اِنجیل مَتّی 11
11
عیسی گَفِن یحیی تعمید دهنده درباره
1وختی عیسی اِشتَن دونزَه گِله شاگِردی سفارِش کَردِشَه که چِه بِکَرِن، اوآکا شَه تا چَوون شَهرون کا اَوون تعلیم بِدَه و چَوون را گف بِژَنِه.
2وختی یحیی زندانی کا، مسیح کارون دَرَسِشَه، اِشتَن شاگِردون ویسا آکَردِشَه 3تا عیسی کا دَفَرسِن: «تِه هَ کسی اِستیش که بَسی با، یا دییَری منتظر بِبییَم؟» 4عیسی چَوون جَواوی کا واتِشه: «بِشَه و هَر چیی که بَویندیرون و دَرَسَه، یحیی را بوآجَه، که 5چِنتَه کورِن بَویندین، شَلِن مِجِن، جُذامی اِن شفا بَگتین، کَرِن دَرَسِن و مَرده اِن زِنده آبون و فَقیرون خوشَ خَوَر آدوعَه بَبی. 6خَسَه بِبو اَ کسی که بَه مِن شَک مَکَرِه.»
7هَتَه که یحیی شاگِردِن کارا بَشین، عیسی، دَمندَه یحیی درباره مردمی نَه گَف ژَندِه و واتِشه: «چیکی ویندِه را شَه ایرونَه وییاوون؟ مِردی ویندِه را که لَلَه ایی شیوارَه که وختی وا وَزِه هَر وَری را تکان بَردی؟ 8بَس چِه چی ویندِه را شَه ایرونَه بِرون؟ مِردی ویندِه را كه گِرون و نرمَه خَلا دَکَردَشه؟ کَسونی که گِرون و نرمَه خَلا دَکَرِن پاُتشااون قَصرون دیلَه کا زندگی بَکَردین. 9بَس چِه چی ویندِه را شَه ایرونَه بِرون؟ ایلَه پیغمبری ویندِه را؟ ها، شِمَه نَه بَواتیم که یحیی ایلَه پیغمبری کا نی کَفاتَرَه. 10یحیی هَ کسی اِستَه که چَیی درباره، مَلاکی پیغمبری کیتابی کا نیویشته بییَه:
«”حِسَه چِمِن قاصِدی اِشتِه نارناره ویسا آکَرِم،
تا اِشتِه راه اِشتِه پیشی کا حاضیر آکَرِه.“
11حقیقتن شِمَه نَه بَواتیم، که کسی یحیی تعمید دهنده کا یالتَر دنیا اومَه نییَه. با اِم حال روکتَرین شَخصی که آسِمونی پاُتشایی کایَه، یحیی کا یالتَرَه. 12یحیی تعمید دهنده دورانی نَه تا حِسَه، آسِمونی پاُتشایی وِر سِتم کَشَشَه و ظالِم آدَمِن پیستِشونَه زوری نَه اَیی بِگِرِن. 13چوم که گِرد پیغمبرِن و تورات، تا یحیی دورانی پیشگویی بَکَردین. 14و اَگم بِپییَه که قبول بِکَرَه، یحیی هَ ایلیای پیغمبری یَه که بَسی با. 15هَر کسی دَرَسَه گوش هِستِشه، دَرَسِه.
16« امّا، اِم نَسلی مردمی بَشایم چِه چی تشبیه بِکَرِم؟ اَوِن خِردَنونی شیواری نَه كه کوچه بازارون کا نِشِن و اِشتَن رَفِقون دَخونِن و بَواتین:
17«”شِمَه را لَلَه ژَندِمونَه، دوش نِکَردِرونَه؛
نوحه خَندِمونَه، سینَه نِژَندِرونَه.“
18چوم یحیی اومَه که، نِه هَری و نِه هِنجی؛ بَواتین: ”اَ دیوِش اِستَه.“ 19اِنسانی زوعَه اومَه که هَم هَرِه و هَم هِنجه؛ بَواتین: ”دَیِسه، ایلَه وِرَه هَر و عرق هَرَه آدَمَه، باجگیرون و گناه کارون رَفِقه.“ شِمَه اَعمال ثابت بَکَردی که عقل و حکمت نیرونَه.»
وای بَر شهرونی که توبه نِکَرِن
20اَ موقع عیسی دَمنده، اَ مردمی سَرزنش کَردِه که چَوون شهرون کا وِرتَر معجِزه کَردَش بَه، چوم که اَوِن توبه کَردَشون نِبَه. 21عیسی واتِشه: «وای بَر شِمَه، اِی خورَزینی اَهالی! وای بَر شِمَه، اِی بِیت‌صِیدا اَهالی! چوم اَگم معجزه اونی كه شِمَه کا اَنجام بَه، صور و صیدونی شهرون کا اَنجام بِبی، اَ شهرون مردم خیلی زمان پیش کیل دَکَرین و خاکِستری کا نِشین و توبَه کَرین. 22امّا شِمَه نَه بَواتیم که داوَری یَه روزی کا، مجازاتی تاو وَردِه، صور و صیدونی مردمی را راحتتَر بَبی، تا شِمَه را. 23و شِمَه اِی کَفَرناحومی اَهالی، شِمَه پیستِرونَه سَر بِه آسِمون بِکَشَه؟ هرگز، بَلکَم تا جهندمی تون سرنگون بَبیرون. چوم اَگم معجِزه اونی كه شِمَه را اَنجام بَه سُدومی شهری کا اَنجام بَبی، اَ شَهر تا اوری نَه روز باقی بَمَندی. 24امّا شِمَه نَه بَواتیم که داوَری یَه روزی کا، مجازاتی تاو وَردِه سُدومی مَردمی را راحتتَر بَبی، تا شِمَه را.»
بایَه چِمِن وَر
25هَ موقع عیسی واتِشه: «اِی دَده، اِی آسِمون و زمینی خِداوند، تِه شُکور بَواتیم كه اِم چییون، دانایون و عاقل آدَمون کا نِین آکَردَرَه و خِردَنون را آشکار آکَردَرَه. 26ها، اِی دَده، اِشتِه پور لطفه اِراده اِم بَه. 27چِمِن آسِمونی یَه دَده گِردِ چیون بَه مِن دَسپاردَشَه. هیچکس دَده غِیراز زوعَه آنِزونِه، و هیچکس زوعَه غیراز دَده آنِزونِه، و اَ کسونی که زوعَه پیستِشَه دَده اَوون را آشکار آکَرِه.
28«بایَه چِمِن وَر، اِی کسونی کِه وِر زَحمت بَکَشتیرون و شِمَه بار وِر سنگینَه، اَز شِمَه راحتی بَدایم. 29چِمِن یوغی شِمَه دوشی کا بِگِرَه و بَه مِن کا تعلیم بِگِرَه، چوم از ملایمی مَه و دیلی نَه فروتنی مَه، و شِمَه جانون کا راحتی بَگتیرون. 30چوم چِمِن یوغ راحتَه و چِمِن بار سبک.»
Айни замон обунашуда:
اِنجیل مَتّی 11: ITB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ 2024 Korpu Company