LOS HECHOS 4
4
Ndyaa lo'o ngu' ji'i̱ Pedro lo'o ji'i̱ Juan
1Tya ndu̱ Pedro lo'o Juan nchcui' lo'o ngu' ne' laa nu lo'o ngulaa sti jo'ó. Ya̱a̱ ngu' lo'o xu'na ngu' policía nu ndi'i̱ cua̱ ne' laa tonu, lo'o nu ngu' saduceo ya̱a̱. 2Ñasi̱' tsa ngu' bi', cha' nclyu'u Pedro lo'o Juan ji'i̱ ñati̱; nclyu'u ngu' cha' ñi'ya̱ lo'o ndyu'ú Jesucristo chaca quiya' lo'o ngujuii yu, jua'a̱ nga'a̱ cha' tyu'ú lcaa jyo'o ñati̱ chaca quiya' nde loo la. 3Li' ngulo ngu' cña cha' xñi ngu' policía ji'i̱ Pedro lo'o ji'i̱ Juan, cha' su'ba ngu' ji'i̱ ne' chcua̱ sca talya, cha' ngusi̱i̱ tsa lo'o ngujui ngu' bi' ji'i̱ ngu'. 4Tso'o tsa ndyuna quiña'a̱ ñati̱ cha' ji'i̱ ycui' Ndyosi nu ngulu'u ngu' bi' ji'i̱ ngu', hora ti ngusñi ngu' cha' bi'. Cua ntsu'u ca'yu mil tya'a nu qui'yu ti nu ngusñi cha' ji'i̱ Jesucristo li'.
5Ca chaca tsa̱ ndyu'u ti'i̱ ngu' nu laca loo ji'i̱ ngu' quichi̱ Jerusalén, lo'o ngu' cusu' ji'i̱ quichi̱, lo'o ñati̱ nu nclu'u cha' jo'ó ji'i̱ ngu' ne' laa. 6Nga'a̱ Anás nu ngua xu'na sti jo'ó, jua'a̱ nga'a̱ Caifás, lo'o Juan, lo'o Alejandro, nga'a̱ lcaa tya'a sti jo'ó nu laca loo. 7Ngulo ngu' ji'i̱ Pedro lo'o ji'i̱ Juan ne' chcua̱, ñaa lo'o ngu' ji'i̱ ngu' bi' ca slo ngu' nu laca loo. Li' nchcuane nu ngu' cusu' bi' ji'i̱ ngu':
―¿Ñi'ya̱ ngua'ni ma̱ cha' ndyaca tso'o yu quicha quiya' bi'? ―nacui̱ ngu' ji'i̱ ngu'―. ¿Tilaca laca nu nda chacuayá' cha' cua'ni ma̱ jo'o ji'i̱ yu?
8Li' tso'o tsa nguxtyucua Xtyi'i ycui' Ndyosi ji'i̱ Pedro, bi' cha' ngua ji'i̱ yu nguxacui̱ yu cha' ji'i̱ ngu' nu laca loo, jua'a̱ ji'i̱ ngu' cusu' bi':
―Cu'ma̱ ngu' cusu' nu laca loo ji'i̱ ya ―nacui̱ Pedro ji'i̱ ngu'―, 9cua nchcuane ma̱ ji'i̱ ya ni cha' laca nguxtyucua ya ji'i̱ yu re nu ngua quicha quiya' ―nacui̱―, ni cha' ngua'ni ya jo'o ji'i̱ yu re ―nacui̱―. 10Cua'a̱ jyaca̱ ma̱ xi lacua. Ta na' sca cha' lo'o ma̱, lo'o lcaa ngu' loyuu re, cha' ycui' Jesucristo laca nu ngua'ni cha' ndyaca tso'o nu quicha re. La cui' Jesús Nazaret nu ndyujuii ma̱ ji'i̱ lo crusi, bi' laca nu cua ngua'ni ycui' Ndyosi cha' ndyu'ú chaca quiya' lo'o ngujuii. Ycui' Jesús bi' nda chacuayá' cha' ngua tso'o quiya' yu re, bi' cha' ndu̱ yu ca nde tso'o ti yu juani. 11Ñi'ya̱ laca sca cuityi ni'i̱ nu nchcua̱a̱ sca quee tonu cha' ná tso'o nti' cuityi, masi stu'ba tsa ña'a̱ loo, jua'a̱ laca cu'ma̱ cha' ná ntaja'a̱ ma cuna ma̱ cha' nu cua nchcui' Jesús lo'o ma̱; ñi'ya̱ laca quee bi' nu cua nchcua̱a̱ ma̱ ji'i̱, jua'a̱ laca ycui' Jesús, cha' ná ndaquiya' ma̱ ji'i̱ yu tsiya' ti. Pana juani loo la laca nu Jesús bi', 12bi' cha' nchca ji'i̱ cua'ni lyaá ji'na ji'i̱ lcaa cha' cuxi nu ntsu'u ji'na; ná ntsu'u xa' ñati̱ tyucui ña'a̱ chalyuu nu nchca la ji'i̱, cha' sca ti ji'i̱ Jesús cua nda ycui' Ndyosi chacuayá' cua'ni cña bi'.
