LOS HECHOS 5
5
Ñilo'o Ananías lo'o Safira ji'i̱ ycui' Ndyosi
1Lo'o jua'a̱ ntsu'u chaca yu nu naa Ananías, lo'o clyo'o yu naa Safira. Ndyujui' ngu' xi yuu ji'i̱ ngu' ji'i̱ xa' ñati̱. 2Li' ndyaa nu qui'yu bi' slo nu tii tyucuaa tya'a ngu' nu ngua tsa'a̱ ji'i̱ Jesucristo tya clyo; pana tsa cla'be ti cñi nda yu ji'i̱ ngu', cha' cuaana ti nguxco'o yu nu chaca tya cla'be cñi bi' toni'i̱ ji'i̱ yu. Lo'o jua'a̱ ngua cuayá' ti' clyo'o yu lcaa ña'a̱ nu ngua'ni yu bi'. 3Nchcui' Pedro lo'o yu li':
―Ananías ―nacui̱―, ¿na laca ngua hi̱? ¿Ni cha' laca nda nu'u̱ chacuayá' ji'i̱ nu xña'a̱ nu naa Satanás cha' caca loo ne' cresiya jinu'u̱? Bi' laca nu ngua'ni cha' nguñilo'o nu'u̱ ji'i̱ Xtyi'i ycui' Ndyosi ―nacui̱ Pedro ji'i̱ yu bi'―. Nacui̱ nu'u̱ cha' nde laca lcaa cñi nu ngujui jinu'u̱ lo yuu bi', lo'o si'i lcaa cñi laca re. 4Yuu jinu'u̱ laca bi' nquicha', lo'o jua'a̱ cua ntsu'u chacuayá' jinu'u̱ cua'ni na laca nu nti' nu'u̱ cua'ni lo'o cñi bi'. ¿Ni cha' laca nguñilo'o nu'u̱ ji'i̱ ya lacua? Ná liñi cha' nu ngua'ni nu'u̱, cha' nu cua nacui̱ nu'u̱ cha' lcaa cñi bi' laca re, lo'o si'i jua'a̱ laca bi'. Si'i lo'o ñati̱ ti nda nu'u̱ cha' cuiñi bi', lo'o ycui' Ndyosi cua nda nu'u̱ cha' cuiñi bi' ―nacui̱ Pedro ji'i̱ nu qui'yu bi'.
5Lo'o ndyuna Ananías cha' bi', li' nclyú yu lo yuu. Na nclyú ti yu, ngujuii yu li'. Ndyutsi̱i̱ tsa lcaa ngu' nu ndi'i̱ cacua ti li'. 6Yala ti lijya̱ xi ngu' cuañi', ngüixi̱i̱ ngu' late' chu̱' jyo'o bi', ngulo ngu' ji'i̱ nde liya'. Li' ndyaa lo'o ngu' ji'i̱, ndyaa cha' tyatsi'.
7Cua nteje tacui sna hora lo'o ña̱a̱ clyo'o jyo'o bi' li', pana ná jlo ti' ma' na laca ngua ji'i̱ jyo'o bi'. 8Li' nchcui' Pedro lo'o nu cuna'a̱ bi':
―Cacha' nu'u̱ jna' ―nacui̱ ji'i̱―, ¿ha tsa lo cua ti cñi nda ngu' ji'i̱ ma̱ cha' ndyujui' ma̱ yuu bi' ji'i̱ ngu'?
―Chañi ―nacui̱ nu cuna'a̱ bi'―, la cui' tsa lo cua ti cñi nda ngu' ji'i̱ ya.
9―¿Ni cha' laca ngua'ni ma̱ jua'a̱? ―nacui̱ Pedro li'―. Tyucuaa ma̱, cua ngua'ni stu'ba ma̱ cha' lo'o tya'a ma̱ cha' cua'ni cuayá' ma̱ ji'i̱ Xtyi'i ycui' Ndyosi, si jlo ti' Ni, si ná jlo ti' Ni cha' cuiñi ma̱ ―nacui̱―. Cua'a̱ jyaca̱ xi ñi'ya̱ ndañi quiya' ngu' cuañi' nu lijya̱ ndyaa nguxatsi' ngu' ji'i̱ jyo'o clyo'o nu'u̱. La cui' jua'a̱ tsaa lo'o ngu' jinu'u̱ juani.
