اِنجیل مَتّی 10
10
دونزَه گِله حَواری
1عیسی اِشتَن دونزَه گِله شاگِردی دَخوندِشَه اِشتَن وَر و اَوون قدرت و اِختیار آدوشَه که پلیده روح اون بَرکَرِن و هَر درد و مرضی شفا بِدَن. 2اَ دونزَه گِله حواری نوم اِمَه: اوّل، شَمعون معروف بِه پطرس و چَیی بِرا آندریاس؛ یعقوب و یوحنا زِبدی زوعَه اِن؛ 3فیلیپُس و بَرتولما؛ توما و باجگیرَه مَتّی؛ یعقوب حَلفای زوعَه و تَدّای؛ 4شَمعون وَطن پرست و یهودا اَسخَریوط كه بِه عیسی خیانت کَردِشَه.
5عیسی اِم دونزَه نفری ویسا آکَردِشَه و اَوون نَه واتِشه: «غیر یهودییون وَر مَشه و سامِریون شهری دیلَه مَشه، 6بَلكَم فقط بِشَه قوم اِسرائیلی ژون آبَه گوسَندون وَر. 7وختی که بَشیرون، اِعلام بِکَرَه و بوآجَه که آسِمونی پاُتشایی نِزدیکَه. 8مریضون شفا بِدییَه، مَرده اون زِنده آکَرَه، جُذامیون شفا بِدییَه و دیوون بَرکَرَه، مِفت ویگِترونَه، مِفت نی آدییَه. 9هیچ طِلا و نُقره یا مِسَ سِکه شِمَه کَمردَوِندون کا اِشتَن نَه مَپِگِرَه. 10و شِمَه سَفری را، نِه کوله بار نِه اِضافه شِیی نِه كفش نِه دَسَ چو اِشتَن نَه مَپِگِرَه؛ چوم کاریگری روزی چَیی حقَه. 11هَر شهر یا دِهی دیلَه دَشیرونَه، معتبَره آدَمی دومله بِگَردَه و تا وختی که اوآ کا اِستیرونَه چَیی کَ کا بومونَه. 12وختی کَیی دیلَه دَشییَه، ”سلام بِکَرَه.“ 13اَگم اَ کَ اَهالی لایِق بِبون، شِمَه سلامی بَرکت اَوون نَه بَمَندی ولی اَگم لایِق مَبون، شِمَه سلامی بَرکت آگَردِه بِه شِمَه. 14اَگم کسی شِمَه قبول مَکَرِه یا شِمَه گفون گوش مَدَه، وختی اَ کَ یا اَ شهری کا بَشیرون، اوآ خاکی شِمَه پا کا نی تَکان بِدییَه. 15حقیقتن شِمَه نَه بَواتیم، داوَری یَه روزی کا، مجازاتی تاو وَردِه، سُدوم و عَمورَّه شهرون مَردمی را، راحتتَر بَبی تا اَ شهری مردمی را.
16«اَز شِمَه گوسَندون شیوار ویسا آکَرِم وَرگون دیلَه. بَس نَلتی شیوار هوشیار و کَفتَری شیوار معصوم بِبییَه. 17شِمَه هَواس مردمی کا بِبو. چوم اَوِن شِمَه دادگاه اون تحویل بَداین و اِشتَن عِبادتگاه اون کا شِمَه شِلاق ژَنِن. 18چِمِن واسی، شِمَه بَبَردین فَرماندارون و پاُتشااون وَر تا چَوون و غیر یهودیون دیلَه کا چِمِن درباره شهادتی بِدییَه. 19وختی که اَوِن شِمَه تسلیم بِکَرِن، نگران مَبییَه كه چِنتَه گَف بِژَنَه و یا چِه بوآجَه. چوم هَ موقع اَ چیی که بَسی بوآجَه شِمَه آدوعَه بَبی. 20چوم شِمَه نیرونَه که گف ژَنَه، بَلكَم شِمَه آسِمونی یَه دَده روح اِستَه كه شِمَه زَوونی نَه گَف ژَنِه. 21بِرا، اِشتَن بِرا و دَده، اِشتَن خِردَنی مرگی تسلیم بَکَردی. خِردَنِن، اِشتَن دَده نَنه ضِد پِرِزِن و چَوون مرگی باعیث بَبین. 22گِردِ مردم چِمِن نومی واسی شِمَه کا بیزار بَبین، امّا کسی که تا آخِر تاو بواَرِه، نجات پِیدا بَکَردی. 23وختی ایلَه شهری کا شِمَه اَذیت آزار بَکَردین، ایلَه دییَر شهری را دَوَزَه. حقیقتن شِمَه نَه بَواتیم، پیش اَز اِمکه اِسرائیلی گِردِ شهرون را بِشَه، اِنسانی زوعَه بومَی.