13Ndyuna ngu' cha' nu nchcui' Pedro, cuati ña'a̱ tsa ngu' ji'i̱ Pedro lo'o Juan:
―¿Ni cha' laca ná ntsi̱i̱ ngu' re nchcui' ngu' lo'o na? ―nacui̱ ngu'―. Si'i ñati̱ tlyu laca ngu', si'i ñati̱ nu ngua tsa'a̱ quityi laca ngu' re.
Li' ngua tii ngu' cusu' cha' cua nguta'a̱ ngu' lo'o Jesús. 14Nga'aa ngujui la cha' nu chcui' ngu' cusu' lo'o ngu' bi', cha' stu'ba ti ndu̱ ngu' lo'o yu nu ngua quicha bi'. 15Li' ngulo ngu' cña cha' tyu'u nu ca ta'a sna ti ngu' bi' nde liya', cha' cuaana ti chcui' ngu' cusu' lo'o tya'a ti ngu':
16―¿Ñi'ya̱ cua'ni na lo'o ngu' jua? ―nacui̱ ngu' cusu'―. Cua ngua'ni ngu' sca cha' tlyu, lo'o jlo ti' lcaa ngu' quichi̱ Jerusalén re cha' bi' ―nacui̱ ngu'―. Ná taca ñacui̱ na cha' cha' cuiñi laca bi' ―nacui̱ ngu'―. 17Pana ná tso'o si cuna xa' la ñati̱ cha' ji'i̱ Jesús; bi' cha' tso'o si xcutsi̱i̱ na ji'i̱ ngu' jua, cha' ná culu'u ngu' ji'i̱ xa' ñati̱ tilaca laca Jesucristo.
18Li' ngusi'ya ngu' cusu' ji'i̱ ngu' bi', cha' tya̱a̱ ngu' nde ni'i̱ chaca quiya'. Ngulo ngu' cusu' cña ji'i̱ ngu' bi' li':
―Nga'aa chcui' ma̱ tsiya' ti cha' ji'i̱ Jesucristo lo'o xa' ñati̱ ―nacui̱ ngu' cusu' ji'i̱ ngu'.
19Nguxacui̱ Pedro lo'o Juan cha' ji'i̱ nu ngu' cusu' bi' li':
―Ná cube tsa ti' cu'ma̱, ngu' cusu' ―nacui̱ ngu' ji'i̱ ngu' bi'―. ¿Ha ntsu'u cha' cua'ni ya cña nu culo cu'ma̱ ji'i̱ ya? ¿Ha ná tso'o la nti' cu'ma̱ cha' cua'ni ya cña nu ngulo ycui' Ndyosi ji'i̱ ya? 20Tso'o la nti' ya cha' cua'ni ya cña nu ngulo ycui' Ndyosi ji'i̱ ya; bi' cha' ná tye chca cha' chcui' ya lo'o ñati̱, lcaa cha' nu cua na'a̱ ya ji'i̱ Jesús, lo'o lcaa cha' nu cua ndyuna ya, cha' nu nchcui' yu lo'o ya.