10Hora ti nclyú nu cuna'a̱ bi' lo yuu; slo ti Pedro nclyú, ngujuii ca li'. Li' ña̱a̱ ngu' cuañi' na'a̱ ngu' cha' lo'o nu cuna'a̱ bi' ngujuii. Hora ti ndyi'ya ngu' ji'i̱ jyo'o ma', ndyaa lo'o ngu' ji'i̱, ndyaa cha' tyatsi' sii' ti cuaá su nguatsi' jyo'o clyo'o; ca bi' nguxatsi' ngu' ji'i̱. 11Ndyutsi̱i̱ tsa lcaa ngu' nu ngusñi cha' ji'i̱ Jesucristo cha' jua'a̱ ngua ji'i̱ jyo'o Ananías lo'o clyo'o yu, lo'o jua'a̱ ndyutsi̱i̱ tsa lcaa ñati̱ nu ndyuna cha' bi'.
Ngua'ni ngu' tyu̱u̱ tya'a cha' tlyu chacuayá' ji'i̱ ycui' Ndyosi
12Quiña'a̱ tsa chacuayá' nda ycui' Ndyosi ji'i̱ ngu' nu ngua tsa'a̱ ji'i̱ Jesucristo tya clyo, bi' cha' ngua'ni ngu' quiña'a̱ tsa cha' tlyu ca su ndi'i̱ ngu' quichi̱. Ngulacua tsa ti' ngu' quichi̱ xqui'ya cña tlyu bi'. Lcaa ngu' nu ngusñi cha' ji'i̱ Jesucristo ni, ndyu'u ti'i̱ ngu' ca su nacui̱ ngu': “Corredor ji'i̱ Salomón”, cha' stu'ba ti ntsu'u tyiquee lcaa ngu' bi'; ca to' laa tonu laca corredor bi'. 13Xa' la ngu' quichi̱ ni, ndyutsi̱i̱ tsa ngu'; ná ndya'a̱ ngu' slo ngu' bi', masi tso'o tsa nchcui' ngu' ji'i̱ lcaa ñati̱ nu ntsu'u cha' ji'i̱ lo'o Jesucristo. 14Li' ndyuna tyu̱u̱ tya'a ñati̱ cha' ji'i̱ ycui' Jesucristo nu Xu'na na, jlya ti' ngu' cha' bi' li'. Stu'ba ti ngusñi ngu' cha' bi', masi nu cuna'a̱, masi nu qui'yu, ngusñi ngu' cha' ji'i̱ ycui' nu Xu'na na. 15Li' ndyaa ngu' quichi̱ bi', ndyaa qui'ya ngu' ji'i̱ ngu' quicha nu ntsiya slo ngu'. Li' ngusta ngu' ji'i̱ ngu' quicha bi' lo jaa', masi lo qui'ña, cha' tsaa lo'o ngu' ji'i̱ ngu' quicha bi' ca to' calle su tyeje tacui Pedro. Ngua ti' ngu' masi cua'a̱ ti tyacala' nu nda Pedro loo ngu' quicha bi', nu lo'o nteje tacui yu. Tyaca tso'o nu quicha bi' li'. 16Nguañi cha' bi' lcaa quichi̱ cacua ti, lcaa su ndi'i̱ ñati̱ quicha; bi' cha' ñaa lo'o ngu' ji'i̱ lcaa ngu' quicha nu ntsu'u slo ngu', lo'o ji'i̱ ngu' nu cua ngusñi cui'i̱ cuxi ji'i̱. Ñaa lo'o ngu' ji'i̱ ngu' quicha bi' nde quichi̱ Jerusalén slo Pedro, lo'o jua'a̱ ngua tso'o lcaa nu ngu' quicha bi' li'.
