵilo akakulayana kwanji necalo capansi. 14Popele lomba, ili ŋkalete'kumbi pacalo, iŋkoŋgolo ikaŵoneka mwikumbi, 15popele ŋkalaŋguluko'kulayana kwanji, uku ndayene namweŵo nefileŋgelwe fyonse ifyamweo ifyaminefu yonse; popele amenda tesi akaaluke liŵili ŵuloŵe mukonale'fyaminefu fyonse. 16Kaŵili iŋkoŋgolo ikalukuli mwikumbi; popele ŋkaiwona ati ndaŋguluke ukulayana ukwamuyayaya uku ŵalayene ŵaLesa nefileŋgelwe fyonse ifyamweo ifyaminefu yonse ifili pacalo capansi. 17Popele ŵaLesa ŵalilaŵile kuli Noa ati: Aka ekesiŵilo akakulayana uko uku njikalicile neŵo nefyaminefu fyonse ifili pacalo capansi.
18Lomba aŵana ŵakwe Noa aŵalalume, aŵafumine mubwato, ŵali niSyemi naYamu naYafeti: kaŵili Yamu ewisi Kanani. 19Aŵo ŵotatu eŵana ŵakwe Noa: kaŵili ŵo ŵaliputile pacalo conse icapansi.
20Popele apo Noa walitaticile ukucite'milimo yaŵulimi, nekulimba neŵala lyamifaina: 21naye alinwine imfaina nekupendwa; nekulala mwisema lyakwe uwakuŵulo'kulifimba. 22Popele Yamu, wisi Kanani, walibwene insoni syaŵawisi, nekuŵaŵula aŵakwaŵo ŵoŵilo aŵali posonde. 23Popele Syemi naYafeti ŵaliŵulile icaku fwala nekuciŵika pafifusi fyaŵo ŵoŵilo, nekwenda mamfutenuma, nekufimba-po pansoni syaŵawisiŵo; lomba amenso aŵo alilolele kunuma, naŵo taŵabwene-po insoni syaŵawisiŵo. 24Popele apo Noa waliŵucile kumfaina syakwe, nekwisiŵe'fyo ifi acitile kuli ye umwana wakwe umwanice-ŵantu.
25Naye ati:
Kanani afiŋgwe!
Akaŵe mupyunjisi waŵapyunjisi kuŵakwaŵo!
26Kaŵili naye ati:
Ŵacindeme ŵaYawe, Lesa wakwe Syemi!
Kanani ŋgaawe muntu wakwe!
27ŴaLesa ŵakusye Yafeti;
Akalukwikele mumasema akwe Syemi;
Kaŵili Kanani aŵe muntu wakwe!
28Popele ukufuma kumpindi yaŵuloŵe Noa waliikele nemweo imyaka imyanda itatu nemakumi asanu. 29Kaŵili insiku syakwe Noa syonse syalikumene imyaka imyanda isanu naine nemyaka amakumi asanu peulu: naye walifwile.
Айни замон обунашуда:
Ifyakutaŋga 9: AAL59
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Lamba Bible Version © United Bible Societies, 1959.