YA-SFADOCI JRNE 1
1
1Hina vlamvh kvmikvtwi vpiwv inv Kvlvwewanv, chena inv Kvlvwewanv weci vpiwv Mvnadoli, macimi Mvnatu inv Kvlvwe-wanv. 2Inv ivskv weci vpiwv Mvnadoli ina vlamvh kvmikvtwi. 3Jrivhki wiahi macdota srpwi inv; macimi frgici inv mvtv wiahi macdota mviacdodagi. 4Weyrgi inv vhdawi lanvwawewa; macimi ini lanvwawewa ini u wvhfayrmwv ilaneki. 5Chena ini wvivhfayrgi wvhfagaiv ini lr papagicv; macimi inv Ir papagicv ud rlwi nanuhtv ini. 6Nitvsi biawv ilani, Mvnadoli uci wrwen-asgofu, Jrne si wefowani. 7Ivskv inv dabwawanv waci bird, wvhsi manvwvhi pvh-nemagi ini wvivhfayrgi si dabwawa, wvhsi manvwvhi jrivhki dapwahsawrci srpwi nili. 8Mvtv inv ini wvivhfayrgi, wakv biawv wvhsi manvwvhi pvh-nemagi ini wvivh-fayrgi si dabwawa. 9N’tvsi vhdawi ini mvyrwi wvivhfayrgi, datapilvhi ini wvivhfayrgi wvivhfamakuci jrgi ilani pvyaci birtv ini yalakuqvh-kvmigigi. 10Hinv ini yalakuqvh-kvmigigi vpiwv, macimi ini yalakuqvh-kvmigigi macdota srpwi inv, chena ini yalakuqvh-kvmigigi mvtv u wrkumaku. 11Hu nhvlwrfewanv si biawv, macimi nihi na-hvlwrfeci utvhpanakuhi mvtv. 12Pvyaqv yatfwi utvhpanakuci, niheni inv u melvhi ini mvyrwafewa wvhsi ut vpaluhfami-nrci Mvnatu, datapilvhi nihi da-dap wahtv-mabci u wefowa : 13nihgeni usgi-lanvwaweki, mvtv msqi uci, mvtv-nuhgi ini yasi tahawanigi ini wivufi uci, walr mvtv-nuhgi ini ilani utasi tahawa uci, Mvnatu uci wakv. 14Chena inv Kvlvwewanv wivufiwi, macimi weci dawv alagenv gelvwa (macimi ki talrpvdr-pa u wvhfrci-makufewa, brsi u wvhfrci-makufewa inv nakudo-srkv inv Ufimv uci), uqihfanwili gisrciwewa chena dabwawa. 15Jrne u pvh-nemvwrli dabwawa nili, macimi yalvhotvgi, Yrmv inv yonv yr-cimvkv, Inv ba-biaci nakvsitv uwa negrni vpiwv : xvga inv nhihtv nelv si, hiwv. 16Xvga ini ut ’qrwafewa jrivhki k’uta-fipa gelvwa, macimi gisrciwewa vsuwa gisrciwewa. 17Xvga ini kutaladewa meliwapi srpwi Mosise; gisrciwewa macimi dabwawa biaiv srpwi Jesise Klvisde. 18Mvtv ilani u mah’ nawrli Mvnadoli Irqv nahcipah’; inv nakudo-srkv Uqihfimv, ya-pitv u tvkunigawa-nagi inv Ufimv, inv u mahci muhgrci-mrli nili.
19Macimi vlv yomv ini u dabwawa-niwewa Jrne, hina nihki Josvki Culosalame uci bialkvmvwr-wrli mkvtaukulviahi chena Lefrihi wvhsi, Nafvwa gelv? si nvtuhdrkuci. 20Macimi tapvsv-wr-cimu, chena mvtv gircimu; macimi, Mvtv neiv inv Klvisde, si tapvsvwrcimu. 21Macimi nihki, Nafvwa uwa? Hv Elvicv gelv? u tasi nvtuhtvwr-wrli nili. Macimi inv Mvtv inv nelv, isiwa. Hv inv mrmosigesqatv gelv? Macimi inv, Mvtv, si rpvfsa. 22Nihki waciganvhi, Nafvwa gelv? wvhsi manvwvhi melvgici rpvfsawa nihki wa-wrwenaskv-wiv-magicki. Nahiwa gi tatv geiv? u talr-wrli nili. 23Yonv nelv inv nakuti wiyafv ini tvlvhotvmwv lr belasgi, Tapilvhi sfadoku ini u myawi inv Dabalamiwatv, ya-iuci inv mrmosigesqatv Visviv, isiwa. 24Chena nihki nihi Palasihi uci mahci wrwenasgofoki. 25Chena nihki u nvtuhtvwr-wrli nili, macimi, Gociwa uwa gi fvfvhqi-ulalhiwa gelv, qahqiu mvtv inv Klvisde gelv, mvtv nuhgi Elvicv, nuhgi mvtv inv mrmosigesqatv? u talrwrli. 26Ud rpvftvwvhi Jrne, Napigi nelv ni tasi fvfvhqi-ulalhiwa : alagenv gelvwv nepvwi nakuti mvtv ki wrkumrwv inv, 27datapilv’ hinv ba-biaci nakvsitv, nili u manihfapia ni notqi ilafi wvhsi palhv-mvwvgi, isiwa. 28Pafanagi tvsi lvwepi yolumv wiahi vlikv wiyaci ini Jrtane, tvh bami fvfvhqi-ulalhiwaci Jrne.
