LOS HECHOS 2
2
Ndyalaa Xtyi'i ycui' Ndyosi
1Ngua tsa̱ ta'a Pentecostés, sca ta'a ji'i̱ ngu' judío, li' ndyu'u ti'i̱ lcaa ñati̱ nu ngusñi cha' ji'i̱ Jesucristo ca bi' se'i̱ ti. 2Hora ti nguañi nde ne' ni'i̱ su nga'a̱ ngu' ñi'ya̱ laca lo'o lye tsa ndyaca cui'i̱. Lcaa ngu' bi' ndyuna ngu' lo'o nguañi bi'. 3Li' ndu'u tucua tyu̱u̱ tya'a na ñi'ya̱ slu quii' ti ña'a̱, ngutacui bi' lo xlya hique lcaa ngu' bi'; 4jua'a̱ ngua lo'o ndyanu Xtyi'i ycui' Ndyosi ne' cresiya ji'i̱ lcaa ngu' bi'. Li' nguxana nchcui' ngu' cha'cña ji'i̱ xa' ñati̱, cha' Xtyi'i ycui' Ndyosi ngua'ni lo'o ngu' cha' ngua ji'i̱ ngu' li'.
5Tyempo nu ndyaca ta'a bi' nde quichi̱ Jerusalén ndi'i̱ quiña'a̱ tsa ngu' judío; ngutu'u ngu' lijya̱ ngu' tyu̱u̱ quichi̱ loyuu tyijyu', cha' ndu'ni tlyu ngu' bi' ji'i̱ ycui' Ndyosi. 6Li' nguxana ndyu'u ti'i̱ ngu' bi' ca su ndañi cha' bi'. Ná ngua cuayá' ti' ngu' bi' tsiya' ti ñi'ya̱ nu ngua, cha' lcaa ngu' tyijyu' ndyuna ngu' cha' nchcui' nu ñati̱ ji'i̱ Jesucristo bi' cha'cña ji'i̱ ycui' ca ngu' tyijyu' bi'. 7Ndube tsa ti' ngu' tyijyu' bi' li', ngulacua tsa ti' ngu' bi':
―¿Ha si'i xcui' ngu' quichi̱ su cuentya Galilea laca ngu' jua? ―nacui̱ ngu' bi' lo'o tya'a ngu'―. 8¿Ni cha' laca ndyuna na nchcui' ngu' jua cha'cña ji'na? ―nacui̱ ngu'―. 9Quiña'a̱ tsa quichi̱ ndu'u na: laca na ngu' Partia, ngu' Media, ngu' Elam, ngu' Mesopotamia, ngu' Judea, ngu' Capadocia, ngu' Ponto, ngu' loyuu su cuentya Asia, 10ngu' Frigia, ngu' Panfilia, ngu' Egipto, ngu' Africa nu ndi'i̱ nde loo la ji'i̱ quichi̱ Cirene; lo'o jua'a̱ ngu' romano, lo'o ndi'i̱ ngu' bi' ca nde ―nacui̱ ngu' bi'―. Ntsu'u nu laca sñi' ngu' judío tya'a na, lo'o jua'a̱ ntsu'u xa' ngu' romano nu stu'ba ti ndyu'ni tlyu ji'i̱ ycui' Ni lo'o na. 11Lo'o jua'a̱ ndi'i̱ ngu' Creta, ndi'i̱ ngu' Arabia. Pana lcaa na lo'o tya'a na ndyuna na nchcui' ngu' cha'cña ji'na, stu'ba ti ndyuna na lcaa ña'a̱ cha' tlyu nu ngua'ni ycui' Ndyosi.
12Ndube tsa ti' lcaa ngu' bi'. Ná jlo ti' ngu' tsiya' ti na ca ngua. Tya nchcui' ngu' lo'o tya'a ngu' li':
―¿Na laca ndyaca re? ―nacui̱ ngu' bi'.
13Lo'o jua'a̱ nxtyí lo'o xa' la ñati̱ ji'i̱ ñati̱ ji'i̱ Jesucristo bi':
―Cu'bi tsa ngu' jua cha' nchcui' ngu' jua'a̱ ―nacui̱ ngu'.
