اِنجیل مَتّی 7
7
خَلکی قضاوت مَکَرَه
1«هیچکسی قضاوت مَکَرَه تا کسی شِمَه قضاوت مَکَرِه. 2چوم هَر حکمی نَه که مردمی قضاوت بِکَرَه هَ حکمی نَه شِمَه را قضاوت بَبی. و هَر پیمونَه ای نَه که وزن بِکَرَه هَ پیمونَه نَه شِمَه را وزن بَبی. 3چیرا پوشه ای كه اِشتِه بِرا چِمی دیلَه کا دَرییَه بَویندیش، ولی دارَه کُنده ای که اِشتِه چِمی دیلَه کا دَرییَه نِوینی؟ 4وختی دارَه کُنده ای اِشتِه چِمی دیلَه کا دَرییَه، چِنته بَشای اِشتِه بِرا نَه بوآجی، ”بِدا اَ پوشه اِشتِه چِمی کا بَروَرِم“؟ 5اِی دِ دیم، اوّل دارَه کُنده اِشتِه چِمی کا بِرون بَروَه؛ چَیی پَش چاک بَشای ویندِه که پوشه اِشتِه بِرا چِمی کا بَروَری.
6«اَ چیی که مقدّس اِستَه، آمَدَه یَه اِسبه اون و شِمَه مِرواریون خو اون ناری کا مَویکَرَه، نَبادا اَوون پا بِنون کا بِنَن و آگَردِن شِمَه پِزارنِن.
7«بِپییَه، که شِمَه آدوعَه بَبی، بِگَردَه که تِلَفَه؛ بوکویَه که بَر شِمَه دیمی کا آبو. 8چوم هَر کسی پیستِشَه، اَیی آدوعَه بَبی و هَر کسی بِگَردِه تِلَفِه و هَر کسی بوکویِه بَر چَیی دیمی کا آبو. 9کمیله نفر شِمَه کا اَگم چَیی زوعَه اَیی کا نون پیستِشَه، نونی عوض اَیی سِنگ آدَه؟ 10یا اَگم مایی پیستِشَه، مایی عوض اَیی نَلتی آدَه؟ 11بَس اَگم شِمَه كه بَدَه آدَمونی اِستیرونَه، بَزنیرون چِنتَه چاکَ هِدیه اون شِمَه خِردَنون آدییَه، چِندی وِرتَر شِمَه آسِمونی یَه دَده، بِه کسونی که اَیی کا پیستِشونَه چاکَ چیوون آدَه. 12بَس خَلکی نَه هَتَه رَفتار بِکَرَه كه پیستِرونَه شِمَه نَه رَفتار بِکَرِن. اِم، تورات و پَیغمبَرون نیویشتَه اون خلاصه یَه.
زندگی راه
13«تَنگه بَری نَه بایَه دیلَه، چوم بَری که وِشا یَه و رایی که راحتَه نابودی طَرفی را بَشی و کسونی که اِم بَری نَه دیلَه دَشون وِری نَه. 14امّا بَری که تنگَه و رایی که چَتینَه زندگی طرفی را بَشی و کسونی که اَیی تِلَفِن کَمی نَه.
دار و چَیی میوۀ
15«دروعَه پیغمبرون کا دوری بِکَرَه. اَوِن گوسَندون خَلا کا بومَین شِمَه وَر، ولی باطنی کا وَرگونی اِستینَه که پِزارنِن. 16اَوون چَوون میوه کا آزونَه. مَگم بِرَّه بِنَه کا اَنگِر چینِن یا خِندیلَه بِنَه کا، اَنجیل چینِن؟ 17هِنتَه نی، هَر سالمَ داری چاکَ میوه بواَردی ولی آفَتی یَه دار بَدَه میوه. 18سالمَ دار نیمَشا بَدَه میوه بِدَه و آفَتی یَه دار نی نیمَشا چاکَ میوه بواَرِه. 19هَر داری كه چاکَ میوه مَدَه اَیی دَوِرِن و آتشی کا دَرَفَنِن. 20بَس اَوون، چَوون میوه اون کا آزونَه.
21«اِنتَه نییَه که هَر کسی مِن ’خِداوندا، خِداوندا‘ دَخونِه آسِمونی پاُتشایی دیلَه دَشو، بَلكَم کسی کِه چِمِن آسِمونی یَه دَده اِراده اَنجام بِدَه آسِمونی پاُتشایی دیلَه دَشو. 22داوری یَه روزی کا وِر کَسِن بَه مِنَه بَواتین: ”اِی خِداوند، اِی خِداوند، مَگم اِشتِه نومی نَه نَبوّت نِکَردِمونَه؟ مَگم اِشتِه نومی نَه دیوون بَنِرکَردِمونَه؟ مَگم اِشتِه نومی نَه وِرَه معجِزه اون نِکَردِمونَه؟“ 23اَ موقع اَز اَوون نَه عَلَنی بَواتیم، ”اَز هَرگز شِمَه آزونِستَه نیمَه. چِمِن چِمی پیشی کا دور آبییَه، اِی بَدکارِن!“
دِ گِله کَ
24«بَس هَر کسی چِمِن اِم گَفون دَرَسِه و اَوون اَنجام بِدَه، عاقیلَه مِردی شیوارَه كه اِشتَن کَ پاکاری سِنگی سَری کا بینا کَردَشه. 25وارِش بَوارستی، سیل بومَی، وا وَزِه و اَ کَ سَری زور بواَردی، ولی اَ کَ خَراو نییَب چوم چَیی پاکاری سِنگی سَری کا بینا کَردَشَه. 26امّا هَر کسی چِمِن اِم گَفون دَرَسِه و اَوون اَنجام مَدَه، نادونَ مِردی شیوارَه كِه اِشتَن کَ پاکاری فورشی سَری کا بینا کَردَشَه. 27وارِش بَوارستی، سیل بومَی، وا وَزِه و اَ کَ سَری زور بواَردی، و اَ کَ خَراو آبَه و چَیی خَراوَگی بَرک وِر بَه!»
28وختی عیسی اِم گفون تمون آکَردِشَه، مردم چَیی تعلیمون کا مات آبَه بینَه، 29چوم اِقتداری نَه تعلیم بَدای، نِه چَوون توراتی معلمون شیوار.
Айни замон обунашуда:
اِنجیل مَتّی 7: ITB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ 2024 Korpu Company