21Ngua ti' ngu' cusu' xcutsi̱i̱ ngu' ji'i̱ Pedro lo'o Juan, bi' cha' chaca quiya' lye la nchcui' ngu' cusu' bi' lo'o ngu'. Lo'o li' nda ngu' cusu' chacuayá' cha' tyaa ngu' laja ti; ná ngua ji'i̱ ngu' nu laca loo xcube' ngu' ji'i̱ Pedro lo'o ji'i̱ Juan, cha' ndyutsi̱i̱ ngu' cusu' bi' ji'i̱ ngu' quichi̱, cha' nu ngu' quichi̱ ni, lye tsa ndya xlya'be ngu' ji'i̱ ycui' Ndyosi cha' ngua tso'o yu quicha quiya' bi'. 22Cua nteje tacui tu'ba yija̱ ntsu'u nu quicha bi' lo'o ngua'ni Ni cha' ndyaca tso'o yu.
Ca ta'a ñati̱ ji'i̱ Jesucristo nchcui' lo'o ycui' Ndyosi
23Nu lo'o nda ngu' cusu' chacuayá' cha' tyaa ngu' laja ti, li' hora ti ndu'u ngu' ndyaa ngu' ca slo nu ngu' tya'a ndya'a̱ ngu'. Nda Pedro lo'o Juan cha' lo'o lcaa tya'a ngu', lcaa ña'a̱ cha' nu nchcui' sti jo'ó, lcaa ña'a̱ cha' nu nda ngu' cusu' bi' lo'o ngu'. 24Lo'o cua ndyuna tya'a ngu' cha' bi', stu'ba ti nchcui' lcaa ngu' lo'o ycui' Ndyosi li':
―Ndyosi Sti ya ―nacui̱ ngu'―, nu'u̱ laca nu Xu'na ya, nu'u̱ laca nu laca loo la ―nacui̱ ngu'―. Cua ngüiñá nu'u̱ lcaa chalyuu, lo'o lcaa nde cua̱, lo'o lcaa tyujo'o; cua ngüiñá nu'u̱ lcaa na nu ntsu'u chalyuu ―nacui̱ ngu'―. 25Nda nu'u̱ Xtyi'i ycui' nu'u̱ ji'i̱ David jyo'o cusu' ji'i̱ ya, nu lo'o nguscua yu cha' cuentya jinu'u̱ lo quityi. Ndi'ya̱ nscua cha' lo quityi bi':
¿Ni cha' laca tyaala tsa ngu' xa' loyuu?
Nclyacua tsa ti' ngu' bi', cha' cua'ni cuxi ngu'; pana ná nchca ji'i̱ ngu' cua'ni ngu' cha' cuxi bi'.
26Cua ndyu'u ti'i̱ lcaa nu laca xu'na chalyuu re lo'o nu laca loo ji'i̱ lcaa quichi̱,
cha' cua'ni cuxi ngu' lo'o ycui' Ndyosi nu Xu'na na, jua'a̱ lo'o Cristo nu ngusubi ycui' Ndyosi ji'i̱.
27-28’Ñi'ya̱ nu cua nchcui' quityi jinu'u̱ nu nguscua jyo'o David sa'ni la bi' ―nacui̱ ngu' ji'i̱ ycui' Ndyosi Sti na―, jua'a̱ cua ndyu'u ti'i̱ ngu' nu laca loo ji'i̱ quichi̱ re cha' cua'ni cuxi ngu' lo'o Jesús Sñi' ycui' nu'u̱, masi xcui' lubii tsiya' ti cresiya ji'i̱ nu Jesús bi'; la cui' yu laca nu ngusubi nu'u̱ ji'i̱ ―nacui̱ ngu'―. Ndyu'u ti'i̱ Herodes lo'o Poncio Pilato, lo'o ngu' xa' loyuu, lo'o ngu' tya'a ya nde loyuu re. Li' ngua'ni ngu' lcaa cña nu nda nu'u̱ chacuayá' ji'i̱ ngu' bi' cha' cua'ni ngu'; ñi'ya̱ nu nda nu'u̱ cha' lo'o ngu' sa'ni, la cui' jua'a̱ ngua cha' yija̱ re ―nacui̱ ngu' ji'i̱ ycui' Ndyosi―. 29Xu'na ya, ña'a̱ nu'u̱ ca nde juani cha' tyaala tsa ngu' ña'a̱ ngu' ji'i̱ ya. Nti' ya cua'ni ya cña nu ngulo nu'u̱ ji'i̱ ya, bi' cha' xtyucua nu'u̱ ji'i̱ ya juani cha' caja juersa ji'i̱ ya, cha' ná cutsi̱i̱ ya nu lo'o ta ya cha' jinu'u̱ lo'o ñati̱ re ―nacui̱ ngu'―. 30Ta nu'u̱ chacuayá' cha' tyaca tso'o ngu' quicha; cua'ni Jesús Sñi' nu'u̱ nu xcui' lubii cresiya ji'i̱ quiña'a̱ tsa cña tonu, cha' jua'a̱ cube tsa ti' ngu' jinu'u̱. Tsa lo cua ti cha' chcui' ya juani.