24«نِه شاگِرد اِشتَن اُستادی کا کَفاتَرَه و نِه نوکَر اِشتَن اَربابی کا کَفاتَر. 25شاگِردی را وَستَه که اِشتَن اُستادی شیوار بِبو و نوکَری را نی وَستَه اِشتَن اَربابی شیوار بِبو. اَگم کَ صاحیبی نَه بِعِلزِبول یا اِبلیس بَواتین، چِندی وِرتَر چَیی کَ اَهالی، بَدَه نومون نَه دَخونِن؟
مَتَرسَه
26«بَس اَوون کا مَتَرسَه. چوم هیچ سَرپوش پِنوعَه چیی نی که آشکار آمَبو و هیچ نِینَکی یَه چیی نی که عَلَنی مَبو. 27گَفونی که از تاریکی کا شِمَه نَه واتِمَه، روشونی کا بوآجَه و اَ چیی که شِمَه گوشون کا یَواشی نَه واتَه بییَه، کومون سَری کا اِعلام بِکَرَه. 28کسونی کا که فقط بَشاین جِسمی بِکِشِن ولی نِیمَشان روحی بِکِشِن مَتَرسه. خِدا کا بِتَرسَه که بَشای هَم روح و هَم جِسمی جَهَندمی کا هلاک بِکَرِه. 29مَگم دِ گِله کیجَه قِیمت ایی قِران نییَه؟ با اِم حال، حتی ایلَه کیجه نی بیدون اِراده شِمَه آسِمونی یَه دَده، زمینی کا نِبَلَکِه. 30حتی شِمَه سَری مویِن گِرد ایشمَرده بَیینَه. 31بَس مَتَرسَه، چوم شِمَه اِرزِش هَزارون گِله کیجه اون کا وِرتَرَه.
32«هَر کسی مردمی وَری کا اِشتَن زَوونی نَه بوآجِه که چِمِن شِنَه، از نی چِمِن آسِمونی یَه دَده وَری کا چِمِن زَوونی نَه بَواتیم که، اَ آدَم چِمِن شِنَه؛ 33امّا هَر کسی مردمی پیشی کا مِن هاشا بِکَرِه، از نی چِمِن آسِمونی یَه دَده پیشی کا، اَیی هاشا بَکَردیم.
34«خیال مَکَرَه از اومَیمه که زَمینی کا صلح بواَرِم. اومَه نیمَه كه صلح بواَرِم، بلكَم اومَیمه تا شمشیر بواَرِم. 35چوم از اومَیمه تا:
«”زوعَه بَر ضِد چَیی دَده،
کِلَه، بَر ضِد چَیی نَنه،
و وَیو بَر ضِد چَیی خِسِرگ بِکَرِم.
36هَر کسی دِشمِن، چَیی اِشتَن کَ اَهالی کا بَبی.“
37«هَر کسی اِشتَن دَده یا نَنه نَه بَه مِن کا وِرتَر خِش بِبو، چِمِن لایق نییَه؛ و هَر کسی اِشتَن کِلَه یا زوعَه نَه بَه مِن کا وِرتَر خِش بِبو، چِمِن لایق نییَه. 38هَر کسی اِشتَن عذابی صَلیبی مَپِگِره و چِمِن دومله ما، چِمِن لایق نییَه. 39هَر کسی که پیستِشَه اِشتَن جانی حفظ بِکَرِه، اَیی اَز دَس بَدای؛ و هَر کسی چِمِن واسی اِشتَن جانی فیدا بِکَرِه اَیی حفظ بَکَردی.
40«هَر کسی شِمَه قبول بِکَرِه، مِن قبول کَردَشه و کسی که مِن قبول بِکَرِه، اَ کسی که مِن ویسا آکَردَشَه قبول بَکَردی. 41هَر کسی ایلَه پیغمبری، اِمی واسی قبول بِکَرِه که پیغمبر اِستَه، ایلَه پیغمبری پاداشی ویگِرِه، و هَر کسی ایلَه صالِح آدَمی، اِمی واسی قبول بِکَرِه که صالِح اِستَه، ایلَه صالِح آدَمی پاداشی ویگِرِه. 42هَر کسی ایلَه اِم روکون کا، اِمی واسی که چِمِن شاگِردَه، حتی ایی قَدَره سَردَه آو آدَه، حقیقتن شِمَه نَه بَواتیم، اَبَداً بیدون پاداش نِمونَه.»
Айни замон обунашуда:
اِنجیل مَتّی 10: ITB
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
@ 2024 Korpu Company