Cha' nu nchcui' Pedro lo'o ngu'
14Lo'o li' ndu̱ Pedro lo'o nu tii chaca tya'a ñati̱ bi', cui̱i̱ nchcui' yu lo'o nu ngu' quiña'a̱ bi' li':
―Ngu' cusu' cu'ma̱, ngu' judío ―nacui̱ Pedro―, lo'o lcaa cu'ma̱ nu ndi'i̱ nde quichi̱ Jerusalén juani ―nacui̱ yu―, cua'a̱ jyaca̱ ma̱ ji'i̱ cha' nu chcui' na' lo'o ma̱ ―nacui̱ yu―. 15Cu'bi cuare, nti' ma̱; pana si'i na cu'bi cuare, cha' hora cua caa nde tlya ti laca juani. 16Ndi'ya̱ ndyaca cha' re: na cua ngua cha' tlyu bi', ñi'ya̱ nu nchcui' cha' nu cua nguscua jyo'o cusu' Joel nu ngua sa'ni la. Ndi'ya̱ nchcui' quityi bi':
17Tyempo nde loo la lo'o cua tye ti chalyuu, nacui̱ ycui' Ndyosi,
ta na' Xtyi'i ycui' na' cha' tyanu ne' cresiya ji'i̱ ñati̱ chalyuu, nacui̱ Ni.
Li' ta sñi' ma̱ cha' jna' lo'o ngu'.
Lo'o jua'a̱ ña'a̱ ngu' cuañi' cha' tlyu nu ndu'ni ycui' Ni,
culu'u na' cha' tlyu bi' ji'i̱ ngu';
lo'o jua'a̱ chcui' xcalá ngu' cusu'.
18Ta na' Xtyi'i ycui' na' cha' tyanu ne' cresiya ji'i̱ lcaa ñati̱ nu ndu'ni cña nu nclyo na' ji'i̱ ngu' bi', nacui̱ Ni.
Li' chcui' ñati̱ bi' lcaa cha' nu ta na' lo'o ngu' cha' chcui' ngu'.
19Cua'ni na' cha' tlyu nde cua̱,
lo'o jua'a̱ cua'ni na' cha' tlyu nde lo yuu;
lye tyalú tañi li', tyaqui̱ quii' tonu, xcui' snii caca nde lo yuu, nacui̱ Ni.
20Na' laca̱ ycui' nu Xu'na ma̱;
cua tyalaa ti tsa̱ lo'o cua'ni cuayá' na' ji'i̱ lcaa ñati̱ chalyuu.
Cua'ni na' cha' tyacu̱' lo xee cuichaa,
cha' nga'a ña'a̱ caca co', ñi'ya̱ tañi ña'a̱, nacui̱ Ni.
Sca tsa̱ tlyu tsa caca bi', liñi caca cuayá' ti' lcaa ñati̱ chalyuu lo'o tyalaa tsa̱ bi'.
21Pana cua'ni lyaá na' ji'i̱ lcaa ñati̱ nu ndijña cha' clyu ti' 'na.
Jua'a̱ nchcui' ycui' Ndyosi. Nguscua jyo'o Joel cha' bi' lo quityi ―nacui̱ Pedro―.
22’Cu'ma̱ ngu' Israel ―nacui̱ yu―, cua'a̱ jyaca̱ ma̱ ji'i̱ cha' nu chcui' na' lo'o ma̱ juani: Ngu' Nazaret laca Jesús. Nguxtyucua ycui' Ni ji'i̱ yu lo'o ngua'ni yu xcui' cña tonu ca slo ma̱. Ngulacua tsa ti' ma̱ lo'o na'a̱ ma̱ cña tonu bi', lo'o ngua cuayá' ti' ma̱ cha' xcui' cña ji'i̱ ycui' Ndyosi ngua. 23Cua sa'ni la cua jlo ti' ycui' Ndyosi, tya li' cua nchcui' Ni ñi'ya̱ nu caca ji'i̱ Jesús. Ndacha' lo Ni ji'i̱ ngu' cha' cujuii ñati̱ cuxi ji'i̱ ycui' Jesús. Jua'a̱ ngua li'; tsubi' ti ngusñi ma̱ ji'i̱ yu, ngujui'i̱ ca'a̱ ma̱ ji'i̱ yu lo crusi. Cua ndyujuii ma̱ ji'i̱ yu lo'o nda ma̱ cña ji'i̱ ñati̱ cuxi bi', cha' cua ngua'ni ngu' cña cuxi bi' cuentya ji'i̱ ma̱, ñi'ya̱ nu nacui̱ Ni cha' caca. 24Pana ná nscua cha' tyanu Jesús ne' cuaá ña'a̱ jyo'o ti yu, bi' cha' ngua'ni ycui' Ndyosi Sti yu cha' ndyu'ú yu chaca quiya'. 25Cua ntsu'u chaca cha' nu nguscua jyo'o cusu' David sa'ni la nu nchcui' cuentya ji'i̱ Jesús ndi'ya̱:
Xu'na, nacui̱ yu, xcui' ndya'a̱ nu'u̱ lo'o na';
cacua tsa nga'a̱ nu'u̱ slo na', cha' caca tlyu tyiquee na' lo'o nxtyucua nu'u̱ jna';
26bi' cha' tso'o tsa ntsu'u tyiquee na', jua'a̱ tso'o tsa nchcui' na' xqui'ya nu'u̱, cha' chaa tsa ti' na'.