Nchcube' ngu' ji'i̱ Pedro lo'o Juan
17Ñasi̱' tsa xu'na sti jo'ó ña'a̱ ji'i̱ ngu' nu ngua tsa'a̱ ji'i̱ Jesús tya clyo, xqui'ya cha' quiña'a̱ tsa cña tlyu ndyu'ni ngu' cuentya ji'i̱ Jesús. Lo'o jua'a̱ ngu' saduceo nu tya'a ndya'a̱ sti jo'ó ni, ti'í ti' ngu' ña'a̱ ngu' ji'i̱ ngu' bi'. 18Bi' cha' ngulo ngu' cña cha' xñi ngu' ji'i̱ ca ta'a nu tii tyucuaa tya'a ngu' bi', cha' tsaa lo'o ngu' ji'i̱ ngu' bi' ne' chcua̱. 19Nu lo'o ngua talya, li' ndyalaa sca xca̱ ji'i̱ ycui' Ndyosi, ngusaala toni'i̱ su ntsu'u ngu' ne' chcua̱ cha' tyu'u ngu' nde liya'. Lo'o cua ngutu'u ngu' nde liya', li' nchcui' xca̱ bi' lo'o ngu':
20―Yaa clya ma̱ ―nacui̱―, yaa ma̱ ne' laa tonu jua cha' culu'u ma̱ cha' ji'i̱ Jesús ji'i̱ tya'a ñati̱ ma̱ ―nacui̱―. Ta ma̱ cha' lo'o ngu' ñi'ya̱ caca cucui cresiya ji'i̱ ngu' xqui'ya Jesucristo.
21Ndaquiya' ngu' bi' ji'i̱ cha' nu nchcui' xca̱ bi' lo'o ngu'; bi' cha' lo'o nguxee, li' ndyatí̱ ngu' bi' ndyaa ngu' ne' laa tonu cha' culu'u ngu' cha' bi' ji'i̱ ñati̱ nu ndi'i̱ ca bi'.
Li' ndyaa xu'na sti jo'ó lo'o ngu' tya'a ndya'a̱ yu, ngulo yu cña cha' tyu'u ti'i̱ lcaa ngu' cusu', lcaa nu laca loo ji'i̱ ngu' Israel. Cuati ngulo yu cña cha' tsaa ngu', tsaa culo ngu' ji'i̱ ngu' nu ntsu'u ne' chcua̱ bi', cha' tya̱a̱ ngu' bi' slo yu. 22Ndyaa ngu' li'; pana nu lo'o ndyalaa ngu' toni'i̱ chcua̱, nga'aa tucui ntsu'u ne' chcua̱ bi'. Hora ti nguxtyu̱u̱ ngu' ñaa ngu' slo nu ngu' cusu' bi'.
23―Ndyalaa ya toni'i̱ chcua̱ ―nacui̱ ngu' ji'i̱ ngu' nu laca loo bi'―. Nga'a̱ ya' toni'i̱ chcua̱ bi', lo'o ña'a̱ ti tya ndi'i̱ ngu' cua̱ ―nacui̱―. Pana nu lo'o ngusaala ya toni'i̱ chcua̱, nga'aa tucui ndi'i̱ ne' chcua̱ na'a̱ ya li'.
24Ngulacua tsa ti' sti jo'ó lo'o nu laca loo ji'i̱ ngu' policía nu nga'a̱ cua̱, nu lo'o ndyuna ngu' cha' nga'aa ntsu'u preso bi'. 25Li' ndyalaa sca ñati̱ slo ngu':
―¿Ha ná jlo ti' ma̱ mala ndi'i̱ ngu' nu ngusu'ba ma̱ ji'i̱ ne' chcua̱ la caa? ―nacui̱ yu ji'i̱ nu ngu' cusu' bi'―. Cua ndi'i̱ ngu' bi' ne' laa tonu nclyu'u ngu' ji'i̱ ñati̱ ca bi'.
