اِنجیل مَتّی 8
8
جُذامی یَه مِردی شَفا
1وختی عیسی کو کا اومَه جیر، وِرَه جماعتی چَیی دومله راه دَلَکَینَه. 2اَ موقع ایلَه مِردی که جُذامِش اِستبَه، اومَه عیسی وَر و چَیی پیشی کا زِنگ ژَندِشَه و واتِشه: «اِی آقا، اَگم تِه بِپیش بَشای مِن شفا بِدَی.»
3عیسی اِشتَن دَسی دِراز آکَردِشه اَیی دَس آسوشَه و واتِشه: «پیستِمَه؛ شفا بِگِه!» اَلبَحَل اَ مِرد، جُذامی کا شفا گِتِشَه. 4دومله عیسی اَیینَه واتِشه: «اِشتِه هَواسی جَمع آکَه که اِم ماجرا هیچکسی نَه مَواجی، ولی بِش و اِشتَن کاهِنی نِشون بِدَه و قِربونی ایی كه مخصوص شفا یَه و موسی پیغمبر حُکم کَردَشه، قِربونی بِکَه، تا اَوون را ثابت بِبو که تِه شَفا گِتَره.»
رومی یَه اَفسَری ایمان
5وختی عیسی شَه كَفَرناحومی شهری دیلَه، ایلَه رومی یَه اَفسری اومَه چَیی وَر و مِنَّتی نَه واتِشه: 6«اِی آقا، چِمِن نوکَر فَلَجَ و کَ کا دَلَکه و بَرکَ دردی کَشِه.» 7عیسی اَیی نَه واتِشه: «اَز بومَیم و اَیی شَفا بَدایم.» 8امّا اَ اَفسر جَواو دوشَه: «اِی آقا، اَز لایِق نیمَه كه تِه بای چِمِن کَ. فقط ایی کلمه بوآج، که چِمِن نوکَر شَفا بَگتی. 9چوم اَز اِشتَن نی ماموریمَه و سَربازونی هِستِمَه که چِمِن تَحت فَرمانی نَه و ایلَه نَه بَواتیم ”بِش،“ بَشی و اَ ایلَه نَه بَواتیم ”بِه،“ بومَی و چِمِن نوکَری نَه بَواتیم ”فِلون کاری بِکَه،“ بَکَردی.» 10وختی عیسی اِم گَفون دَرَسِشَه، تعجب کَردِشَه و مردمی نَه کِه چَیی دومله کارا بومَین واتِشه: «حقیقتن شِمَه نَه بَواتیم، اَز حتی گِرد اِسرائیلیون دیلَه کا نی اِنتَه رَه ایمانی وینده نیمَه. 11شِمَه نَه بَواتیم که وِر کَسِن مشرق و مغریبی نَه بومَین و آسِمونی پاُتشایی کا، اِبراهیم و اِسحاق و یعقوبی نَه ایلَه سِفره سَری کا نِشِن، 12امّا کسونی که اِم پاُتشایی را دنیا اومَیینَه، بِرونی تاریکی کا دَرَفَنِن، جِگایی که داد بَکَردین و دَندون، دَندونی سَر فیشار بَداین.» 13دومله عیسی اَ اَفسری نَه واتِشه: «بِش، مطابق اِشتِه ایمان بَه تِه را اَنجام بِبو.» هَ لحظه چَیی نوکَر شفا گِتِشَه.
مریضون شفا
14وختی عیسی شَه پطرسی کَ، ویندِشه پطرسی ژِن نَنه تَو کَردَشه و مریض اِشتَن جِگا کا دَلَکه. 15عیسی چَیی دَسی، دَس آسوشَه و چَیی تَو قطع آبَه. اَ ژِن پِرِشته دَمَنده عیسی کا پذیرایی کَردِشَه.
16مَغریب دَم، وِر تور و دیوونَه آدَمونی وَردِشونَه عیسی وَر و عیسی ایی کلمه نَه دیوون اَوون کا بَرکَردِشَه و گِرد مریضون شفا دوشَه. 17اِنتَه بَه تا اَ چیی که اِشعَیای پیغمبری واسطه نَه واتَه بییَه بَه، اِتِفاق دَلَکِه که:
«اَ، چَمَه دردون بَرطرف کَردِشَه
و چَمَه مَرضیون اِشتَن دوشی کا گِتِشَه.»