Ti̱ ti ndi'i̱ tyucui ña'a̱ na' xqui'ya cha' ndi'i̱ nu'u̱ cha' ña'a̱si̱i̱ nu'u̱ jna'.
27Ná tyanu cresiya jna' su ndi'i̱ jyo'o, xqui'ya cha' ná ta nu'u̱ chacuayá' catsu' cuaña' na' jua'a̱ ti, cha' ntsu'u tsa tyiquee nu'u̱ ña'a̱ nu'u̱ jna';
28cua ngulu'u nu'u̱ tyucui̱i̱ su tsa'a na' cha' tyi'i̱ na' ca slo nu'u̱.
Tso'o tsa ntsu'u tyiquee na' cha' stu'ba ti tyi'i̱ na' lo'o nu'u̱ li'.
Jua'a̱ nguscua jyo'o David lo quityi.
29’Pana jlo ti' cu'ma̱ cha' chañi cha' ngujuii David, nu jyo'o cusu' ji'na ―nacui̱ Pedro―. Sa'ni tsa ngujuii bi'; nguxatsi' ngu' ji'i̱ li', lo'o jua'a̱ tya ntsiya cuaá ji'i̱ jyo'o bi' juani. 30Tu'ba ji'i̱ ycui' Ndyosi ngua jyo'o David bi'; jlo ti' yu cha' nda Ni cha' liñi lo'o yu lo'o nchcui' Ni cha' sca ñati̱ tya'a nati̱ ji'i̱ ycui' yu cala nde loo la, bi' caca nu Cristo. Caca Cristo bi' rey, ñi'ya̱ lo'o ngua ycui' David rey. 31Ngua cuayá' ti' yu tya sa'ni la cha' ntsu'u cha' tyu'ú nu Cristo bi' chaca quiya' lo'o cua ngujuii, bi' cha' nchcui' yu cha' ná tyanu cresiya ji'i̱ Cristo su ndi'i̱ jyo'o, ná catsu' cuaña' Cristo li'. 32Cha' liñi laca cha' ngua'ni ycui' Ndyosi cha' ndyu'ú Jesús chaca quiya' ―nacui̱ Pedro―. Liñi nda ya cha' lo'o cu'ma̱, cha' cua na'a̱ ya ji'i̱ yu chaca quiya' cha' lu'ú yu. 33Li' ñaa ycui' Ndyosi ya̱qui'ya Ni ji'i̱ Jesús cha' tyaa yu ca slo ycui' Ni. Juani ndi'i̱ Jesús nde la'a tsu' cui̱ su tlyu ca su ntucua ycui' Ndyosi. Cua nda ycui' Ndyosi Sti yu Xtyi'i ycui' Ni ji'i̱ Jesús, lo'o nu juani cua nda Jesús Xtyi'i ycui' Ni cha' tyalaa nde chalyuu. Lcaa cha' nu cua ndyuna ma̱, lcaa cha' nu cua na'a̱ ma̱ tsa̱ juani, bi' laca cña nu ngua'ni ycui' Jesús. 34Ná ndyaa jyo'o David ña'a̱ lu'ú ti ca slo ycui' Ndyosi, bi' cha' jlo ti' na cha' si'i cha' ji'i̱ ycui' ca yu nchcui' cha' nu nguscua nu David bi' lo quityi, nu ndi'ya̱ nchcui':
Cua nchcui' ycui' Ndyosi lo'o nu Xu'na na':
“Tyucua nu'u̱ la'a tsu' cui̱ jna'.
35Caca nu'u̱ loo ji'i̱ lcaa ñati̱ nu laca tya'a cusu̱u̱ nu'u̱”, nacui̱ ycui' Ndyosi ji'i̱.
Jua'a̱ nguscua jyo'o David lo quityi ―nacui̱ Pedro―.
36’Ntsu'u sca cha' ji'i̱ ycui' Jesús nu nga'a̱ cha' ca cuayá' ti' lcaa na nu laca na ngu' Israel: La cui' Jesús nu ngujui'i̱ ca'a̱ na ji'i̱ lo crusi cha' cujuii na ji'i̱, la cui' yu bi', cua nda ycui' Ndyosi chacuayá' ji'i̱ yu cha' caca yu Xu'na na, cha' laca yu nu Cristo.
37Lo'o ndyuna ngu' cha' nu nchcui' Pedro, ntyuju'u tsa ti' ngu' li'. Nchcuane ngu' ji'i̱ Pedro lo'o ji'i̱ lcaa ngu' nu ngua tsa'a̱ ji'i̱ Jesús tya clyo:
―¿Ñi'ya̱ cua'ni ya juani? ―nacui̱ ngu' ji'i̱ ngu' bi'.
