LOS HECHOS 3
3
Ngua'ni ngu' jo'o ji'i̱ nu quicha quiya'
1Ngua sca tsa̱ ndyaa Pedro lo'o Juan ne' laa tonu. Hora cua sna nde ngusi̱i̱ ngua, bi' hora laca nu nchcui' ngu' loyuu bi' lo'o ycui' Ndyosi. 2Nga'a̱ sca nu quicha quiya' to' laa, ca ña'a̱ quicha quiya' yu nu lo'o ngula yu. Lcaa tsa̱ ndya'a̱ lo'o tya'a nu quicha bi' ji'i̱ yu to' laa tonu, nu to' laa nu nda'ya tsa ña'a̱ ndu'ni ngu' quichi̱ ji'i̱. Nga'a̱ yu to' laa ndijña yu msta̱ ji'i̱ ngu' nu lo'o lijya̱ ngu' to' laa li'. 3Cua na'a̱ nu quicha bi' ji'i̱ Pedro lo'o ji'i̱ Juan, lijya̱ ngu' cha' tsaa ngu' ne' laa, ngüijña yu msta̱ ji'i̱ ngu' bi' li'. 4Ndyatu̱ se'i̱ ti Pedro lo'o Juan cha' ña'a̱ tso'o ngu' ji'i̱ nu quicha bi'. Li' ndacha' Pedro ji'i̱ yu:
―Ña'a̱ nu'u̱ xi ji'i̱ ya ―nacui̱ Pedro ji'i̱ yu.
5Ndyuna tso'o yu, ngua ti' yu cha' cua ta ti ngu' msta̱ ji'i̱ yu.
6―Ná ntsu'u cñi jna' ―nacui̱ Pedro ji'i̱―, chaca lo cña ntsu'u jna' cha' cua'ni na' lo'o nu'u̱ ―nacui̱―. ¡Chacuayá' ji'i̱ Jesucristo Nazaret ni!, tyatu̱ nu'u̱ cha' tya'a̱ nu'u̱ ycui' ti.
7Li' ngusñi Pedro ya' yu tsu' cui̱ cha' xatu̱ ji'i̱ yu li'. Hora ti ngua tso'o quiya' yu, lo'o yane quiya' yu ngua tso'o. 8Tajua' tsa ndatu̱ yu bi', nguxana yu ndya'a̱ yu li'; ndyatí̱ yu ndyaa yu ne' laa tonu lo'o ngu' bi' li', ndya'a̱ yu ndyacua̱ yu cha' chaa tsa ti' yu, cha' ngua tso'o quiya' yu ndya'a̱ yu. Ngua'ni tlyu yu ji'i̱ ycui' Ndyosi cha' ngua'ni Ni cha' ngua tso'o quiya' yu. 9Cua na'a̱ lcaa ñati̱ ji'i̱ yu ne' laa, cha' tso'o ti nchca ndya'a̱ yu, cha' ndyu'ni tlyu yu ji'i̱ ycui' Ndyosi. 10Nslo ngu' ji'i̱ yu, cha' la cui' yu quicha quiya' nu cua nchca'a̱ to' laa bi' ndijña yu msta̱ ji'i̱ ngu' lcaa tsa̱ laca yu bi'. Ndube tsa ti' ngu' li', ngulacua tsa ti' ngu' cha' cua ngua tso'o quiya' yu.