26Hora ti ndu'u nu laca loo ji'i̱ ngu' nu nga'a̱ cua̱ bi', ndyaa ndyiqui'ya ji'i̱ preso bi'. Lo'o nu ngu' policía nu nga'a̱ cua̱ ni, ndyaa ngu' lo'o. Ná ngulo policía juersa ji'i̱ ngu' lo'o ngusñi ngu' bi' ji'i̱ ngu', cha' ntsi̱i̱ policía ji'i̱ ngu' quichi̱, ñi'ya̱ si cu̱ ngu' quee ji'i̱ ycui' policía. 27Ñaa lo'o ngu' ji'i̱ ngu' bi' slo ngu' cusu' cha' ca cuayá' ji'i̱ ngu' bi'. Li' nguxana sti jo'ó nu laca loo bi' nchcui' lo'o ngu':
28―Cua ngulo ya cña ji'i̱ ma̱ ―nacui̱ sti jo'ó ji'i̱ ngu' preso―, cha' ná culu'u ma̱ cha' ji'i̱ jyo'o Jesús bi' ji'i̱ ñati̱ ―nacui̱―. ¿Na laca ngua ji'i̱ ma̱ juani? ¿Ni cha' laca ná nduna ma̱? ―nacui̱―. Nclyu'u ma̱ cha' bi' ji'i̱ lcaa ngu' quichi̱ Jerusalén re, lo'o jua'a̱ nti' ma̱ sta ma̱ qui'ya ji'i̱ ya cha' ndyujuii ya ji'i̱ Jesús.
29Nguxacui̱ Pedro cha' ji'i̱ sti jo'ó bi' li', cuentya ji'i̱ lcaa ngu' nu ngua tsa'a̱ ji'i̱ Jesucristo tya clyo nchcui' yu:
―Ntsu'u cha' taquiya' ya ji'i̱ cña nu ngulo ycui' Ndyosi ji'i̱ ya, masi xa' cña culo ñati̱ chalyuu ji'i̱ ya ―nacui̱ Pedro ji'i̱ ngu'―. 30Cua ndyujuii ma̱ ji'i̱ Jesús, ngujui'i̱ ca'a̱ ma̱ ji'i̱ lo crusi. Lo'o juani ni, ycui' Ndyosi nu ngua ycui' Ndyosi ji'i̱ lcaa jyo'o cusu' ji'na, bi' laca Ni nu ngua'ni cha' ndyu'ú Jesús chaca quiya'. 31Nchca ji'i̱ Jesús bi' cuityi̱ yu cha' cuxi nu ntsu'u ji'i̱ ñati̱ chalyuu. Ycui' Jesús laca nu Xu'na na, bi' cha' la'a tsu' cui̱ ca su ntucua Ni nda ycui' Ndyosi su tyi'i̱ Jesús. Ngua'ni Ni jua'a̱ cha' caja ñi'ya caca tyuju'u ti' na nu laca na ngu' Israel ji'i̱ qui'ya nu ntsu'u ji'na, lo'o jua'a̱ cui'ya Ni cha' clyu ti' ji'na li'. 32Cha' liñi nchcui' ya lo'o ma̱ cha' cua na'a̱ ya ji'i̱ ycui' Jesús bi'. Cua nda ycui' Ndyosi Xtyi'i ycui' Ni cha' tyanu ne' cresiya ji'i̱ lcaa ñati̱ nu ndu'ni cña nu ngulo Ni ji'i̱ ngu'. Lo'o jua'a̱ Xtyi'i ycui' Ndyosi laca nu ndu'ni cha' taca ca jlo ti' ya cha' chañi laca cha' ji'i̱ Jesucristo nu nclyu'u ya ji'i̱ lcaa ñati̱.