31Lo'o cua ndye cha' nchcui' ngu' lo'o ycui' Ndyosi, li' ngüiña ni'i̱ su nga'a̱ ngu' bi'. La cui' hora jlo ti' ngu' cha' chañi cha' ndyanu Xtyi'i ycui' Ndyosi ne' cresiya ji'i̱ lcaa ngu' bi' li', bi' cha' nga'aa ndyutsi̱i̱ ngu' lo'o nda ngu' cha' ji'i̱ ycui' Ndyosi lo'o xa' ñati̱.
Lcaa na nu ntsu'u ji'i̱ ngu' ngusa'be ngu' ji'i̱ lo'o lcaa tya'a ngu'
32Se'i̱ ti ndi'i̱ lcaa ngu' nu ngusñi cha' ji'i̱ Jesucristo, stu'ba tsa ndu'ni lcaa ngu' bi' lo'o tya'a ngu', sca ti cha' ntsu'u tyiquee lcaa ngu'. Nda ngu' lcaa na nu ntsu'u ji'i̱ ngu' cha' xtyucua ji'i̱ lcaa ngu' lo'o tya'a ngu'. 33Lo'o nu ngu' nu ngua tsa'a̱ ji'i̱ Jesucristo tya clyo ni, tlyu tsa tyiquee ngu' nchcui' ngu' lo'o xa' ñati̱ cha' cua na'a̱ ycui' ca ngu' ji'i̱ Jesús nu Xu'na na lo'o cua ndyu'ú yu chaca quiya', nu lo'o ngujuii yu. Lo'o jua'a̱ nguxtyucua ycui' Ni ji'i̱ lcaa ngu' bi', cha' tso'o ti cua'ni ngu' lo'o lcaa ñati̱. 34Tso'o tsa tyiquee lcaa ngu' nu ntsu'u cha' ji'i̱ lo'o Jesucristo, bi' cha' ni sca tya'a ngu' nga'aa ntsu'u na nu lyiji ji'i̱ ngu', cha' lcaa ngu' nu ntsu'u ni'i̱ ji'i̱, lcaa nu ntsu'u xi yuu ji'i̱, ndyujui' ngu' na bi', cha' caja ñi'ya̱ tyiji̱ yu'ú ji'i̱ ngu' lo'o tya'a ngu'. 35Nda ngu' cñi bi' ji'i̱ ngu' nu ngua tsa'a̱ ji'i̱ Jesucristo tya clyo cha' tacha ngu' cha' bi' ji'i̱ tya'a ngu' li'. Ngu' bi' jlo ti' si ntsu'u na nu lyiji ji'i̱ xa' tya'a ngu'. 36La cui' jua'a̱ ngua'ni sca ngu' Chipre nu naa José. Ngu' Leví laca yu; ñi'ya̱ ndu'ni xirta cña ne' laa, jua'a̱ ndu'ni ngu' Leví bi' cña. Xa' xtañi ngusta nu tii tyucuaa tya'a ngu' bi' ji'i̱ nu José bi'; Bernabé ngua xtañi yu li', cha' tso'o tsa nxaala' yu tyiquee tya'a ñati̱. 37Ntsu'u xi yuu ji'i̱ yu bi'. Lo'o cua ndyujui' yu yuu bi' ji'i̱ xa' ñati̱, li' ñaa nu Bernabé bi', nda yu lcaa cñi caya' lo yuu bi' ji'i̱ ngu' nu ngua tsa'a̱ ji'i̱ Jesucristo tya clyo.
Айни замон обунашуда:
LOS HECHOS 4: cta
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.