Cha' nu nda Pedro lo'o quiña'a̱ ñati̱
11Ndu̱ Pedro lo'o Juan to' laa tonu su nacui̱ ngu' “Corredor ji'i̱ Salomón” li'. Lo'o nu qui'yu nu ngua tso'o quiya' bi' ni, ndu̱ yu lo'o ngu'; ña'a̱ ti nga'a̱ yu ngusñi yu ya' ngu' bi'. Li' quiña'a̱ tsa ngu' quichi̱ ngusna lijya̱ slo ngu' bi', cha' ndube tsa ti' nu ngu' quiña'a̱ bi' ñi'ya̱ nu ngua, cha' ngua tso'o quiya' yu quicha bi' li'. 12Cua na'a̱ Pedro ji'i̱ ñati̱ cha' quiña'a̱ tsa ngu' ndyalaa ngu' slo. Li' nchcui' Pedro lo'o ngu' quiña'a̱ bi' ñi'ya̱ nu ngua ji'i̱ nu quicha bi':
―Cu'ma̱ ngu' Israel ―nacui̱ Pedro ji'i̱ ngu'―, ¿ni cha' laca ndube tsa ti' ma̱? ―nacui̱―. Na ndu̱ ti ma̱ nxña'a̱ tsa ma̱ ji'i̱ ya ―nacui̱―. Ndube tsa ti' ma̱ ña'a̱ ma̱ na ca ndyaca ji'i̱ nu qui'yu re. Nacui̱ ma̱ cha' nchca tsa ji'i̱ ya; ngua'ni ya cha' ndyaca tso'o yu re xqui'ya cha' tso'o tsa cha' nu ndu'ni ya lcaa tsa̱, nti' ma̱. Si'i jua'a̱. Jesús laca nu ngua'ni cha' ndyaca tso'o quiya' yu re. 13Ycui' Ndyosi Sti na ni, la cui' Ni laca nu ngua'ni tlyu jyo'o cusu' ji'na ji'i̱ tya sa'ni la, masi jyo'o Abraham, masi jyo'o Isaac, masi jyo'o Jacob; lcaa jyo'o cusu' ji'na ngua'ni tlyu ngu' ji'i̱ ycui' Ndyosi bi'. Ycui' Ndyosi laca nu cua nda chacuayá' ji'i̱ Jesús Sñi' ycui' Ni cha' caca tlyu yu. Ntejeya' ma̱ ji'i̱ nu Jesús bi' tsubi' ti, ndyaa lo'o ma̱ ji'i̱ yu, ndyaa ma̱ ngusta ma̱ qui'ya ji'i̱ yu slo ngu' nu laca loo; nu lo'o ngua ti' gobernador Pilato cha' tyu'u Jesús laja ti, ná ntaja'a̱ ma̱ li'. 14Xcui' cha' tso'o ngua'ni nu Jesús bi', xcui' lubii cresiya ji'i̱ yu, lo'o ná nda ma̱ chacuayá' tyu'u yu laja ti li'. Ngüijña ma̱ chacuayá' ji'i̱ gobernador bi', cha' tyu'u laja ti chaca nu laca preso, nu cua ndyujuii ji'i̱ tyu̱u̱ tya'a ñati̱. 15Lo'o li' ngüijña ma̱ chacuayá' cujuii ngu' ji'i̱ Jesús, masi ycui' Jesús laca nu nda chalyuu nu ná nga'a̱ cha' tye ji'i̱ ñati̱. Li' ngua'ni ycui' Ndyosi cha' ndyu'ú Jesús chaca quiya' lo'o cua ngujuii yu. Jlo ti' ya cha' chañi laca cha' cua ndyu'ú yu chaca quiya', cha' cua na'a̱ ya ji'i̱ yu ña'a̱ lu'ú ti yu chaca quiya'.
16’Cua nslo ma̱ ji'i̱ nu qui'yu re nu ngua quicha yu nquicha' ―nacui̱ Pedro ji'i̱ ngu'―. Lo'o juani cua ngua'ni Jesús cha' ndyaca tso'o yu re, xqui'ya cha' jlya ti' ya ji'i̱ Jesús. Nchca tsa ji'i̱ nu Jesús bi' cua'ni cha' tyaca tso'o ñati̱; taca ña'a̱ ma̱ cha' chañi cha' bi', cha' ngua tso'o yu re juani.