33Lye tsa ngunasi̱' ngu' cusu' li', lo'o ndyuna ngu' cha' nu nchcui' Pedro lo'o ngu'; nti' tsa ngu' cujuii ngu' ji'i̱ ngu' nu ngua tsa'a̱ ji'i̱ Jesucristo bi' li'. 34Pana hora ti ndatu̱ sca nu cusu' slo ngu' li'. Gamaliel naa nu cusu' bi'. Ngu' fariseo laca nu Gamaliel bi', nu tso'o tsa nclyu'u cha' ji'i̱ ycui' Ndyosi ji'i̱ tya'a quichi̱ tyi yu. Nclyu'u yu cha' nu nguscua jyo'o cusu' lo quityi sa'ni, lo'o jua'a̱ ndiya tsa ti' lcaa ñati̱ ña'a̱ ngu' ji'i̱ nu cusu' bi'. Juani nchcui' yu lo'o ngu' cha' tso'o la si tsaa nu ngu' nu ngua tsa'a̱ ji'i̱ Jesucristo bi' nde liya' sca hora ti. 35Lo'o li' nchcui' nu Gamaliel bi' lo'o lcaa ngu' cusu' bi':
―Cu'ma̱, laca ma̱ loo ji'i̱ ngu' Israel ―nacui̱ yu ji'i̱ ngu'―, tso'o la si cui'ya na cuentya ñi'ya̱ cña nu cua'ni na lo'o ngu' nu ndu̱ nde liya' bi' ―nacui̱―. 36Ntsu'u ti' na cha' tya tsubi' la ngulaa sca nu qui'yu nu tyaala tsa, nu naa Teudas; nguti'i̱ yu xi loyuu re. Jlya tsa ti' ngu' cha' nu nchcui' yu bi', cha' nacui̱ yu cha' ñati̱ tlyu ngua yu. Li' ndya'a̱ jacua siyento tya'a ñati̱ lo'o yu; pana nu lo'o ndyujuii ñati̱ ji'i̱ yu, li' ngusna lyiji nu ñati̱ tya'a ndya'a̱ yu li'. Ndye cha' ji'i̱ yu jua'a̱ ti li'. 37Chaca quiya' ndyalaa sca ngu' Galilea tyempo lo'o nguscua ngu' nu laca cña xtañi ngu' quichi̱, jyo'o Judas ngua bi'. Ngusi'yana jyo'o Judas bi' ji'i̱ tyu̱u̱ tya'a ñati̱ cha' tyu'u lca'a̱ ngu' ji'i̱ yu, cha' xu̱u̱ tya'a ngu' lo'o ngu' sendaru. Lo'o li' ñi'ya̱ nu ngua ji'i̱ Teudas bi', jua'a̱ ngua lo'o Judas bi', cha' ndyujuii ñati̱ ji'i̱ yu. Ndye cha' ji'i̱ yu jua'a̱ ti li', ngusna lcaa ngu' tya'a ndya'a̱ yu. 38Bi' cha' juani, tso'o la si ná sca na cua'ni na lo'o ngu' nu ndu̱ nde liya' bi'; tso'o la si nga'aa cala' na ji'i̱ ngu' bi'. Si ñati̱ ti ngulo cña ji'i̱ ngu' bi', tye cha' ji'i̱ ngu' jua'a̱ ti li'; 39si chañi cha' ycui' Ndyosi laca nu ngulo Ni cña ji'i̱ ngu' bi', cu'ma̱ ná nchca ji'i̱ ma̱ cua'ni tye ma̱ cha' ji'i̱ ngu' bi' li'. Na nxu̱u̱ tya'a ma̱ lo'o ycui' Ndyosi laca si cua'a ma̱ ji'i̱ ñati̱ ji'i̱ Ni.
40Ndyuna ngu' cusu' cha' nu nchcui' nu cusu' bi' lo'o ngu'. Li' ngusi'ya ngu' ji'i̱ ngu' nu ndu̱ nde liya' bi' cha' tya̱a̱ ngu' nde ni'i̱ chaca quiya'. Ngulo ngu' cña ji'i̱ xca̱ cha' quiji'i̱ ji'i̱ preso bi'. Li' liñi tsa ngulo ngu' cusu' bi' cña ji'i̱ preso bi', cha' nga'aa chcui' ngu' cha' ji'i̱ Jesucristo lo'o xa' ñati̱. Lo'o cua ndye cha', li' ndyaa laja ti ngu' nu ngua tsa'a̱ ji'i̱ Jesucristo. 41Ndu'u ngu', chaa tsa ti' ngu' li', masi cua nchcube' ngu' nu laca loo bi' ji'i̱ ngu' xqui'ya cha' ngusñi ngu' cha' ji'i̱ Jesús. 42Lcaa tsa̱ nclyu'u ngu' ji'i̱ ñati̱ ne' laa tonu, lo'o jua'a̱ nde to' tyi ñati̱; xcui' nclyu'u ngu' cha' ji'i̱ Jesucristo ji'i̱ ngu', cha' Jesús laca ycui' nu Xu'na na, cha' bi' laca nu ntajatya tsa ngu' ji'i̱ tya tsubi' la.
Айни замон обунашуда:
LOS HECHOS 5: cta
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
© 1981, Wycliffe Bible Translators, Inc. All rights reserved.