عیسی کا پیروی کَرده بَها
18وختی عیسی ویندِشَه وِرَه جماعتی چَیی دور جَمع آبَیینَه، اِشتَن شاگِردون فرمان دوشَه و واتِشه: «بِشَم دریاچه اَ طرفی را.» 19اَ موقع ایلَه توراتی معلمون کا اومَه چَیی وَر و واتِشه: «اِی اُستاد، هَر جِگا بِشی اَز اِشتِه دومله بومَیم.» 20عیسی جَواو دوشَه: «رِباطِن لونَه هِستِشونَه و پَرَنده اِن خومَه هِستِشونَه، امّا اِنسانی زوعَه، سَر پنوعِه را جِگایی نیشَه.» 21ایلَه دییَر شاگِردون کا عیسی نَه واتِشه: «اِی آقا، اوّل بِدا اَز بِشوم تا موقعی که چِمِن دَده مَرده، اَیی دَفن بِکَرِم، دومله بومَیم.» 22عیسی جَواو دوشَه: «تِه چِمِن دومله بِری، بِدا مَرده اِن، اِشتَن مَرده اون دَفن بِکَرِن.»
عیسی کِلاکی آروم آکَرِه
23دومله عیسی لوتکا دَنِشتَه و چَیی شاگِردن نی چَیی دومله راه دَلَکینَه. 24ایی دَفعه دَریاچه کا بَرک کِلاکی راست آبَه، جوری که نِزدیک بَه موجِن لوتکا غرق آکَرِن. ولی عیسی خِت بَه. 25بَس شاگِردِن اومینَه عیسی خاوی کا پِکَردِشونَه و واتِشونَه: «اِی آقا، اَمَه نجات بِدَه؛ اَمَه کارا هلاک آبییَم!» 26عیسی واتِشه: «اِی كم ایمانِن، چیرا اِنتَه تَرسَه؟» دومله پِرِشتَه وا و دریاچه را زِرَه گِتِشه و گِرد جِگا کامل آروم آبَه. 27شاگِردِن حیرون بینَه و یَندی نَه بَواتین: «اِم چِنتَه رَه آدَمی یَه؟ حتی وا و دریاچه نی اَیی کا اِطاعت بَکَردین؟»
عیسی دِ گِله تور و دیوونَه شَفا بَدای
28وختی عیسی آرَستَه جَدَریانی مَنطقه که دریاچه اَ طرفی کا یَه، دِ گِله تورَه مِردی که قَبرستونی کا بِرون بومَین، بَیی نَه دیمادیس بینَه. اَوِن هِندی وَحشی بینَه كه هیچ کس جِکَه نِکَری اوآکا دَوییَری. 29اَوِن خِلِع کَردِشونَه و واتِشونَه: «تِه اَمَه نَه چِه كارِر اِستَه، اِی خِدا زوعَه؟ اومَه ایشَه اییا تا پیش- پیش اَمَه عذاب بِدَی؟» 30تِلی اَوون کا دورتَر، ایلَه یالَ خوعَه رَمه ای کارا غذا بَردین. 31دیوِن عیسی مِنَّت کَردِشونَه واتِشونَه: «اَگم اَمَه بَرکَری، اَمَه ویسا آکَه اَ خوعَه رَمَه دیلَه.» 32عیسی اَوون نَه واتِشه: «بِشَه!» دیوِن اَ دِ گِله مِردی کا بَرشینَه و شینَه خو اون دیلَه و گِرد اَ رَمَه، کولی کفا نَه شینَه دریاچه طَرف و آوی دیلَه کا غرق آبینَه. 33خوعَه وونِن دَوَشتینَه، شینَه شهری را و گِرده اِم ماجرا، مخصوصا اَ اِتِفاقی که اَ دِ گِله توری را دَلَکه، مردمی را واتِشونَه. 34دومله اَ شهری مردم گِرد، عیسی ویندِه را اومینَه و وختی اَیی ویندِشونَه اَیی مِنَّت کَردِشونَه که چَوون منطقه نَه بِشو.
Айни замон обунашуда:
اِنجیل مَتّی 8: ITB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ 2024 Korpu Company