17’Cu'ma̱ ngu' tya'a quichi̱ tyi na, jlo ti' na' cha' ná ngua tii ma̱ tilaca ngua Jesús nu lo'o ngüijña ma̱ chacuayá' cha' cujuii sendaru ji'i̱ yu. Lo'o jua'a̱ nu ngu' nu laca loo ji'i̱ ma̱, ná ngua tii ngu' na laca nu ngua'ni ngu', si cha' tso'o, si cha' cuxi ngua'ni ngu' li'. 18Cua laca cha' juani, la cui' cha' nu nda ycui' Ndyosi lo'o jyo'o cusu' ji'na sa'ni la, la cui' cha' nu nguscua ngu' lo quityi ji'i̱ ycui' Ndyosi. Quityi bi' nchcui' cha' ti'í tsa cua'ni quicha ngu' ji'i̱ Jesucristo; jua'a̱ cujuii ngu' ji'i̱ Jesús, la cui' Jesús nu nda ycui' Ndyosi ji'i̱ ya̱a̱ lo yuu chalyuu. 19Bi' cha' ntsu'u cha' ca tyuju'u ti' ma̱ ji'i̱ lcaa cha' cuxi nu ntsu'u tyiquee ma̱ ji'i̱, cuati jña ma̱ cha' clyu ti' ji'i̱ ycui' Ndyosi cha' cuityi̱ Ni lcaa cha' cuxi nu ngua'ni ma̱. Cua'ni nu Xu'na na cha' taca ca tso'o cresiya ji'i̱ ma̱ chaca quiya' li'. 20Cuati culo ycui' Ndyosi cña ji'i̱ Jesús cha' tya̱a̱ chaca quiya', la cui' Jesús nu ngusubi Ni ji'i̱ cha' caca nu Xu'na na. 21Ntsu'u cha' tyanu Jesús ca slo Ni nu juani ti; pana tiya' la, li' tyalaa sca tsa̱ lo'o chaca quiya' cua'ni cucui ycui' Ndyosi ji'i̱ lcaa na nu ntsu'u chalyuu, cha' li' tya̱a̱ Jesús. Jua'a̱ laca cha' nu nda ycui' Ndyosi lo'o jyo'o cusu' ji'na, cha' nu nguscua ngu' lo quityi cua sa'ni la. 22Tyempo bi' ndi'ya̱ nguscua jyo'o Moisés bi': “Ñi'ya̱ ngulo ycui' Ndyosi cña jna' cha' ta na' cha' ji'i̱ Ni lo'o ma̱, jua'a̱ culo nu Xu'na na cña ji'i̱ sca nu cusu' tya'a quichi̱ tyi na ca nde loo la. Taquiya' ma̱ lcaa cha' nu chcui' nu cusu' bi' lo'o ma̱. 23Si ntsu'u sca ñati̱ nu ná nti' taquiya' cha' nu ta nu cusu' bi', tye cha' ji'i̱ ñati̱ bi' li'; ná caca ñati̱ bi' ñati̱ ji'i̱ ycui' Ndyosi.” Jua'a̱ nscua cha' lo quityi bi'.
24’La cui' jua'a̱ nguscua lcaa jyo'o cusu' ji'na lo quityi ji'i̱ ycui' Ndyosi sa'ni la; masi quityi nu nguscua jyo'o Samuel, masi quityi nu nguscua lcaa jyo'o cusu' bi', nguscua ngu' cha' ca̱a̱ Jesucristo lo yuu chalyuu. Lo'o juani cua ngua cha' nu nchcui' ngu' bi'. 25Lcaa na laca na tya'a ñati̱ ji'i̱ jyo'o cusu' nu nguscua quityi ji'i̱ ycui' Ndyosi bi'; na cua ngüiñi cha' ji'i̱ Ni lo'o jyo'o cusu' ji'na bi', lo'o jua'a̱ ngua cha' ndyanu cha' bi' cuentya ji'na juani, cha' tya'a ñati̱ ji'i̱ jyo'o cusu' bi' laca na. Ndi'ya̱ nchcui' ycui' Ndyosi lo'o Abraham, nu jyo'o cusu' ji'na bi': “Sca ñati̱ tya'a nu'u̱ nu tyi'i̱ chalyuu nde loo la”, nacui̱ Ni ji'i̱, “bi' laca nu cua'ni cho'o cresiya ji'i̱ lcaa lo ñati̱ chalyuu”. 26Ngua'ni ycui' Ndyosi cha' ndyu'ú nu sca ti Sñi' ycui' ca chaca quiya' lo'o ngujuii yu, jua'a̱ ngulo Ni cña ji'i̱ yu cha' clyo ca̱a̱ yu ca slo na ca nde. Cua nti' Ni cha' ca lubii cresiya ji'na, bi' cha' cua ñaa Sñi' ycui' Ni cha' xtyucua ji'na, cha' caca culotsu' na ji'i̱ lcaa cha' cuxi nu ntsu'u ji'na.
Айни замон обунашуда:
LOS HECHOS 3: cta
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.