38―Tso'o si caca tyuju'u ti' ma̱ ji'i̱ cha' cuxi, lcaa cha' cuxi nu ntsu'u tyiquee ma̱ xtyanu ma̱ ji'i̱ li' ―nacui̱ Pedro ji'i̱ ngu'―. Lo'o jua'a̱ tyucuatya ngu' ji'i̱ ma̱ chacuayá' ji'i̱ Jesús li'. Cuityi̱ Ni lcaa qui'ya nu ntsu'u ji'i̱ ma̱ li', jua'a̱ ta Ni Xtyi'i ycui' Ni cha' tyanu Ni ne' cresiya ji'i̱ ma̱. 39Liñi tsa cha' nu nda ycui' Ndyosi lo'o ma̱ lo'o nchcui' Ni cha' tyanu Xtyi'i ycui' Ni ne' cresiya ji'i̱ ma̱, lo'o ne' cresiya ji'i̱ sñi' ma̱ tyanu Xtyi'i ycui' Ni, lo'o ne' cresiya ji'i̱ ngu' nu ndi'i̱ tyijyu' tyanu Ni; tyanu Ni ne' cresiya ji'i̱ lcaa ñati̱ nu cua ngusubi ycui' Ndyosi ji'i̱.
40Tya quiña'a̱ la cha' nchcui' Pedro lo'o ngu' li'. Liñi tsa ngulo yu cña ji'i̱ ngu':
―Xtyanu ma̱ ji'i̱ ñati̱ nu ndu'ni xcui' cha' cuxi ―nacui̱ yu ji'i̱ ngu'.
41Lcaa ngu' nu jlya ti' cha' nu nchcui' Pedro lo'o ngu', ndyaa ngu' bi' cha' tyucuatya ngu' ji'i̱ ngu' bi' chacuayá' ji'i̱ Jesús. La cui' tsa̱ bi' nguxana sna mil tya'a ñati̱ ngusñi ngu' cha' ji'i̱ Jesucristo. 42Ndyuna tso'o lcaa ngu' bi' cha' nu ngulu'u ngu' nu ngua tsa'a̱ ji'i̱ Jesucristo tya clyo ji'i̱ ngu'. Tso'o ntsu'u tyiquee ngu' bi', stu'ba ti ndi'i̱ ngu', lu'ba ti nchcui' ngu' lo'o ycui' Ndyosi; stu'ba ti ndacu ngu', stu'ba ti ndyu'ni tlyu lcaa ngu' bi' ji'i̱ Jesucristo.
Ndi'ya̱ ngua'ni ñati̱ ji'i̱ Jesucristo clyo
43Ndube tsa ti' lcaa ngu' quichi̱ bi' ji'i̱ cña nu ndyu'ni ycui' Ndyosi, cha' cua quiña'a̱ cña tonu ngua'ni ngu' nu ngua tsa'a̱ ji'i̱ Jesucristo tya clyo chacuayá' ji'i̱ Ni. 44Lcaa ngu' stu'ba ti ndi'i̱ ngu' lo'o tya'a ngu' nu ntsu'u cha' ji'i̱ Jesucristo, nda ngu' cha' tso'o nu ntsu'u ji'i̱ ngu' cha' tacha ngu' ji'i̱ tya'a ngu'; 45ndyujui' ngu' lcaa na nu ntsu'u ji'i̱ ngu', cha' caja cñi nu tacha ngu' ji'i̱ tya'a ngu' nu ná ntsu'u cha' tso'o ji'i̱ tsiya' ti. 46Lcaa tsa̱ ndyu'u ti'i̱ ngu' bi' ne' laa tonu ji'i̱ ngu' judío, jua'a̱ stu'ba ti ndacu ngu' bi' to' tyi tya'a ngu'. Tso'o tsa ntsu'u tyiquee ngu' bi', tso'o ti nchcui' ngu' lo'o tya'a ngu', 47cha' ndu'ni tlyu ngu' bi' ji'i̱ ycui' Ndyosi. Tso'o nchcui' lcaa ñati̱ quichi̱ ji'i̱ ngu' bi', jua'a̱ lcaa tsa̱ quiña'a̱ la ñati̱ ngusñi ngu' cha' ji'i̱ Jesucristo; ndyu'ni lyaá Ni ji'i̱ ngu' bi' li'. Bi' cha' quiña'a̱ la ñati̱ ndyatu̱ nu ndyu'u ti'i̱ lo'o taju ñati̱ ji'i̱ Jesucristo bi' li'.
Айни замон обунашуда:
LOS HECHOS 2: cta
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.