29Wvyrpvgi u nawrli Jesiseli bami utfakuci, Wrpvmahku, nili u pvlvsrni-magefamvli Mvnatu, yr-miwadolici ini u mvjela-fewa inv yalakuqvh-kvmigigi ! iwv macimi. 30Hinv yrmv yr-cimvkv, Hvhkuwi nelv ilani biawv ya-lvhf vmiwa-mitv : xvga inv nhihtv vpiwv nelv. 31Macimi mvtv ni wrkumv inv; pvyaqv wi hinv tapinrqi shofuci lr Iswelv, yone xvga waci biriv nelv bami fvfvhqi-ulalhiwaiv napigi. 32Macimi Jrne u pvhkvsanv dabwa-wa, Ni mahci ilrpvmv inv Ucvjrlvhqv bami manqvtugi uci Irsi-wahsigi brsi myrsi-pvwef v; macimi inv nili usgici vpiwv, hiwv.
33Chena mvtv ni wrkumv inv : pvyaqv inv wa-wrwenaskv-witv wvhsi fvfvhqi-ulalhiwaiv napigi, Usgici goqa-nafvli-grci gah nawv inv Ucvjrlvhqv si lrsiwahsinwv macimi vpiwv usgici nili, henv inv fr-fvfvhqi-ulalhiwatv nili Ufapi Ucvjrlvhqvli, ni taqv.
34Chena ni mahci nama, macimi ni mahci pvh-nema dabwawa yasi yolumv nileni u Qihfici Mvnatu.
35Nuhgi ini wvyrpvgi bami nepvwici Jrne, chena neswi u kvgahgimrf hi; 36macimi u tah wrpvmrli Jesiseli yasi inv pam-faci, chena Wrpvmahku, u pvlvsrni-magefamvli Mvnatu ! hiwv. 37Chena nihki neswi kvgahgimrfvki u notvwr-wrli kvlvweli, macimi nihki u nakvlr-wrli Jesiseli. 38Chena mrsi kugewv Jesise, macimi u talrpvmvhi nihi u nakvlakuhi, Nahiwa ki nvtunahr-nrwv? u talvhi. Macimi, Labrye (Gagahgimiwa iyowa ini ya-lrbrci-kvlvwigi), drniwa gi tatv gelv? u takuhi. 39Birku, macimi gah nama-nrwv, u talvhi nihi. Nihki biaki waciganvhi macimi u nama-nrwv tv hvpilici nili; chena u nvuhrwrli ina grsa-gigi : nvwitu ini matvhfana yrtafvgi. 40Nakuti nihki neswi na-notvwrcki Jrneli kvlvweli, macimi u nakvlagoli, Antlo inv, Svimvn’ Betv u janinrli. 41Hinv u mkvwrli nhihtv nhvlwrkv u janinrli Svimvneli, macimi Ni mkvwrpa inv Masriv naiahkv, u talrli nili, (Klvisde iyowa ini ya-lrbrci kvlvwigi). 42Hinv Jesiseli u biatvwrli nili. Jesise u wrpvmrli nili, Svimvne gelv inv u qih-fvli Jrne : Sefvse ga hvigopi u talrli, (Betv iyowa ini ya-lrbrci kvlvwigi).
43Ini wvyrpvgi Galalegi wvhsi hrci si taha, macimi u mkv-wrii Filvbeli : chena nakvsilu u talrli Jesise. 44Huwa Filvbe Pafsaita uci, ini udawa-nwv Antlo chena Betv. 45Filvbe u mkv-wrli Nafanivleli, macimi Ni mahci mkvwrpa inv ini u kutaladewa-nagi Mosise macimi nihki mrmosigesqacki yatvlvwigrlrwrci, Jesise, Nrsalafe uci, u qihfvli Jose, u talrli. 46Macimi Nafanivle, Kvnhv wiahsi uwasi wiahi kvtvwi uci luhfaiv ini Nrsalafe? u ta-lrli. Birlu macimi namalu, u talrli Filvbe. 47Jesise u nawrli Nafanivleli bami utfakuci, Wrpvmahku, svpkvhi Iswelv si lanv-wa, weyrgi mvtvlrqv nhiwvnimafewa ! u talrli nili. 48Drniwa g’uci wrkumi? u talrli Nafanivle. Jesise rpvfsa macimi, wihsi-bur utvhpimahgi Filvbe, ina sebrci ini gicimesi git vpi, gi nvula, u talrli. 49Nafanivle ud rpvftvwrli, Labrye, nili Mvnatu u Qih-fvli gelv; Ugimrmvli Iswelv gelv, u talrli. 50Jesise rpvfsa macimi, Xvga gi nvula sebrci ini gicimesi gi tala, hv gi dapwahsa? gah namanv gelv vlikv yaki wiahi notv yolumv, u talrli. 51Chena Tapilo, tapilo, gi tala nelv, Gah namanrwv ini manqvtwi wah tvwaskv, macimi nihi ut ancvle-mhi Mvnatu bami vgofiwalici chena bami lrsiwalici usgici nili u Qihfvli Ilani, u talrli.
Айни замон обунашуда:
YA-SFADOCI JRNE 1: SJW
Лаҳзаҳои махсус
Паҳн кунед
Нусха
Want to have your highlights saved across all your devices? Sign up or sign in
Published for Thomas Wildcat Alford in 1929